Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MARCH 2014

 SANEYITSO LƐ MLITSƆƆMƆ

Nɔ ni Nyɔŋmɔ Efee Eha Bo

Nɔ ni Nyɔŋmɔ Efee Eha Bo

“Ejaakɛ nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”Yohane 3:16.

Enɛ ji Biblia mli wiemɔi ni mɛi le waa lɛ ateŋ ekome, ni atsɛ ŋmalɛ nɛɛ yisɛɛ fe ŋmalɛi krokomɛi fɛɛ ni yɔɔ Biblia lɛ mli. Mɛi komɛi kɛɔ akɛ, ŋmalɛ ko ŋmalɛ ko bɛ ni “nyɛɔ etsɔɔ wekukpaa ni kã Nyɔŋmɔ kɛ adesai ateŋ kɛ bɔ ni adesai aaafee aná wala lɛ mli yɛ gbɛ ni yɔɔ faŋŋ ni yɔɔ kuku nɔ” tamɔ ŋmalɛ nɛɛ. Enɛ hewɔ lɛ, yɛ maji komɛi anɔ lɛ, mɛi pii ŋmalaa “Yohane 3:16” loo wiemɔi ni yɔɔ jɛmɛ lɛ yɛ henaabuamɔi ashishi, tsɔji ahe, gbogboi ahe, kɛ hei krokomɛi.

Wɔbaanyɛ wɔkɛɛ akɛ mɛi ni ŋmalaa wiemɔi nɛɛ yɛ nɔmimaa akɛ amɛbaaná naanɔ wala ejaakɛ Nyɔŋmɔ sumɔɔ amɛ. Ni bo hu? Mɛni Nyɔŋmɔ suɔmɔ lɛ baanyɛ afee aha bo? Ni kɛ́ okwɛ lɛ, mɛni Nyɔŋmɔ efee ni tsɔɔ akɛ esumɔɔ bo?

“NYƆŊMƆ SUMƆ JE LƐ”

Ewaaa haaa mɛi babaoo akɛ amɛaakpɛlɛ nɔ akɛ Nyɔŋmɔ ji mɔ ni bɔ je lɛ, nibii ni yɔɔ mli lɛ, kɛ adesai. Nibii ni yɔɔ wala mli lɛ yɛ hwanyaŋŋ ni afee amɛ jogbaŋŋ, ni enɛ tsɔɔ akɛ bɔ fɛɛ bɔ ni fee lɛ, mɔ ko ni yɔɔ nilee waa ji mɔ ni bɔ amɛ. Mɛi babaoo daa Nyɔŋmɔ shi daa akɛ eduro amɛ wala. Amɛle hu akɛ, eji jeee Nyɔŋmɔ kulɛ, amɛnyɛŋ amɛná kɔɔyɔɔ, nu, niyenii, kɛ nibii krokomɛi fɛɛ ni haa amɛhiɔ wala mli ni amɛnáa miishɛɛ lɛ.

Esa akɛ wɔda Nyɔŋmɔ shi, ejaakɛ nibii nɛɛ fɛɛ tsɔɔ akɛ lɛɛlɛŋ, Lɛ ji wɔ-Feelɔ kɛ wɔwala Yibaalɔ. (Lala 104:10-28; 145:15, 16; Bɔfoi lɛ Asaji 4:24) Kɛ́ wɔsusu nibii ni Nyɔŋmɔ feɔ ehaa wɔ bɔni afee ni wɔkã he wɔhi wala mli lɛ ahe lɛ, wɔbaana akɛ, Nyɔŋmɔ sumɔɔ wɔ waa diɛŋtsɛ. Bɔfo Paulo tsɔɔ mli akɛ: “[Nyɔŋmɔ] dɛŋ wala kɛ mumɔ kɛ nii fɛɛ jɛɔ  haa gbɔmɛi fɛɛ. Ejaakɛ emli nɔŋŋ wɔhiɛ kamɔ ni wɔtsiɔ wɔhe ni wɔyɔɔ yɛ.”Bɔfoi lɛ Asaji 17:25, 28.

Yɛ heloonaa nibii nɛɛ ni Nyɔŋmɔ kɛduroɔ wɔ lɛ sɛɛ lɛ, nibii krokomɛi yɛ ni tsɔɔ akɛ esumɔɔ wɔ. Bɔ ni ebɔ wɔ eha lɛ haa esoroɔ wɔ kwraa yɛ kooloi ahe. Ebɔ wɔ kɛ shwelɛ kɛ nyɛmɔ ni wɔkɛkase ehe nii, ni eyeɔ ebuaa wɔ koni wɔnyɛ wɔfee nakai. (Mateo 5:3) Enɛ hewɔ lɛ, adesai fɛɛ ni boɔ Nyɔŋmɔ toi lɛ yɛ hiɛnɔkamɔ akɛ, wɔsɛɛ lɛ, amɛbaatsɔmɔ Nyɔŋmɔ “bii,” kɛkɛ lɛ amɛbafata eweku lɛ he.Romabii 8:19-21.

Taakɛ aŋma yɛ Yohane 3:16 lɛ, Nyɔŋmɔ tsu e-Bi, ni ji Yesu, kɛba shikpɔŋ lɛ nɔ ni ebatsɔɔ wɔ e-Nyɔŋmɔ kɛ e-Tsɛ lɛ he nii, ni ebagbo eha wɔ. Enɛ tsɔɔ akɛ Nyɔŋmɔ sumɔɔ wɔ. Mɛi pii kɛɔ akɛ, anɔkwa, amɛlé nɔ hewɔ ni esa akɛ Yesu abagbo aha adesai. Ni agbɛnɛ hu, amɛnuuu nɔ hewɔ ni akɛɔ akɛ Yesu gbele lɛ tsɔɔ akɛ Nyɔŋmɔ sumɔɔ wɔ lɛ shishi. Mɛni hewɔ Yesu bagbo, ni te wɔnáa egbele lɛ he sɛɛ wɔhaa tɛŋŋ? Ha wɔkwɛ bɔ ni Biblia lɛ tsɔɔ sanebimɔi nɛɛ amli ehaa.

“EŊƆ EBI KOOME LƐ EHA”

Adesa ko adesa ko bɛ ni eye ehe kɛjɛ hela, gbɔlɛ, kɛ gbele he. Kɛlɛ, jeee nakai Yehowa Nyɔŋmɔ to akɛ ebalɛ. Eha klɛŋklɛŋ adesai ni ebɔ lɛ hiɛnɔkamɔ akɛ amɛbaanyɛ amɛhi shi kɛya naanɔ yɛ paradeiso mli yɛ shikpɔŋ lɛ nɔ. Shi ja amɛfee nɔ kome ko dã: Ja amɛbo lɛ toi. Nyɔŋmɔ kɛɛ amɛ akɛ, kɛ́ amɛbooo lɛ toi lɛ amɛbaagboi. (1 Mose 2:17) Klɛŋklɛŋ nuu lɛ eyabooo Nyɔŋmɔ toi, etse ehiɛ atua, ni enɛ kɛ gbele ba lɛ kɛ eshwiei fɛɛ anɔ. Bɔfo Paulo tsɔɔ mli akɛ, “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ.”Romabii 5:12.

Shi, Nyɔŋmɔ “sumɔɔ jalɛsaneyeli.” (Lala 37:28) Eyɛ mli akɛ ekuuu ehiɛ eshwieee klɛŋklɛŋ nuu lɛ atuatsemɔ lɛ nɔ moŋ, shi no etsɔɔɔ akɛ, belɛ, ebu adesai fɛɛ fɔ akɛ amɛpiŋ ni amɛgboi kɛya naanɔ yɛ nakai gbɔmɔ kome lɛ toigbele lɛ hewɔ. Moŋ lɛ, akɛni ekɛ shishitoo mla ni ji “akɛ wala atse wala” lɛ tsu nii hewɔ lɛ, eye jalɛ sane, ni eha adesai ni boɔ lɛ toi lɛ ená hiɛnɔkamɔ akɛ amɛbaahi shi kɛya naanɔ shi kome ekoŋŋ. (2 Mose 21:23, Ga Biblia hee.) Sanebimɔ lɛ ji, Te aaafee tɛŋŋ ni nine ashɛ adesa wala ni yeɔ emuu ni ŋmɛɛ Adam lɛ nɔ ekoŋŋ? Hetoo lɛ ji: Esa akɛ mɔ ko ni kɛ́ Adam yeɔ egbɔ kɛ ewala ni yeɔ emuu lɛ aha loo ekɛshã afɔle.

Yesu jɛ esuɔmɔ mli eba shikpɔŋ lɛ nɔ ni ekɛ ewala bafɔ̃ shi koni ekɛkpɔ̃ adesai kɛjɛ esha kɛ gbele mli

Ekã shi faŋŋ akɛ, akɛni Adam shwiei lɛ fɛɛ yeee emuu hewɔ lɛ, amɛteŋ mɔ ko nyɛɛɛ awo nyɔmɔ nɛɛ, shi Yesu nyɛ ewo. (Lala 49:7-10) Afɔ Yesu akɛ mɔ ko ni esha bɛ ehe, mɔ ko ni eye emuu tamɔ bɔ ni Adam ji beni efeko esha lɛ. Enɛ hewɔ lɛ, beni Yesu gbo lɛ, enyɛ ekpɔ̃ adesai kɛjɛ esha nyɔŋyeli shishi. Enɛ ni efee lɛ ha Adam kɛ Hawa shwiei lɛ ná hiɛnɔkamɔ akɛ amɛbaanyɛ amɛná wala ni eye emuu ni no mli lɛ Adam kɛ Hawa yɔɔ beni amɛfeko esha lɛ mli ŋɔɔmɔ. (Romabii 3:23, 24; 6:23)  Mɛni esa akɛ wɔfee koni wɔnyɛ wɔná suɔmɔ ni ajɛ mlihilɛ mli ajie kpo nɛɛ he sɛɛ?

“MƆ FƐƐ MƆ NI HEƆ ENƆ YEƆ LƐ”

Kɛ́ wɔkwɛ Yohane 3:16 lɛ, wɔnaa akɛ ákɛ wiemɔ ni ji “mɔ fɛɛ mɔ ni heɔ [Yesu] nɔ yeɔ lɛ hiɛ akakpata, shi moŋ ená naanɔ wala” lɛ tsu nii. Enɛ tsɔɔ akɛ kɛ́ ‘abaaduro wɔ naanɔ wala’ lɛ, ja wɔfee nɔ ko dã. Esa akɛ wɔhe Yesu nɔ wɔye ni wɔbo lɛ toi, no dani ‘wɔbaaná naanɔ wala.’

Ekolɛ obaabi ohe akɛ: ‘Ni mɛni enɛ kɔɔ yɛ toiboo he? Bɛ Yesu kɛɛ “mɔ fɛɛ mɔ ni heɔ enɔ yeɔ lɛ” baaná naanɔ wala?’ Hɛɛ, hemɔkɛyeli he miihia. Kɛlɛ, esa akɛ wɔkai akɛ, hemɔkɛyeli ni wɔɔná akɛ Yesu yɛ lɛ pɛ kɛkɛ faaa. Niiamlitaomɔ wolo ko (Vine’s Expository Dictionary of Old and New Testament Words) tsɔɔ mli akɛ, Hela wiemɔ ni Yohane kɛtsu nii lɛ tsɔɔ “he ni akɛfɔ̃ɔ nɔ ko nɔ kwraa, shi jeee ni aaakpɛlɛ nɔ kɛkɛ.” Kɛ́ mɔ ko baaná Nyɔŋmɔ hiɛ duromɔ lɛ, kpɛlɛmɔ ni eeekpɛlɛ nɔ akɛ Yesu ji Yiwalaherelɔ lɛ pɛ kɛkɛ faaa. Esa akɛ mɔ ni heɔ yeɔ lɛ amia ehiɛ waa ni ehi shi yɛ Yesu tsɔɔmɔi lɛ anaa. Kɛ́ mɔ ko kɛɛ eyɛ hemɔkɛyeli ni etsuuu he nii lɛ sɛɛnamɔ bɛ he. Biblia lɛ kɛɔ akɛ, “Hemɔkɛyeli ni nitsumɔi bɛ he lɛ ji hemɔkɛyeli gbonyo.” (Yakobo 2:26) Yɛ gbɛ kroko nɔ lɛ, esa akɛ mɔ ni heɔ yeɔ lɛ ajie hemɔkɛyeli ni eyɔɔ yɛ Yesu mli lɛ kpo, ni tsɔɔ akɛ, esa akɛ ehi shi yɛ ehemɔkɛyeli lɛ naa.

Beni Paulo gbalaa sane nɛɛ mli lɛ, ekɛɛ akɛ: “Kristo suɔmɔ lɛ nyɛɔ wɔnɔ, ni wɔkojoɔ nɛkɛ, akɛ, kɛ́ mɔ kome [Yesu] gbo mɛi fɛɛ yigbele lɛ, belɛ . . . egbo mɛi fɛɛ yigbele, koni mɛi ni hiɛ kãmɔ lɛ ahiɛ akakãmɔ miiha amɛ diɛŋtsɛ amɛhe dɔŋŋ, shi moŋ amɛhiɛ akãmɔ aha mɔ ni gbo ni atee lɛ shi ekoŋŋ aha amɛ lɛ.” (2 Korintobii 5:14, 15) Esa akɛ hiɛsɔɔ ni wɔyɔɔ kɛha Yesu afɔleshãa lɛ atsirɛ wɔ ni wɔfee tsakemɔi yɛ wɔshihilɛ mli, koni wɔkahi shi wɔha wɔhe dɔŋŋ, shi moŋ wɔhi shi wɔha Yesu, mɔ ni bagbo eha wɔ lɛ. Enɛ tsɔɔ akɛ, esa akɛ wɔhi shi yɛ nɔ ni Yesu tsɔɔ lɛ naa be fɛɛ be. Kɛ́ wɔfee tsakemɔi ni tamɔ nɛkɛ yɛ wɔshihilɛ mli lɛ, bɔ fɛɛ bɔ ni fee lɛ, ebaasa wɔjeŋba, wɔyiŋkpɛi, kɛ nɔ fɛɛ nɔ ni wɔfeɔ lɛ he. Mɛni mɛi ni heɔ Yesu nɔ amɛyeɔ ni amɛjieɔ hemɔkɛyeli ni amɛyɔɔ yɛ emli lɛ kpo lɛ baaná?

“HIƐ AKAKPATA, SHI MOŊ ENÁ NAANƆ WALA”

Yohane 3:16 lɛ naagbee fã lɛ mli lɛ, wɔkaneɔ shi ni Nyɔŋmɔ ewo mɛi ni yɔɔ hemɔkɛyeli yɛ kpɔmɔ he gbɛjianɔ ni eto lɛ mli ni hiɔ shi yɛ etaomɔ nii anaa lɛ he sane. Nyɔŋmɔ eto eyiŋ akɛ ehaŋ anɔkwafoi nɛɛ ‘ahiɛ akpata, shi moŋ amɛbaaná naanɔ wala.’ Kɛlɛ, hiɛnɔkamɔi srɔtoi yɛ kɛha mɛi ni baaná Nyɔŋmɔ suɔmɔ lɛ he sɛɛ lɛ.

Yesu wo kuu kome shi akɛ amɛbaaná naanɔ wala yɛ ŋwɛi. Ekɛɛ ekaselɔi anɔkwafoi lɛ akɛ eeya ni eyasaa he ko eto amɛ koni amɛ kɛ lɛ aye nɔ yɛ anunyam mli. (Yohane 14:2, 3; Filipibii 3:20, 21) Mɛi ni abaatee amɛshi kɛya ŋwɛi lɛ ‘baatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.’Kpojiemɔ 20:6.

Kristo sɛɛnyiɛlɔi fioo komɛi pɛ baaná hegbɛ nɛɛ. Yesu kɛɛ akɛ: ‘Kaashe gbeyei, asafoku bibioo; ejaakɛ nyɛtsɛ lɛ yɛ he tsuijurɔ akɛ eeeŋɔ maŋtsɛyeli lɛ eha nyɛ.’ (Luka 12:32) Mɛi enyiɛ feɔ “asafoku bibioo” nɛɛ? Kpojiemɔ 14:1, 4 lɛ kɛɔ akɛ: “Ni mikwɛ, ni naa, toobi lɛ [Yesu Kristo ni atee lɛ shi lɛ] damɔ Zion Gɔŋ [ni yɔɔ ŋwɛi] lɛ nɔ, ni mɛi akpei oha-kɛ-nyɔŋmai-ejwɛ-kɛ-ejwɛ ni aŋma egbɛ́i kɛ etsɛ gbɛ́i yɛ amɛhiɛŋtsei anɔ fata ehe. . . . Mɛnɛɛmɛi ji mɛi ni ahé kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ toobi lɛ.” Kɛ́ akɛ mɛi 144,000 lɛ to mɛi akpekpe toi akpei abɔ ni ehi shi pɛŋ lɛ ahe lɛ, amɛji “asafoku bibioo” ko. Atsɛ amɛ maŋtsɛmɛi, no hewɔ lɛ namɛi anɔ amɛbaaye?

Yesu wie kuu ni ji enyɔ ni yeɔ anɔkwa ni baaná ŋwɛi Maŋtsɛyeli lɛ he sɛɛ lɛ he. Ewie yɛ Yohane 10:16 lɛ akɛ: “Miyɛ tooi krokomɛi ni jɛɛɛ tooi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni tooi lɛ fee kuu kome kɛ kwɛlɔ kome.” “Tooi” nɛɛ yɛ hiɛnɔkamɔ akɛ amɛbaaná naanɔ wala yɛ shikpɔŋ lɛ nɔ—hiɛnɔkamɔ ni Adam  kɛ Hawa yɔɔ be ni abɔ amɛ lɛ nɔŋŋ. Te wɔfeɔ tɛŋŋ wɔleɔ akɛ shikpɔŋ lɛ nɔ ji he ni amɛbaahi?

Ŋmalɛi babaoo yɛ Biblia lɛ mli ni wieɔ Paradeiso mli shihilɛi ni baaba shikpɔŋ lɛ nɔ lɛ he. Kɛ́ ootao ni bo diɛŋtsɛ ona enɛ lɛ, ofainɛ gbelemɔ o-Biblia lɛ ni okane ŋmalɛi ni nyiɛ sɛɛ nɛɛ: Lala 37:9-11; 46:9, 10; 72:7, 8, 16; Yesaia 35:5, 6; 65:21-23; Mateo 5:5; Yohane 5:28, 29; Kpojiemɔ 21:4. Agba yɛ ŋmalɛi nɛɛ amli akɛ ta, hɔmɔ, hela, kɛ gbele, sɛɛ baafo. Ŋmalɛi nɛɛ gbaa wɔ be ni mɛi kpakpai kɛ miishɛɛ baamamɔ amɛ diɛŋtsɛ amɛshĩai, ni amɛfee amɛ diɛŋtsɛ amɛbɔi, ni amɛtsɔse amɛbii yɛ toiŋjɔlɛ mli lɛ he sane. * Ani osumɔŋ ni oná shihilɛ ni tamɔ nɛkɛ? Wɔyɛ yiŋtoi kpakpai ahewɔ ni esa akɛ wɔhe wɔye akɛ etsɛŋ shiwoi nɛɛ baaba mli.

NYƆŊMƆ EFEE NIBII PII EHA WƆ

Kɛ́ osusu nibii fɛɛ ni Nyɔŋmɔ efee eha bo kɛ adesai fɛɛ lɛ ahe lɛ, eyɛ faŋŋ akɛ Nyɔŋmɔ efee nibii pii eha wɔ momo. Eduro wɔ wala, nilee, gbɔmɔtsoŋ hewalɛ, kɛ nibii krokomɛi ni haa wɔhiɔ wala mli. Nɔ ni fe fɛɛ lɛ, taakɛ wɔkase yɛ Yohane 3:16 lɛ mli lɛ, kpɔmɔnɔ ni Nyɔŋmɔ kɛha kɛtsɔ Yesu, mɔ ni bagbo eha wɔ lɛ, nɔ lɛ, baanyɛ aha wɔná jɔɔmɔi kpelei.

Ekã shi faŋŋ akɛ, toiŋjɔlɛ kɛ shihilɛ kpakpa ni hela, ta, hɔmɔ, kɛ gbele, bɛ mli ni wɔbaaná mli ŋɔɔmɔ kɛya naanɔ lɛ, baaha wɔná miishɛɛ kɛ jɔɔmɔi ni bɛ naagbee. Obaaná jɔɔmɔi nɛɛ jio, onaŋ jio lɛ, fɛɛ damɔ onɔ. No hewɔ lɛ, sane ni esa akɛ obi ohe ji, Mɛni mifeɔ mihaa Nyɔŋmɔ?

^ kk. 24 Kɛ́ ootao ole gbalɛi nɛɛ ahe saji babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia lɛ Tsɔɔ Diɛŋtsɛ? yitso 3 lɛ mli.

Ekrokromɛi Hu Nɛ

Mɛni Ji Nyɔŋmɔ Yiŋtoo Kɛhã Shikpɔŋ Lɛ?

Ani Nyɔŋmɔ yiŋtoo akɛ ebaahã shikpɔŋ lɛ atsɔ paradeiso lɛ baaba mli lɛɛlɛŋ? Kɛ́ nakai lɛ, mɛɛ be?