Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ OCTOBER 2013

Mɛɛ Hewalɛ Kɔla Náa Yɛ Onɔ?

Mɛɛ Hewalɛ Kɔla Náa Yɛ Onɔ?

Kɛ́ ookwɛ nii lɛ, ohiŋmɛi kɛ ojwɛŋmɔ feɔ ekome kɛtsuɔ nii kɛbuaa saji anaa. Ŋɔɔ lɛ akɛ ona aduawa ko ni bɛŋkɛ bo, okpɛɔ oyiŋ akɛ obaaye loo oyeee. Okwɛɔ atatu lɛ ni onaa akɛ ŋmɛnɛ lɛ, nugbɔ enɛŋ. Oona niŋmai ni okaneɔ amrɔ nɛɛ, ni ootao akɛ onu shishi. Yɛ anɔkwale mli lɛ, kɔla náa onɔ hewalɛ yɛ nifeemɔi nɛɛ amli. Ani eji anɔkwale?

Aduawa ni ona lɛ kɔla loo esu yeɔ ebuaa bo ni onaa kɛji etsu ni ehi hu. Atatu lɛ su yeɔ buaa bo ni oleɔ kɔɔyɔɔ lɛ shikãmɔ. Amrɔ nɛɛ ni okaneɔ nibii nɛɛ ni aŋmala lɛ, bɔ ni esoro wolo lɛ kɔla yɛ niŋmai lɛ anɔ̃ lɛ he lɛ haa onaa niŋmaa lɛ jogbaŋŋ. Hɛɛ, ekolɛ ojwɛŋmɔ eyako nɔ pɛŋ, kɛlɛ be fɛɛ be lɛ, okɛ kɔla tsuɔ nii kɛyɔseɔ nibii ni onaa lɛ. Kɛfata he lɛ, kɔla náa bɔ ni onuɔ nii ahe ohaa lɛ nɔ hewalɛ.

BƆ NI KƆLA NÁA WƆNƆ HEWALƐ EHAA

Kɛ́ onyiɛ shwapo ko mli lɛ, onaa adekai, tsɛŋsii, kɛ rɔbai babaoo ni nibii yɔɔ mli, ní aye lɛ samai bɔ ni kɛ́ ona nɔŋŋ lɛ obaasumɔ ni ohé. Ole jio, oleee jio lɛ, mɛi ni tswaa nibii ahe adafi lɛ jeɔ gbɛ amɛhalaa kɔlai kɛ kɔla henɔi srɔtoi kɛfeɔ nibii bɔ ni kɛ́ ona lɛ, ekɔɔɔ he eko mɔ ni oji lɛ obaanya he. Nitsulɔi tamɔ shĩa saalɔi, nikpɛlɔi kɛ nitɛŋlɔi hu le akɛ kɔlai ni amɛhalaa kɛtsuɔ nii lɛ baanyɛ aná mɛi anɔ hewalɛ yɛ gbɛ ko nɔ.

He fɛɛ he kɛ bɔ ni mɛi naa kɔlai komɛi amɛhaa yɛ kusumii ni yɔɔ jɛmɛ lɛ naa. Akɛ nɔkwɛmɔnɔ lɛ, yɛ Asia gbɛ lɛ mɛi komɛi kɛ etsuru damɔɔ shi kɛhaa omanye kɛ nyamɔ, shi Afrika hei komɛi lɛ, akɛ nitsuru damɔɔ shi kɛhaa ŋkɔmɔyeli. Ekɔɔɔ he eko he ni mɔ ko jɛ lɛ, kɔlai komɛi náa wɔ fɛɛ wɔnɔ hewalɛ yɛ gbɛ kome too lɛ nɔŋŋ nɔ. Ha wɔsusu kɔlai etɛ komɛi ahe wɔkwɛ bɔ ni amɛbaanyɛ amɛná onɔ hewalɛ amɛha.

ETSURU: Eji kɔla ko ni jijeɔ waa. Bei pii lɛ akɛ nitsuru damɔɔ shi ahaa hewalɛ, ta, kɛ oshara. Eji kɔla ko ni náa mɔ nɔ hewalɛ, ni ebaanyɛ ekanya gbɔmɔtso lɛ koni etsu nii fe nine, eha amu oyayaayai, ni eha tsui lɛ atswa waa.

Yɛ Biblia lɛ mli lɛ, aná Hebri wiemɔ ni ji “etsuru” lɛ kɛjɛ wiemɔ ko ni shishi ji “la” lɛ mli. Biblia lɛ kɛ etsuru fɔɔ, loo etsuru tamɔ muneele fee yoo ajwamaŋ gbɔmɔgbelɔ ko he mfoniri ni akaiɔ waa; yoo nɛɛ ta “kooloo ni tsuɔ tamɔ muneele ko nɔ, ni ehe eyi obɔ̃ kɛ musubɔɔ gbɛii,” ni ewula ehe kɛ atade afaseo diŋ kɛ muneele.—Kpojiemɔ 17:1-6.

EŊƆLI: Nibii ni kɛ́ mɔ ko na eŋɔli su lɛ efeɔ lɛ kɛ nibii ni kɛ́ mɔ ko na nitsuru lɛ efeɔ lɛ shiɔ koŋ, no ji amɛyeee egbɔ kwraa, ejaakɛ eŋɔli haaa gbɔmɔtso lɛ atsu nii fe nine, ehaa mɔ tsui nyɔɔ emli. Eŋɔli ji kɔla ko ni haa mɔ náa hejɔlɛ, ni bei pii lɛ akɛtoɔ toiŋjɔlɛ he. Kɛ́ wɔna abɔi loo gɔji kɛ amɛnɔ bai eŋɔli lɛ, wɔtsui nyɔɔ wɔmli. Amaniɛbɔɔ ni yɔɔ 1 Mose wolo lɛ mli lɛ kɛɔ akɛ, Nyɔŋmɔ ha jwɛifɔ loo jwɛi eŋɔli kɛ tsei kwɛ̃ ha adesai.—1 Mose 1:11, 12, 30.

EYƐŊ: Bei pii lɛ, akɛ eyɛŋ toɔ kane, shweshweeshwe kɛ hetsemɔ he. Akɛtoɔ sui tamɔ mlihilɛ, bemyeli kɛ krɔŋŋ he. Eyɛŋ ji kɔla ko ni atsĩɔ tã waa yɛ Biblia lɛ mli. Yɛ ninai amli lɛ, awieɔ  adesai kɛ ŋwɛi bɔfoi ahe akɛ amɛwo niyɛji, ni akɛ enɛ maa jalɛ kɛ mumɔŋ hetsemɔ nɔ mi. (Yohane 20:12; Kpojiemɔ 3:4; 7:9, 13, 14) Anaa okpɔŋɔ yɛji kɛ amɛnɔtaralɔi ni wo klala yɛŋ ni he tse, ni no damɔ shi kɛha jalɛ ta. (Kpojiemɔ 19:14) Nyɔŋmɔ kɛ kɔla yɛŋ tsuɔ nii kɛmaa nɔ mi ehaa wɔ akɛ eesumɔ ni eŋɔ wɔhe eshai lɛ eke wɔ: “Kɛ́ nyɛhe eshai lɛ tsuɔ tamɔ la po, amɛaayɛ tamɔ snoo; kɛ́ amɛtsuɔ tamɔ muneele lɛ, amɛaatsɔmɔ tamɔ too he tsɔi yɛŋ.”—Yesaia 1:18.

KƆLA YEƆ EBUAA KƐKAIƆ NII

Bɔ ni Biblia lɛ kɛ kɔla tsuɔ nii lɛ haa wɔnaa akɛ Nyɔŋmɔ nuɔ bɔ ni adesai feɔ amɛnii amɛhaa yɛ kɔla he lɛ shishi. Akɛ nɔkwɛmɔnɔ lɛ, Biblia wolo ni ji Kpojiemɔ lɛ gba shihilɛi ni adesai tsɔɔ mli amrɔ nɛɛ, ní tai, hɔmɔ, gbele hela, niyenii he ni esɛ̃ kɛ tsɛŋemɔ hela fata he lɛ efɔ̃ shi. Bɔ ni afee ni wɔnyɛ wɔkai enɛ lɛ, akɛ ninamɔ ko ni sa kadimɔ waa ni kɔɔ okpɔŋɔi kɛ amɛnɔtaralɔi ahe tsu nii—jeee okpɔŋɔi kɛkɛ, shi okpɔŋɔi ni eko fɛɛ eko kɛ ekɔla pɔtɛɛ ko.

Klɛŋklɛŋ lɛ, ana okpɔŋɔ yɛŋ futaa ko ni damɔ shi kɛha jalɛ ta ni Yesu Kristo baawuu lɛ. No sɛɛ lɛ, wɔnaa okpɔŋɔ tsuru ko ni damɔ shi kɛha majimaji ateŋ ta. Enɛ sɛɛ lɛ, okpɔŋɔ diŋ ko hu je kpo, ni no damɔ shi kɛha hɔmɔ. No sɛɛ lɛ, wɔnaa “okpɔŋɔ lamulu; ni mɔ ni tá enɔ lɛ gbɛi ji gbele.” (Kpojiemɔ 6:1-8) Okpɔŋɔi lɛ eko fɛɛ eko kɔla baanyɛ aha wɔná henumɔ pɔtɛɛ ko ni kɛ nɔ ni okpɔŋɔ lɛ damɔ shi kɛha lɛ yeɔ egbɔ. Ewaaa kwraa akɛ wɔbaakai okpɔŋɔi kɛ amɛhe kɔlai nɛɛ, kɛ nɔ ni no tsɔɔ wɔ yɛ wɔbei nɛɛ amli lɛ.

Nɔkwɛmɔ nii babaoo yɛ Biblia lɛ mli ni tsɔɔ bɔ ni akɛ kɔla tsu nii yɛ mfonirifeemɔ gbɛ nɔ kɛtsɔɔ nibii komɛi amli. Hɛɛ, Bɔlɔ lɛ ni bɔ la, kɔla, kɛ gbɔmɔ hiŋmɛi lɛ ŋɔɔ kɔlai kɛtsuɔ nii yɛ hesaa mli kɛfeɔ nibii ahe mfoniri, ni ekɛtsɔɔ nii bɔ ni mɛi ni kaneɔ lɛ nuɔ shishi ni amɛkaiɔ. Kɔla yeɔ ebuaa wɔ kɛnáa saji, ni wɔtsuɔ he nii. Kɔla náa wɔnɔ hewalɛ. Kɔla baanyɛ aye abua wɔ koni wɔkai nibii komɛi ni he hiaa. Kɔla ji nikeenii ni Nyɔŋmɔ jɛ suɔmɔ mli ekɛke wɔ koni wɔná miishɛɛ yɛ shihilɛ mli.