Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ OCTOBER 2013

Gbalatsemɔ Jeee Wala Naagbee

Gbalatsemɔ Jeee Wala Naagbee

“Minu he tamɔ mikpɔ kɛjɛ gɔŋ ko nɔ mibatswa shi too. Nɔ fɛɛ nɔ miiya nɔ jogbaŋŋ yɛ oshihilɛ mli, kɛkɛ lɛ trukaa lɛ, ofee shwɛm.”—MARK, * ni tse gbãla afi kome nɛ lɛ.

“Miwu kɛ oblayoo ko ni kɛ wɔbiyoo ji tipɛŋfoi lɛ yaná bɔlɛ. Beni wɔtse gbãla lɛ, mitsui nyɔ mimli akɛ miye mihe kɛjɛ etsui ni shaa lɛ lɛ he, shi nakai beaŋ nɔŋŋ lɛ minu he akɛ ashwie mihiɛ shi, ni sɛɛnamɔ ko kwraa bɛ mihe.”—EMMELINE, ni tse gbãla afii 17 sɔŋŋ nɛ lɛ.

Mɛi komɛi tseɔ gbãla kɛsusumɔ akɛ no baaha amɛhe ajɔ amɛ, ni mɛi komɛi hu sumɔɔ koni amɛhi gbalashihilɛ lɛ mli, shi amɛnyɛɛɛ amɛtsĩ amɛhefatalɔ lɛ naa akɛ ehi shi. Kɛlɛ, etamɔ nɔ ni mɛi fɛɛ ni tseɔ gbãla lɛ bayɔseɔ akɛ, bɔ ni amɛkpa gbɛ akɛ shihilɛ lɛ baafee mlɛo lɛ, jeee nakai kwraa ji sane lɛ. Anɔkwa, kɛ́ otse gbãla etsɛko lɛ, ekolɛ obaana akɛ eji shihilɛ ni gbalaa mɔ mli waa ní osumɔŋ okɛkpe dɔŋŋ lɛ ateŋ ekome. Belɛ, ebaahi jogbaŋŋ akɛ obaasusu Biblia mli ŋaawoi kpakpai komɛi ni baanyɛ aye abua bo koni onyɛ okpee naagbai ni gbalatsemɔ kɛbaa lɛ anaa lɛ ahe.

NAAGBA 1: HENUMƆI NI EJAAA.

Naagbai ni ohia, bii akwɛmɔ, kɛ shoofeemɔ kɛbaa lɛ baanyɛ asu otsui waa diɛŋtsɛ, ni bei komɛi lɛ ekpakpa ko dani henumɔi nɛɛ asɛɛ foɔ. Jwɛŋmɔ he nilelɔ Judith Wallerstein ni bɛ wala mli amrɔ nɛɛ yɔse akɛ, kɛ́ atse gbãla lɛ, afii babaoo sɛɛ po lɛ, mɛi komɛi nuɔ he lolo akɛ alaka amɛ, akɛ amɛ eyawa gbɛ teŋ, ni ákɛ “shihilɛ lɛ kɛ amɛ yeko jogbaŋŋ, amɛnijiaŋ jeɔ wui, ni amɛhe feɔ shoo.”

NIBII NI OBAANYƐ OFEE

  • Ye awerɛho yɛ nɔ ni ŋmɛɛ bo lɛ hewɔ. Ekolɛ ohiɛ tseɔ hefatalɔ ni osumɔɔ lɛ lolo lɛ. Kɛ́ no mli lɛ,  miishɛɛ bɛ nyɛteŋ po lɛ, owerɛ baanyɛ aho ohe ejaakɛ onáaa miishɛɛ ni okpa gbɛ yɛ gbalashihilɛ lɛ mli lɛ. (Abɛi 5:18) Kaaha efee bo hiɛgbele akɛ obaaŋɔ ‘be kɛfó.’—Jajelɔ 3:1, 4.

  • Kaatse ohe banee yɛ mɛi ahe. Eyɛ mli akɛ esa akɛ oná be okɛye ŋkɔmɔ moŋ, shi nilee bɛ mli akɛ obaatse ohe yɛ mɛi ahe be kplaŋŋ. (Abɛi 18:1) Kɛ́ okɛ onanemɛi miigba sane lɛ, okɛ wiemɔi ni tswaa mɔ emaa shi atsu nii, ejaakɛ kɛ́ ofɔɔ otsutsu hefatalɔ lɛ he wiemɔ nyanyaanya ni osane ja po lɛ, mɛi sumɔŋ akɛ amɛbaabɛŋkɛ bo. Kɛ́ otse gbãla ni ehe bahia koni okpɛ yiŋ ko ni he hiaa nɔŋŋ lɛ, ha mɔ ko ni oheɔ lɛ oyeɔ aye abua bo kɛkpɛ yiŋ ni ja.

  • Kwɛmɔ ohewalɛnamɔ nɔ jogbaŋŋ. Bei pii lɛ, naagbai ni gbalatsemɔ kɛbaa lɛ ekomɛi ji tsui hela kɛ atifa. Ye nii jogbaŋŋ, gbɔlemɔ okpɔiaŋ, ni oná wɔ kpakpa owɔ.—Efesobii 5:29.

  • Jiemɔ nibii fɛɛ ni haa onáa otsutsu hefatalɔ lɛ he mlifu loo nibii ni he ehiaaa bo lɛ yɛ oshihilɛ mli, shi kaajie woji ni he hiaa yɛ onibii amli. Kɛ́ ona nibii tamɔ nyɛkpeemɔ lɛ he mfonirii ni egbaa onaa lɛ, buamɔ naa oto he ko oha obii.

  • Kwa susumɔi ni ejaaa. Olga ni tse ewu gbãla beni nuu lɛ kɛ yoo kroko efite gbãla lɛ wie akɛ: “Mibi mihe shii abɔ akɛ, ‘Mɛni kwraa yɔɔ yoo nɛɛ he, ni mibɛ eko?’” Sɛɛ mli lɛ, Olga bayɔse akɛ, kɛ́ etee nɔ esusu nibii tamɔ enɛɛmɛi ahe lɛ ‘emumɔ baagbɔjɔ.’—Abɛi 18:14.

    Mɛi babaoo yɔseɔ akɛ, kɛ́ amɛŋmala amɛsusumɔi amɛshwie shi lɛ, eyeɔ ebuaa amɛ kɛnaa saji anaa jogbaŋŋ, ni amɛnyɛɔ amɛjajeɔ amɛjwɛŋmɔ. Kɛ́ ofee enɛ lɛ, bɔɔ mɔdɛŋ oná susumɔi hei kpakpai kɛye susumɔi ni ejaaa ni oowu oshi lɛ najiaŋ. (Efesobii 4:23) Susumɔ nɔkwɛmɔnii enyɔ nɛɛ ahe okwɛ:

    Tsutsu susumɔ: Mi mifee ni mihefatalɔ lɛ je misɛɛ lɛ.

    Susumɔ hee: Eyɛ mli akɛ miyɛ mifatɔi moŋ, shi mihefatalɔ lɛ bɛ hegbɛ akɛ edamɔɔ nɔ ejeɔ misɛɛ.

    Tsutsu susumɔ: Mifite miwala afii kpakpai lɛ fɛɛ yɛ nuu ni kɛ mi eyashɛŋ he ko lɛ he.

    Susumɔ hee: Ebaahi akɛ mapele mihiɛgbɛ moŋ fe ní magba mihe naa yɛ nɔ ni ba lɛ he.

  • Jiemɔ ojwɛŋmɔ yɛ mɛi anaa wiemɔi ni tsurɔɔ mɔ lɛ anɔ. Nanemɛi kɛ wekumɛi ni ehiɛɛɛ jwɛŋmɔ gbonyo baawie ohe saji komɛi ni ejaaa loo amɛbaawie nibii komɛi ni baatsurɔ bo, ekolɛ amɛbaakɛɛ akɛ: ‘Ejeee yoo kpakpa po kɛha bo,’ loo ‘Nyɔŋmɔ miihi gbalatsemɔ.’ * Yiŋtoo kpakpa ko hewɔ ni Biblia lɛ woɔ ŋaa nɛɛ akɛ, “Wiemɔi ni awieɔ lɛ, kaadi fɛɛ sɛɛ” lɛ. (Jajelɔ 7:21) Yoo ko ni atsɛɔ lɛ Martina ni etse gbãla afii enyɔ nɛ lɛ wie akɛ: “Nɔ najiaŋ ni majwɛŋ wiemɔi ni tsurɔɔ mɔ anɔ lɛ, mibɔɔ mɔdɛŋ akɛ maha misusumɔi kɛ Nyɔŋmɔ nɔ akpã gbee. Esusumɔi anɔ kwɔlɔ fe wɔnɔ lɛ.”—Yesaia 55:8, 9.

  • Sɔlemɔ oha Nyɔŋmɔ. Nyɔŋmɔ woɔ mɛi ni jaa lɛ lɛ hewalɛ akɛ ‘amɛshɛ amɛhaomɔi fɛɛ amɛfɔ̃ enɔ,’ titri lɛ beni amɛyɔɔ hejaramɔ mli.—1 Petro 5:7.

KAA ENƐ OKWƐ: Ŋmalamɔ Biblia ŋmalɛi komɛi ni onaa akɛ ebaaye abua bo lɛ koni okɛkpɛtɛ hei ni obaafɔ naa. Ŋmalɛi ni atsĩtsĩi tã nɛɛ asɛɛ lɛ, mɛi ni etse gbãla lɛ ateŋ mɛi komɛi ená ŋmalɛi ni nyiɛ sɛɛ nɛɛ hu ahe sɛɛ: Lala 27:10; 34:18; Yesaia 41:10; kɛ Romabii 8:38, 39.

Ha Nyɔŋmɔ Wiemɔ lɛ awaje bo yɛ jaramɔ beaŋ

NAAGBA 2: BƆ NI OKƐ OTSUTSU HEFATALƆ LƐ BAAYE AHA.

Juliana ni hi gbãla mli afii 11 lɛ wie akɛ: “Mikpa miwu fai akɛ ekashi mi. Beni eshi etee sɛɛ lɛ, mimli fu lɛ kɛ yoo ni ekɛyahi shi lɛ waa diɛŋtsɛ.” Mɛi babaoo yɛ ni kɛ́ amɛtse gbãla lɛ, afii komɛi asɛɛ fɛɛ  ni amɛmli efu amɛhefatalɔi ni amɛkɛtse gbãla lɛ lolo. Kɛlɛ, shihilɛi komɛi nyɛɔ amɛnɔ koni amɛkɛ amɛhe awie yɛ be kɛ beaŋ, titri lɛ kɛ́ bii yɛ amɛteŋ.

NƆ NI OBAANYƐ OFEE

  • Okɛ otsutsu hefatalɔ lɛ aye yɛ bulɛ mli. Susumɔ nibii ni he hiaa ahe titri, ha sanegbaa lɛ afee kuku, ni oya lɛ tɛ̃ɛ. Mɛi babaoo eyɔse akɛ enɛ kɛ toiŋjɔlɛ baa.—Romabii 12:18.

  • Kwa wiemɔi ni woɔ mɔ mlila. Titri lɛ, kɛ́ onu he akɛ aawie ashi bo lɛ, Biblia ŋaawoo nɛɛ yeɔ ebuaa: “Mɔ ni wiemɔ ekaaa lɛ, ele nii, ni mɔ ni mumɔ he jɔ lɛ, lɛ ji mɔ ni kɔɔ sane sɛɛ.” (Abɛi 17:27) Kɛ́ sanegbaa ko miiya lɛ bɔ ni osumɔɔɔ, ni onyɛɛɛ he nɔ ko ofee lɛ, obaanyɛ okɛɛ akɛ: “Masumɔ masusu nɔ ni owie lɛ he koni sɛɛ mli lɛ wɔtsa nɔ.”

  • Kɛ́ obaanyɛ lɛ, kwɛmɔ koni nyɛja nibii ni nyɛfee ekome kɛfee lɛ amli, ní nibii tamɔ shika, helatsamɔ, kɛ mla naa saji ahe woji fata he.

KAA ENƐ OKWƐ: Be kroko kɛ́ okɛ otsutsu hefatalɔ lɛ miiwie lɛ, kwɛmɔ akɛ obaana okadii komɛi ni tsɔɔ akɛ nyɛteŋ mɔ ko miifã ehe loo eefee kpɛŋŋ lo. Kɛ́ ebaahi lɛ, kɛɛmɔ lɛ akɛ obaasumɔ ni nyɛfo sɛɛ daŋ, loo nyɛbaa gbeekpamɔ akɛ nyɛbaatsɔ e-mail nɔ nyɛsusu sane lɛ he.—Abɛi 17:14.

NAAGBA 3: YE OBUA OBII LƐ KONI AMƐNYƐ AMƐKPEE SHIHILƐ LƐ NAA.

Maria kaiɔ nɔ ni ba beni egbãla tse sɛɛ nɔŋŋ lɛ akɛ: “Mibiyoo fioo lɛ fóɔ be fɛɛ be, ni ebɔi shamɔmɔ kɛ saa mli woo ekoŋŋ. Ni mibiyoo onukpa lɛ bɔ mɔdɛŋ akɛ ekɛ bɔ ni enuɔ he ehaa lɛ baatee mi, shi miyɔse akɛ lɛ hu etsake.” Dɔlɛ sane ji akɛ, beni oyelikɛbuamɔ he miihia obii lɛ waa lɛ, obaanu he akɛ obɛ be loo nyɛmɔ ni sa ni obaanyɛ okɛye obua amɛ.

NƆ NI OBAANYƐ OFEE

  • Wo obii lɛ hewalɛ ni amɛkɛ bo awie bɔ ni amɛnuɔ he amɛhaa lɛ he, kɛ́ nɔ ni amɛbaakɛɛ lɛ yɛ “flafla” po.—Hiob 6:2, 3.

  • Mɔ fɛɛ mɔ atsu esɔ̃. Eyɛ mli akɛ obaasumɔ ni aye abua bo yɛ bɔ ni onuɔ he ohaa lɛ hewɔ, ni ekolɛ obii lɛ baasumɔ ni amɛfee nakai, shi esaaa, ni asaŋ ejaaa gbɛ akɛ obaaha obii lɛ atsu onukpai asɔ̃ ni tamɔ nɛkɛ lɛ he nii. (1 Korintobii 13:11) Kwɛmɔ ni okɛ gbekɛ lɛ akagba boŋ saji loo oha etsɔ teŋdamɔlɔ eha okɛ otsutsu hefatalɔ lɛ.

  • Too obii lɛ ahe gbɛjianɔ jogbaŋŋ. Ehi jogbaŋŋ akɛ obaahi shĩa lɛ nɔŋŋ mli, ni nyɛfee nibii ni nyɛfeɔ lɛ nɔŋŋ, shi titri lɛ yaa nɔ ofee nibii ni baawaje nyɛkɛ Yehowa teŋ wekukpãa lɛ; ní Biblia kanemɔ kɛ weku jamɔ fata he.—5 Mose 6:6-9.

KAA ENƐ OKWƐ: Otsi nɛɛ mli lɛ, bɔɔ mɔdɛŋ oha obii lɛ ale akɛ osumɔɔ amɛ, ni akɛ jeee amɛ amɛha okɛ ohefatalɔ lɛ gbãla tse. Kɛ́ amɛbi bo saji ni ooha amɛ hetoo lɛ, kwɛmɔ ni okɛ shwamɔ lɛ akafɔ̃ ohefatalɔ lɛ nɔ.

Kɛ́ ogbãla tse lɛ, no etsɔɔɔ akɛ owala eba naagbee ji no. Melissa, yoo ko ni hi gbãla mli afii 16 lɛ wie akɛ, “Beni wɔtse gbãla lɛ, mishwie miyiŋ akɛ ‘Jeee nɛkɛ mito akɛ mishihilɛ naa ayakpa aha.’” Shi amrɔ nɛɛ, shihilɛ mli ni eyaje lɛ fɛɛ sɛɛ lɛ, etsui nyɔɔ emli ni eyɛ miishɛɛ. Ewie akɛ, “Beni mikpa mihe naagbamɔ yɛ nɔ ni ba lɛ he lɛ, mihe jɔ mi waa agbɛnɛ.”

^ kk. 2 Atsake gbɛi lɛ ekomɛi yɛ sane nɛɛ mli.

^ kk. 18 Nyɔŋmɔ miihi ŋaa ni atsɔɔ kɛtseɔ gbãla. Shi kɛ́ mɔ ko je ehefatalɔ sɛɛ ekɛ mɔ kroko yabɔ ajwamaŋ lɛ, Nyɔŋmɔ ŋmɛɔ mɔ ni atɔ̃ enɔ lɛ gbɛ koni ekpɛ eyiŋ akɛ ebaatse gbãla loo etseŋ gbãla. (Maleaki 2:16; Mateo 19:9) Kwɛmɔ sane ni ji “The Bible’s Viewpoint—What Kind of Divorcing Does God Hate?” ni je kpo yɛ February 8, 1994, Awake! ni Yehowa Odasefoi fee lɛ mli lɛ.

BI OHE AKƐ . . .

  • Ani miná be saŋŋ mikɛfó kɛye gbalatsemɔ lɛ he ŋkɔmɔ lo?

  • Te mafee tɛŋŋ majie mitsutsu hefatalɔ lɛ he mlifu ni miyɔɔ lolo lɛ kɛjɛ mimli lɛ?