Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ AUGUST 2014

 SAJI NI MƐI NI KANEƆ LƐ BIƆ . . .

Namɔ Bɔ Nyɔŋmɔ?

Namɔ Bɔ Nyɔŋmɔ?

Feemɔ tsɛ ko ni kɛ ebinuu ni eye afii kpawo lɛ miigba sane lɛ he mfoniri okwɛ. Tsɛ lɛ kɛɛ ebinuu lɛ akɛ, “Etsɛ etsɛ ko lɛ, Nyɔŋmɔ bɔ shikpɔŋ lɛ kɛ nɔ fɛɛ nɔ ni yɔɔ nɔ lɛ, ni ebɔ hulu lɛ, nyɔŋtsere lɛ kɛ ŋulamii lɛ.” Gbekɛ lɛ jwɛŋ sane lɛ he fioo kɛkɛ ni ebi akɛ, “Dada, namɔ bɔ Nyɔŋmɔ?”

Tsɛ lɛ here nɔ akɛ, “Nyɔŋmɔ yɛ daa, mɔ ko ebɔɔɔ lɛ.” Nakai hetoo ni yɔɔ kuku lɛ hã gbekɛ lɛ tsui nyɔ emli. Kɛ̃lɛ, be ni eda saŋŋ kɛshɛ he ko lɛ, ejwɛŋ sane lɛ he ekoŋŋ. Enuuu bɔ ni baafee ni mɔ ko baahi shi ni ebɛ shishijee lɛ shishi. Nɔ hewɔ ji akɛ, je lɛ po yɛ shishijee. Ebi ehe akɛ ‘Nɛgbɛ Nyɔŋmɔ jɛ kɛba?’

Mɛɛ hetoo Biblia lɛ kɛhãa? Hetoo ni tsɛ ni awie ehe yɛ nɔkwɛmɔnɔ lɛ mli lɛ kɛhã lɛ nɔŋŋ Biblia lɛ hu kɛhãa. Mose ŋma akɛ: ‘Nuŋtsɔ Yehowa, be ni anáko afɔ́ gɔji lɛ, ní onáko obɔ shikpɔŋ kɛ jeŋ lɛ, bo ji Mawu kɛjɛ naanɔ kɛyaa naanɔ.’ (Lala 90:1, 2) Nakai nɔŋŋ gbalɔ Yesaia hu wie, ekɛɛ akɛ: ‘Ani oleee, ani onuko? Yehowa ni bɔ shikpɔŋ lɛ naagbeehei lɛ ji naanɔ Nyɔŋmɔ lɛ!’ (Yesaia 40:28) Nakai nɔŋŋ Yuda wie yɛ wolo ni eŋma lɛ mli akɛ Nyɔŋmɔ ‘hiɔ shi daa.’Yuda 25.

Ŋmalɛi nɛɛ tsɔɔ wɔ akɛ, Nyɔŋmɔ ji “naanɔi amaŋtsɛ lɛ,” taakɛ bɔfo Paulo wie lɛ. (1 Timoteo 1:17) Enɛ tsɔɔ akɛ, Nyɔŋmɔ ehi shi daa, ekɔɔɔ he eko afii abɔ ni wɔkɛ wɔjwɛŋmɔ baaya sɛɛ. Ni ebaahi shi daa kɛbaaya naanɔ. (Kpojiemɔ 1:8) No hewɔ lɛ, akɛni eyɛ kɛmiiya naanɔ hewɔ lɛ, abaanyɛ atsɛ lɛ akɛ Ofe.

Mɛni hewɔ ewa kɛhã wɔ akɛ wɔɔnu sane nɛɛ shishi lɛ? Nɔ hewɔ ji akɛ, akɛni wɔwala afii lɛ faaa hewɔ lɛ, bɔ ni wɔnaa be wɔhãa lɛ yɛ srɔto kwraa yɛ bɔ ni Yehowa naa be ehãa lɛ he. Akɛni Nyɔŋmɔ yɛ kɛmiiya naanɔ hewɔ lɛ, enaa afii akpe tamɔ gbi kome. (2 Petro 3:8) Akɛ nɔkwɛmɔnɔ lɛ: Ani agã ni hiɔ shi aaafee gbii 50 pɛ yɛ edalɛ mli lɛ baanyɛ anu wɔwala afii ni ji afii 70 loo 80 lɛ shishi? Ebaawa! Kɛ̃lɛ, Biblia lɛ tsɔɔ akɛ, wɔtamɔ agãi, kɛ́ akɛ wɔ to wɔ-Bɔlɔ Kpeteŋkpele lɛ he. Ejwɛŋmɔ po nɔ kwɔ kwraa fe wɔnɔ lɛ. (Yesaia 40:22; 55:8, 9) Kɛ́ nɛkɛ ji sane lɛ, belɛ, esaaa akɛ efeɔ wɔ naakpɛɛ akɛ nibii komɛi yɛ ni kɔɔ Yehowa he ni adesai nyɛŋ anu shishi kɛmɔ shi.

Eyɛ mli akɛ ekolɛ , sane nɛɛ ni tsɔɔ akɛ Nyɔŋmɔ yɛ kɛjɛ naanɔ ni ebaahi shi kɛya naanɔ lɛ baanyɛ afee nɔ ni wa akɛ wɔɔnu shishi moŋ, shi wɔbaanyɛ wɔna akɛ jwɛŋmɔ yɛ mli. Eji mɔ ko ji mɔ ni bɔ Nyɔŋmɔ kulɛ, abaatsɛ nakai mɔ lɛ akɛ Bɔlɔ. Kɛ̃lɛ, taakɛ Biblia lɛ tsɔɔ lɛ, Yehowa ji mɔ ni ‘bɔ nii fɛɛ.’ (Kpojiemɔ 4:11) Kɛfata he lɛ, wɔle akɛ, be ko ni eho lɛ, je lɛ bɛ. (1 Mose 1:1, 2) Nɛgbɛ je lɛ jɛ kɛba? Esa akɛ Mɔ ni Bɔ je lɛ ahi shi dã. Eyɛ kwraa dani e-Bi koome lɛ kɛ ŋwɛibɔfoi lɛ ba shihilɛ mli. (Hiob 38:4, 7; Kolosebii 1:15) Ekã shi faŋŋ akɛ, ekome ehi shi klɛŋklɛŋ. Enyɛŋ efee akɛ abɔ lɛ, ejaakɛ nɔ ko bɛ shihilɛ mli ni baanyɛ abɔ lɛ.

Shihilɛ mli ni wɔyɔɔ kɛ shihilɛ mli ni jeŋ muu lɛ fɛɛ yɔɔ lɛ maa nɔ mi kɛhãa wɔ akɛ Nyɔŋmɔ ko yɛ ni ehi shi daa. Esa akɛ Mɔ ni bɔ je lɛ ni ehãa ebɔleɔ ehe, ni efee mlai ni kudɔɔ je lɛ afee Mɔ Ko ni ehi shi daa. Lɛ pɛ ebaanyɛ emu wala ewo nɔ fɛɛ nɔ mli.Hiob 33:4.

Ekrokromɛi Hu Nɛ

Mɛni Ji Anɔkwale ni Kɔɔ Nyɔŋmɔ He Lɛ?

Kɛ́ okwɛ lɛ, ani Nyɔŋmɔ susuɔ ohe akɛ aŋkro? Kanemɔ koni ole esui kɛ bɔ ni obaafee otsi obɛŋkɛ lɛ.

‘Yehowa Hewalɛ Da Kpele’

Ani esa akɛ Nyɔŋmɔ hewalɛ lɛ aha wɔshe lɛ gbeyei? Hɛɛ kɛ dabi fɛɛ ji hetoo ni ja.