Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MAY 2013

 BIBLIA LƐ TSAKEƆ MƐI

“Kulɛ Miitao Matsɔ Osɔfo”

“Kulɛ Miitao Matsɔ Osɔfo”
  • BE NI AFƆ LƐ: 1957
  • MAŊ NƆ NI EJƐ: MEXICO
  • MƆ NI EJI TSUTSU: MITEE OSƆFOI ASKUL; MITSUI GBA MINAA WAA

MITSUTSU SHIHILƐ:

Afɔ mi yɛ Texcoco, maŋ bibioo ko ni yɔɔ Mexico lɛ mli. No beaŋ lɛ, awoko gbɛjegbɛi lɛ babaoo anɔ, ni enɔ yɛ mulu waa. Bei pii lɛ, mɛi babaoo ni jɛɔ akrowai ni bɛŋkɛ lɛ amli lɛ kɛ amɛjatsui lɛ shwieɔ tejii anɔ kɛbaa maŋ lɛ mli koni amɛbahɔɔ. Wɔyi nɛɛhu ji bii ni yɔɔ weku ni yeɔ ohia nɛɛ mli, ni miji mɔ kpawo nɔ yɛ bii lɛ ateŋ. Mipapa saa tokota loo etsuɔ shumeka kɛkwɛɔ weku lɛ. Shi egbo beni miye afii kpawo. Kɛjɛ no nɔ kɛyaa lɛ, mimami yatsomloɔ koni weku lɛ aná nii aye.

No mli lɛ, minii tswaa saŋku, ni enyiɛɔ saŋkutswalɔi akuu ko ni tswaa sɔlemɔi lalai titri lɛ ahiɛ. Etamɔ nɔ ni miwekumɛi lɛ fɛɛ le saŋku kɛ ehenɔi lɛ atswaa. No mli lɛ, mimami fata kuu ni láa yɛ sɔlemɔ lɛ mli lɛ ahe, ni mitsɛkwɛ hu láa ni etswaa piano. Wɔkɛ Katolik jamɔ lɛ shwɛɛɛ kwraa—mifata gbekɛbii hii ni nyiɛɔ osɔfoi lɛ ahiɛ lɛ ahe, ni mishwe akɛ wɔsɛɛ lɛ matsɔ Katolik maŋsɛɛ sɔɔlɔ. No beaŋ hu lɛ, misumɔɔ sinii ni anɔɔ karat yɛ mli lɛ akwɛmɔ naakpa. Babaoo ni mikwɛɔ nakai sinii lɛ, babaoo ni ehaa mifeɔ basabasa ji no.

Beni miyɔɔ Puebla lɛ, mitee jamɔŋ skul ko ni atsɔɔ osɔfoyeli hu yɛ jɛmɛ lɛ. No mli lɛ, oti ni ma mihiɛ ji matsɔ Katolik osɔfo. Shi beni eshwɛ afi ni magbe skul lɛ naa lɛ, Katolik jamɔ lɛ baje mitsine kwraa, ejaakɛ nibii eyabaaa lɛ bɔ ni mikpa gbɛ lɛ. Oblayoo ko ni sɔmɔɔ yɛ sɔlemɔwe lɛ bɔɔ mɔdɛŋ akɛ ekɛ mi baaná bɔlɛ. Mibɔ mɔdɛŋ miye kaa nɛɛ nɔ, shi shihilɛ nɛɛ ha miná shwelɛ akɛ mabote gbalashihilɛ mli. Kɛfata he lɛ, miyɔse akɛ osɔfoi lɛ ateŋ babaoo feɔ osato. Naagbee lɛ, miŋmɛɛ oti ni mikɛ ma mihiɛ akɛ matsɔ osɔfo lɛ he kwraa.

Mifata gbekɛbii ni nyiɛɔ osɔfoi lɛ ahiɛ lɛ ahe, ni no ha mishwe akɛ matsɔ Katolik maŋsɛɛ sɔɔlɔ. No mli lɛ, mikwɛɔ karat he sinii waa, ni mibɔi basabasa feemɔ

 Mikpɛ miyiŋ akɛ maya skul ko (National Conservatory of Music) ni yɔɔ Mexico City lɛ koni mayakase lala he nii. Beni migbe skul nɛɛ naa lɛ, mibote gbalashihilɛ mli, ni etsɛɛɛ kɛkɛ ni wɔfɔ bii ejwɛ. Miláa yɛ Katolik Sɔlemɔ lɛ mli kɛ́ aafee Mass loo sɔlemɔ, ni no mitsu kɛkwɛ miweku lɛ.

Kɛjɛ wɔgbalashihilɛ lɛ shishijee tɔ̃ɔ ni wɔkɛ wɔhe bɔi bemɔ. Wɔkɛ wɔhe nɔɔ ni wɔpilaa wɔhe, ni fɛɛ jɛ wɔhe awuŋa ni wɔyeɔ lɛ hewɔ. Wɔje shishi kɛ wɔhe sopamɔ, ni no sɛɛ lɛ wɔbɔi nɔmɔ. Wɔhi shi afii 13, ni naagbee lɛ wɔkpɛ mli akɛ wɔbaagbala mli, ni sɛɛ mli lɛ, wɔtse gbala lɛ mli.

BƆ NI BIBLIA LƐ TSAKE MISHIHILƐ:

Mikɛ Yehowa Odasefoi ná sharamɔ dani mikɛ mihefatalɔ lɛ gbala mli. Odasefoi enyɔ batswa wɔshinaa lɛ, ni amɛkɛɛ amɛkɛ wɔ baakase Biblia lɛ. Misusu akɛ mile jamɔ he saji waa, no hewɔ lɛ mito akɛ matsɔɔ amɛ akɛ mibe kwraa fe amɛ. Mibibiɔ amɛ saji ni wala kɛ susumɔ akɛ amɛnáŋ hetoo. Shi be fɛɛ be lɛ, amɛhaa mi hetoi ni ja ni damɔ Biblia lɛ nɔ, ni enɛ ha minaa kpɛ mihe pam. Mibayɔse akɛ asomoaŋ mileee nɔ ko nɔ ko kwraa. Kɛlɛ, no mli lɛ, miŋa nyafĩɔ Odasefoi lɛ waa, ni akɛni mináaa deka hewɔ lɛ, amɛkpa baa.

Afii enumɔ sɛɛ lɛ, mikɛ yoo kroko ni atsɛɔ lɛ Elvira bɔi nyiɛmɔ, ni shi kome ekoŋŋ lɛ mikɛ Yehowa Odasefoi lɛ bɔi sharamɔ. Elvira eteee shi ewooo Odasefoi lɛ, no hewɔ lɛ ebafee mlɛo kɛha mi akɛ makase Biblia lɛ nɔtonɔto. Fɛɛ sɛɛ po lɛ, ehé mi afii komɛi dani minyɛ mikpa mitsutsu jeŋbai lɛ.

Mibayɔse akɛ, kɛ́ miisumɔ ni majɛ mitsuiŋ fɛɛ masɔmɔ Yehowa lɛ, ehe baahia koni mafee tsakemɔi kpelei komɛi. Klɛŋklɛŋ lɛ, ebabi koni makpa lala ni miyaláa yɛ Katolik Sɔlemɔ lɛ mli beni afeɔ Mass lɛ, ni no tsɔɔ akɛ esa akɛ matao nɔ kroko matsu kɛkwɛ miweku lɛ. (Kpojiemɔ 18:4) Ehe bahia hu ni mikɛ gbalashihilɛ ni mikɛ Elvira ebote mli lɛ ayawo mla shishi.

Shi tsakemɔi lɛ ateŋ nɔ ni bawa waa kɛha mi ji bɔ ni mafee makudɔ mibɛku tsui lɛ. Biblia ŋmalɛi enyɔ komɛi ye bua mi waa diɛŋtsɛ: Lala 11:5, ni wieɔ akɛ Yehowa hiɔ yiwalɛ nifeemɔ lɛ, kɛ 1 Petro 3:7 lɛ, ni ha mile akɛ kɛ́ miitao ni Yehowa abo misɔlemɔi atoi lɛ, no lɛ esa akɛ mikɛ miŋa aye yɛ bulɛ mli lɛ. Beni mijwɛŋ nakai ŋmalɛi lɛ anɔ, ni misɔle koni Yehowa aye abua mi lɛ, fiofio lɛ, minyɛ mikudɔ mibɛku tsui lɛ.

Biblia lɛ ha mile akɛ kɛ́ miitao ni Yehowa abo misɔlemɔi atoi lɛ, no lɛ esa akɛ mikɛ miŋa aye yɛ bulɛ mli

BƆ NI MINÁ HE SƐƐ:

Amrɔ nɛɛ miweku shihilɛ lɛ efee nɔ ni yɔɔ miishɛɛ waa. Miibɔ mɔdɛŋ koni mi kɛ mibihii ni mifɔ yɛ klɛŋklɛŋ gbalashihilɛ lɛ mli lɛ ateŋ afee jogbaŋŋ, koni maye mabua miweku ni miná amrɔ nɛɛ hu lɛ ni amɛhe awa yɛ hemɔkɛyeli lɛ mli.

Beni miji gbekɛ lɛ, kulɛ miitao matsɔ osɔfo koni maye mabua mɛi. Amrɔ nɛɛ minuɔ he akɛ mitsui enyɔ mimli waa diɛŋtsɛ. Mitsɔɔ lala kɛkwɛɔ miweku lɛ. Miida Yehowa shi waa akɛ eto etsui shi eha mi, ni eha miná hegbɛ kɛtsake kɛbatsɔ gbɔmɔ kpakpa!