Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ OCTOBER 2013

 SANEYITSO LƐ MLITSƆƆMƆ | MƐNI HE BIBLIA LƐ WIEƆ?

Te Fee Tɛŋŋ Wɔba Shihilɛ Mli?

Te Fee Tɛŋŋ Wɔba Shihilɛ Mli?

Kɛ́ wɔbaawie lɛ kuku lɛ, wolo ni jeɔ Biblia lɛ shishi ni ji 1 Mose lɛ kɛ wiemɔi fioo nɛɛ tsɔɔ bɔ ni fee ni je lɛ ba shihilɛ mli lɛ mli akɛ: “Shishijee mli lɛ Nyɔŋmɔ bɔ ŋwɛi kɛ shikpɔŋ.” (1 Mose 1:1) Beni Nyɔŋmɔ bɔ tsei kɛ kooloi sɛɛ lɛ, ebɔ klɛŋklɛŋ adesai enyɔ lɛ, Adam kɛ Hawa. Esoro amɛ kwraa yɛ kooloi lɛ ahe ejaakɛ adesai yɛ Nyɔŋmɔ diɛŋtsɛ sui lɛ eko, ni nɔ ni fata sui nɛɛ ahe ji nihalamɔ mli heyeli. No tsɔɔ akɛ amɛbaatere amɛnifeemɔi ahe sɔ̃. Eji amɛkɛ Nyɔŋmɔ famɔi tsu nii kulɛ, amɛbaanyɛ amɛná Nyɔŋmɔ yiŋtoo kɛha adesai aweku lɛ mli gbɛfaŋnɔ; no ji akɛ ákɛ klɛŋklɛŋ fɔlɔi lɛ, amɛbaahi shi yɛ toiŋjɔlɛ kɛ emuuyeli mli yɛ shikpɔŋ lɛ nɔ kɛya naanɔ.

Kɛlɛ, ŋwɛi bɔfo loo mumɔŋ bɔɔ nɔ ko ŋɔ hegbɛ lɛ ni ekɛ adesai tsu nii kɛha lɛ diɛŋtsɛ esɛɛnamɔ. No ha ebatsɔ Satan, eshishi ji “Shiteekɛwolɔ.” Satan wie kɛtsɔ onufu nɔ kɛlaka Hawa akɛ, ebaanyɛ eye omanye ni Nyɔŋmɔ yelikɛbuamɔ ko kwraa he ehiaaa lɛ. Adam kɛ Hawa bo Satan toi, ni no fite amɛkɛ amɛ-Bɔlɔ lɛ teŋ wekukpaa lɛ. Jɛ amɛnihalamɔ gbonyo nɛɛ hewɔ lɛ, wala ni sɛɛ efooo lɛ ŋmɛɛ wɔklɛŋklɛŋ fɔlɔi lɛ, ni amɛkɛ esha, emuu ni ayeee, kɛ gbele ni anyɛɛɛ naa foi ajo lɛ tsɛŋe wɔ fɛɛ.

Oya nɔŋŋ kɛkɛ ni Nyɔŋmɔ ha ale eyiŋtoo ni ekɛbaajaje shihilɛ ni yɔɔ mɔbɔ nɛɛ, ni eha Adam shwiei ná hegbɛ koni amɛná wala ni sɛɛ efooo. Nyɔŋmɔ gba akɛ “seshi” ko—mɔ krɛdɛɛ ko—baakpãta Satan hiɛ kwraa ni ebaajie nɔnai fɛɛ ni Satan, Adam kɛ Hawa kɛba lɛ kɛya. (1 Mose 3:15) Namɔ baafee nakai “seshi” lɛ? Be baatsɔɔ.

Amrɔ nɛɛ, Satan ka he eebɔ mɔdɛŋ koni efite Nyɔŋmɔ yiŋtoo kpakpa lɛ. Esha kɛ yiwalɛ nifeemɔ gbɛ eshwa oyayaayai. Nyɔŋmɔ kpɛ mli akɛ ekɛ nu afua ko baakpãta efɔŋfeelɔi lɛ ahiɛ. Efã Noa ni ji jalɔ lɛ koni ekpɛ adeka ko—adeka agbo ko ni tɔɔ nu hiɛ—koni ekɛhere ekɛ eweku lɛ, kɛ kooloi ni afã lɛ akɛ ekɛ amɛ awo adeka lɛ mli lɛ ayiwala.

Yɛ Nu Afua lɛ sɛɛ afi kome lɛ, Noa kɛ eweku lɛ je kpo kɛjɛ adeka lɛ mli kɛba shikpɔŋ ni nɔ tse nɔ. Kɛlɛ, no mli lɛ “seshi” lɛ bako lolo.

Edamɔ 1 Mose yitsei 1-11; Yuda 6, 14, 15; Kpojiemɔ 12:9 nɔ.