Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JUNE 2014

Mɛɛ Hiɛnɔkamɔ Yɔɔ Kɛhã Miblematsɛmɛi Lɛ?

Mɛɛ Hiɛnɔkamɔ Yɔɔ Kɛhã Miblematsɛmɛi Lɛ?

BE KO lɛ, sane ko ni sa hesusumɔ je kpo yɛ Korea adafitswaa wolo ko (The Chosun Ilbo) mli. Abi akɛ: “‘Shim Cheong, Oblayoo ni Nɔ Bɛ’ ni Lé Nɔ Ko Kwraa yɛ Yesu He—Ani Etee Hɛl?”

Sane nɛɛ ni je kpo yɛ adafitswaa wolo lɛ mli lɛ wo mɛi amli la waa ejaakɛ Shim Cheong ji oblayoo ko ni asumɔɔ esane waa yɛ Koreabii lɛ adesã mli, ejaakɛ ekɛ ewala fɔ̃ shi kɛye ebua etsɛ shwilafo lɛ. Mɛi pii ejie eyi yɛ afii babaoo ni eho lɛ amli yɛ nɔ ni efee nɛɛ hewɔ. Yɛ anɔkwale mli lɛ, Shim Cheong ebatsɔ nɔkwɛmɔnɔ ehã oblayei ni etuu amɛhe kwraa kɛkwɛɔ amɛfɔlɔi yɛ Korea lɛ.

Yɛ mɛi babaoo agbɛfaŋ lɛ, ejaaa akɛ abaapiŋ gbɔmɔ kpakpa tamɔ nɛkɛ yɛ hɛl akɛni ejeee Kristofonyo ni abaptisi lɛ lɛ hewɔ, ni mɛi pii po amli fuɔ. Nɔ hewɔ ji, mɛi kɛɔ akɛ Shim Cheong he sane nɛɛ ba jeeŋmɔ dani Kristo he sane lɛ yashɛ amɛkrowa lɛ.

Abi osɔfo ko sane yɛ sane nɛɛ mli akɛ, ani mɛi ni naaa hegbɛ akɛ amɛaakase Yesu he nii dani amɛgboi lɛ fɛɛ baaya hɛl la mli? Te ehã hetoo ehã tɛŋŋ? Ekɛɛ akɛ, “Wɔlé. Wɔsusuɔ kɛkɛ akɛ ekolɛ Nyɔŋmɔ baaje gbɛ ko ahã [mɛi ni tamɔ nakai lɛ].”

AOMƆNII KƐHÃ YIWALAHEREMƆ

Niiamlitaomɔ wolo ko (The New Catholic Encyclopedia) wie akɛ: “Baptisimɔ he miihia kɛhã yiwalaheremɔ. Kristo diɛŋtsɛ wie akɛ, kɛji ajɛɛɛ nu kɛ Mumɔ Krɔŋkrɔŋ lɛ mli afɔɔɔ mɔ ko lɛ, enyɛŋ Nyɔŋmɔ Maŋtsɛyeli lɛ mli ebote (Yohane 3:5).” Enɛ hewɔ lɛ, mɛi komɛi heɔ yeɔ akɛ, akɛ mɛi ni gboiɔ ni abaptisiko amɛ lɛ woɔ hɛl la mli loo apiŋɔ amɛ yɛ gbɛ ko nɔ yɛ amɛgbele sɛɛ.

Kɛ̃lɛ, mɛi pii yɛ ni susuɔ akɛ nilee bɛ mli akɛ abaaná susumɔ ni tamɔ nakai. Gbɔmɛi akpekpei abɔ egboi ni amɛlé Biblia lɛ he nɔ ko kwraa. Ani esa akɛ apiŋ amɛ kɛya naanɔ? Mɛni Biblia lɛ kɛɔ yɛ sane nɛɛ he?

HIƐNƆKAMƆ NI AWO HE SHI YƐ BIBLIA LƐ MLI

Biblia lɛ tsɔɔ faŋŋ akɛ Nyɔŋmɔ ekuŋ ehiɛ eshwieŋ mɛi ni hi shi ni lé akɛ esa akɛ amɛfee esuɔmɔnaa nii lɛ anɔ. Bɔfoi lɛ Asaji 17:30 lɛ maa nɔ mi ehãa wɔ akɛ: “Bei ní aleee lɛ Nyɔŋmɔ eku ehiɛ efɔ̃ nɔ.” Mɛɛ hiɛnɔkamɔ Biblia lɛ tsɔɔ akɛ eyɔɔ kɛhã mɛi ni leee Nyɔŋmɔ he nɔ ko ni egboi lɛ?

Mɛni Yesu shiwoo akɛ: “Okɛ mi aaahi Paradeiso!” lɛ tsɔɔ?

Abaanyɛ ana hetoo lɛ yɛ nɔ ni Yesu kɛɛ ojotswalɔi ni asɛŋ amɛ afata ehe lɛ ateŋ mɔ kome lɛ mli. Ojotswalɔ lɛ kɛɛ Yesu akɛ: “Kaimɔ mi, be ni oooba yɛ omaŋtsɛyeli lɛ mli lɛ!” Mɛni Yesu kɛɛ lɛ? “Lɛɛlɛŋ, miikɛɛo akɛ: Ŋmɛnɛ okɛ mi aaahi Paradeiso!”Luka 23:39-43.

Ani Yesu miiwo nuu lɛ shi akɛ ebaaya ŋwɛi? Dabi. Ajɛko nu kɛ mumɔ mli ‘afɔko’ nuu lɛ “ekoŋŋ,” ni ji taomɔnii kɛhã ŋwɛi Maŋtsɛyeli lɛ mlibotemɔ. (Yohane 3:3-6) Nɔ ni Yesu tsɔɔ lɛ ji, ojotswalɔ lɛ baahi shi ekoŋŋ yɛ Paradeiso! Akɛni ojotswalɔ lɛ ji Yudafonyo hewɔ lɛ, eeenyɛ efee akɛ ele Paradeiso, ni ji Eden abɔɔ ni awie he yɛ klɛŋklɛŋ wolo ni jeɔ Biblia lɛ shishi lɛ mli lɛ he sane. (1 Mose 2:8) Yesu shiwoo lɛ hã ená hiɛnɔkamɔ akɛ abaatee lɛ shi kɛba Paradeiso ni abaaku sɛɛ akɛba shikpɔŋ lɛ nɔ ekoŋŋ lɛ mli.

Yɛ anɔkwale mli lɛ, Biblia lɛ woɔ shi akɛ, ‘abaatee mɛi ni ja kɛ mɛi ni ejaaa fɛɛ shi.’ (Bɔfoi lɛ Asaji 24:15) “Mɛi ni ejaaa” lɛ ji mɛi ni efeee Nyɔŋmɔ suɔmɔnaa nii, akɛni amɛleee lɛ hewɔ. Yesu baatee ojotswalɔ ni ejaaa ni kɛ lɛ wie lɛ kɛ mɛi akpekpei abɔ krokomɛi ni gboi ni efeee Nyɔŋmɔ suɔmɔnaa nii yɛ lé ni amɛleee lɛ hewɔ lɛ ashi. Kɛkɛ lɛ, yɛ shikpɔŋ nɔ Paradeiso lɛ mli lɛ, atsɔɔ amɛ nɔ ni ji Nyɔŋmɔ suɔmɔnaa nii, ni amɛbaaná hegbɛ lɛ kɛtsɔɔ akɛ amɛmiisumɔ Nyɔŋmɔ kɛtsɔ ekitai lɛ anɔ ni amɛaaye lɛ nɔ.

 BE NI ATEE MƐI NI EJAAA LƐ ASHI

Kɛ́ atee mɛi ni ejaaa lɛ ashi lɛ, ani abaadamɔ amɛtsutsu nifeemɔi lɛ anɔ akojo amɛ? Dabi. Romabii 6:7 lɛ kɛɔ akɛ: “Mɔ ni egbo lɛ, abu lɛ bem kɛjɛ esha lɛ mli.” Mɛi ni ejaaa lɛ ewo amɛhe esha lɛ he nyɔmɔ kɛtsɔ gboimɔ ni amɛgboi lɛ nɔ. No hewɔ lɛ, abaadamɔ nɔ ni amɛbaafee be ni atee amɛshi sɛɛ lɛ nɔ akojo amɛ, shi jeee nɔ ni amɛfee dani amɛgboi yɛ lé ni amɛleee lɛ hewɔ. Te amɛbaaná he sɛɛ amɛhã tɛŋŋ?

Yɛ gbohiiashitee lɛ sɛɛ lɛ, mɛi ni ejaaa lɛ baaná hegbɛ kɛkase Nyɔŋmɔ mla lɛ, ní abaajie lɛ kpo be ni agbele mfonirifeemɔŋ woji anaa lɛ. Kɛkɛ lɛ, akojo amɛ “bɔ ni sa amɛnitsumɔi lɛ,” kɛ́ amɛbo Nyɔŋmɔ mla lɛ toi loo amɛbooo toi. (Kpojiemɔ 20:12, 13) Yɛ mɛi ni ejaaa lɛ ateŋ mɛi babaoo agbɛfaŋ lɛ, enɛ ebafeŋ hegbɛ ni ji enyɔ, shi klɛŋklɛŋ hegbɛ ni amɛaaná kɛkase Nyɔŋmɔ he nii ni amɛfee esuɔmɔnaa nii koni amɛhi shi kɛya naanɔ yɛ shikpɔŋ lɛ nɔ.

Nɛkɛ Biblia tsɔɔmɔ nɛɛ eye ebua mɛi pii ni amɛná hemɔkɛyeli yɛ Nyɔŋmɔ mli ekoŋŋ. Yeong Sug ji amɛteŋ mɔ kome. Atsɔse lɛ akɛ Katoliknyo ni kɛ ejamɔ lɛ shwɛɛɛ kwraa. Eweku lɛ mli bii lɛ ateŋ mɛi komɛi ji osɔfoi. Akɛni eesumɔ ni etsɔ Katolik yei ni kɛ hii ehiii shi lɛ ateŋ mɔ kome hewɔ lɛ, eyahi he ni amɛhiɔ lɛ. Sɛɛ mli lɛ, akɛni nɔ ni yaanɔ yɛ jɛmɛ lɛ hã enijiaŋ je wui hewɔ lɛ, eshi jɛmɛ. Nɔ ni fe fɛɛ lɛ, ekpɛlɛɛɛ hɛl la tsɔɔmɔ lɛ nɔ, ejaakɛ enu he akɛ ejaaa akɛ abaapiŋ mɛi yɛ la mli, ni etsɔɔɔ suɔmɔ hu.

Kɛkɛ ni Yehowa Odasefonyo ko kɛ Biblia mli wiemɔi nɛɛ ni kɛɔ akɛ: “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko, ni amɛbɛ nyɔmɔwoo ko dɔŋŋ” lɛ tsɔɔ Yeong Sug kɛjɛ Biblia lɛ mli. (Jajelɔ 9:5) Odasefonyo lɛ ye ebua lɛ ni ená ele akɛ apiŋŋ eblematsɛmɛi lɛ yɛ hɛl la mli. Shi moŋ, amɛwɔ yɛ gbele mli ni amɛmiimɛ ni atee amɛ shi.

Akɛni Yeong Sug le akɛ mɛi babaoo yɛ ni nuko anɔkwale ni yɔɔ Biblia lɛ mli lɛ dã hewɔ lɛ, ejwɛŋ Yesu wiemɔi ni yɔɔ Mateo 24:14 lɛ nɔ. Jɛmɛ kɛɔ akɛ: “Aaashiɛ maŋtsɛyeli lɛ he sane kpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” Amrɔ nɛɛ eeshiɛ sane kpakpa lɛ ni eegba mɛi ehiɛnɔkamɔ ni yɔɔ miishɛɛ ni damɔ Biblia lɛ nɔ lɛ he sane.

“NYƆŊMƆ JEEE MƐI AHIƐŊKWƐLƆ”

Biblia lɛ kɛɔ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Enɛ ji jalɛsaneyeli ni nɔ bɛ ni wɔ fɛɛ wɔbaanyɛ wɔkpa gbɛ kɛjɛ Nyɔŋmɔ ni “sumɔɔ jalɛ kɛ jalɛsaneyeli” lɛ dɛŋ.Lala 33:5.