Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2014

 SANEYITSO LƐ MLITSƆƆMƆ | ANI NYƆŊMƆ SUSUƆ OHE?

Nyɔŋmɔ Nuɔ Bo Shishi

Nyɔŋmɔ Nuɔ Bo Shishi

“Yehowa, otao mimli ni ole mi.”LALA 139:1.

“Be ni miji lá kukuli kɛkɛ lɛ, ohiŋmɛii na.”—LALA 139:16

NƆ HEWƆ NI MƐI KOMƐI AYIŊ FEƆ AMƐ ENYƆƆNYƆ: Mɛi pii susuɔ akɛ bɔ ni Nyɔŋmɔ naa adesai ji akɛ, amɛji eshafeelɔi ni he tseee ni esaaa akɛ Nyɔŋmɔ susuɔ amɛhe. Kendra, ni hao waa yɛ jwɛŋmɔŋ lɛ nu he akɛ eji mɔ ko ni nyɛŋ ashɛ Nyɔŋmɔ taomɔ nii lɛ ahe. No hewɔ lɛ, ekɛɛ akɛ, “mikpa sɔlemɔ.”

NƆ NI NYƆŊMƆ WIEMƆ LƐ TSƆƆ: Yehowa kwɛɔ nii kɛtekeɔ emuu ni oyeee lɛ, ni enuɔ bo shishi waa. Biblia lɛ kɛɔ akɛ, “Ele wɔsu kɛ wɔbaŋ, ekaiɔ akɛ sũ kɛkɛ ji wɔ.” Kɛfata he lɛ, ekɛ wɔyeee yɛ wɔnishaianii lɛ anaa, enaa wɔ mɔbɔ ni ekɛ wɔhe eshai keɔ wɔ kɛ́ wɔshwa wɔhe.Lala 103:10, 14.

Susumɔ David, ni ji Israel maŋtsɛ, ni atsĩ etã yɛ klɛŋklɛŋ nikasemɔ ni tsɔ hiɛ lɛ mli lɛ he okwɛ. David sɔle ehã Nyɔŋmɔ akɛ: “Be ni miji lá kukuli kɛkɛ lɛ, ohiŋmɛii na . . . aŋma fɛɛ yɛ owolo lɛ mli. Mawu, taomɔ mimli, ni ole mitsuiŋ.” (Lala 139:16, 23) Hɛɛ, eyɛ mli akɛ David tɔ̃ tɔ̃mɔi ni yɔɔ hiɛdɔɔ bei komɛi moŋ, shi ená nɔmimaa akɛ, Yehowa na akɛ eshwa ehe kɛjɛ etsui mli.

Yehowa nuɔ bo shishi kwraa fe mɔ fɛɛ mɔ. Biblia lɛ kɛɔ akɛ “Gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” (1 Samuel 16:7) Nyɔŋmɔ le nɔ hewɔ ni ofeɔ onii yɛ gbɛ pɔtɛ̃ɛ ko nɔ lɛ. Ele akɛ bɔ ni okɔ opapa loo omami ohã, bɔ ni fee ni oda kɛ he ni oda yɛ lɛ ji nɔ ni hãa ofeɔ onii yɛ gbɛ pɔtɛ̃ɛ ko nɔ lɛ. Eyɛ mli akɛ otɔ̃ɔ bei komɛi moŋ, shi Nyɔŋmɔ naa bɔ ni obɔɔ mɔdɛŋ ni ofee tsakemɔi yɛ oshihilɛ mli lɛ, ni enáa he miishɛɛ waa.

Kɛ̃lɛ, mɛɛ gbɛ nɔ Nyɔŋmɔ kɛ bɔ ni ele ‘bo jogbaŋŋ diɛŋtsɛ’ hã lɛ tsuɔ nii koni ekɛshɛje omii?