Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NOVEMBER 2014

 SANEYITSO LƐ MLITSƆƆMƆ | ANI SATAN YƐ LƐƐLƐŊ?

Esa akɛ Wɔshe Satan Gbeyei?

Esa akɛ Wɔshe Satan Gbeyei?

Carbon monoxide ji kɔɔyɔɔ fɔŋ ko ni anaaa ní he yɔɔ oshara waa—tamɔ Satan pɛpɛɛpɛ

Ewa akɛ abaayɔse. Anaaa ni anuuu ehe fu hu, ebaanyɛ egbe mɛi be ni amɛhiɛ bɛ amɛhe nɔ. Ekolɛ, kɛ́ aja mɛi ni ebɔɔ gbeɔ yɛ je lɛŋ fɛɛ lɛ amli enyɔ lɛ, lɛ pɛ egbeɔ fã kome: eji kɔɔyɔɔ ni ebɔɔ yɔɔ mli ni atsɛɔ lɛ carbon monoxide lɛ. Kɛ̃lɛ, ehe ehiaaa ni ashe gbeyei. Gbɛi yɛ ni abaanyɛ atsɔ nɔ ayoo kɔɔyɔɔ nɛɛ, ni anyɛ abu he kɛjɛ he. Mɛi pii kɛ nilee toɔ nibii komɛi ahe gbɛjianɔ koni ebɔ amɛ kɔkɔ ni ehã amɛyoo kɔɔyɔɔ nɛɛ, no sɛɛ lɛ, amɛbɔɔ mɔdɛŋ amɛkɛ kɔkɔbɔi fɛɛ ni nibii nɛɛ kɛhãa amɛ lɛ tsuɔ nii.

Taakɛ kɔɔyɔɔ fɔŋ nɛɛ ji lɛ, anaaa Satan, ewa waa kɛhã adesai akɛ amɛaayɔse enifeemɔi, ni ehe yɛ oshara waa diɛŋtsɛ. Shi Nyɔŋmɔ shiko wɔ, eyeɔ ebuaa wɔ. Kɛ́ okɛ nikeenii ni nyiɛ sɛɛ nɛɛ ni Nyɔŋmɔ kɛhãa lɛ tsu nii lɛ, ehe ebahiaŋ kwraa ni oshe Satan gbeyei.

Obaanyɛ ohala nɔ ni obaafee. Yakobo 4:7 lɛ kɛɔ wɔ akɛ: “Nyɛtea shi nyɛwoa abonsam, ni eeejo nyɛnaa foi.” Eyɛ mli akɛ Satan yɛ hewalɛ waa moŋ, shi enyɛŋ enyɛ onɔ ni ofee nii ni osumɔɔɔ. Obaanyɛ ohala nɔ ni osumɔɔ ni ofee. Ŋmalɛ ni yɔɔ 1 Petro 5:9 lɛ kɛɔ akɛ: ‘Daamɔ shi shiŋŋ yɛ hemɔkɛyeli lɛ mli tsĩi Abonsam gbɛ.’ Kaimɔ akɛ be ni Yesu kɛ shiŋŋfeemɔ kpoo Satan kai etɛ lɛ sɛɛ lɛ, Satan shi lɛ. (Mateo 4:11) Nakai nɔŋŋ bo hu obaanyɛ ohala akɛ obaate shi owo mɔdɛŋ ni Satan bɔɔ koni enine ashɛ onɔ lɛ.

Okɛ Yehowa abɔ naanyo. Yakobo 4:8 lɛ woɔ wɔ hewalɛ ni ‘wɔtsi wɔbɛŋkɛ Nyɔŋmɔ.’ Yehowa diɛŋtsɛ fɔ̃ɔ wɔ nine ni wɔkɛ lɛ ababɔ naanyo. Te ooofee tɛŋŋ ofee nakai lɛ? Gbɛ ni hi fe fɛɛ ni oootsɔ nɔ ofee nakai ji, ni okase ehe nii babaoo kɛjɛ Biblia lɛ mli. (Yohane 17:3) Nɔ ni obaakase yɛ Yehowa he lɛ baatsirɛ bo ni osumɔ lɛ, no sɛɛ lɛ, nakai suɔmɔ lɛ hu baakanya bo ni ofee esuɔmɔnaa nii. (1 Yohane 5:3) Be ni otsiɔ obɛŋkɛɔ oŋwɛi Tsɛ lɛ, mɛni lɛ hu ebaafee? Yakobo tsa nɔ akɛ, ‘Nyɔŋmɔ baatsi ebɛŋkɛ bo.’

Yehowa kɛ mumɔŋ nibii komɛi hãa koni ekɛbu ohe

Shiwoo akɛ ebaabu ohe. Abɛi 18:10 lɛ kaneɔ akɛ: “Mɔ̃ɔ ni wa ji Yehowa gbɛ́i lɛ; no mli jalɔ sháa foi kɛyaa, ni ehiɔ shi shweshweeshwe.” Kɛ̃lɛ, enɛ etsɔɔɔ akɛ Nyɔŋmɔ gbɛ́i lɛ ji nɔ ko ni akɛfeɔ ashwãi anii. Moŋ lɛ, nɔ ni etsɔɔ ji akɛ mɛi ni buɔ Nyɔŋmɔ gbɛ́i lɛ waa lɛ baanyɛ atsɛ lɛ kɛhã hebuu be fɛɛ be.

Nɔkwɛmɔnɔ ko ni ba diɛŋtsɛ. Bɔfoi lɛ Asaji 19:19 lɛ gbaa wɔ sane ko ni yɔɔ miishɛɛ waa ni kɔɔ mɛi komɛi ni batsɔmɔ Kristofoi yɛ Efeso lɛ ahe: “Ŋkunyaayelɔi lɛ hu ateŋ mɛi babaoo ba ni amɛkɛ amɛwoji lɛ babua shi ni amɛshã yɛ mɛi fɛɛ hiɛ; ni be  ni abu naa lɛ, efee jwiɛtɛi kukuji akpei-nyɔŋmai-enumɔ.” * Nakai Kristofoi lɛ kpata nibii fɛɛ ni kɛ mumɔi atsɛmɔ yɔɔ tsakpãa lɛ ahiɛ, ekɔɔɔ he eko bɔ ni nibii nɛɛ ajara wa hã. Wɔbaanyɛ wɔkase nibii babaoo kɛjɛ nakai nɔkwɛmɔnɔ lɛ mli ŋmɛnɛ. Jeŋ nɛɛ mli eyi kɛ mumɔi atsɛmɔ nibii kɛ nifeemɔi. Mumɔi atsɛmɔ nibii kɛ nifeemɔi ni tamɔ nɔ ni efɔŋ ko bɛ he lɛ po baanyɛ ahã daimonioi aná mɛi anɔ hewalɛ. Sɛɛnamɔ yɛ he waa akɛ ooojie nibii ni tamɔ nɛkɛ lɛ yɛ oshihilɛ mli kwraa, ekɔɔɔ he eko nɔ ni baaŋmɛɛ bo.5 Mose 18:10-12.

Rogelio, ni awie ehe yɛ klɛŋklɛŋ sane lɛ mli lɛ heee Abonsam nɔ eyeee aahu kɛyashi ená afii 50. Shi sɛɛ mli lɛ, ejwɛŋ sane lɛ he ekoŋŋ. Mɛni hewɔ? Rogelio wie akɛ: “Nɛkɛ be nɛɛ ji be klɛŋklɛŋ kwraa ni miná Biblia. Nɔ ni mikase yɛ Ŋmalɛ lɛ mli lɛ hã mina akɛ Abonsam yɛ. Nakai nilee lɛ nɔŋŋ buɔ mihe ŋmɛnɛ koni Abonsam nine akashɛ minɔ.”

“Nɔ ni mikase yɛ Ŋmalɛ lɛ mli lɛ hã mina akɛ Abonsam yɛ. Nakai nilee lɛ nɔŋŋ buɔ mihe ŋmɛnɛ koni Abonsam nine akashɛ minɔ”

Ani obaasumɔ ni ona be ni Satan bɛ shihilɛ mli dɔŋŋ lɛ? Obaanyɛ ona. Ŋmalɛ lɛ gba akɛ be ko baashɛ ni abaaŋɔ Abonsam ni ji mɔ ni shishiuɔ mɛi babaoo lɛ “awo la kɛ swɔɔ kpaakpo lɛ mli.” (Kpojiemɔ 20:10) Kɛ̃lɛ, eyɛ faŋŋ akɛ la kɛ swɔɔ ni wɔle lɛ nyɛŋ ashã mumɔŋ bɔɔnɔ ko. No hewɔ lɛ, la kpaakpo lɛ damɔ shi kɛhã naanɔ hiɛkpatamɔ. Abaajie Satan yɛ shihilɛ mli kwraa. Mɛɛ miishɛɛ po nɛkɛ be nɛɛ baafee ehã mɛi ni sumɔɔ Nyɔŋmɔ lɛ!

Dani nakai be lɛ baashɛ lɛ, yaa nɔ okase nɔ fɛɛ nɔ ni ooonyɛ yɛ Yehowa kɛ egbɛi lɛ ahe. * Feemɔ he mfoniri ni oyɛ wala mli, ní yɛ naagbee lɛ, wiemɔ ni ji, “Satan bɛ shihilɛ mli dɔŋŋ” lɛ eba mli anɔkwale lɛ okwɛ!

^ kk. 8 Kɛ́ jwiɛtɛi kuku ni awie he kɛtsɔ hiɛ lɛ ji Romabii ashika denario lɛ, no lɛ kɛ́ abu naa lɛ, fɛɛ baafee mɛi 50,000 adaa gbi nyɔmɔwoo—shika babaoo diɛŋtsɛ!

^ kk. 11 Kɛ́ ootao ole Satan kɛ mumɔi atsɛmɔ nifeemɔi ahe saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? lɛ yitso ni ji 10 lɛ. Bi Yehowa Odasefonyo fɛɛ Yehowa Odasefonyo ni ehã bo eko.

Ekrokromɛi Hu Nɛ

Mɛni Ji Nyɔŋmɔ Yiŋtoo Kɛha Shikpɔŋ Lɛ?

Biblia lɛ tsɔɔ nɔ hewɔ ni Nyɔŋmɔ bɔ shikpɔŋ lɛ, be ni nɔnaa baaba naagbee, kɛ nɔ ni baaba shikpɔŋ lɛ kɛ mɛi ni yɔɔ nɔ lɛ anɔ.

Bɔ ni Mumɔŋ Bɔɔ Nii Náa Wɔnɔ Hewalɛ Amɛhãa

Biblia lɛ wieɔ ŋwɛibɔfoi kɛ daimonioi ahe. Ani mumɔŋ bɔɔ nii nɛɛ yɛ lɛɛlɛŋ? Ani amɛbaanyɛ amɛná onɔ hewalɛ?