Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JANUARY 2014

 SANE KO NÍ ODASEFONYO KO KƐ MƆ KO GBA

Mɛni Hewɔ Nyɔŋmɔ Ŋmɛɔ Piŋmɔ Gbɛ?

Mɛni Hewɔ Nyɔŋmɔ Ŋmɛɔ Piŋmɔ Gbɛ?

Sane ni nyiɛ sɛɛ nɛɛ ji nɔkwɛmɔnɔ ni tsɔɔ sane ko ní Yehowa Odasefonyo ko kɛ mɔ ko baagba. Ŋɔɔ lɛ akɛ Odasefonyo ko ni atsɛɔ lɛ Michelle lɛ eyasara yoo ko ni atsɛɔ lɛ Sophia yɛ eshĩa.

TE NYƆŊMƆ NUƆ WƆPIŊMƆI LƐ AHE EHAA TƐŊŊ?

Michelle: Hɛloo, Sophia. Eŋɔɔ minaa akɛ mina bo yɛ shĩa.

Sophia: Mi hu nakai nɔŋŋ.

Michelle: Nyɛsɛɛ ni miba lɛ, wɔsusu bɔ ni Nyɔŋmɔ nuɔ wɔpiŋmɔi lɛ ahe ehaa lɛ he. * Owie akɛ eji sane ko ni miigba onaa be kplaŋŋ nɛ, titri lɛ kɛjɛ beni omami yaná lɔle oshara ni epila lɛ. Shi amrɔ nɛɛ, te omami yɔɔ tɛŋŋ?

Sophia: Bei komɛi lɛ ehi, bei komɛi hu ehiii. Shi ŋmɛnɛ lɛ ehi saŋŋ.

Michelle: Eŋɔɔ minaa waa akɛ ŋmɛnɛ lɛ eyɛ jogbaŋŋ. Ebɛ mlɛo akɛ abaakpee shihilɛ ni tamɔ nɛkɛ naa.

Sophia: Hɛɛ! Bei komɛi lɛ mibiɔ mihe akɛ, mɛɛ be epiŋmɔ nɛɛ baaba naagbee?

Michelle: Nakai ji bɔ ni mɔ fɛɛ mɔ baanu he. Obaakai akɛ, nyɛsɛɛ beni mibasara bo lɛ, mishi sanebimɔ ko miha bo, no ji “Kɛ́ Nyɔŋmɔ yɛ hewalɛ ni ebaanyɛ ekɛfo piŋmɔ sɛɛ lɛ, mɛni hewɔ efooo sɛɛ lɛ?”

Sophia: Hɛɛ, mikaiɔ.

Michelle: Dani wɔbaasusu hetoo ni Biblia lɛ kɛhaa lɛ he lɛ, masumɔ ni wɔkai wɔhe otii ni wɔsusu he nyɛsɛɛ lɛ fioo komɛi ahe.

Sophia: Ojogbaŋŋ.

Michelle: Nɔ kome ni wɔkase ji akɛ, nuu anɔkwafo ko ni hi shi yɛ Biblia beaŋ lɛ po eyanuuu nɔ hewɔ ni Nyɔŋmɔ ŋmɛɔ piŋmɔ gbɛ lɛ shishi. Kɛlɛ, Nyɔŋmɔ ewieee nuu nɛɛ hiɛ yɛ sane ni ebi lɛ hewɔ, ni ekɛɛɛ hu akɛ nuu lɛ hemɔkɛyeli faaa.

Sophia: No bafee susumɔ hee ko kwraa kɛha mi.

Michelle: Wɔkase hu akɛ Yehowa Nyɔŋmɔ sumɔɔɔ ni wɔpiŋɔ. Akɛ nɔkwɛmɔnɔ lɛ, Biblia lɛ kɛɛ akɛ beni ewebii lɛ hao lɛ, “lɛ hu ehao.” * Aso le ni wɔle akɛ kɛ́ wɔmiipiŋ lɛ Nyɔŋmɔ hu haoɔ lɛ haaa wɔtsui anyɔ wɔmli?

Sophia: Ehaa wɔtsui nyɔɔ wɔmli.

Michelle: Naagbee kwraa lɛ, wɔbana hu akɛ, kɛ́ wɔkwɛ hewalɛ kpele ni wɔ-Bɔlɔ lɛ yɔɔ lɛ, eyɛ nyɛmɔ ni ekɛbaafo piŋmɔi lɛ asɛɛ be fɛɛ be ni esumɔɔ.

Sophia: No ji nɔ ni minuuu shishi lɛ. Mɛni hewɔ Nyɔŋmɔ ŋmɛɔ gbɛ mɔ ni nibii gbohii nɛɛ fɛɛ yaa nɔ beni eyɛ hewalɛ ni ekɛbaaku naa lɛ?

NAMƆ NO MLI LƐ EWIEƆ ANƆKWALE LƐ?

Michelle: Kɛ́ wɔgbele kɛtee wolo ni jeɔ Biblia lɛ shishi, ni ji Mose Klɛŋklɛŋ Wolo lɛ wɔbaaná osanebimɔ lɛ hetoo. Ani ole Adam kɛ Hawa kɛ tso yibii ni agu amɛ yeli lɛ he sane lɛ?

 Sophia: Hɛɛ, atsɔɔ mi enɛ yɛ Sunday skul. Nyɔŋmɔ kɛɛ amɛ akɛ amɛkaye tso pɔtɛɛ ko nɔ yibii, shi amɛbooo toi, amɛye kɛ̃.

Michelle: Obɔ mɔdɛŋ waa. Agbɛnɛ ha wɔsusu shihilɛi ni ha Adam kɛ Hawa fee esha lɛ ahe. Nakai shihilɛi lɛ haa wɔnaa nɔ tuuntu hewɔ ni wɔpiŋɔ lɛ. Ofainɛ ni okane Mose Klɛŋklɛŋ Wolo lɛ yitso 3, kuku 1 kɛyashi 5 lɛ.

Sophia: Ekaneɔ akɛ: “Shi onufu le ŋaa fe ŋã nɔ kooloi fɛɛ ni Yehowa Nyɔŋmɔ fee lɛ, ni ekɛɛ yoo lɛ akɛ: Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ? Ni yoo lɛ kɛɛ onufu lɛ akɛ: Trom lɛ mli tsei ayibii lɛ eko wɔyeɔ; shi tso ni yɔɔ trom lɛ teŋ lɛ nɔ yibii lɛ ni Nyɔŋmɔ kɛɛ: Nyɛkayea eko, ni nyɛkataa he tete, koni nyɛkagboi. Ni onufu lɛ kɛɛ yoo lɛ akɛ: Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.”

Michelle: Oyiwaladɔŋŋ. Ha wɔsusu kukuji nɛɛ ahe fioo wɔkwɛ. Klɛŋklɛŋ lɛ, kadimɔ akɛ onufu ko kɛ yoo lɛ, ni ji Hawa wie. Biblia lɛ he kroko hu tsɔɔ akɛ Satan Abonsam diɛŋtsɛ ji mɔ ni no mli lɛ ewieɔ kɛtsɔɔ onufu lɛ nɔ lɛ. * Satan bi koni Hawa atsɔɔ lɛ akpɔ ni Nyɔŋmɔ ewo amɛ yɛ tso pɔtɛɛ ko he. Ani okadi toigbalamɔ ni Nyɔŋmɔ kɛɛ Adam kɛ Hawa baaná kɛ́ amɛye nakai tso lɛ nɔ yibii lɛ eko lɛ?

Sophia: Amɛbaagboi.

Michelle: Nakai pɛpɛɛpɛ. Agbɛnɛ Satan kɛ nibii ni ewie kɛshi sɛɛ lɛ folɔ Nyɔŋmɔ naa diɛŋtsɛ. Kadimɔ nɔ ni ekɛɛ: “Jeee gboimɔ nyɛaagboi.” Satan miitsɛ Nyɔŋmɔ amalelɔ!

Sophia: Misusu ko sane nɛɛ he nɛkɛ pɛŋ.

Michelle: Ni beni Satan tsɛ Nyɔŋmɔ amalelɔ lɛ, etee sane ko shi ni baabi ni be ashwie mli dani ana naa. Ole nɔ hewɔ?

Sophia: Hmm. Mikpaaa shi.

Michelle: Ojogbaŋŋ, ekolɛ manyɛ mikɛ enɛ afee he nɔkwɛmɔnɔ. Ŋɔɔ lɛ akɛ gbi ko lɛ, mibakɛɛ bo akɛ mihe wa kwraa fe bo. Mɛni obaafee kɛtsɔɔ akɛ mihe waaa?

Sophia: Efeɔ mi akɛ maka okpɔiaŋ makwɛ.

Michelle: Nakai pɛpɛɛpɛ. Ekolɛ, wɔbaatao nɔ ko ni tsii koni wɔkwɛ wɔteŋ mɔ ni baanyɛ awo. Anɔkwa, ewaaa kwraa akɛ abaana mɔ ni he wa.

Sophia: Mina nɔ ni otsɔɔ lɛ.

Michelle: Ni kɛ́ mikɛɛɛ bo akɛ mihe wa fe bo, shi mikɛɛ miyeɔ anɔkwa fe bo hu? No baawa fioo, aloo jeee nakai?

Sophia: Hɛɛ, misusuɔ nakai.

Michelle: Ejaakɛ, anɔkwayeli jeee nɔ ko tamɔ hewalɛ ni akɛ nifeemɔ kuku ko baaka akwɛ.

Sophia: Dabi.

Michelle: Anɔkwa, gbɛ pɛ ni abaanyɛ atsɔ nɔ ana enɛ naa ji ni abaamɛ ni be ashwie mli bɔ ni sa, koni mɛi akpa wɔyi enyɔ lɛ shi kɛna wɔteŋ mɔ ni yeɔ anɔkwa fe enaanyo.

Sophia: Nilee yɛ mli nakai.

Michelle: Agbɛnɛ ha wɔkwɛ sane ni wɔkane yɛ Mose Klɛŋklɛŋ Wolo lɛ mli lɛ mli ekoŋŋ. Aso Satan kɛɛ akɛ ehe wa fe Nyɔŋmɔ?

Sophia: Dabi.

Michelle: Kulɛ, oya nɔŋŋ ni Nyɔŋmɔ baaha ana akɛ ehe wa kwraa fe Satan. Moŋ lɛ, Satan tao atsɔɔ akɛ eyeɔ anɔkwa kwraa fe Nyɔŋmɔ. Yɛ gbɛ ko nɔ lɛ, ekɛɛ Hawa akɛ, ‘jeee anɔkwale Nyɔŋmɔ kɛɔ bo lɛ, mi moŋ miikɛɛ bo anɔkwale lɛ.’

Sophia: Sane lɛ moŋ nɛ!

Michelle: Nyɔŋmɔ jɛ enilee mli ena akɛ, gbɛ ni hi fe fɛɛ ni ebaatsɔ nɔ etsu sane lɛ he nii ji ní eha be ashwie mli bɔ ni sa. Naagbee lɛ, abaana mɔ ni ji anɔkwafo kɛ mɔ ni ji amalelɔ.

SANE KO NI HE HIAA WAA

Sophia: Shi, bɛ beni Hawa gbo nɔŋŋ lɛ, no ha ana akɛ Nyɔŋmɔ ji anɔkwafo?

Michelle: Yɛ gbɛ ko nɔ lɛ, nakai eji. Shi, nibii krokomɛi hu yɛ mpoa ni Satan tswa lɛ mli. Kwɛmɔ kuku 5 lɛ ekoŋŋ. Ani okadi nɔ kroko hu ni Satan kɛɛ Hawa lɛ?

 Sophia: Ekɛɛ kɛ́ Hawa ye nakai aduawa lɛ, ehiŋmɛi baagbele.

Michelle: Nakai, ni ákɛ ebaatsɔ ‘tamɔ Nyɔŋmɔ, ni ebaale ekpakpa kɛ efɔŋ.’ No hewɔ lɛ, Satan tao atsɔɔ akɛ Nyɔŋmɔ kɛ nɔ kpakpa ko miitee adesai.

Sophia: Mina nɔ ni otsɔɔ lɛ.

Michelle: No hu jeee sane ko ni esa akɛ atswa afɔ̃.

Sophia: Mɛni otaoɔ otsɔɔ lɛ?

Michelle: Satan kɛ ewiemɔi lɛ tsɔɔ akɛ, Hawa—kɛ agbɛnɛ hu, adesai fɛɛ—baanyɛ ahi shi ni Nyɔŋmɔ nɔyeli he ehiaaa amɛ. Yɛ enɛ hu mli lɛ, Yehowa le akɛ gbɛ ni hi jogbaŋŋ ni ebaatsɔ etsu mpoatswaa nɛɛ he nii ji ni eŋmɛ Satan gbɛ koni akwɛ akɛ nɔ ni Satan wie lɛ yɛ mli lo. No hewɔ lɛ, Nyɔŋmɔ eŋmɛ Satan gbɛ koni eye je nɛɛ nɔ kɛyashi be ko. Enɛ hewɔ wɔnaa piŋmɔi babaoo yɛ je lɛŋ nakai lɛ—ejaakɛ Satan ji je lɛ nɔyelɔ diɛŋtsɛ shi jeee Nyɔŋmɔ. * Shi sane kpakpa ko yɛ.

Sophia: Mɛni ji no?

Michelle: Biblia lɛ haa wɔnaa anɔkwalei enyɔ komɛi ni sa kadimɔ waa yɛ Nyɔŋmɔ he. Klɛŋklɛŋ lɛ, kɛ́ wɔmiina nɔ lɛ, egbaa Yehowa naa waa. Akɛ nɔkwɛmɔnɔ lɛ, susumɔ Maŋtsɛ David wiemɔi ni aŋma yɛ Lala 31:7 lɛ he okwɛ. David na nɔ babaoo yɛ ewala shihilɛ mli, shi kwɛmɔ nɔ ni ekɛɛ Nyɔŋmɔ yɛ sɔlemɔ mli. Ofainɛ, obaasumɔ ni okane nakai ŋmalɛ lɛ?

Sophia: Ojogbaŋŋ. Ekaneɔ yɛ Ga Biblia Hee lɛ mli akɛ: “Mimli aaafilimi, ni manya yɛ osuɔmɔ ni sɛɛ efooo lɛ hewɔ, ejaakɛ ona minɔnaa lɛ, ni ole mihaomɔi lɛ.”

Michelle: No hewɔ lɛ, eyɛ mli akɛ David na nɔ yɛ shihilɛ mli moŋ, shi akɛni ele akɛ Yehowa naa shihilɛi fɛɛ ni etsɔɔ mli lɛ hewɔ lɛ etsui nyɔ emli. Ani le ni ole akɛ Yehowa naa nɔ fɛɛ nɔ ni yaa nɔ lɛ, ni enaa piŋmɔi tete ni wɔtsɔɔ mli ni adesai enaaa lɛ hu, haaa otsui anyɔ omli?

Sophia: Ehaa mitsui nyɔɔ mimli.

Michelle: Anɔkwale kroko ni sa kadimɔ waa yɛ Nyɔŋmɔ he ji, eŋmɛŋ gbɛ ni wɔna nɔ kɛya naanɔ. Biblia lɛ tsɔɔ akɛ etsɛŋ kwraa ni ekɛ Satan yiwalɛ nɔyeli lɛ baaba naagbee. Ni ebaajie nibii gbohii ni etee nɔ, ni piŋmɔ ni okɛ omami etsɔ mli lɛ fata he lɛ fɛɛ kɛya. Ani obaasumɔ ni maku misɛɛ maba wɔsɛɛ otsi koni mibatsɔɔ bo nɔ hewɔ ni wɔbaanyɛ wɔná nɔmimaa akɛ, etsɛŋ kwraa ni Nyɔŋmɔ baafo piŋmɔi fɛɛ asɛɛ lɛ? *

Sophia: Manya he waa.

Ani oyɛ Biblia mli sanebimɔ pɔtɛɛ ko ni miigba onaa? Ani oyiŋ etɛ̃ɛɛ bo yɛ Yehowa Odasefoi ahemɔkɛyelii kɛ jamɔŋ nifeemɔi ni amɛkɛ amɛhe woɔ mli lɛ ahe? Kɛ́ nakai lɛ, kaashashao shi akɛ obaabi Yehowa Odasefoi lɛ ateŋ mɔ ko. Ebaaŋɔɔ Odasefonyo lɛ naa akɛ ekɛ bo baasusu saji ni tamɔ nakai lɛ ahe.

Ekrokromɛi Hu Nɛ

Ani “Naagbee Gbii lɛ” Amli Wɔyɔɔ Lɛ?

Kanemɔ koni ona bɔ ni mɛi anifeemɔi kɛ amɛjeŋba maa nɔ mi akɛ wɔyɛ “naagbee gbii lɛ” ni Biblia lɛ gba fɔ̃ shi lɛ mli.