Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ OCTOBER 2013

 BIBLIA LƐ TSAKEƆ MƐI

“Mɛi Babaoo Ahe Tsɛ̃ Mi”

“Mɛi Babaoo Ahe Tsɛ̃ Mi”
  • BE NI AFƆ LƐ: 1978

  • MAŊ NƆ NI EJƐ: CHILE

  • MƆ NI EJI TSUTSU: AWUIYELƆ

MITSUTSU SHIHILƐ:

Mida yɛ Chile maŋtiase, ni ji Santiago lɛ akutso ko ni kokein kɛ ehenɔi, awuiyelɔi, kɛ efɔŋfeemɔ ebu yɛ jɛi lɛ mli. Agbe mipapa beni miye afii enumɔ. No sɛɛ lɛ, mimami yahi ejɔle ko ni yitsoŋ wa ŋɔɔ. Eyiɔ mi kɛ mimami fɛɛ. Kɛbashi amrɔ nɛɛ, mihiɛ kpako piŋmɔi ni mitsɔ mli yɛ nakai afii lɛ amli lɛ nɔ.

Beni midaa lɛ, nakai shihilɛ ni mitsɔ mli lɛ ná minɔ hewalɛ gbonyo, eha miyitsoŋ bawa waa. No beaŋ lɛ, minyaa heavy-metal lalai ahe waa, mitɔɔ dãa, ni be kɛ beaŋ lɛ mikɛ kokein kɛ ehenɔi tsuɔ nii. Mikɛ mɛi ni hɔ̃ɔ tsofai nɛɛ nɔɔ yɛ maŋjaanɔ, ni amɛka shii abɔ akɛ amɛbaagbe mi. Be ko lɛ, kuu ko ni kɛ wɔkuu lɛ yeee lɛ yahai yiwalɔ ko ni ale lɛ jogbaŋŋ lɛ akɛ ebagbe mi, etsu mi kakla moŋ nɛ shi mije mli. Be kroko hu lɛ, hii komɛi ni hɔ̃ɔ kokein kɛ ehenɔi nɛɛ kɛ tu ma miyitso ni amɛka mi sɛŋmɔ.

Yɛ afi 1996 lɛ, mibaná yoo ko ni atsɛɔ lɛ Carolina lɛ he suɔmɔ, ni yɛ afi 1998 mli lɛ wɔbote gbalashihilɛ mli. Beni wɔfɔ wɔbinuu kromɔ lɛ sɛɛ lɛ, mibashe gbeyei naakpa akɛ aleee nɔ, makɔ mimami jɔle lɛ su, ni no baaha miyitsoŋ awa yɛ miweku lɛ nɔ. Mitee he ko yɛ wɔmaŋ lɛ mli ni ayeɔ abuaa mɛi kɛkpaa sui nɛɛ. Amɛfee he eko aahu, shi afu ma emaahe. Bɔ ni no mli lɛ, nɔ fɛɛ nɔ kwraa woɔ mimli la lɛ mli bawo wu; ehiii mi kudɔmɔ. Mika akɛ magbe mihe bɔni afee ni mikɛkpa miweku lɛ naagbamɔ. Heniianaa lɛ, miyayeee omanye.

Mihi shi afii babaoo ni miheee miyeee akɛ Nyɔŋmɔ yɛ, shi no mli lɛ miitao mahe Nyɔŋmɔ nɔ maye. Mikɛ sɔlemɔ ko yabɔ bei fioo ko. Be nɛɛ mli lɛ, no mli lɛ Yehowa Odasefoi kɛ miŋa kaseɔ Biblia lɛ. No mli lɛ, misumɔɔɔ Odasefoi lɛ asane kwraa, ni mibolɔɔ miwoɔ amɛ, ni mijɛɔ amɛ yakayaka. Shi be fɛɛ be ni mafee nakai lɛ, bɔ ni amɛkɛ naajɔlɛ jieɔ naa lɛ haa minaa kpɛɔ mihe.

Gbi ko lɛ, Carolina bi koni makane Lala 83:19 lɛ yɛ mi diɛŋtsɛ mi-Biblia lɛ mli. Nakai ŋmalɛ lɛ ha efee faŋŋ akɛ Nyɔŋmɔ gbɛ́i ji Yehowa. Minaa kpɛ mihe waa, ejaakɛ mibayɔse akɛ asomoaŋ nyɔŋmɔ ko kɛkɛ mikase ehe nii yɛ  misɔlemɔ lɛ shi jeee Yehowa. Yɛ afi 2000 mra mli lɛ, Odasefoi lɛ kɛ mi hu bɔi Biblia lɛ kasemɔ.

BƆ NI BIBLIA LƐ TSAKE MISHIHILƐ:

Beni miyaa hiɛ yɛ nikasemɔ lɛ mli lɛ, mibana akɛ Yehowa ji Nyɔŋmɔ musuŋtsɔlɔ ni ŋɔɔ eshai efaa. Akɛ nɔkwɛmɔnɔ lɛ, Biblia lɛ wieɔ Yehowa he akɛ: “Nyɔŋmɔ musuŋtsɔlɔ kɛ durolɔ lɛ, mɔ ni toɔ tsui shi, ní emli eyi kɛ suɔmɔ kɛ anɔkwale babaoo lɛ, mɔ ni yɔɔ suɔmɔ ha mɛi akpekpei abɔ ni ekɛ tɔ̃mɔ kɛ esha faa.”—2 Mose 34:6, 7, Ga Biblia hee.

Mibana akɛ Yehowa ji Nyɔŋmɔ musuŋtsɔlɔ ni ŋɔɔ eshai efaa

Enɛ fɛɛ sɛɛ po lɛ, ebawa kɛha mi akɛ mikɛ nɔ ni mikaseɔ lɛ baatsu nii. Mibanu he akɛ minyɛŋ makudɔ mibɛku tsui lɛ kɔkɔɔkɔ. Be fɛɛ be ni miyanyɛɛɛ mihe nɔ maye yɛ enɛ gbɛfaŋ lɛ, Carolina jɛɔ suɔmɔ mli ewoɔ mi hewalɛ. Ekaiɔ mi akɛ Yehowa le mɔdɛŋ ni mibɔɔ lɛ jogbaŋŋ. Yelikɛbuamɔ ni ekɛha mi lɛ waje mi, ni eyɛ mli akɛ bei komɛi minijiaŋ jeɔ wui moŋ, shi mitee nɔ mibɔ mɔdɛŋ koni masa Yehowa hiɛ.

Gbi ko lɛ, Alejandro, ni ji mɔ ni kɛ mi kaseɔ Biblia lɛ bi koni makane Galatabii 5:22, 23 lɛ. Nakai kukuji lɛ kɛɛ Nyɔŋmɔ mumɔ lɛ yibii ji “suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ.” Alejandro tsɔɔ mli akɛ, jeee mi diɛŋtsɛ minyɛmɔ naa manyɛ maná nakai sui lɛ, shi moŋ ja Nyɔŋmɔ mumɔ krɔŋkrɔŋ lɛ eye ebua mi. Nakai anɔkwale lɛ ha mitsake misusumɔ kwraa!

Sɛɛ mli lɛ, mitee kpee wulu ko ni Yehowa Odasefoi fee. Bɔ ni mɛi ba amɛjeŋ jogbaŋŋ amɛha, falefalefeemɔ ni yɔɔ jɛmɛ kɛ naanyobɔɔ ni miná lɛ ha mihe miye diɛŋtsɛ akɛ mina anɔkwa jamɔ lɛ. (Yohane 13:34, 35) Abaptisi mi yɛ February afi 2001.

BƆ NI MINÁ HE SƐƐ:

Yehowa etsake mi, ni kulɛ miji awuiyelɔ lɛ, kɛbatsɔ mɔ ko ni tiuɔ toiŋjɔlɛ sɛɛ. Minuɔ he akɛ ejie mi kɛjɛ ŋmɔtɔ ni fu mi lɛ mli. Mɛi babaoo ahe tsɛ̃ mi, shi amrɔ nɛɛ mikɛ miŋa kɛ mibihii enyɔ lɛ kɛ miishɛɛ miisɔmɔ Yehowa yɛ toiŋjɔlɛ mli.

Miwekumɛi kɛ mitsutsu nanemɛi lɛ anaa kpɛɔ amɛhe waa yɛ tsakemɔi kpele ni minyɛ mifee lɛ ahewɔ. Enɛ eha amɛteŋ mɛi babaoo ená he miishɛɛ akɛ amɛbaakase anɔkwalei ni yɔɔ Biblia lɛ mli lɛ. Kɛfata he lɛ, miná hegbɛ kɛye mibua mɛi krokomɛi ni amɛbale Yehowa. Kwɛ miishɛɛ ni eji akɛ Biblia mli anɔkwale lɛ etsake amɛ hu amɛshihilɛ!