Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2013

 TSI OBƐŊKƐ NYƆŊMƆ

‘Ewoɔ Wɔtsuiiaŋ Obɔ’

‘Ewoɔ Wɔtsuiiaŋ Obɔ’

Ani Yehowa susuɔ wɔhe lɛɛlɛŋ, aloo haomɔi ni adesai kɛkpeɔ yɛ shikpɔŋ nɛɛ nɔ lɛ kɔɔɔ ehe eko? Hetoo ni Biblia lɛ kɛhaa yɛ sanebimɔ nɛɛ he lɛ haa wɔtsui nyɔɔ wɔmli waa. Eji anɔkwale akɛ Nyɔŋmɔ susuɔ adesai aweku lɛ he, ni eesumɔ koni wɔmii ashɛ wɔhe yɛ shihilɛ mli. Daa gbi lɛ, eŋmɛɔ gbɛ ni adesai—ni mɛi ni hiɛ esɔɔɔ nii po fata he lɛ—náa ejurɔ babaoo ni efeɔ lɛ ahe sɛɛ. Susumɔ bɔfo Paulo wiemɔi lɛ ahe okwɛ.Kanemɔ Bɔfoi lɛ Asaji 14:16, 17.

Beni Paulo kɛ mɛi ni jaaa Nyɔŋmɔ ni yɔɔ Listra maŋtiase lɛ mli lɛ wieɔ lɛ, ewie akɛ: “Blemabii lɛ ayinɔi ni eho lɛ mli lɛ [Nyɔŋmɔ] hã jeŋmaji lɛ fɛɛ nyiɛ amɛ diɛŋtsɛ amɛgbɛi lɛ anɔ, shi kɛlɛ efɔ̃ɔɔ lɛ diɛŋtsɛ ehe odaseyeli, shi moŋ efeɔ ejurɔ ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmaa kɛ miishɛɛ woɔ nyɛtsuiiaŋ obɔ.” Te Paulo toibolɔi lɛ nu nakai wiemɔi lɛ shishi amɛha tɛŋŋ?

Ehe ebahiaaa ni Listrabii lɛ afo shi dani amɛna bɔ ni Paulo wiemɔi lɛ ji anɔkwale ha. Ayeɔ okwaa yɛ he ni amɛyɔɔ lɛ, ni jɛmɛ shikpɔŋ lɛ yɛ frɔfrɔ ni ebaa nii jogbaŋŋ hu. Shi taakɛ Paulo ha amɛle lɛ, Nyɔŋmɔ ji nu ni nɛɔ lɛ kɛ afii ni baa nii pii lɛ Jɛɛhe. No tsɔɔ akɛ be fɛɛ be ni amɛkpaa ŋmɔshi nii babaoo, ni amɛnáa niyenii kpakpai amɛyeɔ lɛ, amɛmiiná Nyɔŋmɔ ejurɔfeemɔ lɛ he sɛɛ ji no.

Sane ni Paulo kɛɛ Listrabii lɛ haa wɔkaseɔ nibii babaoo ni he hiaa yɛ Yehowa Nyɔŋmɔ he.

Yehowa haa wɔ nihalamɔ mli heyeli. Kadimɔ akɛ Yehowa ŋmɛ Jeŋmajiaŋbii lɛ fɛɛ gbɛ koni ‘amɛnyiɛ amɛ diɛŋtsɛ amɛgbɛi lɛ anɔ.’ Biblia shishitsɔɔlɔi awolo ko wie akɛ, abaanyɛ atsɔɔ wiemɔ nɛɛ shishi hu akɛ “koni amɛfee nɔ ni amɛsumɔɔ” loo “amɛfee nɔ ni amɛ diɛŋtsɛ amɛsusuɔ akɛ ehi.” Yehowa enyɛɛɛ mɔ ko nɔ koni ejá lɛ. Eha wɔ nihalamɔ mli heyeli—nyɛmɔ ni wɔyɔɔ akɛ wɔhala nɔ ni wɔsumɔɔ akɛ wɔbaafee.—5 Mose 30:19.

Yehowa miisumɔ koni wɔle lɛ. Paulo tsɔɔ mli akɛ, Yehowa efɔ̃ɔɔ “lɛ diɛŋtsɛ ehe odaseyeli.” Biblia shishitsɔɔlɔi awolo ni atsĩ tã kɛtsɔ hiɛ lɛ wie akɛ abaanyɛ atsɔɔ sane nɛɛ shishi akɛ, “eha mɛi ena nɔ̃ Nyɔŋmɔ ni eji lɛ faŋŋ.” Nyɔŋmɔ adebɔɔ nii lɛ yeɔ “ehe nii ni anaaa,” ní emlihilɛ loo ejurɔ ni efeɔ, enilee, ehewalɛ kɛ esuɔmɔ fata he lɛ he odase faŋŋ. (Romabii 1:20) Yehowa ejie ehe saji babaoo akpo yɛ Biblia lɛ mli. (2 Timoteo 3:16, 17) Ani enɛ etsɔɔɔ akɛ eesumɔ ni wɔle lɛ jogbaŋŋ?

Daa gbi lɛ, eŋmɛɔ gbɛ ni adesai—ní mɛi ni hiɛ esɔɔɔ nii po fata he lɛ—náa ejurɔ babaoo ni efeɔ lɛ ahe sɛɛ

Yehowa miisumɔ ni wɔná miishɛɛ. Paulo kɛɛ akɛ, ‘Nyɔŋmɔ kɛ ŋmaa kɛ miishɛɛ woɔ wɔtsuiiaŋ obɔ.’ Efɔŋfeelɔ ni heee Yehowa nɔ eyeee lɛ po yeɔ nii, ni etsui tɔɔ kɛ miishɛɛ yɛ shihilɛ mli. Kɛlɛ, Nyɔŋmɔ miisumɔ ni wɔná miishɛɛ diɛŋtsɛ ni hiɔ shi daa. Ja wɔkase ehe anɔkwalei ni wɔhi shi yɛ naa dani wɔbaaná miishɛɛ ni tamɔ nɛkɛ.—Lala 144:15; Mateo 5:3.

Wɔ fɛɛ wɔnáa Yehowa ejurɔfeemɔ lɛ he sɛɛ daa gbi. Mɛni hewɔ okaseee gbɛi krokomɛi anɔ ni obaatsɔ ojie hiɛsɔɔ kpo otsɔɔ Nyɔŋmɔ, mɔ ni kɛ ‘ŋmaa kɛ miishɛɛ woɔ otsuiŋ obɔ’ lɛ?

Biblia kanemɔ kɛha July

Bɔfoi lɛ Asaji 11-28