Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ JUNE 2013

Ani Esa Akɛ Wɔkɛ Wɔsɔlemɔ Aha Saints Loo Hetselɔi?

Ani Esa Akɛ Wɔkɛ Wɔsɔlemɔ Aha Saints Loo Hetselɔi?

NAMƆ efeko yeyeeye yɛ shihilɛ mli, ni enuko he akɛ esa akɛ eya mɔ ko ŋɔɔ kɛha yelikɛbuamɔ pɛŋ? Kɛ́ wɔna nɔ ni kɛ yeyeeyefeemɔ lɛ ba lɛ, ekolɛ wɔbaasumɔ ni wɔtao wɔnaanyo ko ni nuɔ he ehaa wɔ, ni yɔɔ niiashikpamɔ yɛ naagba ni wɔkɛkpe lɛ mli koni wɔkɛ lɛ asusu he. Musuŋtsɔlɛ kɛ niiashikpamɔ ni mɔ lɛ yɔɔ lɛ haa ebafeɔ naanyo ni sa jogbaŋŋ.

Nakai ji bɔ ni mɛi komɛi baanu he amɛha yɛ sɔlemɔ gbɛfaŋ. Nɔ najiaŋ ni amɛbaabɛŋkɛ Nyɔŋmɔ—mɔ ni amɛsusuɔ akɛ enɔ kwɔ kwraa, ni ehe yɔɔ gbeyei—yɛ sɔlemɔ mli lɛ, amɛsumɔɔ moŋ akɛ amɛkɛ amɛsɔlemɔi lɛ aha hetselɔi loo saints lɛ eko. Amɛsusuɔ akɛ, akɛni hetselɔi nɛɛ ená amanehului kɛ shihilɛi ni mli wawai ni adesai kɛkpeɔ lɛ amli niiashikpamɔi hewɔ lɛ, amɛji mɛi ni baanu he waa amɛha amɛ. Ákɛ nɔkwɛmɔnɔ lɛ, mɛi komɛi ni amɛnibii ni he hiaa amɛ waa elaaje lɛ baasumɔ moŋ ni amɛkɛ amɛsɔlemɔ lɛ aha mɔ ko ni amɛtsɛɔ lɛ Saint Anthony ni jɛ Padua lɛ—ní aheɔ ayeɔ akɛ lɛ ehaa anaa nibii ni elaaje loo aju lɛ. Kɛ́ amɛmiisɔle amɛha kooloo ko ni bɛ hewalɛ lɛ, amɛsumɔɔ ni amɛkɛ amɛsɔlemɔ lɛ aha mɔ ko ni amɛtsɛɔ lɛ Saint Francis ni jɛ Assisi lɛ, loo kɛji akɛ amɛhao ni amɛleee nɔ ni amɛbaafee lɛ, amɛkɛ amɛsɔlemɔ lɛ haa mɔ ko ni amɛtsɛɔ lɛ Saint Jude Thaddeus lɛ.

Kɛlɛ, te wɔbaafee tɛŋŋ wɔle akɛ sɔlemɔi ni akɛhaa hetselɔi nɛɛ ja yɛ Ŋmalɛ naa loo ejaaa? Akɛni wɔsɔlemɔi lɛ ji wiemɔ ni wɔkɛ Nyɔŋmɔ wieɔ hewɔ lɛ, ekã shi faŋŋ akɛ wɔbaasumɔ ni wɔle sane nɛɛ: Ani Nyɔŋmɔ nuɔ wɔsɔlemɔi lɛ? Aso esaaa akɛ wɔbiɔ hu akɛ: Te Nyɔŋmɔ nuɔ sɔlemɔi ni akɛhaa hetselɔi lɛ ahe ehaa tɛŋŋ?

SƆLEMƆ NI AKƐHAA HETSELƆI—NƆ NI ŊMALƐI LƐ KƐƆ YƐ HE

Sɔlemɔi ni akɛhaa hetselɔi lɛ ji Katolik Sɔlemɔ lɛ tsɔɔmɔ akɛ hetselɔi lɛ damɔɔ mli amɛhaa mɛi. Wolo ko (New Catholic Encyclopedia) tsɔɔ mli akɛ, “eji nifeemɔ ni yɛ Nyɔŋmɔ hiɛ lɛ, mɔ ko ni yɔɔ hegbɛ akɛ edamɔɔ mɔ ko najiaŋ ebiɔ nii ehaa lɛ lɛ feɔ kɛbiɔ Nyɔŋmɔ nii ehaa mɔ lɛ.” No hewɔ lɛ, enɛ tsɔɔ akɛ mɛi ni amɛkɛ amɛsɔlemɔi haa hetselɔi lɛ feɔ nakai kɛ hiɛnɔkamɔ akɛ, ekolɛ Nyɔŋmɔ baatsɔ hetselɔi lɛ anɔ eduro amɛ, akɛni amɛsusuɔ akɛ hetselɔi lɛ yɛ hegbɛ krɛdɛɛ ko yɛ Nyɔŋmɔ hiɛ lɛ hewɔ.

Ani Biblia lɛ tsɔɔ tsɔɔmɔ ni tamɔ nakai? Mɛi komɛi kɛɔ akɛ bɔfo Paulo to sɔlemɔ ni akɛhaa hetselɔi lɛ ashishi yɛ nibii ni eŋmala lɛ amli. Ákɛ nɔkwɛmɔnɔ lɛ, eŋma kɛyaha Kristofoi ni yɔɔ Roma lɛ akɛ: “Miikpa nyɛ fai, anyɛmimɛi, yɛ wɔ-Nuŋtsɔ Yesu Kristo hewɔ kɛ mumɔ lɛ suɔmɔ lɛ hewɔ, akɛ nyɛfata mihe kɛpele yɛ nyɛsɔlemɔi ni nyɛsɔleɔ nyɛhaa mi yɛ Nyɔŋmɔ hiɛ lɛ amli.” (Romabii 15:30) Ani no mli lɛ Paulo miibi koni enyɛmimɛi Kristofoi lɛ adamɔ mli aha lɛ koni amɛkɛ esɔlemɔ lɛ aha Nyɔŋmɔ? Jeee nakai kwraa ji sane lɛ. Kɛ́ nɔ ko kwraa po lɛ, amɛ moŋ amɛbaabi Paulo ni eji Kristo bɔfo lɛ koni edamɔ mli eha amɛ. Nɔ ni no mli lɛ Paulo tsɔɔ lɛ ji akɛ, tɔ̃mɔ bɛ he akɛ wɔbaakɛɛ nyɛmi Kristofonyo ko akɛ kɛ́ eesɔle  eha Nyɔŋmɔ lɛ, ekai wɔ loo etsĩ wɔnaagbai lɛ atã yɛ esɔlemɔ lɛ mli. Shi esoro enɛ kwraa yɛ sɔlemɔ ni akɛhaa mɔ ko ni asusuɔ akɛ etee ŋwɛi, ni no hewɔ lɛ ekɛ wɔnibimɔ lɛ baaha Nyɔŋmɔ eha wɔ lɛ he. Mɛni hewɔ ni wɔkɛɔ nakai?

Yɛ Yohane Sanekpakpa lɛ mli lɛ, Yesu wie akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” (Yohane 14:6) Ni ekɛɛ hu akɛ: “Tsɛ lɛ baaha nyɛ nɔ fɛɛ nɔ ni nyɛbiɔ lɛ yɛ migbɛi amli lɛ.” (Yohane 15:16, The New Jerusalem Bible) Yesu ekɛɛɛ akɛ wɔkɛ wɔsɔlemɔi lɛ aha lɛ koni ekɛ Nyɔŋmɔ awie aha wɔ. Shi moŋ lɛ, bɔni afee ni Nyɔŋmɔ abo wɔsɔlemɔi lɛ atoi lɛ, esa akɛ wɔkɛ wɔsɔlemɔi lɛ aha Nyɔŋmɔ kɛtsɔ Yesu nɔ, shi jeee kɛtsɔ mɔ kroko nɔ.

Beni Yesu kaselɔi lɛ bi lɛ koni etsɔɔ amɛ bɔ ni asɔleɔ lɛ, ekɛɛ amɛ akɛ: “Kɛ́ nyɛmiisɔle lɛ, nyɛkɛɛa akɛ: ‘Wɔtsɛ ni yɔɔ ŋwɛi, ogbɛi lɛ afee krɔŋkrɔŋ.’” (Luka 11:2) Hɛɛ, “kɛ́ wɔmiisɔle” loo be fɛɛ be ni wɔbaasɔle lɛ, Nyɔŋmɔ ji mɔ ni esa akɛ wɔkɛwie, shi jeee Yesu loo mɔ kroko. Yɛ Yesu tsɔɔmɔ ni mli kã shi faŋŋ nɛɛ hewɔ lɛ, ani nilee bɛ mli akɛ wɔbaamu sane naa akɛ, jeee mlidamɔlɔi loo mɛi komɛi ni atsɛɔ amɛ hetselɔi lɛ esa akɛ wɔkɛ wɔsɔlemɔ lɛ aha, shi moŋ esa akɛ wɔkɛha Nyɔŋmɔ kɛtsɔ Yesu Kristo nɔ?

Sɔlemɔ ji wɔjamɔ lɛ fã ko ni he hiaa waa, no hewɔ lɛ, kɛ́ wɔjá mɔ kroko moŋ fe ni wɔbaaja Nyɔŋmɔ lɛ, eyɛ faŋŋ akɛ no kɛ Biblia lɛ kpaaa gbee kwraa. (Yohane 4:23, 24; Kpojiemɔ 19:9, 10) No hewɔ ni esa akɛ wɔkɛ wɔsɔlemɔi lɛ aha Nyɔŋmɔ pɛ lɛ.

ANI ESA AKƐ OSHE GBEYEI AKƐ OBAABƐŊKƐ NYƆŊMƆ?

Yɛ Yesu Gɔŋ nɔ Shiɛmɔ lɛ mli lɛ, eha nɔkwɛmɔnɔ ni kɔɔ gbekɛ ko ni bi koni etsɛ aha lɛ nɔ ko eye lɛ he. Ani tsɛ lɛ baaha ebi lɛ tɛ moŋ fe ni ebaaha lɛ aboloo? Loo ebaaha lɛ onufu moŋ fe ni ebaaha lɛ ŋshɔŋloo? (Mateo 7:9, 10) Jwɛŋmɔ bɛ mli akɛ fɔlɔ ko ni yɔɔ suɔmɔ baafee nɔ ko ni tamɔ nɛkɛ!

Nyɔŋmɔ miisumɔ akɛ wɔkɛ lɛ agba sane taakɛ tsɛ ni yɔɔ suɔmɔ kɛ ebi feɔ lɛ

Susumɔ nɔkwɛmɔnɔ ko ni tamɔ nakai ni kɔɔ fɔlɔ he lɛ he okwɛ. Ŋɔɔ lɛ akɛ nɔ ko kã obi ko tsui nɔ waa ni eetao ebi bo. Otswa okɛ obi lɛ teŋ wekukpaa lɛ oma shi jogbaŋŋ, ni anyɛɔ abɛŋkɛɔ bo be fɛɛ be ni asumɔɔ. Kɛlɛ, akɛni obi lɛ sheɔ bo gbeyei, shi ebɛ nɔdaamɔnɔ ko yɛ he lɛ hewɔ lɛ, ekɛ nibimɔ ni kã etsui nɔ lɛ hã mɔ ko koni mɔ lɛ ababi bo aha lɛ. Te obaanu he oha tɛŋŋ? Ni kɛ́ ekɛfee esu akɛ ebaakɛɛ mɔ lɛ enaagba koni mɔ lɛ abakɛɛ bo, ni ona akɛ ekpɛ eyiŋ akɛ ebaaya nɔ efee nakai hu? Ani obaaná nakai gbɛjianɔtoo lɛ he miishɛɛ? Ekã shi faŋŋ akɛ onaŋ he miishɛɛ kwraa! Fɔlɔi ni sumɔɔ amɛbii asane lɛ baasumɔ koni amɛbii lɛ kɛ amɛnaagbai abafɔ amɛhiɛ, ni amɛkashashao shi akɛ amɛbaabi amɛ nɔ fɛɛ nɔ ni he hiaa amɛ.

Beni Yesu kɛ enɔkwɛmɔnɔ ni kɔɔ gbekɛ ko ni miibi koni aha lɛ nɔ ko eye lɛ he lɛ tsuɔ nii lɛ, ekɛɛ etoibolɔi lɛ akɛ: “Agbɛnɛ kɛji nyɛ ni nyɛji mɛi fɔ̃ji lɛ nyɛle bɔ ni nyɛfeɔ nyɛŋɔɔ nikpakpai nyɛhaa nyɛbii lɛ: enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ nikpakpai ehaŋ mɛi ni biɔ lɛ lɛ?” (Mateo 7:11) Ŋwanejee ko bɛ he akɛ, fɔlɔi shweɔ waa akɛ amɛkɛ nibii kpakpai baaha amɛbii. Shwelɛ ni wɔŋwɛi Tsɛ lɛ yɔɔ akɛ eha wɔ nibii kpakpai lɛ mli wa kwraa po fe fɔlɔi lɛ anɔ̃.

Kɛ́ wɔfatɔi lɛ efee jatsui ni tsii yɛ wɔnɔ po lɛ, Nyɔŋmɔ miisumɔ koni wɔkɛ lɛ awie tɛ̃ɛ yɛ sɔlemɔ mli. Ekɛ hegbɛ akɛ abo sɔlemɔi atoi lɛ hako mɛi krokomɛi. Biblia lɛ woɔ wɔ hewalɛ akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.” (Lala 55:22, Ga Biblia hee) Nɔ najiaŋ ni wɔkɛ wɔhe baafɔ̃ hetselɔi loo mɔ ko nɔ akɛ edamɔ mli eha wɔ lɛ, esa akɛ wɔná Yehowa Nyɔŋmɔ he jwɛŋmɔ ni ja.

Wɔŋwɛi Tsɛ lɛ susuɔ wɔhe akɛ aŋkroaŋkroi. Eesumɔ ni eye ebua wɔ kɛtsu wɔnaagbai lɛ ahe nii, efɔ̃ɔ wɔ nine akɛ wɔtsi wɔbɛŋkɛ lɛ. (Yakobo 4:8) Kwɛ bɔni wɔyɔɔ miishɛɛ akɛ wɔyɛ hegbɛ akɛ wɔbɛŋkɛɔ wɔ-Nyɔŋmɔ kɛ wɔ-Tsɛ, ni ji ‘sɔlemɔ Toibolɔ’ lɛ!Lala 65:2, Ga Biblia hee.