Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ MAY 2013

Ani Okɛ Ohe Baafɔ̃ Nyɔŋmɔ Nɔ?

Ani Okɛ Ohe Baafɔ̃ Nyɔŋmɔ Nɔ?

ŊƆƆ lɛ akɛ oyɛ naanyo ko ni osumɔɔ esane waa, shi efee nɔ ko ni onuuu shishi. Mɛi komɛi wieɔ amɛshiɔ enifeemɔi kɛ esusumɔ, ni amɛkɛɔ akɛ onaanyo lɛ yitsoŋ wa. Ani ohe baafee oya ni okɛ amɛ akpã gbee, loo obaato otsui shi, ni obo nɔ ni onaanyo lɛ hu yɔɔ kɛɛmɔ toi? Kɛ́ ebɛ jɛmɛ ni ebaatsɔɔ nɔ ni ba lɛ mli lɛ, ani obaato otsui shi ni okamu sane naa?

Dani obaaha hetoo lɛ, ekolɛ obaasumɔ ni ole babaoo yɛ sane lɛ he. Ekolɛ, obaabi akɛ, ‘Te mile naanyo nɛɛ jogbaŋŋ miha tɛŋŋ, ni mɛni hewɔ misumɔɔ esane lɛ?’ Ojogbaŋŋ. Susumɔ enɛ he okwɛ: Ani wɔnyɛŋ wɔkɛ shishitoo mla nɛɛ nɔŋŋ atsu nii yɛ sane ni abiɔ akɛ Nyɔŋmɔ yitsoŋ wa loo eyitsoŋ waaa lɛ mli?

Ekolɛ, ebaawa kɛha bo akɛ obaanu nibii komɛi ni Nyɔŋmɔ efee lɛ ashishi, loo ekolɛ kɛ́ osusu nɔ hewɔ ni eŋmɛ nibii komɛi agbɛ lɛ he lɛ, ojwɛŋmɔ shɛɛɛ he. Mɛi babaoo yɛ ni baakɛɛ bo akɛ Nyɔŋmɔ yitsoŋ wa, ni amɛbaawo bo hewalɛ koni okojo esusumɔi lɛ taakɛ amɛfeɔ lɛ. Ani obaaŋmɛ otsui shi koni okamu sane naa kɛyashi obaale sane lɛ he nii babaoo? Hetoo ni obaaha lɛ baadamɔ bɔ ni ole Nyɔŋmɔ jogbaŋŋ oha lɛ nɔ. Bi ohe akɛ, ‘Mɛɛ nibii kpakpai Nyɔŋmɔ efee eha mi?’

Kɛ́ shihilɛ lɛ kɛ bo etswia shi lɛ, no lɛ kɛ́ okwɛɛɛ ni ahi lɛ, obaamu sane naa akɛ Nyɔŋmɔ efeko nɔ ko kpakpa ko ehako bo. Shi shwiemɔ oyiŋ okwɛ. Ani Nyɔŋmɔ ji mɔ ni ha shihilɛ lɛ kɛ bo tswia shi lɛ—loo mɔ ni fee nibii kpakpai komɛi kɛha bo lɛ? Taakɛ wɔna lɛ, Satan ji “je nɛŋ lumɔ lɛ,” jeee Yehowa. (Yohane 12:31) No hewɔ lɛ, Satan ji mɔ ni hɔ je nɛɛ naagbai kɛ jalɛsane ni ayeee lɛ amli kpotoo asɛɛ. Ani okpɛlɛŋ nɔ akɛ wɔnaagbai lɛ babaoo hu jɛ emuu ni wɔyeee kɛ nibii ni baa trukaa lɛ?

Ani Nyɔŋmɔ ji mɔ ni ha shihilɛ lɛ kɛ bo tswia shi lɛ—loo mɔ ni fee nibii kpakpai komɛi kɛha bo lɛ?

Yɛ gbɛ kroko nɔ lɛ, mɛni Nyɔŋmɔ efee? Susumɔ nɔ ni Biblia lɛ kɛɔ lɛ he okwɛ: ákɛ Nyɔŋmɔ ji “mɔ ni fee ŋwɛi kɛ shikpɔŋ lɛ”; ni ákɛ wɔgbɔmɔtsei lɛ fata nibii ni efee ni yɔɔ ‘naakpɛɛ’ lɛ ahe; ni ákɛ Yehowa ji “Nyɔŋmɔ ní omumɔ yɔɔ edɛŋ” lɛ. (Lala 124:8; 139:14; Daniel 5:23) Mɛni nomɛi fɛɛ tsɔɔ?

No tsɔɔ akɛ wɔhiɛ ni kamɔ lɛ kɛ wala mli ni wɔyɔɔ lɛ tete jɛ wɔ-Bɔlɔ lɛ. (Bɔfoi lɛ Asaji 17:28) No tsɔɔ akɛ nikeenii ni ji wala, nibii fɛfɛji ni ebɔle wɔ yɛ je lɛ mli, suɔmɔ kɛ naanyobɔɔ mli ŋɔɔmɔ, bɔ ni wɔsaa nii anaa, wɔtaa nii ahe, wɔnuɔ gbɛɛmɔi, kɛ nibii aŋma ni wɔnuɔ lɛ—fɛɛ ji nikeenii ni jɛ Nyɔŋmɔ ŋɔɔ. (Yakobo 1:17) Ani okpɛlɛɛɛ nɔ akɛ nibii ni ekɛduro wɔ nɛɛ fɛɛ haa ebafeɔ Naanyo ni sa akɛ wɔsumɔ esane waa, ni wɔkɛ wɔhe afɔ̃ enɔ?

Anɔkwa, ekolɛ onaŋ lɛ mlɛo akɛ okɛ ohe baafɔ̃ Nyɔŋmɔ nɔ. Ekolɛ, onuɔ he akɛ oleko lɛ jogbaŋŋ bɔ ni baaha onyɛ okɛ ohe afɔ̃ enɔ. Ni shishinumɔ yɛ he. Wɔnyɛɛɛ wɔtsĩ yiŋtoi fɛɛ ahewɔ ni mɛi komɛi susuɔ akɛ Nyɔŋmɔ yitsoŋ wa lɛ atã yɛ saji kukuji ni wɔsusu he nɛɛ amli koni wɔtsɔɔ mli. Shi, ani ebafeŋ nɔ ni ja akɛ obaabɔ mɔdɛŋ koni ole Nyɔŋmɔ jogbaŋŋ? * Wɔyɛ nɔmimaa akɛ kɛ́ ofee nakai lɛ, obaale Nyɔŋmɔ he anɔkwale lɛ. Ani eyitsoŋ wa? Jeee nakai kwraa ji sane lɛ: “Nyɔŋmɔ lɛ, suɔmɔ ji lɛ.”—1 Yohane 4:8.

^ kk. 8 Ákɛ nɔkwɛmɔnɔ lɛ, obaana saji krokomɛi ni tsɔɔ nɔ̃ hewɔ ni Nyɔŋmɔ eŋmɛ efɔŋfeemɔ gbɛ lɛ yɛ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 11 lɛ mli.

 

Ekrokromɛi Hu Nɛ

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Mɛni kɛ efɔŋfeemɔ ba, ni mɛni hewɔ Nyɔŋmɔ eŋmɛ gbɛ ni eyaa nɔ lɛ? Ani nɔnaa baaba naagbee gbi ko?