Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2014

Ani Obaanyɛ Ona Nyɔŋmɔ ni Anaaa Lɛ Lɛ?

Ani Obaanyɛ Ona Nyɔŋmɔ ni Anaaa Lɛ Lɛ?

“NYƆŊMƆ lɛ Mumɔŋ,” adesai nyɛŋ ana lɛ kɛ amɛhiŋmɛi. (Yohane 4:24) Kɛ̃lɛ, Biblia lɛ bɔɔ amaniɛ akɛ mɛi komɛi ena Nyɔŋmɔ, yɛ gbɛ ko nɔ pɛŋ. (Hebribii 11:27) Te fee tɛŋŋ amɛna lɛ? Ani obaanyɛ ona “Nyɔŋmɔ ni anaaa lɛ” lɛ lɛɛlɛŋ?Kolosebii 1:15.

Okɛ shihilɛ ni wɔyɔɔ mli lɛ ato mɔ ko ni afɔ lɛ akɛ shwilafo lɛ he okwɛ. Ani kɛ okwɛ lɛ, shwilafo ni eji lɛ hewɔ lɛ, elé nibii ni yaa nɔ yɛ ehewɔŋ lɛ he nɔ ko kwraa? Dabi. Shwilafo naa bɔ ni nibii yaa nɔ ehãa yɛ gbɛi srɔtoi anɔ, ni enɛ hãa enyɛɔ eyɔseɔ akɛ gbɔmɛi kɛ nibii yɛ he ni eyɔɔ lɛ, ni kɛ́ aafee nibii komɛi yɛ ehewɔŋ hu lɛ, enyɛɔ eyɔseɔ. Nuu shwilafo ko kɛɛ akɛ, “jwɛŋmɔ akɛnaa nii, shi jeee hiŋmɛii lɛ.”

Nakai nɔŋŋ, eyɛ mli akɛ onyɛŋ okɛ ohiŋmɛii diɛŋtsɛ ana Nyɔŋmɔ moŋ, shi obaanyɛ okɛ ‘otsui hiŋmɛii’ lɛ ana lɛ. (Efesobii 1:18) Naa gbɛi etɛ ni obaanyɛ otsɔ nɔ ofee nakai.

‘ATSƆƆ ENII NI EFEE LƐ ANƆ ANAA FAŊŊ’

Be pii lɛ, shwilafoi atoii kɛ nii ahe ni amɛtaa loo amɛhe ni ataa lɛ yeɔ ebuaa amɛ waa ni amɛyoɔ akɛ nibii komɛi miiya nɔ, tsɛbelɛ amɛkɛ amɛhiŋmɛi diɛŋtsɛ enaaa. Nakai nɔŋŋ bo hu obaanyɛ okɛ ogbɔmɔtso lɛ he nibii lɛ ekomɛi atsu nii kɛpɛi nibii ni Nyɔŋmɔ ebɔ lɛ amli, koni onyɛ ona Nyɔŋmɔ ni anaaa lɛ lɛ. “Ehe nii ni anaaa ni ji enaanɔ hewalɛ kɛ nyɔŋmɔyeli lɛ fɛɛ lɛ, kɛjɛ jeŋbɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ.”Romabii 1:20.

Akɛ nɔkwɛmɔnɔ lɛ, susumɔ wɔshikpɔŋ lɛ he okwɛ. Bɔ ni afee shikpɔŋ lɛ ahã lɛ yɛ srɔto, jeee akɛ koni wɔnyɛ wɔhi wala mli yɛ nɔ kɛkɛ, shi moŋ koni wɔhi nɔ kɛ miishɛɛ. Kɛ́ kɔɔyɔɔ ŋmaii ko tswa eshwie wɔhe, wɔkã he ko ni hulu lɛ miitso hɛrɛbii yɛ, wɔye aduawa ko ni ŋɔɔ, loo wɔnu loofɔji alala ni ŋɔɔ lɛ he lɛ, ehãa wɔnáa miishɛɛ waa. Nibii nɛɛ ni wɔ-Bɔlɔ lɛ kɛduro wɔ lɛ tsɔɔ akɛ esusuɔ wɔhe, emusuŋ tsɔɔ lɛ yɛ wɔhe, ni efeɔ wɔ ejurɔ hu.

Mɛni nibii ni onaa yɛ je lɛ mli lɛ baanyɛ atsɔɔ bo yɛ Nyɔŋmɔ he? Sane kome ji akɛ, nibii ni yɔɔ ŋwɛi lɛ hãa anaa Nyɔŋmɔ hewalɛ lɛ. Nibii ni jeŋ shikpalɔi ena nyɛsɛɛ nɛɛ tsɔɔ akɛ, je lɛ miilɛɛ, ni tsɔɔ akɛ ŋulamii kushai ni yɔɔ ŋwɛiniiaŋ lɛ miitsi amɛhe kɛmiijɛ amɛhe kɛmiiya sɛɛ, ni amɛmiifee nakai oyayaayai! Kɛ́ okwɛ ŋwɛi gbɛkɛ ko lɛ, bi ohe akɛ: ‘Mɛni ji nɛkɛ hewalɛ nɛɛ ni hãa je lɛ lɛɔ lɛ jɛɛhe?’ Biblia lɛ kɛɔ wɔ akɛ Bɔlɔ lɛ yɛ ‘hewalɛ kpele.’ (Yesaia 40:26) Nyɔŋmɔ nibɔɔ nii lɛ hãa wɔnaa akɛ lɛ ji “Ofe lɛ”—mɔ ni ‘hewalɛ teke nɔ lɛ.’Hiob 37:23.

‘MƆ NI BAJIE LƐ SHI ETSƆƆ FAŊŊ LƐ’

Yoo ko ni yɔɔ bii shwilafoi enyɔ lɛ kɛɛ akɛ: “Wiemɔ ji gbɛ ni fe fɛɛ ni amɛtsɔɔ nɔ amɛkaseɔ nii. Kɛɛmɔ amɛ nɔ fɛɛ nɔ ni onaa, kɛ nɔ ni onuɔ lɛ, ni ohã ehi ojwɛŋmɔŋ akɛ obaagbala mli ohã amɛ. Bo ji amɛhiŋmɛii.” Nakai pɛpɛɛpɛ eji, eyɛ mli akɛ, “mɔ ko enako [Nyɔŋmɔ] pɛŋ” moŋ, shi Yesu ni ji Nyɔŋmɔ Bi lɛ, “ni yɔɔ tsɛ lɛ mlishi lɛ, lɛ ebajie [Tsɛ] lɛ shi etsɔɔ faŋŋ.” (Yohane 1:18) Yesu, ni ji mɔ ni Nyɔŋmɔ bɔ lɛ klɛŋklɛŋ lɛ, ni ji Nyɔŋmɔ Bi koome lɛ batsɔ “wɔhiŋmɛii” ni wɔkɛnaa nibii ni yɔɔ ŋwɛi. Lɛ ji mɔ ni baanyɛ akɛɛ wɔ Nyɔŋmɔ ni anaaa lɛ lɛ he sane ni ja fe fɛɛ.

Kadimɔ nibii ni Yesu, ni ji mɔ ni kɛ e-Tsɛ lɛ hi shi afii huuhaa abɔ lɛ wie yɛ Nyɔŋmɔ he lɛ amli fioo komɛi:

  • Nyɔŋmɔ tsuɔ nii waa. “Mitsɛ miitsu nii kɛbashi be nɛ.”Yohane 5:17.

  •  Nyɔŋmɔ le nibii ni he hiaa wɔ lɛ. “Nyɛtsɛ lɛ le nii ni hiaa nyɛ dani nyɛbiɔ lɛ.”Mateo 6:8.

  • Nyɔŋmɔ jɛɔ mlihilɛ mli eduroɔ wɔ nii. “Nyɛtsɛ ni yɔɔ ŋwɛi lɛ . . . hãa ehulu teɔ shi yɛ mɛi fɔji kɛ mɛi kpakpai anɔ, ni ehãa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.”Mateo 5:45.

  • Wɔteŋ mɔ fɛɛ mɔ jara wa hã Nyɔŋmɔ. “Afilimatai enyɔ lɛ jeee hiɛbii nyɔŋma ahɔ̃ɔ aheɔ? shi amɛteŋ ekome folo enyɔŋ shikpɔŋ, ja ejɛ nyɛtsɛ lɛ dɛŋ. Shi nyɛyiteŋtsɔi po lɛ akane fɛɛ. No hewɔ lɛ, nyɛkashea gbeyei; nyɛjara wa aahu fe afilimatai babaoo.”Mateo 10:29-31.

GBƆMƆ KO NI JIE NYƆŊMƆ NI ANAAA LƐ LƐ SUI AKPO

Bei pii lɛ, bɔ ni mɛi ni eshwila lɛ nuɔ nibii ashishi lɛ yɛ srɔto yɛ bɔ ni mɛi ni naa nii lɛ nuɔ nii ashishi amɛhãa lɛ he. Kɛ́ shwilafo ko yaje he ko ni hɔŋ yɔɔ lɛ, enuɔ he akɛ eyɛ he ko ni ejɔ ni hulu bɛ jɛmɛ, shi jeee akɛ eyɛ he ko ni hulu bɛ jɛmɛ ni ewo duŋ. Tamɔ bɔ ni shwilafo ko nyɛŋ ana hɔŋ kɛ hulu la kpɛmɔ lɛ, nakai nɔŋŋ wɔ diɛŋtsɛ wɔnyɛŋ wɔnu Yehowa shishi ní ayeee abuaaa wɔ. No hewɔ lɛ, Yehowa kɛ adesa ko hã wɔ koni ejie Yehowa sui kɛ mɔ ni eji lɛ kpo etsɔɔ wɔ.

Nakai gbɔmɔ lɛ ji Yesu. (Filipibii 2:7) Yesu egbaaa wɔ e-Tsɛ lɛ he sane pɛ kɛkɛ, shi moŋ etsɔɔ wɔ mɔ ni Nyɔŋmɔ ji hu. Yesu kaselɔ Filipo bi akɛ: “Nuŋtsɔ, tsɔɔmɔ wɔ tsɛ lɛ.” Yesu hã lɛ hetoo akɛ: “Mɔ ni ena mi lɛ, ena tsɛ lɛ.” (Yohane 14:8, 9) Mɛni obaanyɛ “ona” yɛ Tsɛ lɛ he yɛ bɔ ni Yesu fee enii ehã lɛ mli?

Yesu sumɔɔ mɔ, ebaa ehe shi ni anyɛɔ abɛŋkɛɔ lɛ. (Mateo 11:28-30) Akɛni ehe jɔ hewɔ lɛ, mɛi babaoo nyɛ amɛbɛŋkɛ lɛ. Yesu nu he ehã mɛi ni ye awerɛho lɛ, ni ekɛ amɛ ná miishɛɛ hu. (Luka 10:17, 21; Yohane 11:32-35) Kɛ́ okane loo obo Yesu he sane toi yɛ Biblia lɛ mli lɛ, okɛ ohe awo shihilɛ ni tee nɔ lɛ mli, ni osusu sane lɛ he tamɔ nɔ ni eeya nɔ bianɛ. Kɛ́ ojwɛŋ bɔ ni Yesu kɛ mɛi ye hã lɛ nɔ lɛ, obaana Nyɔŋmɔ sui ni nɔ bɛ lɛ faŋŋ ni ebaaye ebua bo ni otsi obɛŋkɛ lɛ.

TSARAMƆ NIBII LƐ NI OFEE FƐƐ EKOME

Niŋmalɔ ko ŋma bɔ ni shwilafoi feɔ amɛnaa bɔ ni nibii yaa nɔ ehãa yɛ je lɛ mli, eŋma akɛ: “Shwilafo kɛ egbɔmɔtso lɛ he nibii srɔtoi babaoo tsuɔ nii kɛbuaa saji anaa fiofio (nii ahe ni ataa, nifũu, ninumɔ, kɛ ekrokomɛi), ni ebɔɔ mɔdɛŋ etsaraa saji nɛɛ ni efeɔ fɛɛ ekome.” Nakai nɔŋŋ, bo hu kɛ́ okwɛ nibii ni Nyɔŋmɔ ebɔ lɛ, okane nibii ni Yesu wie yɛ e-Tsɛ lɛ he, ni opɛi bɔ ni Yesu jie Nyɔŋmɔ sui lɛ akpo ehã lɛ mli lɛ, obaana bɔ ni Yehowa yɔɔ diɛŋtsɛ. Obaale lɛ akɛ mɔ ko ni yɔɔ diɛŋtsɛ.

Hiob ni hi shi yɛ blema lɛ fee nakai ni enyɛ ele Nyɔŋmɔ jogbaŋŋ. Shishijee lɛ, ewie ‘nibii ni enuuu shishi.’ (Hiob 42:3, Ga Biblia hee) Shi be ni esusu bɔ ni nibii ni Nyɔŋmɔ ebɔ lɛ yɔɔ naakpɛɛ hã lɛ he lɛ sɛɛ lɛ, ewie akɛ: “Mitoi kɛkɛ mikɛnu ohe; shi agbɛnɛ mihiŋmɛi enao.”Hiob 42:5.

‘Kɛji ootao Yehowa lɛ, eeehã ona lɛ’

Bo hu obaanyɛ ofee nakai nɔŋŋ. “Kɛji ootao [Yehowa] lɛ, eeehã ona lɛ.” (1 Kronika 28:9) Yehowa Odasefoi baaná he miishɛɛ akɛ amɛaaye amɛbua bo ni otao Nyɔŋmɔ ni anaaa lɛ lɛ, ni ona lɛ.