Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  May 2013

Adebɔɔ Naa Osharai—Ani Eji Odaseyeli Ni Tsɔɔ Akɛ Nyɔŋmɔ Yitsoŋ Wa?

Adebɔɔ Naa Osharai—Ani Eji Odaseyeli Ni Tsɔɔ Akɛ Nyɔŋmɔ Yitsoŋ Wa?

NƆ NI MƐI KOMƐI KƐƆ: “Nyɔŋmɔ baanyɛ etsĩ adebɔɔ naa osharai anaa, kɛlɛ eŋmɛɔ gbɛ ni amɛbaa, no hewɔ lɛ eyitsoŋ wa.”

NƆ NI BIBLIA LƐ KƐƆ: “Jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Namɔ ji “mɔ fɔŋ lɛ?” Biblia lɛ haa anaa akɛ lɛ ji Satan. (Mateo 13:19; Marko 4:15) Ani osusuɔ akɛ enyɛŋ eba lɛ nakai? Susumɔ enɛ he okwɛ: Kɛ́ Satan yɛ je lɛ nɔ hewalɛ lɛ, belɛ no tsɔɔ akɛ ewoɔ adesai ahewalɛ koni amɛfó amɛ pɛ amɛnɔ mli, amɛye amim, koni amɛkakwɛ nii kɛtee shɔŋŋ taakɛ efeɔ lɛ. Ani no haaa ana nɔ hewɔ ni adesai nyɛɛɛ akwɛ shikpɔŋ lɛ nɔ jogbaŋŋ lɛ? Mɛi babaoo ni le adebɔɔ naa osharai ahe nii lɛ etsɔɔ akɛ, bɔ ni akwɛɛɛ je lɛ nɔ jogbaŋŋ lɛ hu fata he ni adebɔɔ naa osharai baa lɛ; enyɛɔ ehaa adebɔɔ naa osharai lɛ baa, ewoɔ mli wu, loo no haaa adesai afee shweshweeshwe.

Belɛ, mɛni hewɔ Nyɔŋmɔ eŋmɛ Satan gbɛ ni ená hewalɛ babaoo nakai? Hetoo lɛ gbalaa wɔjwɛŋmɔ kɛyaa adesai ashishijee tɔ̃ɔ, beni wɔklɛŋklɛŋ fɔlɔi lɛ kpoo Nyɔŋmɔ akɛ Nɔyelɔ lɛ. Kɛjɛ no nɔ kɛbaa nɛɛ, adesai babaoo hu ekɔ nakai gbɛ lɛ. Nakai gbɛ ni akɔ lɛ, ni ji Nyɔŋmɔ nɔyeli ni akpoo lɛ, eha adesai aje lɛ eyaje Nyɔŋmɔ henyɛlɔ ni ji Satan dɛŋ. No hewɔ ni Yesu tsɛ Satan akɛ “je lɛŋ lumɔ lɛ.” (Yohane 14:30) Ani Satan baaye nɔ kɛya naanɔ? Dabi!

Yehowa * jeee mɔ ko ni yitsoŋ wa ni susuuu nɔnaa ni Satan kɛbaa lɛ he. Anɔkwa, bɔ ni adesai piŋɔ lɛ dɔɔ Nyɔŋmɔ naakpa. Ákɛ nɔkwɛmɔnɔ lɛ, beni Israelbii lɛ kɛ haomɔ ni naa wa kpeɔ lɛ, Biblia lɛ wie yɛ Nyɔŋmɔ he akɛ: “Amɛhaomɔi lɛ fɛɛ mli lɛ, lɛ hu ehao.” (Yesaia 63:9) Akɛni Nyɔŋmɔ naa mɔbɔ hewɔ lɛ, eto gbɛjianɔ koni ekɛ Satan yiwalɛ nɔyeli lɛ aba naagbee—etsɛŋ kwraa! Ehala e-Bi, Yesu Kristo koni esɔmɔ akɛ Maŋtsɛ ni ja ni baaye jalɛsane kɛya naanɔ.

BƆ NI SANE LƐ KƆƆ OHE: Satan nɔyeli lɛ nyɛko abu gbɔmɛi ahe kɛjɛ adebɔɔ naa osharai ahe, shi Yesu nɔyeli lɛ baafee nakai. Be ko ni ahum ni naa wa ko miitswa lɛ, Yesu fee nɔ ko kɛbu ekaselɔi lɛ ahe. Biblia amaniɛbɔɔ lɛ kɛɔ akɛ “Efã kɔɔyɔɔ lɛ yi, ni ekɛɛ ŋshɔ lɛ akɛ: Bu onaa ní ofee diŋŋ: Ni kɔɔyɔɔ lɛ fɔ̃ɔ tswaa ni eŋmɛ dɛmm.” Ni kaselɔi lɛ kɛɛ akɛ: “Namɔ po nɛ, ni kɔɔyɔɔ kɛ ŋshɔ tete boɔ lɛ toi nɛɛ?” (Marko 4:37-41) Nakai sane lɛ haa wɔnáa hekɛnɔfɔ̃ɔ akɛ Yesu baabu adesai fɛɛ ni boɔ lɛ toi lɛ ahe beni eyeɔ nɔ akɛ Maŋtsɛ lɛ.—Daniel 7:13, 14.

^ kk. 5 Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.