Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JULY 2013

Te Onaa Jamɔ Ohaa Tɛŋŋ yɛ Jeŋba Gbɛfaŋ?

Te Onaa Jamɔ Ohaa Tɛŋŋ yɛ Jeŋba Gbɛfaŋ?

Sylvia, ni eji nɛɛsifonyo lɛ kɛɛ akɛ: “Mikɛ mɛi ni tsɛɔ amɛhe nyɔŋmɔjalɔi tee kɔleji. Kɛlɛ, kɛ́ aafee kaa lɛ, amɛkɔpeɔ ni amɛkɛ tsofai tsuɔ nii bɔ ni ejaaa. Amɛshihilɛ etsɔɔɔ akɛ amɛjamɔ lɛ ená amɛnɔ hewalɛ kpakpa ko.”

Nuu ko ni atsɛɔ lɛ Lionel lɛ kɛɛ akɛ: “Mɛi ni mikɛtsuɔ nii lɛ maleɔ, ni amɛtswaa nitsumɔhe lɛ tɛlifoŋ amɛkɛɔ akɛ amɛbɛ hewalɛ, tsɛbelɛ amɛyɛ hewalɛ. Amɛyɛ jamɔ moŋ nɛ, shi amɛkɛtsuuu nii—etamɔ sɛi ko ni ma shi kɛkɛ, shi ataaa nɔ.”

Mɛi kpotoo yɛ ni jamɔ nyɛko aye abua amɛ koni amɛba amɛjeŋ jogbaŋŋ. Mɛi babaoo “hiɛ Nyɔŋmɔ jamɔ su shi amɛkwa emli hewalɛ lɛ.” (2 Timoteo 3:5) Amɛjamɔŋ hiɛnyiɛlɔi lɛ efeko nɔkwɛmɔnɔ kpakpa ko ehako amɛ, ni osɔfoi lɛ hu woko amɛjamɔŋbii lɛ ŋaa ni sa ni damɔ Ŋmalɛi lɛ anɔ ni baaha amɛba amɛjeŋ jogbaŋŋ. Ebɛ naakpɛɛ mɔ akɛ mɛi babaoo heɔ amɛyeɔ akɛ bɔ ni amɛhiɔ shi amɛhaa lɛ kɔɔɔ Nyɔŋmɔ he eko.

MƐNI BIBLIA LƐ TSƆƆ?

Biblia lɛ tsɔɔ akɛ, Nyɔŋmɔ yɛ henumɔi, ni ákɛ bɔ ni wɔbaa wɔjeŋ wɔhaa lɛ saa ehe waa diɛŋtsɛ. Beni blema Israelbii lɛ tse atua amɛshi Nyɔŋmɔ lɛ, “amɛfee lɛ nidɔɔnii.” (Lala 78:40) Kɛlɛ, kɛ́ mɔ ko ni feɔ nɔ ko ni ehiii lɛ tsake etsui lɛɛlɛŋ lɛ, ‘miishɛɛ kpele baa ŋwɛi.’ (Luka 15:7) Kɛ́ mɔ ko hiɛ basɔ wɔŋwɛi Tsɛ lɛ sui kpakpai lɛ, suɔmɔ ni mɔ lɛ yɔɔ kɛha Nyɔŋmɔ lɛ daa, ni no haa esumɔɔ nibii ni Nyɔŋmɔ sumɔɔ, ni enyɛɔ nibii ni Nyɔŋmɔ nyɛɔ lɛ.—Amos 5:15.

NI YEHOWA ODASEFOI HU?

Salt Lake City ni yɔɔ Utah yɛ U.S.A. lɛ adafitswaa wolo ko (The Deseret News) wie Yehowa Odasefoi ahe akɛ: “Amɛyeɔ amɛbuaa ni weku shihilɛ feɔ nɔ ni hi jogbaŋŋ, ni amɛhaa anáa maŋbii kpakpai.” Wolo lɛ kɛfata he akɛ: “Odasefoi lɛ hiɔ shi yɛ jeŋba he mlai ni nɔ kwɔlɔ lɛ anaa. Amɛheɔ amɛyeɔ akɛ tawashɛremɔ, dãanumɔ babaoo, tsofai ni akɛtsuɔ nii yɛ gbɛ ni ejaaa nɔ, asɔshwɛmɔ, hefatalɔ sɛɛ ni ajeɔ akɛ mɔ kroko náa bɔlɛ, nuu kɛ nuu bɔlɛnamɔ, loo yoo kɛ yoo bɔlɛnamɔ ji nifeemɔi ni teɔ shi woɔ Nyɔŋmɔ.”

Ani jamɔŋ hiɛnyiɛlɔi eye ebua amɛjamɔŋbii lɛ koni amɛkɛ Nyɔŋmɔ shishitoo mlai ni kɔɔ jeŋba he lɛ atsu nii?

Mɛɛ gbɛ nɔ Nyɔŋmɔ sui ni Odasefoi lɛ kaseɔ he nii lɛ yeɔ ebuaa amɛ? Sylvia ni wɔwie ehe kɛtsɔ hiɛ lɛ wie akɛ: “Ojotswaa ebu yɛ helatsamɔhei. Ewaaa kwraa akɛ bo hu okɛ ohe baawo mli. Shi le ni mile bɔ ni Yehowa * nuɔ ojotswaa he ehaa lɛ yeɔ ebuaa mi ni mifeɔ nɔ ni ja. Miyɛ miishɛɛ, ni mitsui nyɔɔ mimli.” Sylvia heɔ eyeɔ akɛ ejamɔ lɛ tsɔɔmɔi ni ehiɔ shi yɛ naa lɛ eha eshihilɛ ehi kwraa fe tsutsu lɛ.

^ kk. 9 Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.