Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  December 2013

 TSƆƆMƆ OBII LƐ ANII

Yesu Kristo—Ani Ekã He Etsɔ Gbekɛ, Aloo Eji Maŋtsɛ?

Yesu Kristo—Ani Ekã He Etsɔ Gbekɛ, Aloo Eji Maŋtsɛ?

Kɛ́ eshɛ December lɛ, mɛi pii ni yɔɔ je lɛŋ hei srɔtoi lɛ naa Yesu akɛ abifao yɛ mfonirii kɛ ehenɔi lɛ amli. Ekã kooloi aniyenii anɔ, ni ji adeka agbo ko ni akɛ kooloi aniyenii woɔ mli lɛ mli. Shi ani esa akɛ wɔkai Yesu akɛ eji abifao pɛ? * Ha wɔkwɛ gbɛ ni he hiaa waa ni wɔbaatsɔ nɔ wɔkai Yesu. Wɔbaanyɛ wɔkase nɔ ko kɛjɛ nɔ ni ba tookwɛlɔi akuu ko nɔ lɛ adɛŋ, no mli lɛ amɛmiikwɛ amɛtooi gbi gbɛkɛ ko yɛ ŋanɔ he ko ni bɛŋkɛ Betlehem.

Trukaa kɛkɛ ni ŋwɛi bɔfo ko jie ehe kpo etsɔɔ tookwɛlɔi lɛ. Ekɛɛ amɛ akɛ: “Ŋmɛnɛ afɔ walaherelɔ ni ji Kristo, Nuŋtsɔ lɛ.” Bɔfo lɛ kɛfata he akɛ, amɛbaana Yesu “ni aŋɔ mama abala ehe, ni ekã kooloi aniyenii anɔ mli.” Amrɔ nɔŋŋ lɛ, ŋwɛi bɔfoi krokomɛi babaoo kpeleke shi kɛba ni amɛbɔi ‘Nyɔŋmɔ yi jiemɔ.’

Kɛ́ onu ni ŋwɛi bɔfoi miijie Nyɔŋmɔ yi lɛ, te obaanu he oha tɛŋŋ?— Tookwɛlɔi lɛ ná miishɛɛ pam! Amɛkɛɛ akɛ: “Nyɛhaa wɔyaa Betlehem koo, ni wɔyakwɛa sane ni eba” nɛɛ. Jɛmɛ amɛyana “Maria kɛ Yosef kɛ abifao lɛ ni ekã kooloi aniyenii anɔ̃ lɛ mli.”

Etsɛɛɛ kɛkɛ ni mɛi komɛi hu ba Betlehem, he ni Maria kɛ Yosef yɔɔ lɛ. Beni tookwɛlɔi lɛ gba amɛ nɔ ni eba lɛ, amɛ fɛɛ amɛnaa kpɛ amɛhe waa. Ani ebaaŋɔɔ onaa akɛ obaale nɛkɛ miishɛɛ sane nɛɛ?— Mɛi fɛɛ ni sumɔɔ Nyɔŋmɔ lɛ baasumɔ ni amɛle miishɛɛ sane nɛɛ. Agbɛnɛ ha wɔkwɛ nɔ hewɔ ni Yesu fɔmɔ lɛ ha mɛi pii ná miishɛɛ waa nakai lɛ. Ebaabi ni wɔle nibii ni ba beni Maria kɛ nuu ehiko shi lɛ.

Gbi ko lɛ, ŋwɛi bɔfo ko ni atsɛɔ lɛ Gabriel basara Maria. Ewo shi akɛ Maria baafɔ bi ko, ni ‘bi lɛ baatsɔ agbo, ni abaatsɛ lɛ Ŋwɛinyo lɛ bi.’ Gabriel kɛɛ akɛ: ‘Ebaaye maŋtsɛ kɛbaaya naanɔ, ni emaŋtsɛyeli lɛ sɛɛ efoŋ.’

 Maria tao koni ele bɔ ni enɛ baaba lɛ aha, akɛni no mli lɛ ekɛ nuu nako bɔlɛ daŋ lɛ hewɔ. No hewɔ lɛ, Gabriel ha Maria le akɛ: “Ŋwɛinyo lɛ hewalɛ aaabaha onɔ,” ni “bi krɔŋkrɔŋ lɛ hu ní ooofɔ́ lɛ, aaatsɛ́ lɛ Nyɔŋmɔ bi.” Nyɔŋmɔ Bi lɛ wala ni abaajie kɛjɛ ŋwɛi kɛbawo Maria musuŋ, koni eda akɛ abifao lɛ ji nɔ ko ni yɔɔ naakpɛɛ waa!

Ani ona mfonirii loo nitɛŋmɔi ni miitsɔɔ ‘hii nilelɔi’ etɛ ni kɛ tookwɛlɔi lɛ yasara abifao Yesu lɛ pɛŋ?— Kɛ́ eshɛ Blonya lɛ, anaa nibii nɛɛ waa. Shi enɛɛmɛi jeee anɔkwale. Nakai ‘hii nilelɔi’ lɛ ji ŋulamiiaŋkwɛlɔi diɛŋtsɛ, mɛi ni feɔ nibii ni Nyɔŋmɔ sumɔɔɔ. Ha wɔkwɛ nɔ ni ba beni amɛyashɛ jɛmɛ lɛ. Biblia lɛ kɛɔ akɛ: ‘Amɛtee shĩa lɛ, ni amɛna gbekɛ fioo lɛ kɛ enyɛ Maria.’ No beaŋ lɛ, Yesu jeee abifao ni kã kooloi aniyenii anɔ mli; eji gbekɛ fioo ni kɛ Yosef kɛ Maria yɔɔ shĩa!

Te fee tɛŋŋ ni ŋulamiiaŋkwɛlɔi lɛ yana Yesu lɛ?— Nɔ ko ni tamɔ ŋulami tsɔɔ amɛ gbɛ, shi ekɛ amɛ eyaaa Betlehem tɛ̃ɛ, moŋ ekɛ amɛ tee Maŋtsɛ Herode ŋɔɔ klɛŋklɛŋ. Biblia lɛ kɛɛ akɛ Herode tao Yesu koni egbe lɛ. Agbɛnɛ susumɔ enɛ he okwɛ. Namɔ osusuɔ akɛ lɛ eha nɔ ko ni fee tamɔ ŋulami lɛ tsɔɔ ŋulamiiaŋkwɛlɔi lɛ agbɛ kɛtee Herode ŋɔɔ lɛ?— Jeee Yehowa, anɔkwa Nyɔŋmɔ lɛ, moŋ lɛ ehenyɛlɔ, ni ji Satan Abonsam!

Ŋmɛnɛ lɛ, Satan haa mɛi náa susumɔ akɛ Yesu ji abifao ko ni nyɛɛɛ nɔ ko kwraa afee. Shi bɔfo Gabriel kɛɛ Maria akɛ: ‘Ebaaye maŋtsɛ, ni emaŋtsɛyeli lɛ sɛɛ efoŋ.’ Amrɔ nɛɛ, Yesu miiye nɔ akɛ Maŋtsɛ yɛ ŋwɛi, etsɛŋ ni ebaakpãta Nyɔŋmɔ henyɛlɔi fɛɛ ahiɛ. No ji nɔ ni esa akɛ wɔkai yɛ Yesu he, ni esa akɛ wɔkɛɛ mɛi krokomɛi hu.

^ kk. 3 Kɛ́ okɛ gbekɛ fioo ko miikane sane nɛɛ, ni oshɛ okadi ni ji (—) he lɛ, esa akɛ omɛ fioo, ní owo gbekɛ lɛ hewalɛ ni etsɔɔ ejwɛŋmɔ.

Ekrokomɛi Hu Nɛ

Mɛni Biblia lɛ Tsɔɔ Diɛŋtsɛ?

Namɔ Ji Yesu Kristo?

Kanemɔ koni ole nɔ hewɔ ni atsɛɔ Yesu akɛ shiwoo Mesia lɛ, he ni ejɛ, kɛ nɔ hewɔ ni eji Yehowa Bi koome lɛ.

Mɛni Biblia lɛ Tsɔɔ Diɛŋtsɛ?

Kpɔmɔnɔ Lɛ—Nyɔŋmɔ Nikeenii ni Fe Fɛɛ

Mɛni ji kpɔmɔnɔ lɛ? Mɛni obaanyɛ ofee koni oná he sɛɛ?