Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JANUARY 2014

 SANEYITSO LƐ MLITSƆƆMƆ | KƐ AGBO LƐ, HIƐNƆKAMƆ KO KWRAA BƐ?

Piŋmɔ ni Gbele Kɛbaa

Piŋmɔ ni Gbele Kɛbaa

Gbele ji nɔ ko ni kɛ́ atsĩ tã lɛ, mɛi nyaaa he kwraa. Mɛi babaoo sumɔɔɔ ni amɛwieɔ he po. Shi bɔ fɛɛ bɔ ni fee lɛ, ebaasa wɔhe kɛ̃. Piŋmɔ ni gbele kɛbaa lɛ jaraa, ni eshaa mɔ waa.

Nɔ ko kwraa bɛ ni baanyɛ asaa wɔ kɛmɔ shi koni wɔnyɛ wɔkpee fɔlɔ, suɔlɔ, loo bi ko gbele naa. Gbele baanyɛ aba ni akpaaa gbɛ, loo eba kɛtsara nɔ. Ekɔɔɔ he eko bɔ ni sane lɛ ji lɛ, anyɛŋ ajo piŋmɔ ni gbele kɛbaa lɛ naa foi, ni kɛ́ eba lɛ, efiteɔ nii waa.

Antonio, ni papa gbo yɛ lɔle oshara mli lɛ tsɔɔ mli akɛ: “Etamɔ nɔ ni mɔ ko ebaŋamɔ owe lɛ shinai lɛ ni ekɛ samfei lɛ etee. Onyɛŋ oku osɛɛ kwraa kɛya owe lɛ be kukuoo po. Nɔ pɛ ni shwɛɔ bo ji nibii akaimɔ. Shihilɛ diɛŋtsɛ ni oyaje mli ji no. Eyɛ mli akɛ osumɔŋ ni ohe oye moŋ—akɛni osusuɔ akɛ ejaaa gbɛ lɛ hewɔ—kɛlɛ nɔ ko kwraa bɛ ni obaanyɛ ofee.”

Dorothy kɛ shihilɛ ni tamɔ nɛkɛ nɔŋŋ kpe beni eye afii 47 lɛ, ewu gbo ni ebatsɔ okulafo ni no ha ekpɛ mli akɛ ebaatao sanebimɔi komɛi ahetoi. Akɛ mɔ ko ni tsɔɔ gbekɛbii anii daa Hɔgbaa yɛ sɔlemɔ lɛ, eheee eyeee akɛ kɛ́ agbo lɛ, hiɛnɔkamɔ ko kwraa bɛ. Kɛlɛ, eleee nɔ̃ tuuntu ni baa yɛ gbele sɛɛ. Eyabi Anglican sɔlemɔ ni eyaa lɛ osɔfo lɛ akɛ: “Mɛni baa wɔnɔ kɛ́ wɔgboi?” Osɔfo lɛ to he akɛ, “Mɔ ko kwraa leee. Wɔbaamɛ kɛkɛ ni wɔkwɛ nɔ ni baaba.”

Ni wɔbaagboi lɛ, “wɔmɛ ni wɔkwɛ nɔ ni baaba” kɛkɛ? Te wɔbaafee tɛŋŋ wɔle akɛ kɛ́ agbo lɛ hiɛnɔkamɔ ko yɛ loo hiɛnɔkamɔ bɛ?