Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JANUARY 2014

 SANEYITSO LƐ MLITSƆƆMƆ | KƐ AGBO LƐ, HIƐNƆKAMƆ KO KWRAA BƐ?

Kɛ́ Agbo lɛ, No Etsɔɔɔ akɛ Hiɛnɔkamɔ Ko Kwraa Bɛ.

Kɛ́ Agbo lɛ, No Etsɔɔɔ akɛ Hiɛnɔkamɔ Ko Kwraa Bɛ.

Betania ji akrowa bibioo ko ni kɛ Yerusalem jɛkɛmɔ aaafee kilomitai 3. (Yohane 11:18) Otsii fioo ko dani Yesu baagbo lɛ, oshara ko ba akrowa nɛɛ mli. Yesu nanemɛi kpaakpa lɛ ateŋ mɔ kome ni atsɛɔ lɛ Lazaro lɛ he baye waa, ni trukaa lɛ egbo.

Klɛŋklɛŋ beni Yesu nu amaniɛbɔɔ lɛ, ekɛɛ ekaselɔi lɛ akɛ Lazaro ewɔ, ni eetao eya eyatsĩɛ lɛ yɛ wɔ lɛ mli. (Yohane 11:11) Shi Yesu kaselɔi lɛ eyanuuu nɔ ni etsɔɔ lɛ shishi, no hewɔ lɛ Yesu kɛɛ amɛ faŋŋ akɛ: “Lazaro egbo.”Yohane 11:14.

Beni afu Lazaro agbe naa lɛ, gbii ejwɛ sɛɛ lɛ, Yesu yashɛ Betania, ni ebɔ mɔdɛŋ akɛ ebaashɛje Marta, ni ji mɔ ni egbo lɛ nyɛmiyoo lɛ mii. Marta kɛɛ akɛ: “Eji oyɛ biɛ kulɛ, minyɛmi lɛ naaa agbo.” (Yohane 11:17, 21) Yesu to he eha lɛ akɛ: “Mi lɛ miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaakã.”Yohane 11:25.

“Lazaro ee, jee kpo!”

Bɔni afee ni ana akɛ nakai wiemɔi lɛ ji anɔkwale lɛ, Yesu tsi ebɛŋkɛ gbonyobu lɛ, ni ekɛ gbee ni wa bó akɛ: “Lazaro ee, jee kpo!” (Yohane 11:43) Nuu ni egbo lɛ je kpo, ni mɛi ni damɔ jɛmɛ lɛ fɛɛ anaa kpɛ amɛhe pam.

No mli lɛ, kɛ́ hooo kwraa lɛ, Yesu etee mɛi enyɔ ashi momo. Yɛ ekome mli lɛ, etee oblayoo fioo ko shi kɛjɛ gbohii ateŋ—Yairo biyoo lɛ. Dani Yesu baatee oblayoo nɛɛ hu shi lɛ, ewie akɛ oblayoo lɛ ewɔ.Luka 8:52.

Kadimɔ akɛ Yesu kɛ Lazaro kɛ Yairo biyoo lɛ agbele lɛ to wɔ ni awɔɔ he. Nɔkwɛmɔnɔ ni sa jogbaŋŋ nɛ. Mɛni hewɔ? Kɛ́ mɔ ko wɔ lɛ, eleee nɔ ni yaa nɔ, ni eji shihilɛ ni sa jogbaŋŋ ni tsɔɔ akɛ mɔ lɛ nuuu piŋmɔ loo nɔnaa ko kwraa he. (Jajelɔ 9:5; kwɛmɔ akrabatsa ni ji  “Gbele Tamɔ Wɔ ni Tsii” lɛ.) Yesu mra beaŋ kaselɔi lɛ nu shihilɛ mli ni gbohii lɛ  yɔɔ lɛ shishi. Wolo ko, (Encyclopedia of Religion and Ethics) kɛɛ akɛ: “Yesu sɛɛnyiɛlɔi lɛ nu gbele shishi akɛ eji wɔɔ, ni gbonyobu ji hejɔɔmɔhe . . . kɛha mɛi ni egboi yɛ hemɔkɛyeli lɛ mli lɛ.” *

Le ni wɔnáa wɔleɔ akɛ gbohii lɛ ewɔ yɛ gbohii abui amli, ni amɛnuuu piŋmɔ ko kwraa he lɛ haa wɔtsui nyɔɔ wɔmli. Belɛ wɔna nɔ ni baa wɔnɔ kɛ́ wɔgboi, no hewɔ lɛ esaaa akɛ wɔsheɔ gbeyei dɔŋŋ.

‘KƐJI GBƆMƆ GBO LƐ, ANI EHIƐ BAANYƐ AKÃ EKOŊŊ?’

Kɛ́ wɔná wɔɔ kpakpa ko wɔwɔ lɛ, wɔmii shɛɔ wɔhe waa, shi namɔ baasumɔ ni kɛ́ eyakã shi lɛ ekate shi dɔŋŋ? Ani wɔyɛ hiɛnɔkamɔ akɛ gbohii ni ewɔ yɛ gbohii abui amli lɛ baaku sɛɛ aba wala mli ekoŋŋ—taakɛ ebalɛ yɛ Lazaro kɛ Yairo biyoo lɛ agbɛfaŋ lɛ?

Beni Blematsɛ Hiob nu he akɛ eehe egbo lɛ, ebi nakai sane lɛ nɔŋŋ. Ebi akɛ: ‘Kɛji gbɔmɔ gbo lɛ, ani ehiɛ baanyɛ akã ekoŋŋ?’Hiob 14:14.

Beni ekɛ Nyɔŋmɔ Ofe lɛ wieɔ lɛ, Hiob ha lɛ diɛŋtsɛ esane lɛ hetoo ekɛɛ: “Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.” (Hiob 14:15) Hiob ná nɔmimaa akɛ Yehowa miikpa gbi ni ekɛbaatee etsuji anɔkwafoi lɛ ashi lɛ gbɛ waa diɛŋtsɛ. Ani no mli lɛ Hiob miishwe nɔ ko ni nyɛŋ mli aba? Dabida.

Gbohii ashi ni Yesu tee lɛ maa nɔ mi diɛŋtsɛ akɛ Nyɔŋmɔ ha Yesu hewalɛ yɛ gbele nɔ. Anɔkwa, Biblia lɛ kɛɔ akɛ amrɔ nɛɛ Yesu hiɛ “gbele naa samfei lɛ.” (Kpojiemɔ 1:18) No hewɔ lɛ, Yesu baagbele gbohii abui anaa, taakɛ efã akɛ akokolo tɛ lɛ kɛjɛ Lazaro gbonyobu lɛ naa lɛ.

Biblia lɛ wieɔ gbohiiashitee shiwoo nɛɛ he shii abɔ. Bɔfo ko wo gbalɔ Daniel shi akɛ: “Ooojɔɔ ohe [obaagbo], ni ooote shi oyaná ogbɛfaŋnɔ yɛ gbii lɛ anaagbee lɛ mli.” (Daniel 12:13) Yesu kɛɛ Sadukifoi, ni ji Yudafoi ajamɔŋ hiɛnyiɛlɔi, ni heee gbohiiashitee he shiwoo lɛ amɛyeee lɛ akɛ: “Nyɛmiitɔ̃ naa, ejaakɛ nyɛleee ŋmalɛi lɛ kɛ Nyɔŋmɔ hewalɛ lɛ.” (Mateo 22:23, 29) Bɔfo Paulo kɛɛ akɛ: “Miyɛ Nyɔŋmɔ nɔ hiɛnɔkamɔ, akɛ gbohiiashitee baaba, ni jalɔi kɛ mɛi ni ejaaa fɛɛ baate shi.”Bɔfoi lɛ Asaji 24:15.

MƐƐ BE GBOHII LƐ BAATE SHI?

Mɛɛ be jalɔi kɛ mɛi ni ejaaa lɛ ashitee nɛɛ baaba? Bɔfo lɛ kɛɛ anɔkwafo Daniel akɛ ebaate shi “yɛ gbii lɛ anaagbee lɛ mli.” Marta hu hé eye akɛ enyɛmi nuu, Lazaro ‘baate shi yɛ gbohiiashitee lɛ mli yɛ naagbee gbi lɛ nɔ.’Yohane 11:24.

Biblia lɛ kɛ naagbee gbi nɛɛ to be ni Kristo baaye nɔ akɛ Maŋtsɛ lɛ he. Paulo ŋma akɛ: “Shi ja [Kristo] eye maŋtsɛ kɛyashi beyinɔ ni eeeŋɔ henyɛlɔi lɛ fɛɛ eto enajiashi. Naagbee henyɛlɔ ni abaafo esɛɛ ji gbele.” (1 Korintobii 15:25, 26) Enɛ ji yiŋtoo ni sa jogbaŋŋ hewɔ ni esa akɛ wɔsɔle ni Nyɔŋmɔ Maŋtsɛyeli lɛ aba, koni afee Nyɔŋmɔ suɔmɔnaa nii yɛ shikpɔŋ lɛ nɔ lɛ. *

Taakɛ Hiob ná le faŋŋ lɛ, Nyɔŋmɔ baatee gbohii lɛ ashi. Kɛ́ nakai be lɛ shɛ lɛ, abaafo gbele sɛɛ kwraa lɛɛlɛŋ. Ni mɔ ko biŋ ehe dɔŋŋ akɛ, ‘Kɛ́ agbo lɛ, hiɛnɔkamɔ ko kwraa bɛ?’

^ kk. 8 Aná Blɔfo wiemɔ ni atsɔɔ shishi kɛba Ga mli akɛ “gɔɔ” lɛ kɛjɛ Hela wiemɔ ni shishi ji “wɔɔhe” lɛ mli.

^ kk. 18 Kɛ́ ootao ole Nyɔŋmɔ Maŋtsɛyeli lɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ Yitso 8 lɛ.