Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2013

 BIBLIA LƐ TSAKEƆ MƐI

“Minuuu He Dɔŋŋ akɛ Esa akɛ Matsake Je Lɛ”

“Minuuu He Dɔŋŋ akɛ Esa akɛ Matsake Je Lɛ”
  • BE NI AFƆ LƐ: 1966

  • MAŊ NƆ NI EJƐ: FINLAND

  • MƆ NI EJI TSUTSU: EFÓƆ GBƆMƐI KƐ KOOLOI ANƆ̃ MLI

MITSUTSU SHIHILƐ:

Kɛjɛ migbekɛbiiashi tɔ̃ɔ lɛ minyaa adebɔɔ nibii ahe waa diɛŋtsɛ. No mli lɛ, wɔweku lɛ fɔɔ shisharamɔ yɛ kooi kɛ kpaakpoi fɛfɛji ni ebɔle wɔmaŋ (Jyväskylä) yɛ Central Finland lɛ waa. Kɛfata he lɛ, misumɔɔ kooloi hu asane waa. Beni mi ji gbekɛ lɛ, mifuaa alɔnte fɛɛ alɔnte kɛ gbee fɛɛ gbee ni mana lɛ lɛ! Beni midaa lɛ, bɔ ni mɛi feɔ kooloi aniseniianii lɛ bagba minaa waa. Be bashɛ ni mikɛ mihe yadɔmɔ kuu ko ni fóɔ kooloi anɔ̃ mli, ni no ha mikɛ mɛi krokomɛi ni kɛ mi hiɛ susumɔ kome lɛ kpe.

Wɔtɛje wɔhe wɔfã ta wɔshi niseniianii ni afeɔ kooloi lɛ. Wɔjara saji ni kɔɔ niseniianii ni afeɔ kooloi lɛ ahe lɛ wɔha mɛi, ni wɔha mɛi tswia tsɛŋsi kɛnyiɛ maŋ lɛŋ koni akɛte shi awo mɛi ni hɔ̃ɔ kooloi ahe woji kɛ mɛi ni feɔ kooloi aniseniianii ni amɛkɛɔ akɛ amɛkɛmiikase nii lɛ. Wɔtse kuu hee ko po bɔni afee ni akɛbu kooloi ahe. Akɛni wɔtooo wɔtsui shi kɛtsuuu saji lɛ ahe nii hewɔ lɛ, be babaoo lɛ wɔnifeemɔi lɛ eyaŋɔɔɔ amraloi lɛ anaa. Amɔ mi shii abɔ kɛtee saneyelihe.

Kɛfata kooloi ni misumɔɔɔ akɛ afeɔ amɛ niseniianii lɛ ahe lɛ, naagbai krokomɛi ni yaa nɔ yɛ je lɛŋ lɛ hu bagba minaa waa. No ha mikɛ mihe yadɔmɔ kui srɔtoi ni Amnesty International kɛ Greenpeace fata he lɛ. Mikɛ minyɛmɔ fɛɛ fĩ kui lɛ anifeemɔi lɛ asɛɛ. Miwie kɛfã ohiafoi, mɛi ni hɔmɔ miiye amɛ, kɛ mɛi krokomɛi ni tamɔ nakai lɛ ahe.

Kɛlɛ, fiofio lɛ, mibayɔse akɛ minyɛŋ matsake je lɛ. Eyɛ mli akɛ kui nɛɛ bɔ mɔdɛŋ amɛtsu naagbai bibii fioo komɛi ahe nii moŋ, shi etamɔ nɔ ni naagbai wuji lɛ moŋ amli wo wu. Ebafee tamɔ nɔ ni yiwalɛ nifeemɔ emi jeŋ muu lɛ fɛɛ, ni enɛ gbaaa mɔ ko mɔ ko naa po. Enɛ ha minijiaŋ je wui.

BƆ NI BIBLIA LƐ TSAKE MISHIHILƐ:

Dɔɔ sɔŋŋ ni edɔ mi akɛ minyɛɛɛ shihilɛ lɛ he nɔ ko mafee hewɔ lɛ, mibɔi Nyɔŋmɔ kɛ Biblia lɛ he susumɔ. No mli lɛ, Yehowa Odasefoi kɛ mi ekase Biblia lɛ pɛŋ. No beaŋ lɛ, mihiɛ sɔ bɔ ni Odasefoi lɛ  amli jɔ kɛ bɔ ni amɛnáa mihe miishɛɛ lɛ moŋ, shi no mli lɛ mifeko klalo akɛ mafee tsakemɔ yɛ mishihilɛ mli. Kɛlɛ be nɛɛ mli lɛ, nibii etsake kwraa.

Mikɔ mi-Biblia lɛ ni mibɔi kanemɔ. Eha mitsui nyɔ mimli waa diɛŋtsɛ. Mibana saji komɛi yɛ Biblia lɛ mli ni tsɔɔ akɛ esa akɛ wɔkɛ kooloi aye yɛ mlihilɛ naa. Ákɛ nɔkwɛmɔnɔ lɛ, Abɛi 12:10 lɛ kɛɔ akɛ: “Gbɔmɛi kpakpai kwɛɔ amɛkooloi atsiabo.” (Good News Translation) Kɛfata he lɛ, mibayɔse akɛ jeee Nyɔŋmɔ ji mɔ ni kɛ je lɛŋ naagbai lɛ baa. Moŋ lɛ, akɛni mɛi babaoo kɛ egbɛtsɔɔmɔi tsuuu nii lɛ hewɔ ni wɔnaagbai lɛ amli ewo wu lɛ. Beni mibana bɔ ni Yehowa sumɔɔ wɔ kɛ bɔ ni etoɔ etsui shi ehaa wɔ lɛ, mihiɛ sɔ waa diɛŋtsɛ.—Lala 103:8-14.

Be nɛɛ mli lɛ, mibana wolo bibioo ko ni akɛshɛɔ Mɛni Biblia lɛ Tsɔɔ Diɛŋtsɛ? wolo lɛ, ni miŋmala nɔ nii kɛmaje. Etsɛɛɛ kɛkɛ ni Odasefonyo ko kɛ ehefatalɔ ba mishĩa akɛ amɛkɛ mi baakase Biblia lɛ, ni mikpɛlɛ akɛ makase. Kɛfata he lɛ, mibɔi Kristofoi akpeei yaa yɛ Maŋtsɛyeli Asa lɛ nɔ. No ha Biblia mli anɔkwale lɛ bɔi shihemɔ yɛ mitsui mli.

Eŋɔɔ minaa akɛ, kɛtsɔ Biblia lɛ nɔ lɛ minyɛ mifee tsakemɔi babaoo. Mikpa tawa shɛremɔ kɛ dãanumɔ shɛii. Mibɔi mihe saamɔ bɔ ni yɔɔ hiŋmɛi nɔ, ni mikwa wiemɔ sha kɛnitsumɔ. Mitsake jwɛŋmɔ ni ejaaa ni miná yɛ amraloi ahe lɛ. (Romabii 13:1) Agbɛnɛ hu mikpoo jeŋba sha ni no mli lɛ ená minɔ hewalɛ waa lɛ.

Tsakemɔ ni bawa waa kɛha mi akɛ mafee ji mijwɛŋmɔ ni esa akɛ matsake yɛ kui srɔtoi ni mikɛ mihe yadɔmɔ he lɛ ahe. Tsakemɔi nɛɛ baaa lɛ trukaa. Shishijee lɛ, minu he akɛ kɛ́ mishi kuu lɛ mli lɛ no baatsɔɔ akɛ miyeee kuu lɛ anɔkwa. Kɛlɛ, mibayɔse akɛ Nyɔŋmɔ Maŋtsɛyeli lɛ pɛ ji hiɛnɔkamɔ diɛŋtsɛ ni yɔɔ kɛha wɔjeŋ nɛɛ. Mikpɛ miyiŋ akɛ mikɛ mihewalɛ fɛɛ baafĩ nakai Maŋtsɛyeli lɛ sɛɛ, ni maye mabua mɛi krokomɛi koni amɛkase ehe nii.—Mateo 6:33.

BƆ NI MINÁ HE SƐƐ:

Ákɛ mɔ ni foɔ mɛi anɔ̃ mli lɛ, kulɛ etsɛɛɛ kɛkɛ lɛ mija mɛi amli kɛwo kui enyɔ amli—kɛ́ jeee mɛi kpakpai lɛ, belɛ mɛi gbohii—ni mifeɔ klalo akɛ mate shi mawo mɛi ni mibuɔ amɛ akɛ amɛhiii lɛ. Eŋɔɔ minaa akɛ, kɛtsɔ Biblia lɛ nɔ lɛ, mikpa mɛi ahe hetsɛ̃ namɔ. No najiaŋ lɛ, mibɔɔ mɔdɛŋ akɛ majie Kristofoi asuɔmɔ kpo matsɔɔ mɔ fɛɛ mɔ. (Mateo 5:44) Mijieɔ suɔmɔ nɛɛ kpo yɛ gbɛi srɔtoi anɔ, ni Nyɔŋmɔ Maŋtsɛyeli lɛ he sanekpakpa ni mishiɛɔ mitsɔɔ mɛi lɛ ji gbɛ kome. Kɛ́ mikwɛ bɔ ni nitsumɔ kpakpa nɛɛ haa mɛi náa toiŋjɔlɛ kɛ miishɛɛ, ni amɛnáa hiɛnɔkamɔ diɛŋtsɛ hu lɛ, ehaa mimii shɛɔ mihe waa.

Akɛni mikɛ nɔ fɛɛ nɔ ewo Yehowa dɛŋ hewɔ lɛ, mitsui enyɔ mimli. Miyɛ hekɛnɔfɔ̃ɔ akɛ, ákɛ Bɔlɔ lɛ, Yehowa eŋmɛŋ gbɛ koni aya nɔ afee kooloi kɛ adesai aniseniianii kɛya naanɔ, ni eŋmɛŋ gbɛ hu ni afite wɔshikpɔŋ fɛfɛo nɛɛ. Moŋ lɛ, etsɛŋ kwraa ni ebaatsɔ e-Maŋtsɛyeli lɛ nɔ lɛ esaa nibii fɛɛ ni afite lɛ. (Yesaia 11:1-9) Eŋɔɔ minaa waa akɛ mile anɔkwalei nɛɛ, ni eŋɔɔ minaa hu akɛ miyeɔ mibuaa mɛi koni amɛhé anɔkwalei nɛɛ amɛye. Minuuu he dɔŋŋ akɛ esa akɛ matsake je lɛ.