Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  October 2014

 SANEYITSO LƐ MLITSƆƆMƆ | NYƆŊMƆ MAŊTSƐYELI LƐ—MƐNI HEWƆ ESA AKƐ EHE AHIA BO?

Nyɔŋmɔ Maŋtsɛyeli Lɛ—Nɔ Hewɔ ni Ehe Hiaa Yesu

Nyɔŋmɔ Maŋtsɛyeli Lɛ—Nɔ Hewɔ ni Ehe Hiaa Yesu

Be ni Yesu shiɛɔ yɛ shikpɔŋ lɛ nɔ lɛ, ewie saji babaoo ahe. Akɛ nɔkwɛmɔnɔ lɛ, etsɔɔ ekaselɔi lɛ bɔ ni asɔleɔ, nɔ ni kɛ́ mɔ ko fee lɛ ebaasa Nyɔŋmɔ hiɛ, kɛ bɔ ni aaafee aná miishɛɛ diɛŋtsɛ. (Mateo 6:5-13; Marko 12:17; Luka 11:28) Shi sane ko ni Yesu wie he fe fɛɛ, ni kã etsui nɔ waa ji, Nyɔŋmɔ Maŋtsɛyeli lɛ.Luka 6:45.

Taakɛ wɔna yɛ sane ni tsɔ hiɛ lɛ mli lɛ, Yesu kɛ eshihilɛ fɛɛ ‘shiɛ Nyɔŋmɔ Maŋtsɛyeli lɛ he sane kpakpa lɛ etsɔɔ mɛi.’ (Luka 8:1) Ekɛ ehewalɛ fɛɛ tsu nii ni enyiɛ Israel shikpɔŋ lɛ nɔ fɛɛ ni eetsɔɔ mɛi Nyɔŋmɔ Maŋtsɛyeli lɛ he sane. Abɔ Yesu shiɛmɔ lɛ he amaniɛ yɛ Sanekpakpai ejwɛ lɛ amli, ni atsĩ Maŋtsɛyeli lɛ tã fe shii 100 yɛ mli. Hei nɛɛ babaoo lɛ, ejeɔ kpo yɛ Yesu wiemɔi amli, ni kɛ̃lɛ eji nɔ ni Yesu wie yɛ Nyɔŋmɔ Maŋtsɛyeli lɛ he lɛ he nɔ ko fioo ko pɛ kɛkɛ!Yohane 21:25.

Mɛni hewɔ be ni Yesu yɔɔ shikpɔŋ lɛ nɔ lɛ, Maŋtsɛyeli lɛ he hia lɛ waa lɛ? Sane kome ji akɛ, Yesu le akɛ Nyɔŋmɔ ehala lɛ akɛ efee Maŋtsɛyeli lɛ Nɔyelɔ. (Yesaia 9:5; Luka 22:28-30) Kɛ̃lɛ ejeee Yesu yiŋtoo akɛ ená hewalɛ yɛ mɛi anɔ loo ni mɛi awo ehiɛ nyam. (Mateo 11:29; Marko 10:17, 18) Jeee lɛ diɛŋtsɛ esɛɛnamɔ hewɔ ewie Maŋtsɛyeli lɛ he waa nakai lɛ. Yesu yɛ Nyɔŋmɔ Maŋtsɛyeli * lɛ he miishɛɛ ni ewie he hu waa ejaakɛ ele nɔ ni ebaatsu ehã mɛi ni esumɔɔ lɛ—eŋwɛi Tsɛ lɛ kɛ esɛɛnyiɛlɔi ni yeɔ anɔkwa lɛ.

NƆ NI MAŊTSƐYELI LƐ BAAFEE EHÃ YESU TSƐ

Yesu sumɔɔ eŋwɛi Tsɛ lɛ waa. (Abɛi 8:30; Yohane 14:31) Esumɔɔ e-Tsɛ lɛ sui kpakpai tamɔ Esuɔmɔ, Emusuŋtsɔlɛ, kɛ Ejalɛsaneyeli lɛ waa. (5 Mose 32:4; Yesaia 49:15; 1 Yohane 4:8) No hewɔ lɛ, ekã shi faŋŋ akɛ Yesu sumɔŋ ni enu amalei ni mɛi wieɔ yɛ e-Tsɛ lɛ he lɛ—amalei tamɔ, Nyɔŋmɔ nuuu wɔpiŋmɔi lɛ ahe ehãaa wɔ kɛ Nyɔŋmɔ miisumɔ ni wɔpiŋ lɛ. Enɛ ji yiŋtoo kome hewɔ ni Yesu kɛ ekãa shiɛ “Maŋtsɛyeli lɛ he sane kpakpa lɛ”—ele akɛ be ko baashɛ ni Maŋtsɛyeli lɛ baatse e-Tsɛ lɛ gbɛ́i he. (Mateo 4:23; 6:9, 10) Mɛɛ gbɛ nɔ Maŋtsɛyeli lɛ baatsɔ afee enɛ?

Yehowa baatsɔ Maŋtsɛyeli lɛ nɔ ekɛ tsakemɔi kpelei ni adesai fɛɛ baaná he sɛɛ lɛ aba. ‘Eeetsumɔ adesai ni yeɔ anɔkwa lɛ ahiɛaŋ yaafonui fɛɛ.’ Yehowa baafo nibii ni kɛ nakai yaafonui lɛ baa lɛ fɛɛ sɛɛ, ni ebaakwɛ koni ‘gbele akahi shi dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu ehiŋ shi dɔŋŋ.’ (Kpojiemɔ 21:3, 4) Nyɔŋmɔ baatsɔ e-Maŋtsɛyeli lɛ nɔ efo adesai apiŋmɔi fɛɛ sɛɛ. *

 Ebɛ naakpɛɛ mɔ akɛ, Yesu kɛ ekãa kɛ miishɛɛ shiɛ Maŋtsɛyeli lɛ he sane ehã mɛi! Ele akɛ, no baahã ale bɔ ni e-Tsɛ lɛ yɔɔ hewalɛ kɛ musuŋtsɔlɛ hã. (Yakobo 5:11) Yesu le hu akɛ Maŋtsɛyeli lɛ he baaba sɛɛnamɔ kɛhã mɛi krokomɛi ní esumɔɔ lɛ—adesai anɔkwafoi.

NƆ NI MAŊTSƐYELI LƐ BAAFEE EHÃ ADESAI ANƆKWAFOI

Yesu kɛ e-Tsɛ lɛ hi ŋwɛi afii babaoo kwraa dani eba shikpɔŋ lɛ nɔ. Tsɛ lɛ tsɔ e-Bi lɛ nɔ ekɛ nɔ fɛɛ nɔ ba shihilɛ mli—kɛjɛ ŋwɛi ni hãa mɔ naa kpɛɔ ehe kɛ emli ŋulamii abɔ ni aleee amɛyibɔ lɛ nɔ kɛyashi tsei kɛ kooloi babaoo ni yɔɔ wɔshibɔlemɔ ŋulami ni yɔɔ fɛo nɛɛ nɔ lɛ nɔ. (Kolosebii 1:15, 16) Yɛ nibii nɛɛ fɛɛ ateŋ lɛ, Yesu ‘náa gbɔmɛi abii ahe miishɛɛ.’Abɛi 8:31.

Ana bɔ ni Yesu sumɔɔ adesai lɛ yɛ eshiɛmɔ nitsumɔ lɛ mli. Be ni eje eshiɛmɔ nitsumɔ lɛ shishi nɔŋŋ lɛ, ehã efee faŋŋ akɛ eba koni ‘ebajaje sane kpakpa lɛ etsɔɔ ohiafoi.’ (Luka 4:18) Shi Yesu fee babaoo fe wiemɔ ni ewie akɛ ebaaye ebua mɛi lɛ kɛkɛ.Yesu fee nibii ni tsɔɔ akɛ esumɔɔ adesai yɛ be babaoo mli. Akɛ nɔkwɛmɔnɔ lɛ, be ni asafo babaoo ko ebabua amɛhe naa ni amɛbo Yesu toi lɛ, “emusuŋ tsɔ̃ lɛ yɛ amɛhewɔ, ni etsá amɛteŋ helatsɛmɛi lɛ.” (Mateo 14:14) Be ni nuu ko ni yeɔ hela ko ni waa mɔ he waa lɛ jie hemɔkɛyeli kpo yɛ Yesu mli akɛ kɛ́ eesumɔ lɛ etsa lɛ lɛ, suɔmɔ tsirɛ Yesu. Etsa nuu lɛ, ejɛ mlihilɛ mli ekɛɛ lɛ akɛ: “Miisumɔ, ohe atse!” (Luka 5:12, 13) Be ni Yesu na enaanyo Maria ni eeye enyɛmi nuu Lazaro gbele lɛ he awerɛho lɛ, “ehuŋ yɛ emumɔ mli ni ekpokpo,” ni ‘efó.’ (Yohane 11:32-36) No sɛɛ lɛ, Yesu fee nɔ ko ni mɛi ajwɛŋmɔ shɛɛɛ he—etee Lazaro shi, eyɛ mli akɛ no mli lɛ Lazaro egbo gbii ejwɛ!Yohane 11:38-44.

Kɛ̃lɛ, Yesu le akɛ yelikɛbuamɔ ni ekɛhã mɛi lɛ baahi shi be kukuoo ko kɛkɛ. Ele akɛ etsɛŋ kwraa ni mɛi ni etsa amɛhelai ehã amɛ lɛ ahe baaye ekoŋŋ, ni mɛi hu ni etee amɛ shi lɛ baasaa agboi ekoŋŋ. Kɛ̃lɛ, Yesu le hu akɛ Nyɔŋmɔ Maŋtsɛyeli lɛ baafo naagbai nɛɛ fɛɛ asɛɛ kwraa. No hewɔ ni Yesu efeee naakpɛɛ nii pɛ lɛ; ekɛ ekãa jaje “Maŋtsɛyeli lɛ he sane kpakpa” lɛ hu etsɔɔ. (Mateo 9:35) Naakpɛɛ nii ni efee lɛ tsɔɔ nɔ ni etsɛŋ kwraa ni Nyɔŋmɔ Maŋtsɛyeli lɛ baafee yɛ jeŋ fɛɛ lɛ he nɔ ko bibioo ko kɛkɛ. Susumɔ shiwoo ni Biblia lɛ kɛhãa yɛ nakai be lɛ he lɛ he okwɛ.

  •  Helai asɛɛ baafo.

    “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaalá kɛ nyamɔ.” Kɛfata he lɛ, “maŋbii lɛ ateŋ mɔ ko ekɛŋ akɛ: ‘Mihe miiye.’”Yesaia 33:24; 35:5, 6.

  • Gbele bɛ dɔŋŋ.

    ‘Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.’Lala 37:29.

    “Eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui.”Yesaia 25:8.

  • Mɛi ni egboi lɛ baaku sɛɛ aba wala mli.

    “Mɛi fɛɛ ni yɔɔ gbohiiabui lɛ amli lɛ aaanu egbee, ni amɛaaje kpo.”Yohane 5:28, 29.

    “Gbohiiashitee baaba.”Bɔfoi lɛ Asaji 24:15.

  • Mɔ fɛɛ mɔ baaná shihilɛhe kɛ nitsumɔ etsu.

    “Shi amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye. . . . Mɛi ni mihala lɛ aaaye amɛnine naa nitsumɔ lɛ mli nii aahu po.”Yesaia 65:21, 22.

  •  Tai asɛɛ baafo.

    ‘Ebaahã tai asɛɛ afo kɛya shikpɔŋ lɛ naagbeehei lɛ.’Lala 46:10.

    “Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!”Yesaia 2:4.

  • Niyenii ahe esɛŋ dɔŋŋ.

    ‘Shikpɔŋ lɛ baaba nii; Nyɔŋmɔ ni ji wɔ-Nyɔŋmɔ lɛ aaajɔɔ wɔ.’Lala 67:7.

    “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”Lala 72:16.

  • Ohia sɛɛ baafo.

    “Ohiafo lɛ, jeee daa hiɛ aaakpa enɔ.”—Lala 9:18.

    “Eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeena ohiafo kɛ mɔ ni efĩ lɛ lɛ mɔbɔ, ni ehere mɛi ni efĩ amɛ lɛ asusumai ayiwala.”Lala 72:12, 13..

Kɛ́ osusu shiwoi nɛɛ ni Nyɔŋmɔ Maŋtsɛyeli lɛ kɛhã lɛ ahe lɛ, ani obaanyɛ ona nɔ hewɔ ni Maŋtsɛyeli lɛ he hiaa Yesu waa nakai lɛ? Be ni eyɔɔ shikpɔŋ lɛ nɔ lɛ, eesumɔ ni egba mɔ fɛɛ mɔ ni baabo lɛ toi lɛ Nyɔŋmɔ Maŋtsɛyeli lɛ he sane, ejaakɛ ele akɛ Maŋtsɛyeli lɛ baafo naagbai fɛɛ ni wɔkɛkpeɔ ŋmɛnɛ lɛ asɛɛ.

Ani oyɛ Biblia mli shiwoi ni kɔɔ Maŋtsɛyeli lɛ he lɛ ahe miishɛɛ? Kɛ́ nakai lɛ, te ooofee tɛŋŋ okase Maŋtsɛyeli lɛ he nibii babaoo lɛ? Ni mɛni obaanyɛ ofee koni oná nɔmimaa akɛ wɔsɛɛ lɛ obaaná jɔɔmɔi ni Maŋtsɛyeli lɛ kɛbaaba lɛ eko? Saji ni tsara nɔ nɛɛ naagbee nɔ lɛ baahã sanebimɔi nɛɛ ahetoo.

^ kk. 5 Abɔ bɔ ni Yesu nu nii ahe ehã yɛ sane nɛɛ mli lɛ he amaniɛ oookɛɛ eji sane ko ni miiya nɔ amrɔ nɛɛ, ejaakɛ Yesu yɛ wala mli yɛ ŋwɛi bianɛ, ni kɛjɛ be ni eku esɛɛ kɛtee ŋwɛi nɛɛ, be fɛɛ be lɛ eejwɛŋ Maŋtsɛyeli lɛ he.Luka 24:51.

^ kk. 8 Kɛ́ oootao ole nɔ hewɔ ni Nyɔŋmɔ eŋmɛ gbɛ koni adesai apiŋ kɛyashi be ko lɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ yitso 11 lɛ.