Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2013

Te Onaa Jamɔ Ohaa Tɛŋŋ yɛ Shika Gbɛfaŋ?

Te Onaa Jamɔ Ohaa Tɛŋŋ yɛ Shika Gbɛfaŋ?

No mli lɛ, Estelle * ni yɔɔ bii kpawo lɛ kɛ ebii lɛ yaa sɔlemɔ daa. Ekɛɛ akɛ: “Mikɛ osɔfo lɛ wie akɛ miisumɔ ni makase Biblia lɛ.” Kɛlɛ, osɔfo lɛ emiii nɔ akɛ ebaatsɔɔ lɛ. Enɛ ha Estelle kpa sɔlemɔ lɛ yaa. Ekɛfata he akɛ: “Sɔlemɔ lɛŋ onukpai lɛ ŋma mi wolo amɛkɛɛ, kɛ́ minyɛɛɛ maba sɔlemɔ lɛ po lɛ, mikɛ shika lɛ amaje kɛkɛ. Mikɛɛ mihe akɛ, ‘Kɛ́ miyaaa sɔlemɔ po lɛ, egbaaa amɛnaa; mishika lɛ pɛ ji nɔ ni amɛtaoɔ.’”

Angelina, yoo ko ni nyaa jamɔ he waa lɛ kɛɛ akɛ: “He ni miyaa sɔlemɔ yɛ lɛ, akɛ tsɛŋsi ni akɛheɔ shika lɛ foɔ shi shii etɛ sɔŋŋ beni afeɔ sɔlemɔ lɛ, ni akpaa gbɛ akɛ be fɛɛ be ni akɛbaaho lɛ, esa akɛ wɔkɛ shika awo mli. Daa nɛɛ, amɛmiibi shika. Mikɛɛ mihe akɛ, ‘Amɛbɛ Nyɔŋmɔ mumɔ lɛ.’”

Ani jamɔi ni yɔɔ he ni oyɔɔ lɛ tsɔɔ gbɛ tɛ̃ɛ loo ŋaa gbɛi anɔ amɛnyɛɔ mɛi anɔ kɛheɔ shika? Ani enɛ kɛ nɔ ni Biblia lɛ tsɔɔ lɛ kpãa gbee?

MƐNI BIBLIA LƐ TSƆƆ?

Yesu, mɔ ni to Kristofoi Ajamɔ lɛ shishi lɛ kɛɛ akɛ: “Yaka nyɛná, yaka nyɛŋɔhaa!” (Mateo 10:8) Biblia mli saji lɛ ahe hiaa waa bɔ ni esaaa akɛ ahɔ̃ɔ, shi moŋ aha mɔ fɛɛ mɔ ni taoɔ eko lɛ nine ashɛ nɔ yaka.

Mɛɛ gbɛ nɔ mra beaŋ Kristofoi lɛ tsɔ amɛná shika kɛtsu asafo lɛ hiamɔ nii ahe nii?

‘Mɔ fɛɛ mɔ ha bɔ ni ekpɛ mli momo yɛ etsui mli, ni ejɛɛɛ ŋkɔmɔyeli aloo fimɔ mli, ejaakɛ tsuijurɔnaa halɔ Nyɔŋmɔ sumɔɔ.’ (2 Korintobii 9:7) Bɔfo Paulo wie akɛ: “Beni afee ní wɔkatsɔ jatsu wɔmiiha nyɛteŋ mɔ ko hewɔ lɛ nyɔŋ kɛ shwane fɛɛ wɔmiitsu nii, ni wɔsaa wɔmiijaje Nyɔŋmɔ sanekpakpa lɛ wɔmiitsɔɔ nyɛ.” (1 Tesalonikabii 2:9) Paulo tsu nii akɛ buufeelɔ koni ekɛkwɛ ehe yɛ esɔɔmɔ nitsumɔ lɛ mli.—Bɔfoi lɛ Asaji 18:2, 3.

NI YEHOWA ODASEFOI HU?

Yehowa Odasefoi fɔɔ kpee yɛ tsũi ni bɛ haŋtsii ni atsɛɔ lɛ Maŋtsɛyeli Asai lɛ amli. Mɛɛ gbɛ nɔ amɛtsɔɔ amɛnáa shika kɛtsuɔ asafo lɛ hiamɔ nii ahe nii? Amɛkɛ plɛtei efooo shi yɛ asafoŋbii lɛ ahiɛ kɛheee shika, ni amɛjaraaa wolo kotokui hu kɛbalaaa shika. Moŋ lɛ, mɔ fɛɛ mɔ ni hiɛ sɔɔ nitsumɔ lɛ baanyɛ ajɛ hiɛshikamɔ mli ekɛ shika awo oniatsumɔ adeka ni yɔɔ Maŋtsɛyeli Asa lɛ nɔ lɛ mli.

Mɛɛ gbɛ nɔ esa akɛ atsɔ aná shika kɛtsu jamɔŋ hiamɔ nii ahe nii?

Anɔkwa, afiteɔ shika babaoo kɛkalaa wolo tɛtrɛɛ nɛɛ ni akɛmajeɔ. Kɛlɛ, onaaa ni aatswa adafi kɛmiitao shika loo aabala shika yɛ gbɛ ko kwraa nɔ. Nɔ ni agbalaa jwɛŋmɔ kɛyaa nɔ titri ji Biblia mli anɔkwale lɛ gbɛɛ kɛ shwãmɔ.

Te osusuɔ tɛŋŋ: Aso yiŋtoo ni akɛto gbɛjianɔ nɛɛ kɛ Yesu wiemɔi lɛ, kɛ mra beaŋ Kristofoi lɛ anɔkwɛmɔnɔ lɛ kpãaa gbee?

^ kk. 2 Atsake gbɛ́i lɛ ekomɛi yɛ saji nɛɛ amli.