Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2014

 BIBLIA LƐ TSAKEƆ MƐI

He Fɛɛ He ni Maya lɛ Mitu lɛ Tsɛ Mihe

He Fɛɛ He ni Maya lɛ Mitu lɛ Tsɛ Mihe
  • BE NI AFƆ LƐ: 1958

  • AŊ NƆ NI EJƐ: ITALY

  • MƆ NI EJI TSUTSU: YIWALƆI AKUU KO MLINYO

MITSUTSU SHIHILƐ:

Afɔ mi ni atsɔse mi yɛ Rome maji komɛi ni ohiafoi titri yɔɔ mli lɛ amli. Shihilɛ lɛ wa waa. Milé minyɛ, ni mikɛ mitsɛ teŋ bɛ jogbaŋŋ. Be ni midaa lɛ, minaaa shihilɛ lɛ mlɛo kwraa.

Mibɔi juu dani miye afii nyɔŋma. Mijo foi kɛshi shĩa klɛŋklɛŋ kwraa be ni miye afii 12 lɛ. Mitsɛ bajie mi yɛ polisifoi atsuŋwoohe wulu lɛ shii abɔ. Daa nɛɛ lɛ mikɛ mɛi ená—miyi wa, ni mimlifuɔ mɔ fɛɛ mɔ kwraa. Be ni miye afii 14 lɛ, mishi shĩa kwraa. Mitsɔ kobɔlɔ ni mikɛ tsofai ni naa wala bɔi nitsumɔ bɔ ni esaaa. Akɛni mibɛ he ko ni miwɔɔ hewɔ lɛ, kɛ́ mina tsɔne ko lɛ, miboteɔ mli akranaa naa, ni miwɔɔ mli kɛyashiɔ hiɛ futɛfutɛ mli. No sɛɛ lɛ, mitaoɔ he ko ni nubu yɔɔ kɛkɛ lɛ, miyaju mihe yɛ jɛmɛ.

Mihe sa kɛ juu—mishaa mɛi abaagi, miboteɔ shĩai kɛ gbɔiatoohe wuji amli kɛ tu ni miyajuɔ amɛ gbɛkɛgbɛkɛ. Mibana gbɛ́i gbonyo, ni etsɛɛɛ ni ojotswalɔi akuu ko fɔ̃ mi nine ni mibafata amɛhe, ni no hã miná hegbɛ ni mibɔi juu yɛ shikatoohei. Akɛni mihiɛ yɛ laŋlaŋ hewɔ lɛ, etsɛɛɛ ni mitsɔ mɔ ko ni asheɔ lɛ gbeyei yɛ kuu lɛ mli. Miyaaa heko ni mihiɛɛɛ tu; yɛ anɔkwale mli lɛ, mikɛwoɔ misune lɛ shishi ni mitsɔleɔ. Awuiyeli, tsofai ni akɛtsuɔ nii yɛ gbɛ ni ejaaa nɔ, juu, wiemɔ sha, kɛ jeŋba sha batsɔ mishihilɛ. Be fɛɛ be lɛ, polisifoi miitao mi. Amɔ mi shii abɔ, ni miye afii pii yɛ tsuŋwoohe.

BƆ NI BIBLIA LƐ TSAKE MISHIHILƐ:

Be ko be ni ajie mi yɛ tsuŋwoohe lɛ, mikpɛ mli akɛ mayasara minyɛkwɛ ko. No mli lɛ, mileee kwraa akɛ minyɛkwɛ lɛ kɛ ebii enyɔ ebatsɔ Yehowa Odasefoi. Amɛfɔ̃ mi nine kɛtee kpeei ni Odasefoi lɛ feɔ lɛ eko. Akɛni miitao makpa nii ashi hewɔ lɛ, mikɛ amɛ tee. Be ni wɔyashɛ Maŋtsɛyeli Asa lɛ nɔ lɛ, mikɛɛ doo ja mita heko ni bɛŋkɛ shinaa lɛ naa koni manyɛ mana mɛi  ni boteɔ mli kɛ mɛi ni jeɔ kpo lɛ. Nakai beaŋ lɛ, tu tsɛ mihe.

Nakai kpee lɛ tsake mishihilɛ. Mikaiɔ akɛ, nakai gbi lɛ, minu he tamɔ nɔ ni miyɛ jeŋ kroko mli! Mɛi ni yɔɔ jɛmɛ lɛ here mi hiɛmɛɛ, amɛjie naanyobɔɔ su kpo, ni amɛkɛ mi wie kɛ miishɛɛ. Kɛbashi amrɔ nɛɛ lɛ mikaiɔ bɔ ni Odasefoi lɛ jɛ amɛtsui mli amɛjie mlihilɛ kpo amɛtsɔɔ mi lɛ lolo. Enɛ yɛ srɔto kwraa yɛ bɔ ni mɛi ni mikɛshãra yɛ nakai beaŋ lɛ feɔ amɛnii amɛhãa lɛ he kwraa!

Mikpɛlɛ ni Odasefoi lɛ kɛ mi bɔi Biblia lɛ kasemɔ. Be ni miyaa nɔ mikaseɔ nii lɛ, efee faŋŋ kɛhã mi akɛ esa akɛ matsake mishihilɛ kwraa. Mikɛ ŋaawoo ni yɔɔ Abɛi 13:20 ni kɛɔ akɛ: “Mɔ ni kɛ nilelɔi nyiɛɔ lɛ, eeetsɔ nilelɔ; shi mɔ ni kɛ kwashiai bɔɔ lɛ, eeena amane” lɛ tsu nii. Mina akɛ, esa akɛ matsi mihe kɛjɛ ojotswalɔi akuu lɛ he. Enɛ feemɔ bɛ mlɛo, shi Yehowa yelikɛbuamɔ naa lɛ, miye omanye.

Be nɛɛ ji be klɛŋklɛŋ ni mitswa mifai shi akɛ makpa su gbohii ni mihiɛ nɛɛ fɛɛ

Mihã mihe tse yɛ gbɔmɔtsoŋ hu. Etɔ mi waa dani minyɛ mikpa zigareti shɛremɔ kɛ tsofai ni mikɛtsuɔ nii yɛ gbɛ ni ejaaa nɔ lɛ. Miku miyitsɔi lɛ, mijie toiiaŋnii ni miwo lɛ, ni mikɛ wiemɔ sha kpa nitsumɔ. Be nɛɛ ji be klɛŋklɛŋ ni mitswa mifai shi akɛ makpa su gbohii ni mihiɛ nɛɛ fɛɛ.

Misumɔɔɔ nikanemɔ kɛ nikasemɔ, ni no hewɔ lɛ, kɛ́ mimia mihɛ ni makase Biblia lɛ po lɛ, mijwɛŋmɔ nyɛɛɛ ahi nɔ. Kɛ̃lɛ, be ni mimiaa mihiɛ lɛ, fiofio lɛ, mibasumɔ Yehowa, kɛkɛ ni mihenilee bɔi mi yii. Bei pii lɛ, mimuɔ saji anaa bɔ ni esaaa, ni minuɔ he akɛ Yehowa kɛ nibii fɔji ni mifee lɛ ekeŋ mi kɔkɔɔkɔ. Yɛ nakai bei lɛ amli lɛ, mikane sane ni kɔɔ bɔ ni Yehowa kɛ eshai ni yɔɔ hiɛdɔɔ ni Maŋtsɛ David fee lɛ ke lɛ lɛ he saji, ni enɛ shɛje mimii waa.2 Samuel 11:1–12:13.

Nɔ kroko ni fee naagba kɛhã mi ji, ni maya mɛi aŋɔɔ yɛ amɛshĩai amli ni mashiɛ mahã amɛ. (Mateo 28:19, 20) Mishe gbeyei akɛ ekolɛ, mikɛ mɔ ko ni miye lɛ awui loo sane fɔŋ ko baakpe! Shi, fiofio lɛ, minyɛ miye migbeyeishemɔi lɛ anɔ. Be ni mibɔi mɛi krokomɛi yelikɛbuamɔ ni amɛkase wɔŋwɛi Tsɛ ni nɔ bɛ ni kɛ eshai faa lɛ he nii lɛ, ehã mitsui nyɔ mimli.

BƆ NI MINÁ HE SƐƐ:

Yehowa he nii ni mikase lɛ ebaa miyi! Mitsutsu nanemɛi lɛ pii egboi ni awo mɛi komɛi hu mɔɔ, shi mi lɛ mishihilɛ ehi, ni miikpa wɔsɛɛ be kpakpa gbɛ. Amrɔ nɛɛ mibaa mihe shi, mifeɔ toi ni minyɛɔ miyeɔ mimlifu nɔ. Enɛ ehã wekukpaa kpakpa ebakã mi kɛ mɛi fɛɛ ni mikɛshãraa lɛ ateŋ. Mina ŋa hu ni he yɛ fɛo waa ni atsɛɔ lɛ Carmen. Wɔ fɛɛ wɔmiiye kɛmiibua mɛi ni amɛkase Biblia lɛ.

Amrɔ nɛɛ, miitsu nitsumɔ kpakpa—bei komɛi lɛ miyaa shikatoohei, jeee ni miyaju amɛ, shi moŋ koni miyasaa jɛmɛ!

Ekrokromɛi Hu Nɛ

Mɛni Ji Biblia Mli Nikasemɔ?

Kanemɔ koni ona wɔ-Biblia mli nikasemɔ ni wɔfeɔ ni wɔheee nɔ ko lɛ he sanebimɔi lɛ ahetoi.