Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ APRIL 2014

Thomas Emlyn—Musubɔlɔ loo Anɔkwale lɛ Hefãlɔ?

Thomas Emlyn—Musubɔlɔ loo Anɔkwale lɛ Hefãlɔ?

NAMƆ ji Thomas Emlyn, ni mɛni hã efã anɔkwale lɛ he? Mɛni wɔbaanyɛ wɔkase kɛjɛ edɛŋ ni baanyɛ aye abua wɔ ŋmɛnɛ?

Kɛhã sanebimɔi nɛɛ ahetoo lɛ, esa akɛ wɔsusu saji ni tee nɔ yɛ England kɛ Ireland kɛjɛ afi 1600 afii lɛ anaagbee gbɛ kɛmɔ afi 1700 afii lɛ ashishijee gbɛ lɛ he fioo. Nakai beaŋ lɛ, England Sɔlemɔ lɛ yɛ hewalɛ waa yɛ mɛi anɔ. Protɛstantbii akui srɔtoi kɛ aŋkroaŋkroi komɛi ekpɛlɛɛɛ sɔlemɔ lɛ tsɔɔmɔi lɛ ekomɛi anɔ.

NAMƆ JI THOMAS EMLYN?

Nɛkɛ beaŋ afɔ Thomas Emlyn yɛ May 27, 1663, yɛ Stamford ni yɔɔ Lincolnshire, yɛ England lɛ. Be ni eshiɛ yɛ sɔlemɔ lɛ mli klɛŋklɛŋ lɛ, no mli lɛ eye afii 19. Sɛɛ mli lɛ, ebatsɔ osɔfo ehã yoo ablade ko yɛ London; ni fee sɛɛ lɛ, eshi kɛtee Belfast ni yɔɔ Ireland lɛ.

Be ni eyɔɔ Belfast lɛ, ebatsɔ osɔfo yɛ sɔlemɔ ko ni yɔɔ jɛmɛ kpokpaa lɛ nɔ lɛ mli. Be ni be shwie mli lɛ, Emlyn sɔmɔ akɛ osɔfo yɛ hei krokomɛi, ni Dublin fata he.

MƐNI HEWƆ AFOLƆ ENAA AKƐ EBƆ MUSU LƐ?

Yɛ no beaŋ lɛ, Emlyn kɛ hiɛdɔɔ miikase Biblia lɛ. Nibii ni ekase lɛ hã eyiŋ fee lɛ kɔshikɔshi yɛ Triniti tsɔɔmɔ lɛ he, tsɛ be ko ni eho lɛ eheɔ eyeɔ. Be ni epɛi Sanekpakpai lɛ amli lɛ, ená nɔmimaa akɛ Sanekpakpai lɛ fĩɔ shishinumɔ hee ni ená lɛ sɛɛ.

Emlyn wɔlɔɔɔ ni mɔ ko aaanu nɔ ni ekpa shi ena lɛ he amrɔ nɔŋŋ. Kɛ̃lɛ, mɛi komɛi ni yɔɔ esɔlemɔ lɛ mli yɛ Dublin lɛ na akɛ ewieee Triniti lɛ he kɛ́ eeshiɛ. Akɛni ele akɛ mɛi ekpɛlɛŋ nɔ ni ekase lɛ nɔ hewɔ lɛ, eŋma akɛ: “Kɛ́ miná miwie misusumɔi lɛ ahe pɛ, mikpaaa shi akɛ maya nɔ masɔmɔ yɛ sɔlemɔ lɛ mli akɛ osɔfo.” Yɛ June 1702 lɛ, mɛi enyɔ komɛi ni kɛ lɛ sɔmɔɔ yɛ sɔlemɔ lɛ mli lɛ yanina lɛ ni amɛbi lɛ nɔ hewɔ ni kɛ́ eeshiɛ lɛ, ekɛ Triniti lɛ tsuuu nii lɛ. Emlyn kɛɛ amɛ akɛ, eheee Triniti tsɔɔmɔ lɛ eyeee dɔŋŋ, ni akɛ ebaashi sɔlemɔ lɛ.

Yɛ wolo nɛɛ ni Emlyn ŋma lɛ mli lɛ, ejɛ Ŋmalɛ lɛ mli etsɔɔ nɔ hewɔ ni anyɛŋ akɛɛ akɛ Yesu ji Nyɔŋmɔ Ofe lɛ

Gbii fioo komɛi asɛɛ lɛ, eshi Dublin ni yɔɔ Ireland lɛ ni etee England. Kɛ̃lɛ, otsii nyɔŋma sɛɛ lɛ, eku esɛɛ etee Dublin ni eyatsu saji komɛi ahe nii, ni oti ni ma ehiɛ ji ni efã kɛyahi London kwraa. Be ni eyɔɔ Dublin lɛ, ebɔ mɔdɛŋ akɛ eeefã esusumɔi lɛ ahe kɛtsɔ wolo ko (An Humble Inquiry Into the Scripture-Account of Jesus Christ) ni eŋma lɛ nɔ. Yɛ wolo nɛɛ mli lɛ, ejɛ Ŋmalɛi lɛ amli etsɔɔ faŋŋ akɛ Yesu nyɛŋ afee Nyɔŋmɔ Ofe lɛ nɔŋŋ. Enɛ hã etsutsu sɔlemɔ ni yɔɔ Dublin lɛ mli bii lɛ amli wo la waa. Aŋma wolo kɛyabɔ onukpai lɛ amaniɛ.

Amɔ Emlyn ni akɛ lɛ tee saneyelihe ni fe fɛɛ (Queen’s Bench Court) ni yɔɔ Dublin lɛ yɛ June 14, 1703, koni eyajie enaa. Emlyn wie yɛ wolo ko (True Narrative of the Proceedings) ni eŋma lɛ mli akɛ, “Afolɔ minaa akɛ miŋma wolo ko ni mihã akala, ni akɛ yɛ nakai wolo lɛ mli lɛ, miwie musubɔɔ kɛ mɔheguɔgbee wiemɔi, kɛ wiemɔi krokomɛi kɛtsɔɔ veveeve akɛ Yesu Kristo kɛ Nyɔŋmɔ ni ji Tsɛ lɛ  yeee egbɔ.” Sane ni aye lɛ ejaaa, ejaakɛ dani abaaye sane lɛ po lɛ, no mli lɛ abua momo. Ireland Sɔlemɔ lɛ mli osɔfoi kpawo fata kojolɔi lɛ ahe kɛye sane lɛ. Aŋmɛɛɛ Emlyn gbɛ ni efã ehe. Richard Levins, ni eji Ireland kojolɔ ko ni ehe gbɛ́i waa lɛ, kɛɛ Emlyn akɛ abaafee lɛ butuu “tamɔ klaŋ ko ni mla ebuuu ehe ni naaa milɛloo eye hu.” Be ni agbe saneyeli lɛ naa lɛ, Richard Pyne, ni eji Ireland Kojolɔ Nukpa lɛ, kɛɛ mɛi ni baabua sane lɛ akɛ kɛ́ amɛbuaaa sane lɛ taakɛ akpɛ mli momo lɛ, “onukpai lɛ kɛ osɔfoi lɛ kɛ amɛ baakpe,” ekolɛ nɔ ni etsɔɔ lɛ ji akɛ abaagbala amɛtoi jogbaŋŋ.

“Miina nɔ yɛ nɔ ni mibuɔ akɛ eji [Nyɔŋmɔ] anɔkwale lɛ kɛ enunyam lɛ hewɔ.”—Thomas Emlyn

Be ni abu Emlyn fɔ lɛ, mɔ ni damɔ Ireland nɔyeli lɛ najiaŋ yɛ saneyeli lɛ mli lɛ kɛɛ lɛ akɛ egbala ehe sɛɛ. Emlyn kpoo akɛ eeefee nakai. Agbe lɛ shika gbele, ni akɛɛ lɛ akɛ abaawo lɛ tsuŋ afi kome. Shi akɛni enyɛɛɛ ewo shika lɛ hewɔ lɛ, ehi tsũ lɛŋ afii enyɔ kɛyashi enaanyo ko yakpa onukpai lɛ fai koni amɛtse shika lɛ nɔ. Ajie Emlyn yɛ July 21, 1705. Bɔ ni ashwie ehiɛ shi lɛ hã ewie wiemɔi ni atsɛ yisɛɛ yɛ shishijee lɛ, akɛ: “Miina nɔ yɛ nɔ ni mibuɔ akɛ eji [Nyɔŋmɔ] anɔkwale lɛ kɛ enunyam lɛ hewɔ.”

Emlyn fã eyahi London, ni jɛmɛ ji he ni ekɛ Biblia he nilelɔ kroko ni atsɛɔ lɛ William Whiston lɛ yakpe yɛ. Anyaŋe nuu nɛɛ yɛ wolo ko ni ekala ni kɔɔ nɔ ni esusuɔ akɛ no ji Biblia lɛ mli anɔkwale lɛ hewɔ. Whiston ná bulɛ ehã Emlyn, ni ewie akɛ lɛ ji “‘mɔ klɛŋklɛŋ kɛ mɔ titri ni kpɛlɛ tsutsu kristojamɔ’ nɔ.”

MƐNI HÃ EKPOO TRINITI TSƆƆMƆ LƐ?

Taakɛ eji yɛ William Whiston kɛ nilelɔ kroko ni abuɔ waa ni atsɛɔ lɛ Isaac Newton lɛ gbɛfaŋ lɛ, Emlyn hu na akɛ Biblia lɛ fĩii Triniti tsɔɔmɔ lɛ, ni aŋma yɛ Atanasia Jajemɔ lɛ mli lɛ, sɛɛ. Etsɔɔ mli akɛ: “Nii ahe ni misusu jogbaŋŋ, kɛ Ŋmalɛ krɔŋkrɔŋ lɛ kasemɔ, . . . hã mina akɛ nilee yɛ mli . . . akɛ matsake susumɔ ni mihiɛ yɛ Triniti tsɔɔmɔ lɛ, ni be ko ni eho lɛ mikpɛlɛɔ nɔ lɛ he.” Emu sane naa akɛ “Yesu Kristo Tsɛ kɛ e-Nyɔŋmɔ lɛ pɛ ji Ofe.”

Mɛni hã Emlyn mu sane naa nakai? Ena ŋmalɛi babaoo ni tsɔɔ akɛ esoro Yesu yɛ e-Tsɛ lɛ he. Ŋmalɛi ni ena lɛ ekomɛi nɛ (saji ni Emlyn wie yɛ ŋmalɛi nɛɛ ahe lɛ ji nɔ ni akpa lɛ):

  •  Yohane 17:3: “Awieee Kristo he kɔkɔɔkɔ akɛ lɛ ji Nyɔŋmɔ kome nɛɛ, loo akɛ enɔ kwɔ aahu akɛ lɛ pɛ ji Nyɔŋmɔ.” Tsɛ lɛ pɛ ji “anɔkwa Nyɔŋmɔ kome lɛ.”

  •  Yohane 5:30: “Bi lɛ efeee nɔ ni lɛ diɛŋtsɛ esumɔɔ, shi moŋ nɔ ni Tsɛ lɛ sumɔɔ.”

  •  Yohane 5:26: “Tsɛ lɛ ji mɔ ni hã [Bi] lɛ Wala.”

  •  Efesobii 1:3: “Afɔɔ Yesu Kristo tsɛmɔ akɛ Nyɔŋmɔ Bi, shi wɔnuko ni aatsɛ Tsɛ lɛ akɛ Nyɔŋmɔ Tsɛ pɛŋ, tsɛbelɛ afɔɔ lɛ tsɛmɔ akɛ wɔ-Nuŋtsɔ Yesu Tsɛ.”

Be ni Emlyn esusu nibii ni awie yɛ Yesu Kristo kɛ e-Tsɛ lɛ he lɛ ahe lɛ, ekɛ nɔmimaa wie akɛ: “Sane kome folo po bɛ Ŋmalɛ krɔŋkrɔŋ lɛ mli ni abaanyɛ akwa adamɔ nɔ akɛɛ akɛ Tsɛ lɛ, Bi lɛ, kɛ Mumɔ Krɔŋkrɔŋ lɛ fɛɛ lɛ, mɔ kome lɛ nɔŋŋ ni.”

MƐNI WƆBAANYƐ WƆKASE KƐJƐ MLI?

Ŋmɛnɛ lɛ, mɛi babaoo sheɔ gbeyei akɛ amɛaafã nɔ ni Ŋmalɛi lɛ tsɔɔ lɛ he. Shi Emlyn ná he miishɛɛ akɛ eeefã anɔkwale ni yɔɔ Biblia lɛ mli lɛ he. Ebi akɛ, “Kɛ́ esaaa akɛ mɔ ko wieɔ anɔkwalei ni he hiaa waa, ni ena faŋŋ yɛ Ŋmalɛ krɔŋkrɔŋ lɛ mli lɛ ahe lɛ, no lɛ, mɛni hewɔ esa akɛ ekane ni etao mli mɔ?” Emlyn tsɔɔɔ anɔkwale lɛ hiɛ ebuuu shi.

Nɔkwɛmɔnɔ ni Emlyn kɛ mɛi krokomɛi fee lɛ baanyɛ akanya wɔ ni wɔpɛi wɔmli wɔkwɛ akɛ, ani wɔbaasumɔ ni wɔfã anɔkwale lɛ he kɛ́ mɛi gbe wɔhe guɔ? Wɔ hu wɔbaanyɛ wɔbi wɔhe akɛ, ‘Mɛni ji nɔ ni he hiaa mi fe fɛɛ—hiɛnyam kɛ yijiemɔ ni maná kɛjɛ mikutsoŋbii lɛ adɛŋ loo anɔkwale ni yɔɔ Nyɔŋmɔ Wiemɔ lɛ mli lɛ he ni mafã?’