Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2014

 SANEYITSO LƐ MLITSƆƆMƆ | MƐNI HEWƆ NIBII FƆJI BAA MƐI KPAKPAI ANƆ?

Nibii Fɔji Baa Mɛi Kpakpai Anɔ—Mɛni Hewɔ?

Nibii Fɔji Baa Mɛi Kpakpai Anɔ—Mɛni Hewɔ?

Akɛni Yehowa Nyɔŋmɔ * ji Mɔ ni Bɔ nɔ fɛɛ nɔ ni eji ofe hewɔ lɛ, ekolɛ, mɛi pii baashwa lɛ yɛ nɔ fɛɛ nɔ ni baa je lɛ mli, ni nibii fɔji fata he lɛ he. Shi bo lɛ, susumɔ nɔ ni Biblia lɛ kɛɔ yɛ anɔkwa Nyɔŋmɔ lɛ he lɛ he okwɛ:

  •  ‘Yehowa ja yɛ egbɛi fiaa mli.’Lala 145:17.

  • ‘Nyɔŋmɔ gbɛ̀i fɛɛ lɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ ni esa pɛ.’5 Mose 32:4.

  • ‘Nuŋtsɔ Yehowa mli tsɔ̃ɔ lɛ babaoo, ni enaa mɔbɔ.’Yakobo 5:11, Ga Biblia hee.

Jeee Nyɔŋmɔ hãa nibii fɔji baa. Ani ewoɔ mɛi hewalɛ ni amɛfee nibii fɔji? Dabida. Ŋmalɛ lɛ kɛɔ akɛ, “Kɛji aaka mɔ ko lɛ, ekakɛɛ akɛ: Nyɔŋmɔ ŋɔɔ ajɛ aka mi.” Mɛni hewɔ? Ejaakɛ “Nyɔŋmɔ lɛ akaaa lɛ yɛ nifɔji agbɛfaŋ, ni lɛ diɛŋtsɛ hu ekaaa mɔ ko.” (Yakobo 1:13) Nyɔŋmɔ ekaaa mɔ ko, ni ewooo mɔ hewalɛ ni eyafee nɔfɔŋ. Nyɔŋmɔ kɛ nibii fɔji baaa, ni ewooo mɛi hewalɛ hu ni amɛyafee nibii fɔji. Mɛni loo namɔ mɔ esa akɛ ashwa kɛ́ nibii fɔji ba?

KƐ́ MƆ KO YAJE HE NI ESAAA YƐ BE NI ESAAA MLI

Be ni Biblia lɛ tsɔɔ yiŋtoo kome hewɔ ni mɛi naa nɔ lɛ, ewie akɛ: “Be kɛ nibii ni aleee ni baa trukaa baa mɛi fɛɛ anɔ.” (Jajelɔ 9:11, NW) Kɛ́ nɔ ko ni akpaaa gbɛ loo oshara ko ba, esa mɔ ko he jio, esaaa mɔ ko he jio lɛ, edamɔ he ni mɔ lɛ yɔɔ be ni oshara lɛ ba lɛ nɔ. Aaafee afii 2,000 ni eho nɛ lɛ, Yesu Kristo wie oshara ko ni gbe mɛi 18 be ni mɔɔ ko kumɔ shwie amɛnɔ lɛ he. (Luka 13:1-5) Jeee efɔŋ ko ni amɛfee hewɔ oshara lɛ ba amɛnɔ lɛ; moŋ lɛ amɛyɛ mɔɔ lɛ shishi be ni ekumɔ eshwie shi lɛ. Nyɛsɛɛ nɛɛ, yɛ January afi 2010 lɛ mli lɛ, kukrudu ko ni naa wa waa shi yɛ Haiti, ni amɛnɔyeli lɛ tsɔɔ mli akɛ mɛi ni fe 300,000 awala ŋmɛɛ amɛ. Mɛi nɛɛ fɛɛ gboi ekɔɔɔ he eko mɛi ni amɛji. Hela hu baanyɛ atswa mɔ fɛɛ mɔ ojo be fɛɛ be.

Mɛni hewɔ Nyɔŋmɔ ebuuu mɛi kpakpai ahe kɛjɛɛɛ osharai ahe lɛ?

Ekolɛ, mɛi komɛi baabi akɛ: ‘Ani Nyɔŋmɔ nyɛɛɛ asa osharai wuji tamɔ nɛkɛ lɛ anaa ni amɛkaba? Ani enyɛɛɛ ebu mɛi kpakpai lɛ ahe kɛjɛ osharai nɛɛ ahe?’ Kɛ́ Nyɔŋmɔ baafee osharai nɛɛ ahe nɔ ko lɛ, no lɛ, etsɔɔ akɛ ele nibii fɔji ni baaba lɛ. Eyɛ mli akɛ Nyɔŋmɔ yɛ nyɛmɔ ni ekɛaale wɔsɛɛ moŋ, shi sanebimɔ ni esa akɛ wɔsusu he ji: Ani Nyɔŋmɔ halaa akɛ ekɛ ehewalɛ baatsu nii kɛle nibii nɛɛ?Yesaia 42:9.

Ŋmalɛ lɛ kɛɔ akɛ: “Nyɔŋmɔ lɛ, ŋwɛi eyɔɔ; nɔ fɛɛ nɔ ni esumɔɔ lɛ, no efeɔ.” (Lala 115:3) Jeee nɔ fɛɛ nɔ ni Yehowa baanyɛ afee lɛ efeɔ, shi moŋ, nɔ ni esusuɔ akɛ ehe miihia lɛ. Nakai nɔŋŋ efeɔ yɛ nibii ni baaba wɔsɛɛ ni esumɔɔ ni ele lɛ he. Akɛ nɔkwɛmɔnɔ lɛ, be ni efɔŋfeemɔ bahe shi yɛ Sodom kɛ Gomora maji lɛ amli lɛ, Nyɔŋmɔ kɛɛ blematsɛ Abraham akɛ: ‘Makpeleke shi matee  agbɛnɛ, ni mayakwɛ akɛ, bɔ ni bolɔmɔ lɛ ba miŋɔɔ lɛ, amɛfee nakai kwraa lo; ni kɛ́ jeee nakai hu, ni male.’ (1 Mose 18:20, 21) Yehowa hala akɛ esumɔŋ ni ele he ni maji nɛɛ anɔfɔŋfeemɔ lɛ eshɛ kɛyashi be ko. Nakai nɔŋŋ, Yehowa baanyɛ ahala akɛ etsɔŋ hiɛ eleŋ nɔ fɛɛ nɔ ni baaba lɛ. (1 Mose 22:12) Enɛ etsɔɔɔ kɔkɔɔkɔ akɛ Yehowa tɔɔ fã loo eyɛ gbɔjɔmɔi. Akɛni “enitsumɔi hi” hewɔ lɛ, nyɛmɔ ni eyɔɔ ni ekɛleɔ wɔsɛɛ lɛ kɛ eyiŋtoo lɛ ŋmɛɔ pɛpɛɛpɛ; enyɛɛɛ adesai anɔ ni amɛfee amɛnii yɛ gbɛ pɔtɛ̃ɛ ko nɔ. * (5 Mose 32:4) No hewɔ lɛ, te esa akɛ wɔmu saji anaa wɔhã tɛŋŋ? Ekukufoo ji akɛ: Nyɔŋmɔ halaa nibii ni ebaanyɛ etsɔ hiɛ ele lɛ mli, ni efeɔ nakai yɛ nilee mli.

Mɛni hewɔ Nyɔŋmɔ ebuuu mɛi kpakpai ahe kɛjɛɛɛ awuiyeli he lɛ?

ANI ABAANYƐ ASHWA ADESAI?

Adesai fata he eko ni nɔfɔŋfeemɔ efa lɛ. Kadimɔ bɔ ni Biblia lɛ tsɔɔ nibii ni kɛ amanehulu baa lɛ mli ehã. “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ́ eŋɔ hɔ lɛ, efɔɔ esha, ni esha lɛ hu, kɛ́ afee agbe naa lɛ efɔɔ gbele.” (Yakobo 1:14, 15) Kɛ́ adesai kɛ akɔnɔ fɔŋ ni amɛyɔɔ lɛ tsu nii loo amɛŋmɛɛ amɛhe amɛhã nifeemɔi fɔji komɛi lɛ, bɔ fɛɛ bɔ ni fee lɛ amɛbaana nɔ. (Romabii 7:21-23) Taakɛ yinɔsane tsɔɔ lɛ, adesai efee nibii fɔji ni ehiii kwraa, ni ehã mɛi babaoo miipiŋ. Kɛfata he lɛ, mɛi fɔji baanyɛ ahã mɛi krokomɛi hu afee nɔfɔŋ, koni amɛhã efɔŋfeemɔ aya nɔ daa.Abɛi 1:10-16.

Adesai efee nibii fɔji ni ehiii kwraa, ni ehã mɛi babaoo miipiŋ

Ani esa akɛ Nyɔŋmɔ kɛ ehe awo mli ni etsĩ mɛi anaa ni amɛkafee nibii fɔji? Susumɔ bɔ ni abɔ gbɔmɔ ahã lɛ he okwɛ. Ŋmalɛ lɛ kɛɔ akɛ, Nyɔŋmɔ bɔ gbɔmɔ yɛ esubaŋ nɔ, ni tsɔɔ akɛ Nyɔŋmɔ henɔ ji gbɔmɔ. No hewɔ lɛ, adesai yɛ nyɛmɔ ni amɛkɛaajie Nyɔŋmɔ sui lɛ akpo. (1 Mose 1:26) Akɛ nikeenii ni ji heyeli eduro adesai, no hewɔ lɛ, amɛbaanyɛ amɛhala akɛ amɛbaasumɔ Nyɔŋmɔ ni amɛkpɛtɛ ehe kɛtsɔ nibii ni saa ehiɛ ni amɛaafee lɛ nɔ. (5 Mose 30:19, 20) Kɛ́ Nyɔŋmɔ nyɛ adesai anɔ ni amɛfee amɛnii yɛ gbɛ pɔtɛ̃ɛ ko nɔ lɛ, no baatsɔɔ akɛ eŋmɛɛɛ amɛ gbɛ ni amɛkɛ heyeli ni ekɛduro amɛ lɛ atsu nii? Kɛ́ Nyɔŋmɔ fee nakai lɛ, belɛ adesai baatsɔmɔ tamɔ tsɔnei ni tsuɔ nɔ pɛ ni ato amɛhe gbɛjianɔ akɛ amɛtsu lɛ! Ni kɛ́ shɛɛ mli saji ji nɔ ni kudɔɔ nibii ni wɔfeɔ kɛ nɔ fɛɛ nɔ ni baa wɔnɔ lɛ, no hu baatsɔɔ akɛ tsɔnei ji wɔ. Kwɛ bɔ ni wɔmii shɛɔ wɔhe waa akɛ Nyɔŋmɔ ehã wɔ nyɛmɔ ni wɔkɛhala nɔ ni wɔsumɔɔ akɛ wɔbaafee, ni enɛ tsɔɔ akɛ ebuɔ wɔ! Kɛ̃lɛ, enɛ etsɔɔɔ akɛ piŋmɔ ni ejɛ adesai atɔmɔi kɛ nibii fɔji ni amɛfee lɛ mli kɛba lɛ baakã he ahã adesai aweku lɛ ana nɔ daa.

 ANI KARMA LOO SHƐƐ MLI SANE JI NƆ NI HÃA ADESAI PIŊƆ?

Kɛ́ obi Hindunyo loo Buddhanyo ko sane ni yɔɔ wolo nɛɛ hiɛ lɛ, hetoo ni ebaahã bo nɔŋŋ ji: “Karma mla lɛ ji nɔ ni hãa nibii gbohii baa mɛi kpakpai anɔ. Amɛmiikpa nɔ ni amɛdu tsutsu be ni amɛyɔɔ shihilɛ mli lɛ.” *

Karma tsɔɔmɔ lɛ hewɔ lɛ, esa akɛ wɔkwɛ nɔ ni Biblia lɛ kɛɔ yɛ shihilɛ mli ni gbohii lɛ yɔɔ lɛ he. Be ni Adam, ni ji klɛŋklɛŋ gbɔmɔ lɛ yɔɔ Eden trom lɛ ni ji he klɛŋklɛŋ ni adesai hi lɛ mli lɛ, Bɔlɔ lɛ kɛɛ lɛ akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo.” (1 Mose 2:16, 17) Eji Adam efeee esha kɛtsɔ Nyɔŋmɔ toi ni egbo lɛ nɔ kulɛ, ebaahi shi kɛya naanɔ. Nyɔŋmɔ kitã lɛ ni Adam gbo nɔ toi lɛ he toigbalamɔ ji gbele. No sɛɛ lɛ, be ni afɔ bii lɛ, “gbele lɛ tsɛŋe gbɔmɛi fɛɛ.” (Romabii 5:12) No hewɔ lɛ, abaanyɛ akɛɛ akɛ “esha dɛŋ nyɔmɔwoo lɛ gbele ni.” (Romabii 6:23) Biblia lɛ kɛɔ hu akɛ: “Mɔ ni egbo lɛ, abu lɛ bem kɛjɛ esha lɛ mli.” (Romabii 6:7) Yɛ gbɛ kroko nɔ lɛ, adesai eyaaa nɔ amɛwooo eshai ni amɛfee lɛ ahe nyɔmɔ yɛ amɛgbele sɛɛ.

Ŋmɛnɛ lɛ, mɛi akpekpei abɔ wieɔ akɛ Karma ji nɔ ni hãa adesai naanɔ lɛ. Bei pii lɛ, mɔ ko ni heɔ Karma eyeɔ lɛ gbaaa ehe naa tsɔ kɛ eepiŋ loo kɛ́ mɛi krokomɛi miipiŋ. Shi, kɛ́ nɛkɛ ji sane lɛ, no lɛ, belɛ nibii fɔji asɛɛ efoŋ kɔkɔɔkɔ. Mɛi heɔ yeɔ akɛ dani mɔ ko baanyɛ aye ehe kɛjɛ nibii fɔji ahe lɛ, ja eba ejeŋ jogbaŋŋ ni ená nilee krɛdɛɛ ko, kɛkɛ lɛ ebabalaŋ dɔŋŋ ni ebaapiŋ. Susumɔi nɛɛ kɛ nɔ ni Biblia lɛ kɛɔ lɛ kpaaa gbee kwraa. *

MƆ TITRI NI HÃA ADESAI PIŊƆ!

Ani ole akɛ Satan Abonsam, ni ji “je lɛŋ lumɔ lɛ” ji mɔ titri ni hãa adesai piŋɔ?—Yohane 14:30

Jeee adesa ji mɔ titri ni kɛ piŋmɔ baa. Satan Abonsam, ni tsutsu ko lɛ, eji Nyɔŋmɔ bɔfo ni yeɔ anɔkwa lɛ, “damɔɔɔ anɔkwale lɛ mli” ni ekɛ esha ba je lɛ mli. (Yohane 8:44) Ehã atse atua yɛ Eden trom lɛ mli. (1 Mose 3:1-5) Yesu Kristo tsɛ lɛ ‘mɔ fɔŋ lɛ’ kɛ “je lɛŋ lumɔ lɛ.” (Mateo 6:13; Yohane 14:30) Adesai babaoo boɔ hewalɛ ni Satan woɔ amɛ koni amɛkpoo Yehowa gbɛi kpakpai lɛ atoi. (1 Yohane 2:15, 16) Yohane Klɛŋklɛŋ Wolo lɛ 5:19 lɛ kɛɔ akɛ: “Jeŋ muu lɛ fɛɛ kã mɔ fɔŋ lɛ mli.” Mumɔŋ bɔɔ nii krokomɛi etsɔmɔ mɛi fɔji ni amɛyafata Satan he. Biblia lɛ tsɔɔ akɛ Satan kɛ edaimonioi lɛ ‘miishishiu jeŋ muu lɛ fɛɛ,’ ni enɛ ehã mɛi ni yɔɔ shikpɔŋ lɛ nɔ lɛ miina nɔ. (Kpojiemɔ 12:9, 12) No hewɔ lɛ, mɔ titri ni esa akɛ ashwa yɛ efɔŋfeemɔ ni yaa nɔ lɛ he ji Satan Abonsam.

Belɛ, eyɛ faŋŋ akɛ, jeee Nyɔŋmɔ ji mɔ ni kɛ nibii fɔji baa adesai anɔ; ni jeee lɛ ji mɔ ni hãa amɛnaa nɔ hu. Nɔ ni tamɔɔɔ nakai lɛ, ewo shi akɛ ebaajie efɔŋfeemɔ kɛshi je lɛŋ, taakɛ sane ni nyiɛ sɛɛ lɛ baatsɔɔ lɛ.

^ kk. 3 Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.

^ kk. 11 Kɛ́ ootao ole nɔ hewɔ ni Nyɔŋmɔ eŋmɛ efɔŋfeemɔ gbɛ ni eya nɔ lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ yitso 11 lɛ mli.

^ kk. 16 Kɛ́ ootao ole he ni nɔ ni atsɛɔ lɛ Karma mla lɛ jɛ kɛba lɛ, kwɛmɔ wolo bibioo ni ji Mɛni Baa Wɔnɔ Kɛ́ Wɔgboi? ni Yehowa Odasefoi fee lɛ baafa 8-12 lɛ.

^ kk. 18 Kɛ́ ootao ole nɔ ni Biblia lɛ tsɔɔ yɛ shihilɛ mli ni gbohii lɛ yɔɔ kɛ hiɛnɔkamɔ ni yɔɔ kɛhã mɛi ni egboi lɛ, kwɛmɔ Mɛni Biblia lɛ Tsɔɔ Diɛŋtsɛ? wolo lɛ yitso 6 kɛ 7 lɛ.

Ekrokromɛi Hu Nɛ

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Mɛni kɛ efɔŋfeemɔ ba, ni mɛni hewɔ Nyɔŋmɔ eŋmɛ gbɛ ni eyaa nɔ lɛ? Ani nɔnaa baaba naagbee gbi ko?