Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JUNE 2014

 SANEYITSO LƐ MLITSƆƆMƆ | NYƆŊMƆ SUSUMƆ YƐ TAWA SHƐREMƆ HE

Mɛni Ji Nyɔŋmɔ Susumɔ yɛ Tawa Shɛremɔ He?

Mɛni Ji Nyɔŋmɔ Susumɔ yɛ Tawa Shɛremɔ He?

Naoko, ni atsi etã yɛ sane ni tsɔ hiɛ lɛ mli lɛ tsɔɔ bɔ ni fee ni ekpa tawa shɛremɔ, ekɛɛ akɛ, “Anɔkwale ni kɔɔ Nyɔŋmɔ sui kɛ eyiŋtoi lɛ ahe nii ni mikase lɛ ji nɔ ni ye ebua mi ni mitsake mishihilɛ.” Ekase nakai anɔkwale lɛ yɛ Biblia lɛ mli. Eyɛ mli akɛ Biblia lɛ etsĩii tawa tã moŋ, shi eyeɔ ebuaa wɔ ni wɔnaa Nyɔŋmɔ susumɔ yɛ tawa shɛremɔ he. * Yɛ mɛi babaoo agbɛfaŋ lɛ, nilee ni yɔɔ Biblia lɛ mli lɛ ji nɔ ni wo amɛ hewalɛ ni amɛkpoo loo amɛkpa tawa shɛremɔ. (2 Timoteo 3:16, 17) Hã wɔsusu naagbai etɛ komɛi ni ale waa ni tawa shɛremɔ kɛbaa lɛ he, kɛ nɔ ni Biblia lɛ kɛɔ yɛ naagbai nɛɛ ahe lɛ he wɔkwɛ.

TAWA SHƐREMƆ KAA MƆ HE

Tsofãi ni mɛi le akɛ ekɛ nitsumɔ kaa mɔ he waa lɛ ateŋ ekome yɛ tawa mli, no ji nikotin. Ehãa gbɔmɔtso lɛ tsuɔ nii waa, ni lɛ nɔŋŋ lɛ, ehãa gbɔmɔtso lɛ feɔ bliboo. Kɛ́ mɔ ko shɛre tawa lɛ, nikotin lɛ yaa ejwɛŋmɔ lɛ mli, ni jeee shi kome, shi shii abɔ. Akɛni kɛ́ mɔ ko gbala zigareti lasu shi kome lɛ nikotin lɛ ekome yaa ejwɛŋmɔ lɛ mli hewɔ lɛ, abaanyɛ akɛɛ akɛ, kɛ́ mɔ ko shɛre zigareti adeka kome yɛ gbi kome mli lɛ, nikotin aaashɛ 200 yaa ejwɛŋmɔ lɛ mli, ni enɛ fa kwraa fe nikotin ni yɔɔ tsofãi fɛɛ ni eko yɔɔ mli lɛ amli. Kɛ́ mɔ ko shɛreɔ zigareti daa lɛ, ehãa nikotin lɛ faa yɛ egbɔmɔtso lɛ mli, ni no hewɔ ni ewaa kɛhãa mɔ lɛ akɛ ebaakpa lɛ. Kɛ́ eka ohe, ni oná shwelɛ akɛ oshɛre eko ni onaaa lɛ, ehãa efeɔ tamɔ hela emɔ bo.

‘Mɔ ni nyɛboɔ lɛ toi lɛ, lɛ nɔŋŋ enyɔji ji nyɛ.’—Romabii 6:16

Ani obaanyɛ obo Nyɔŋmɔ toi lɛɛlɛŋ kɛ́ otsɔ nyɔŋ ohã tawa shɛremɔ?

Biblia lɛ yeɔ ebuaa wɔ ni wɔnáa susumɔ ni sa yɛ sane nɛɛ he, ekɛɔ akɛ: “Ani nyɛleee akɛ, mɔ ni nyɛŋɔɔ nyɛhe nyɛfeɔ tsuji [loo nyɔji] nyɛhãa ní nyɛboɔ lɛ toi lɛ, lɛ nɔŋŋ etsuji [loo enyɔji] ji nyɛ ni nyɛboɔ lɛ toi?” (Romabii 6:16) Kɛ́ daa nɛɛ lɛ, nɔ ni mɔ ko susuɔ he nɔŋŋ ji bɔ ni eeefee ená tawa eshɛre lɛ, no lɛ etsɛŋ kwraa ni ebaatsɔ nyɔŋ ehã nifeemɔ ni bɛ hiŋmɛi nɔ nɛɛ. Kɛ̃lɛ, jeee nifeemɔi ni baaye wɔgbɔmɔtsei lɛ awui lɛ pɛ Nyɔŋmɔ, mɔ ni gbɛ́i ji Yehowa lɛ, sumɔɔ ni wɔye wɔhe kɛjɛ he, eesumɔ ni wɔye wɔhe hu kɛjɛ nifeemɔi ni baawo wɔmumɔ ni ji nibii ni wɔshweɔ waa lɛ ahe muji. (  Lala 83:19; 2 Korintobii 7:1) No hewɔ lɛ, be ni mɔ ko yaa nɔ enáa hiɛsɔɔ ehãa Yehowa ni ejieɔ bulɛ kpo ehaa lɛ lɛ, enaa akɛ esa akɛ etuu ehe ehã Yehowa kwraa, ni akɛ enyɛŋ efee nakai be ni ekã he eji nyɔŋ kɛhã nifeemɔ ni nyɛɔ egbeɔ mɔ nɛɛ. Kɛ́ mɔ ko nu anɔkwa sane nɛɛ shishi lɛ, ebaahã ená shwelɛ akɛ ebaakpoo akɔnɔ fɔŋ nɛɛ.

Mɔ ko ni atsɛɔ lɛ Olaf ni yɔɔ Germany lɛ bɔi zigareti shɛremɔ be ni eye afii 12, ni efee nakai afii 16, kɛ̃lɛ ebɔ mɔdɛŋ ekpa. Olaf na klɛŋklɛŋ zigareti ni eshɛre lɛ akɛ nɔ ko ni nyɛŋ lɛ awui eye. Shi be ni be shwie mli lɛ, tawa shɛremɔ ka ehe ni enyɛɛɛ he nɔ ko kwraa efee. Ekɛɛ akɛ: “Gbi ko be ni mibɛ zigareti lɛ, mihao aahu akɛ mihala nɔ ni mishɛre momo lɛ anaabii lɛ, ni mijie amɛmli tawa lɛ miwo wolo mli ni mikota ni mishɛre. Be ni mishɛre migbe naa lɛ, mina akɛ mifee hiɛgbejianii.”  Te fee tɛŋŋ eye ehe kɛjɛ nifeemɔ ni bɛ hiŋmɛi nɔ nɛɛ he lɛ? Ewie akɛ: “Yehowa hiɛ ni miisumɔ ni masa lɛ ji nɔ titri ni ye ebua mi. Suɔmɔ ni Yehowa yɔɔ kɛhã adesai kɛ hiɛnɔkamɔ ni ehãa anáa lɛ ji nɔ ni wo mi hewalɛ ni minyɛ mitsi mihe kwraa kɛjɛ nifeemɔ ni kaa mɔ he nɛɛ he.”

TAWA SHƐREMƆ FITEƆ GBƆMƆTSO LƐ

Wolo ko (The Tobacco Atlas) tsɔɔ mli akɛ, “Jeŋshikpalɔi ekpa shi amɛna akɛ kɛ́ hooo lɛ tawa shɛremɔ . . . yeɔ nɔ fɛɛ nɔ ni yɔɔ gbɔmɔtso lɛ mli lɛ awui, ni ehãa mɔ he yeɔ ni egbeɔ mɔ hu waa.” Ale waa hu akɛ tawa shɛremɔ hãa mɛi náa helai tamɔ kansa, tsui hela kɛ flufla mli helai krokomɛi. Shi Jeŋ Hewalɛnamɔ Gbɛjianɔtoo lɛ tsɔɔ mli hu akɛ nɔ ni hãa mɛi ni yeɔ tsɛŋemɔ hela tamɔ wɔlɔmɔ fɔŋ gboiɔ waa ji tawa shɛremɔ.

“Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.”—Mateo 22:37

Kɛ́ oyeɔ gbɔmɔtso ni Nyɔŋmɔ kɛhã bo lɛ awui kɛtsɔ nifeemɔ gbonyo ko ni okɛ ohe woɔ mli lɛ nɔ lɛ, ani obaanyɛ owie akɛ osumɔɔ Nyɔŋmɔ ni obuɔ lɛ?

Yehowa Nyɔŋmɔ tsɔɔ e-Wiemɔ ni ji Biblia lɛ nɔ eyeɔ ebuaa wɔ ni wɔná susumɔ ni sa yɛ wɔwala, wɔgbɔmɔtso lɛ, kɛ wɔjwɛŋmɔ lɛ he. E-Bi Yesu ma enɛ nɔ mi, ewie akɛ: “Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” (Mateo 22:37) Ekã shi faŋŋ akɛ Nyɔŋmɔ miisumɔ ni wɔná bulɛ wɔhã wala kɛ wɔgbɔmɔtso lɛ koni wɔkɛtsu nii jogbaŋŋ. Be ni wɔyaa nɔ wɔkaseɔ Yehowa kɛ eshiwoi lɛ ahe nii lɛ, wɔbasumɔɔ nibii ni efee ehã wɔ lɛ ni wɔjieɔ bulɛ kpo wɔtsɔɔ nibii nɛɛ. Enɛ kanyaa wɔ ni wɔtsiɔ wɔhe kɛjɛɔ nɔ fɛɛ nɔ ni baanyɛ abule wɔgbɔmɔtso lɛ he.

Datrɛfonyo ko ni yɔɔ India ni atsɛɔ lɛ Jayavanth lɛ kɛ afii 38 shɛre zigareti. Ekɛɛ akɛ: “Mikase awui ni tawa shɛremɔ yeɔ mɔ lɛ he nii yɛ helatsamɔ woji amli. Mile akɛ tawa shɛremɔ ehiii, ni miwo mɛi ni mikwɛɔ amɛ lɛ ŋaa ni amɛkpa shɛremɔ. Shi kɛ̃lɛ, eyɛ mli akɛ mika shii enumɔ loo shii ekpaa akɛ makpa, shi minyɛɛɛ.” Mɛni wa lɛ ni yɛ naagbee lɛ ekpa? Etsa nɔ akɛ: “Biblia lɛ ni mikase lɛ ji nɔ ni wa mi ni mikpa. Shwelɛ ni miyɔɔ akɛ masa Yehowa hiɛ lɛ kanya mi ni mikpa su fɔŋ nɛɛ amrɔ nɔŋŋ.”

TAWA SHƐREMƆ YEƆ MƐI KROKOMƐI AWUI

Ebɔɔ yɛ lasu ni jɛɔ tawa ni kã shi ni miishã, kɛ lasu ni jɛɔ mɛi ni shɛreɔ tawa lɛ amli kɛjeɔ kpo lɛ amli. Kɛ́ mɔ ko mu lasu nɛɛ eko ewo emli lɛ, ebaanyɛ ená kansa kɛ helai krokomɛi, ni daa afi lɛ, lasu nɛɛ gbeɔ mɛi 600,000 ni shɛreee tawa, titri lɛ yei kɛ gbekɛbii. Jeŋ Hewalɛnamɔ Gbɛjianɔtoo lɛ kɛɛ akɛ: “Kɛ́ lasu ni jɛɔ mɛi ni shɛreɔ tawa lɛ amli lɛ bibioo ko po bote mɔ ko mli lɛ, eyɛ oshãra waa.”

“Suɔmɔ onaanyo tamɔ bɔ ni osumɔɔ bo diɛŋtsɛ ohe.”Mateo 22:39

Kɛ́ oshɛreɔ tawa ni ojieɔ lasu lɛ oshwieɔ onaanyo kɛ oweku lɛ nɔ lɛ, ani obaanyɛ owie akɛ osumɔɔ onaanyo?

 Yesu kɛɛ akɛ, naanyo suɔmɔ—wɔweku, nanemɛi, kɛ mɛi krokomɛi ni bɛŋkɛ wɔ lɛ—ji kita ni ji enyɔ yɛ klɛŋklɛŋ kita ni ji suɔmɔ Nyɔŋmɔ lɛ sɛɛ. Nakai kita lɛ kɛɔ akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:39) Kɛ́ wɔkɛ wɔhe wo shihilɛ ko ni baaye mɛi ni bɛŋkɛ wɔ lɛ awui lɛ mli lɛ, etsɔɔ akɛ wɔbɛ suɔmɔ kɛhã wɔnaanyo. Biblia lɛ kɛɔ akɛ: “Mɔ ko mɔ ko akapele miihã ehe, shi moŋ mɔ fɛɛ mɔ apele ahã enaanyo.” Anɔkwa suɔmɔ tsirɛɔ wɔ ni wɔkɛ ŋaawoo nɛɛ tsuɔ nii.1 Korintobii 10:24.

Armen ni yɔɔ Armenia lɛ wie akɛ: “Miweku lɛ kpa mi fai ni mikpa tawa shɛremɔ ejaakɛ eeye amɛ awui. Shi misumɔɔɔ ni mikpɛlɛɔ nɔ akɛ eeye amɛ awui.” Etsɔɔ nɔ ni hã etsake esusumɔ lɛ mli akɛ: “Biblia lɛ ni mikase lɛ, kɛ suɔmɔ ni miyɔɔ kɛhã Yehowa lɛ ye ebua mi ni mikpa tawa shɛremɔ ni mikpɛlɛ nɔ akɛ jeee mi pɛ awui ebaanyɛ eye shi ebaanyɛ eye mɛi krokomɛi ni bɛŋkɛ mi lɛ hu awui.”

ABAAKPA TAWA SHƐREMƆ KWRAA!

Biblia lɛ ni Olaf, Jayavanth, kɛ Armen kase lɛ ye ebua amɛ ni amɛtsi amɛhe kɛjɛ su gbonyo ni ye amɛ kɛ mɛi krokomɛi awui lɛ he. Jeee le ni amɛle akɛ tawa shɛremɔ yeɔ mɔ awui lɛ kɛkɛ ji nɔ ni hã amɛkpa tawa shɛremɔ, shi moŋ suɔmɔ ni amɛná amɛhã Yehowa kɛ shwelɛ akɛ amɛbaafee esuɔmɔnaa nii lɛ ji nɔ ni ye ebua amɛ. Ama nɔ titri ni suɔmɔ tsuɔ lɛ nɔ mi yɛ 1 Yohane 5:3 lɛ. Jɛmɛ kɛɔ akɛ: “Ejaakɛ enɛ ji Nyɔŋmɔ suɔmɔ lɛ, akɛ wɔye ekitai lɛ anɔ; ni ekitai lɛ waaa.” Eji anɔkwale akɛ jeee be fɛɛ be eyɔɔ mlɛo ákɛ, akɛ Biblia mli shishitoo mlai baatsu nii, shi kɛ́ mɔ lɛ ná suɔmɔ ni mli wa ehã Nyɔŋmɔ lɛ, ewaŋ kwraa kɛhaŋ lɛ akɛ eeefee toi.

Yehowa Nyɔŋmɔ miitsɔ jeŋ muu fɛɛ nitsɔɔmɔ gbɛjianɔtoo ko nɔ eeye eebua mɛi akpekpei abɔ ni amɛye amɛhe loo ni amɛtsi amɛhe kɛjɛ tawa ni yeɔ mɔ nyɔŋ lɛ he. (1 Timoteo 2:3, 4) Etsɛŋ kwraa ni Yehowa baatsɔ e-Maŋtsɛyeli ni ji ŋwɛi nɔyeli ni e-Bi Yesu Kristo ji enɔ maŋtsɛ lɛ nɔ ejie jarayeli gbɛjianɔtoi fɛɛ ni foɔ amɛ pɛ amɛnɔ mli, ní ehã mɛi babaoo etsɔmɔ nyɔji ehã tawa lɛ kɛshi je lɛ mli kwraa. Ebaajie tawa shɛremɔ ni ekpele jeŋ fɛɛ lɛ kɛshi je lɛ mli shi kome nyɔŋlo, ni ebaaye ebua adesai ni feɔ toiboo lɛ, ní amɛye emuu yɛ gbɔmɔtsoŋ kɛ jwɛŋmɔŋ.Yesaia 33:24; Kpojiemɔ 19:11, 15.

Kɛ́ oobɔ mɔdɛŋ ni okpa tawa shɛremɔ shi onyɛɛɛ lɛ, kaahã onijiaŋ je wui. Kɛ́ oná suɔmɔ ohã Yehowa ni ona esusumɔ yɛ tawa shɛremɔ he lɛ, ebaaye ebua bo ni okpa. Yehowa Odasefoi baaná he miishɛɛ waa akɛ amɛaaye amɛbua bo ni okase Biblia mli shishitoo mlai lɛ, ní ona bɔ ni ooofee okɛtsu nii. Ná hiɛkɛnɔfɔɔ akɛ, kɛ́ ootao ni Yehowa aye abua bo ni oye ohe kɛjɛ tawa shɛremɔ he lɛ, ebaawaje bo ni onyɛ okpa.Filipibii 4:13.

^ kk. 3 Tawa shɛremɔ ni awieɔ he yɛ wolo nɛɛ mli lɛ kɔɔ, zigareti, kɛ ehenɔi kɛ bɛlɛ, ni ashɛreɔ lɛ ahe. Kɛ̃lɛ, shishitoo mla ni yɔɔ sɛɛ lɛ kɔɔ tawa ni ataa, asara ni afũɔ, ilɛtrɔnik zigaret ni nikotin yɔɔ mli, kɛ tawa henɔi krokomɛi lɛ ahe.