Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2014

 SANEYITSO LƐ MLITSƆƆMƆ | ANI NYƆŊMƆ SUSUƆ OHE?

Nyɔŋmɔ Hiɛ yɛ Onɔ

Nyɔŋmɔ Hiɛ yɛ Onɔ

“Nyɔŋmɔ hiŋmɛii jwere gbɔmɔ gbɛi anɔ, ni enaa enajifaamɔi fɛɛ.”—HIOB 34:21.

Fɔlɔ ni yɔɔ suɔmɔ lɛ hãa ehiɛ hiɔ ebi ni edako kwraa lɛ nɔ waa

NƆ HEWƆ NI MƐI KOMƐI AYIŊ FEƆ AMƐ ENYƆƆNYƆ: Niiamlitaomɔ ko ni afee nyɛsɛɛ nɛɛ tsɔɔ akɛ, shibɔlemɔ ŋulamii akpekpe toi akpei 100 yɛ ŋulami kusha kome ni wɔshikpɔŋ lɛ yɔɔ mli ni atsɛɔ lɛ galaxy lɛ mli. Kɛ́ mɛi babaoo susu bɔ ni je lɛ da hã lɛ he lɛ, amɛbiɔ akɛ, ‘Mɛni hewɔ esa akɛ Bɔlɔ ofe lɛ akwɛ nɔ ni adesai ni baa shi lɛ feɔ yɛ shibɔlemɔ ŋulami bibioo nɛɛ nɔ?’

NƆ NI NYƆŊMƆ WIEMƆ LƐ TSƆƆ: Eyɛ mli akɛ Nyɔŋmɔ kɛ Biblia lɛ ehã wɔ moŋ, shi ejieko ejwɛŋmɔ yɛ wɔnɔ. Yehowa maa nɔ mi ehãa wɔ akɛ: “Mawoo ŋaa, mihiŋmɛi kã ohe.”Lala 32:8.

Bo lɛ, susumɔ Hagar, ni ji Mizraimyoo ni hi shi yɛ afi 1900 D.Ŋ.B. afii lɛ amli lɛ he okwɛ. Akɛni Hagar ejieee bulɛ kpo etsɔɔɔ Sarai, ni ji enitsumɔtsɛ lɛ hewɔ lɛ, Sarai nyɛ Hagar hiɛ, ni ejo foi kɛtee ŋa lɛ nɔ. Ani Nyɔŋmɔ kwa Hagar yɛ etɔ̃mɔ lɛ hewɔ? Biblia lɛ kɛɔ akɛ: “Yehowa bɔfo lɛ na lɛ.” Nakai bɔfo lɛ ma nɔ mi ehã Hagar, ni ekɛɛ lɛ akɛ: “Yehowa enu omane lɛ.” Kɛkɛ ni Hagar kɛɛ Yehowa akɛ: ‘Bo ji Mawu ni naa nii.’1 Mose 16:4-13.

‘Mawu ni naa nii’ lɛ naa bo hu. Akɛ nɔkwɛmɔnɔ lɛ: Fɔlɔ ni yɔɔ suɔmɔ lɛ hãa ehiɛ hiɔ ebi ni edako kwraa lɛ nɔ waa. Nakai nɔŋŋ bei titrii ni Nyɔŋmɔ buɔ wɔhe waa ji, kɛ́ wɔyaje shihilɛ ko ni efee tamɔ nɔ ni wɔhe bɛ sɛɛnamɔ loo wɔbɛ hefamɔ nɔ. Yehowa kɛɛ akɛ, “Ŋwɛi shɔŋŋ kɛ he krɔŋkrɔŋ lɛ mihiɔ; asaŋ mikɛ mɔ ni tswiaa shi kɛ dɔlɛ ní ebaa ehe shi yɛ emumɔ mli lɛ hiɔ shi, koni mahã heshibalɔi amumɔ aná wala hee, ní mɛi ni tswiaa shi kɛ dɔlɛ lɛ atsui aná wala hee!”Yesaia 57:15.

Shi ekolɛ, obaabi akɛ: ‘Mɛɛ gbɛ nɔ Nyɔŋmɔ buɔ mihe? Ani Nyɔŋmɔ damɔɔ bɔ ni mi ji yɛ kponɔgbɛ lɛ nɔ ekojoɔ mi, aloo ekwɛɔ nii kɛtekeɔ no, ni enuɔ nɔ gbɔmɔ ni ji mi lɛ shishi jogbaŋŋ?’