Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ FEBRUARY 2014

 BIBLIA LƐ TSAKEƆ MƐI

Shi ni Awo akɛ Shikpɔŋ lɛ Baatsɔ Paradeiso lɛ Tsake Mishihilɛ!

Shi ni Awo akɛ Shikpɔŋ lɛ Baatsɔ Paradeiso lɛ Tsake Mishihilɛ!
  • BE NI AFƆ LƐ: 1974

  • MAŊ NƆ NI EJƐ: LATVIA

  • MƆ NI EJI TSUTSU: EKƐ EHE WO MOTO FOIDAMƆ NI YƆƆ OSHARA MLI

MITSUTSU SHISHILƐ:

Afɔ mi yɛ Riga, ni ji Latvia maŋtiase lɛ mli. Minyɛ ji mɔ ni tsɔse mi kɛ minyɛmiyoo nukpa lɛ. Eyɛ mli akɛ awo yaa Roman moŋ, shi jamɔŋ gbii juji anɔ pɛ wɔyaa sɔlemɔ. Kɛjɛ migbekɛbiiashi lɛ miheɔ miyeɔ akɛ mɔ ko yɛ ni nɔ kwɔ fe adesai, shi beni mibatsɔ oblanyo lɛ, nibii krokomɛi bahe mijwɛŋmɔ.

Beni midaa lɛ, awo yɔse akɛ migbɛɔ nibii ni minyɛɔ mitsaraa ekoŋŋ. Akɛni nibii babaoo yɛ shĩa lɛ mli ni manyɛ magbɛ hewɔ lɛ, kɛ́ awo baashi mi yɛ shĩa lɛ, etsui enyɔɔɔ emli kwraa. No hewɔ lɛ, ehe nɔ ko ni gbekɛbii kɛshwɛɔ ni anyɛɔ atsaraa ni agbɛɔ ekoŋŋ eha mi. Kɛ́ miigbɛ ni miitsara lɛ, mináa miishɛɛ waa. Ni enɛ ha mihe sa waa yɛ nɔ kroko ni minyaa he waa lɛ mli, no ji mototamɔ. Awo yaŋma migbɛ́i kɛha moto foidamɔ ko ni atsɛɔ lɛ Zelta Mopēds lɛ. Beni mije shishi lɛ, mitaa moto bibioo ni anyɛɔ ataa lɛ tamɔ okɔɔkpe lɛ kɛdaa foi lɛ, ni sɛɛ mli lɛ, mibɔi moto diɛŋtsɛ tamɔ.

Mijwɛŋmɔ mɔɔ nii oya, no hewɔ lɛ eyeee be ko ni mihe basa waa yɛ foidamɔ ni yɔɔ oshara nɛɛ mli. Miye klɛŋklɛŋ gbɛhe yɛ moto foidamɔi srɔtoi ni afee yɛ Latvia lɛ mli shii etɛ, ni miwo majimaji ateŋ moto foidamɔ ko ni atsɛɔ lɛ Baltic States Championship lɛ shii enyɔ.

BƆ NI BIBLIA LƐ TSAKE MISHIHILƐ:

Beni mitee mihiɛ waa yɛ foidamɔ nitsumɔ lɛ mli lɛ, mihemɔ, ni atsɛɔ lɛ Evija (ni sɛɛ mli lɛ ebatsɔ miŋa) lɛ kɛ Yehowa Odasefoi bɔi sharamɔ. Eyana Odasefoi lɛ awolo ko. Afee he ko fioo yɛ wolo lɛ shishigbɛ ni mɛi baanyɛ aŋmala nɔ nii kɛ́ amɛmiitao ni akɛ amɛ abakase Biblia lɛ. Eŋmala nɔ nii ni ekɛmaje. Etsɛɛɛ ni Odasefoi enyɔ komɛi basara lɛ ni amɛkɛ lɛ bɔi Biblia lɛ kasemɔ. Mibɛ naagba yɛ nɔ ni ekaseɔ lɛ he, shi no mli lɛ mibɛ jamɔ he miishɛɛ tsɔ.

 Sɛɛ mli lɛ, Odasefoi lɛ fɔ̃ mi nine ni mibafata Evija he beni akɛ lɛ kaseɔ Biblia lɛ koni mabo eko toi. Mikpɛlɛ ninefɔ̃ɔ lɛ nɔ, ni minya nɔ ni minu lɛ he waa. Nɔ kome ni ta mitsuiŋ waa ji, shi ni awo yɛ Biblia lɛ mli akɛ shikpɔŋ lɛ baatsɔ paradeiso lɛ. Akɛ nɔkwɛmɔnɔ lɛ, atsɔɔ mi ŋmalɛ ni yɔɔ Lala 37:10, 11 lɛ, ekɛɔ akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ, ni kɛ́ okwɛ eshihilɛhe lɛ, ebɛ jɛi. Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” Minya shiwoo nɛɛ he waa.

Miishɛɛ ni miná yɛ Biblia lɛ he lɛ tee nɔ eda. Mibayɔse akɛ nibii pii ni jamɔi lɛ tsɔɔ lɛ, amale ni. Nɔ ni tamɔɔɔ nakai lɛ, mina akɛ nilee yɛ nɔ ni Biblia lɛ tsɔɔ lɛ mli, ni eyɛ faŋŋ.

Beni miyaa nɔ mikaseɔ Biblia lɛ, mibana akɛ Yehowa buɔ wala waa, ni akɛ ejara wa waa kɛha lɛ. (Lala 36:10) Enɛ ha misusu moto foidamɔ lɛ he shii enyɔ; misumɔɔɔ ni mikɛ miwala woɔ oshara mli dɔŋŋ. No najiaŋ lɛ, mishwe akɛ mikɛ miwala baatsu nii yɛ gbɛ ni baawo Yehowa hiɛ nyam nɔ. Enɛ hewɔ lɛ, mibuuu gbɛ́ihemɔ, anunyam, kɛ miishɛɛ ni jɛɔ moto foidamɔ mli lɛ akɛ nɔ ko dɔŋŋ.

Mibana akɛ esa akɛ mabu wala ni Yehowa, ni ji Wala-Halɔ lɛ, kɛha mi lɛ he

Yɛ afi 1996 mli lɛ, mitee Yehowa Odasefoi amajimaji ateŋ kpee ko ni afee yɛ Tallinn ni yɔɔ Estonia lɛ eko. He ni afee kpee lɛ yɛ lɛ bɛŋkɛ shwɛmɔ he ko ni no mli lɛ mifɔɔ foidamɔ yɛ lɛ. Yɛ kpee lɛ shishi lɛ, mina akɛ mɛi lɛ jɛ maji srɔtoi babaoo amli, shi amɛbua amɛhe naa yɛ ekomefeemɔ kɛ toiŋjɔlɛ mli. Akɛ nɔkwɛmɔnɔ lɛ, beni nyɛmi yoo ko laaje ebaagi lɛ, misusu akɛ enaŋ kɔkɔɔkɔ. Shi eyeee be ko ni nyɛmi yoo ko na baagi lɛ ni ekɛbaha nɔtsɛ lɛ ni nɔ fɛɛ nɔ eshɛ yɛ mli. Efee mi naakpɛɛ waa! No dani mibanu shishi akɛ Odasefoi lɛ hiɔ shi yɛ nɔ ni Biblia lɛ tsɔɔ lɛ naa lɛɛlɛŋ. Mi kɛ Evija tee nɔ wɔkase nii, ni yɛ afi 1997 mli lɛ, abaptisi wɔ akɛ Yehowa Odasefoi.

BƆ NI MINÁ HE SƐƐ:

Minanemɛi komɛi egboi yɛ moto foidamɔ mli. Nɔ ni mikase yɛ Biblia lɛ mli lɛ ha mibana akɛ, esa akɛ mabu wala ni Yehowa, ni ji Wala-Halɔ lɛ, kɛha mi lɛ he. Ekolɛ enɛ ji nɔ ni ebaa miwala yi kɛbashi ŋmɛnɛ.

Mi kɛ Evija kɛ wɔbe fɛɛ esɔmɔ yɛ Yehowa Odasefoi anitsumɔhe nine ni yɔɔ Riga lɛ afii ejwɛ. Amrɔ nɛɛ, wɔmiikwɛ wɔbiyoo Alise, ni wɔmiiye wɔmiibua lɛ koni kɛ́ eda lɛ esɔmɔ Yehowa. Kɛfata he lɛ, gbi kome yɛ otsi fɛɛ otsi mli lɛ, miyaa woji ashishitsɔɔmɔ nitsumɔhe lɛ ni miyasaa tsɔji kɛ nibii krokomɛi ni efite yɛ jɛmɛ lɛ. Eŋɔɔ minaa waa akɛ mikɛ hesai ni mikase beni miji gbekɛ lɛ miitsu nɔ ko kpakpa! Miigbɛ nibii ni miitsara lolo.

Biblia lɛ ni mikase lɛ hewɔ lɛ, mi kɛ miweku lɛ ená hegbɛ akɛ wɔye anɔkwa Nyɔŋmɔ koome lɛ he odase, ni enɛ ji nɔ ko ni jara wa waa kɛha mi. Anɔkwa, shikpɔŋ nɔ paradeiso he shiwoo lɛ tsake mishihilɛ!