Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NOVEMBER 2014

 SANE KO NÍ ODASEFONYO KO KƐ MƆ KO GBA

Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 2)

Mɛɛ Be Nyɔŋmɔ Maŋtsɛyeli lɛ Bɔi Nɔyeli? (Fã 2)

Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Cameron lɛ eku esɛɛ eyasara nuu ko ni atsɛɔ lɛ Jon lɛ yɛ eshĩa.

NEBUKADNEZAR LAMƆ LƐ—EMLITĨI FIOO KO

Cameron: Jon, eŋɔɔ minaa akɛ mikɛ bo ekpe ekoŋŋ. Minyaa Biblia mli nikasemɔ ni mikɛ bo feɔ daa otsi lɛ he waa. * Te oyɔɔ tɛŋŋ?

Jon: Miyɛ jogbaŋŋ, oyiwaladɔŋŋ.

Cameron: Eŋɔɔ minaa akɛ oyɛ jogbaŋŋ. Nyɛsɛɛ ni miba biɛ lɛ, wɔsusu nɔ hewɔ ni Yehowa Odasefoi kɛɔ akɛ Nyɔŋmɔ Maŋtsɛyeli lɛ bɔi nɔyeli yɛ afi 1914 lɛ mli lɛ he. * Yɛ wɔniiahesusumɔ lɛ mli lɛ, wɔna oti ko yɛ gbalɛ ni yɔɔ Biblia mli wolo ni ji Daniel, yitso 4 lɛ mli. Ani okaiɔ nɔ ni aŋma yɛ jɛmɛ lɛ?

Jon: Ekɔɔ tso agbo ko ni yɔɔ Maŋtsɛ Nebukadnezar lamɔ lɛ mli lɛ he.

Cameron: Hɛɛ, nakai pɛpɛɛpɛ. Nebukadnezar na tso agbo ko ni kwɔ kɛyashi ŋwɛi yɛ elamɔ lɛ mli. Enu ni Nyɔŋmɔ tsulɔ ko kɛ famɔ hã akɛ afo tso lɛ, shi ashi etsoku lɛ kɛ eshishifã lɛ yɛ shikpɔŋ. Yɛ “bei kpawo” sɛɛ lɛ, tso lɛ baatsɛ̃ ekoŋŋ. * Wɔwie nɔ hewɔ ni gbalɛ lɛ yɔɔ mlibai enyɔ lɛ hu he. Ani okaiɔ eklɛŋklɛŋ mlibaa lɛ?

Jon: Eji nɔ ko ni ba mli yɛ Nebukadnezar diɛŋtsɛ gbɛfaŋ, aloo jeee nakai? Eye sɛkɛ afii kpawo.

Cameron: Nakai. Nebukadnezar ye sɛkɛ kɛyashi be ko, no hewɔ lɛ, ekpa maŋtsɛ lɛ yeli yɛ esɛkɛyeli bei lɛ mli. Shi yɛ emlibaa ni da lɛ mli lɛ, abaafo Nyɔŋmɔ nɔyeli lɛ mli bei kpawo yɛ gbɛ ko nɔ. Taakɛ wɔna lɛ, bei kpawo lɛ je shishi be ni akpata Yerusalem hiɛ yɛ afi 607 D.Ŋ.B. Kɛjɛ nakai beaŋ kɛbaa nɛɛ lɛ, maŋtsɛ ko damɔko Yehowa Nyɔŋmɔ najiaŋ eyeko ewebii lɛ anɔ yɛ shikpɔŋ lɛ nɔ. Kɛ̃lɛ, kɛ́ bei kpawo lɛ ba naagbee lɛ, Nyɔŋmɔ baahala Nɔyelɔ hee ehã ewebii lɛ, nɛkɛ mɔ nɛɛ yɛ ŋwɛi. Yɛ gbɛ kroko nɔ lɛ, bei kpawo lɛ naagbee baakadi be ni Nyɔŋmɔ ŋwɛi Maŋtsɛyeli lɛ baaje enɔyeli lɛ shishi. Amrɔ nɛɛ wɔsusu be ni bei kpawo lɛ je shishi lɛ he momo. No hewɔ lɛ kɛji wɔbaanyɛ wɔna bei kpawo lɛ sɛɛkɛlɛ lɛ, no lɛ wɔbaana be ni Nyɔŋmɔ Maŋtsɛyeli lɛ bɔi nɔyeli. Ofainɛ, bɛ ooja nɔ ni miwieɔ lɛ sɛɛ mɔ?

Jon: Hɛɛ, niiamlitĩi nɛɛ eye ebua mi ni minyɛ mikai nɔ ni wɔsusu he nyɛsɛɛ lɛ.

Cameron: Ehi jogbaŋŋ. Agbɛnɛ hã wɔtao be kpawo lɛ sɛɛkɛlɛ. Mikane sane nɛɛ he nii migbe naa etsɛko koni eye ebua mi ni makai otii ni kɔɔ he lɛ. Mabɔ mɔdɛŋ magbala mli bɔ ni manyɛ.

Jon: OK.

 BEI KPAWO LƐ BA NAAGBEE—NAAGBEE GBII LƐ JE SHISHI

Cameron: Yɛ gbalɛ lɛ klɛŋklɛŋ mlibaa ni kɔɔ Nebukadnezar he lɛ mli lɛ, ekã shi faŋŋ akɛ bei kpawo lɛ ji afii kpawo diɛŋtsɛ. Shi yɛ emlibaa ni da ni kɔɔ Nyɔŋmɔ Maŋtsɛyeli lɛ he lɛ mli lɛ, bei kpawo lɛ sɛɛ baakɛ kwraa fe afii kpawo diɛŋtsɛ.

Jon: Mɛni hewɔ okɛɔ nakai?

Cameron: Sane kome ji akɛ, kaimɔ akɛ bei kpawo lɛ je shishi be ni akpata Yerusalem hiɛ yɛ afi 607 D.Ŋ.B. lɛ. Kɛ́ wɔkane afii kpawo diɛŋtsɛ kɛjɛ afi 607 D.Ŋ.B. lɛ nɔ kɛbaa lɛ, ekɛ wɔ bawaa afi 600 D.Ŋ.B. Shi nɔ ko ni sa kadimɔ ni kɔɔ Nyɔŋmɔ nɔyeli lɛ he lɛ baaa yɛ nakai afi lɛ mli. Kɛfata he lɛ, taakɛ wɔwie he momo lɛ, afii ohai komɛi asɛɛ be ni Yesu ba shikpɔŋ lɛ nɔ lɛ, etsɔɔ akɛ bei kpawo lɛ bako naagbee.

Jon: Hɛ̃ɛ. Mikai agbɛnɛ.

Cameron: No hewɔ lɛ, bei kpawo lɛ efeŋ afii kpawo diɛŋtsɛ, moŋ lɛ ebaafee be kplaŋŋ.

Jon: Bei enyiɛ?

Cameron: Biblia mli wolo ni ji Kpojiemɔ lɛ ni kɛ Daniel wolo lɛ yɔɔ tsakpaa lɛ, yeɔ ebuaa wɔ ni wɔnaa bei kpawo lɛ sɛɛkɛlɛ diɛŋtsɛ. Etsɔɔ akɛ, bei etɛ kɛ fã feɔ gbii 1,260. * No hewɔ lɛ, bei kpawo, ni feɔ bei etɛ kɛ fã toi enyɔ lɛ baafee gbii 2,520. Bɛ oona naa?

Jon: Hɛɛ, miina naa. Shi minaaa akɛ nɔ ni owie nɛɛ tsɔɔ akɛ Nyɔŋmɔ Maŋtsɛyeli lɛ bɔi nɔyeli yɛ afi 1914 lɛ mli.

Cameron: OK, hã wɔkwɛ akɛ wɔbaanyɛ wɔnu shishi jogbaŋŋ lo. Bei komɛi lɛ, yɛ Biblia gbalɛ naa lɛ gbi kome damɔ shi kɛhã afi. * Kɛ́ wɔkɛ sane ni ji gbi kome damɔ shi kɛhã afi lɛ tsu nii lɛ, bei kpawo lɛ baafee afii 2,520. Kɛ́ wɔkane afii 2,520 kɛjɛ afi 607 D.Ŋ.B. lɛ nɔ lɛ, ekɛ wɔ yawaa afi 1914. * Nɛkɛ ji bɔ ni wɔfee ni wɔna akɛ afi 1914 lɛ ji afi nɔ ni bei kpawo lɛ ba naagbee, kɛ be ni Yesu je enɔyeli lɛ shishi akɛ Nyɔŋmɔ Maŋtsɛyeli lɛ nɔ Maŋtsɛ. Ni nɔ ni sa kadimɔ hu ji akɛ, kɛjɛ afi 1914 lɛ nɔ kɛbaa nɛɛ, nibii wuji eba je lɛ mli—nibii ni Biblia lɛ gba akɛ ebaakadi naagbee gbii lɛ.

Jon: Mɛɛ nibii nɛkɛ?

Cameron: Susumɔ nɔ ni Yesu wie ni aŋma yɛ Mateo 24:7 lɛ he okwɛ. Be ni Yesu wieɔ be ni ekɛbaaje enɔyeli lɛ shishi yɛ ŋwɛi lɛ he lɛ, ekɛɛ akɛ: “Maŋ aaate shi awo maŋ, ni maŋtsɛyeli aaate shi awo maŋtsɛyeli; ni hɔ̃ji kɛ tsɛŋemɔ-helai kɛ shikpɔŋhosomɔi aaaba hei srɔtoi fɛɛ.” Kadimɔ akɛ Yesu gba akɛ hɔ̃ji kɛ shikpɔŋhosomɔi baaba yɛ nakai beaŋ. Ani onaaa akɛ wɔyinɔ nɛɛ ena naagbai nɛɛ henɔi babaoo yɛ afii oha ni eho lɛ mli?

Jon: Eji anɔkwale.

Cameron: Yesu gba yɛ ŋmalɛ nɛɛ mli hu akɛ kɛ́ ebɔi nɔyeli akɛ Maŋtsɛ yɛ Nyɔŋmɔ Maŋtsɛyeli lɛ mli lɛ, tai baaba. Ni jeee maŋ ta kɛkɛ Biblia mli wolo ni ji Kpojiemɔ lɛ gba akɛ ebaaba yɛ naagbee be lɛ mli, shi egba hu akɛ tai ni baasa jeŋ muu lɛ fɛɛ he lɛ baaba. * Ani okaiɔ be ni klɛŋklɛŋ jeŋ ta lɛ fɛ?

Jon: Eba yɛ afi 1914 lɛ mli, ni ji afi nɔ ni okɛɛ akɛ Yesu bɔi nɔyeli lɛ mli! Misusuko he nɛkɛ pɛŋ.

 Cameron: Kɛ́ wɔbua odaseyelii nɛɛ fɛɛ—gbalɛi ni kɔɔ bei kpawo lɛ kɛ Biblia mli gbalɛi ni kɔɔ naagbee be lɛ he lɛ anaa lɛ—wɔnaa akɛ nilee yɛ mli diɛŋtsɛ. Yehowa Odasefoi heɔ amɛyeɔ waa akɛ Yesu bɔi nɔyeli akɛ Nyɔŋmɔ Maŋtsɛyeli lɛ nɔ Maŋtsɛ yɛ afi 1914 mli, ni ákɛ naagbee gbii lɛ je shishi yɛ nakai afi lɛ nɔŋŋ mli. *

Jon: Miibɔ mɔdɛŋ lolo akɛ manu nɔ ni owieɔ lɛ shishi.

Cameron: Minuɔ bo shishi jogbaŋŋ. Taakɛ mitsɔ hiɛ mikɛɛ bo lɛ, mi hu ehe mi be dani minu shishi jogbaŋŋ. Shi miheɔ miyeɔ akɛ wɔsanegbaa fioo nɛɛ eye ebua bo ni ona akɛ eyɛ mli akɛ atsĩii afi 1914 lɛ tã yɛ Biblia lɛ mli moŋ, shi nɔ ni Yehowa Odasefoi heɔ amɛyeɔ yɛ nakai afi lɛ he lɛ damɔ Ŋmalɛ lɛ nɔ.

Jon: Hɛɛ, misumɔɔ enɛ yɛ nyɛhe waa—be fɛɛ be lɛ nyɛkɛ ŋmalɛ fiɔ nɔ ni nyɛkɛɔ lɛ sɛɛ. Jeee osusumɔ ji nɔ ni otsɔɔ mi lɛ. Mihiɛ miifee miyaa yɛ nɔ hewɔ ni sane nɛɛ shishinumɔ wa nakai lɛ he. Mɛni hewɔ Nyɔŋmɔ ekɛɛɛ wɔ kɛkɛ yɛ Biblia lɛ mli akɛ afi 1914 lɛ ji afi nɔ ni Yesu baabɔi nɔyeli yɛ ŋwɛi lɛ?

Cameron: Jon, sanebimɔ ni sa waa nɛ. Yɛ anɔkwale mli lɛ, nibii babaoo yɛ ni afeko amɛ faŋŋ yɛ Biblia lɛ mli. No hewɔ lɛ, mɛni hewɔ mɔ ni Nyɔŋmɔ hã aŋma Biblia lɛ yɛ gbɛ ni baabi ni mɛi amia amɛhiɛ dani amɛnu shishi lɛ? Ekolɛ, be kroko kɛ́ miba lɛ, wɔbaasusu he.

Jon: Ebaaŋɔɔ minaa waa.

Ani oyɛ Biblia mli sanebimɔ pɔtɛɛ ko ni oyiŋ etɛ̃ɛɛ bo yɛ he? Ani obaasumɔ ni ole nibii komɛi ni Yehowa Odasefoi heɔ yeɔ loo amɛjamɔŋ nifeemɔi komɛi ahe saji babaoo? Kɛ́ nakai lɛ, kaashashao shi akɛ obaabi Yehowa Odasefoi lɛ ateŋ mɔ ko. Ebaaŋɔɔ Odasefonyo lɛ naa akɛ ekɛ bo baasusu saji ni tamɔ nakai lɛ ahe.

^ kk. 5 Yehowa Odasefoi tsɔɔ Biblia lɛ ni amɛkɛ mɛi kaseɔ ni aheee nɔ ko lɛ nɔ amɛkɛ mɛi gbaa Biblia lɛ mli sane kɛjɛɔ sane kome nɔ kɛyaa sane kroko nɔ.

^ kk. 7 Kwɛmɔ sane ni ji “Sane ko ní Odasefonyo ko kɛ Mɔ ko Gba—Mɛɛ Be Nyɔŋmɔ Maŋtsɛyeli lɛ Bɔi Nɔyeli?—Fã 1” ni yɔɔ October 1, 2014, Buu-Mɔɔ lɛ mli lɛ.

^ kk. 9 Kwɛmɔ Daniel 4:23-25.

^ kk. 24 Kwɛmɔ 4 Mose 14:34; Ezekiel 4:6.

^ kk. 24 Kwɛmɔ akrabatsa ni ji “Nebukadnezar Lamɔ ni Kɔɔ Tso He Lɛ.”

Ekrokromɛi Hu Nɛ

Mɛni Biblia Akɔntaabuu Tsɔɔ yɛ Afi 1914 lɛ He?

Gbalɛ ni kɔɔ “bei kpawo” lɛ he yɛ Daniel yitso 4 lɛ maa nɔ mi akɛ adesai anɔyeli kɛ jaramɔ be ko baakpe.

Ani “Naagbee Gbii lɛ” Amli Wɔyɔɔ Lɛ?

Kanemɔ koni ona bɔ ni mɛi anifeemɔi kɛ amɛjeŋba maa nɔ mi akɛ wɔyɛ “naagbee gbii lɛ” ni Biblia lɛ gba fɔ̃ shi lɛ mli.