Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ APRIL 2013

Yesu—Mɔ Tuuntu ni Haa Mɔ Tsui Nyɔɔ Emli

Yesu—Mɔ Tuuntu ni Haa Mɔ Tsui Nyɔɔ Emli

ANI Yesu tsui nyɔ emli lɛɛlɛŋ yɛ shihilɛ mli? Ekã shi faŋŋ akɛ atsɔse lɛ yɛ shihilɛi ni baa shi amli, ni yɛ eshihilɛ mli fɛɛ lɛ, heloonaa nii fioo ko pɛ ená. Yɛ anɔkwale mli lɛ, no mli lɛ, ‘ebɛ he ni ekɛ eyitso ŋmɛɔ’ po. (Luka 9:57, 58) Kɛfata he lɛ, anyɛ lɛ, afolɔ enaa, ni naagbee lɛ ehenyɛlɔi lɛ gbe lɛ.

Ekolɛ obaashwie oyiŋ akɛ, ‘Efeee mi akɛ shihilɛ ni tamɔ nɛkɛ lɛ haa mɔ tsui nyɔɔ emli diɛŋtsɛ!’ Shi, Yesu shihilɛ he nibii babaoo yɛ ni esa akɛ wɔbɔ mɔdɛŋ wɔsusu he. Ha wɔpɛi enɛɛmɛi ateŋ ejwɛ amli wɔkwɛ.

1. YESU KƐ OTI KO MA EHIƐ YƐ SHIHILƐ MLI—EBAAFEE NYƆŊMƆ SUƆMƆNAANII.

“Miŋmaa ji akɛ mafee mɔ ni tsu mi lɛ suɔmɔnaanii.”—Yohane 4:34.

Yesu tsɔ ewiemɔi kɛ enifeemɔi anɔ ebɔ mɔdɛŋ efee eŋwɛi Tsɛ, Yehowa * suɔmɔnaanii. Yesu ná Nyɔŋmɔ suɔmɔnaa nifeemɔ he miishɛɛ waa. Anɔkwa, ekɛ no feemɔ to niyenii he taakɛ wɔnaa yɛ ŋmalɛ ni tsɔ hiɛ nɔŋŋ lɛ mli lɛ. Bo lɛ, susumɔ shihilɛ ni ba ni ha Yesu kɛ Nyɔŋmɔ suɔmɔnaa nifeemɔ to niyenii he lɛ he okwɛ.

Yesu wie nakai wiemɔi lɛ aaafee shwane ŋmɛlɛ nyɔŋma kɛ enyɔ mli. (Yohane 4:6) No beaŋ lɛ, eyakpa Samaria akrowa lɛ mli leebi fɛɛ, no hewɔ lɛ ekã shi faŋŋ akɛ hɔmɔ miiye lɛ. Anɔkwa, no mli lɛ ekaselɔi lɛ ebakɛɛ lɛ akɛ: “Rabi, ye nɔ ko.” (Yohane 4:31) Yesu tsɔ hetoo ni eha amɛ lɛ nɔ etsɔɔ akɛ kɛ́ etsu Nyɔŋmɔ nitsumɔ lɛ, enuɔ he akɛ eye nii etɔ, ni ená hewalɛ. Ani enɛ etsɔɔɔ akɛ eji nuu ko ni tsui nyɔ emli diɛŋtsɛ yɛ shihilɛ mli?

2. YESU NÁ SUƆMƆ NI MLI WA EHA ETSƐ.

“Misumɔɔ tsɛ lɛ.”—Yohane 14:31.

Yesu ná ekɛ e-Tsɛ teŋ wekukpãa gbagbalii yɛ ŋwɛi. Suɔmɔ ni mli wa waa ni Yesu yɔɔ kɛha Nyɔŋmɔ lɛ kanya lɛ ni ejie e-Tsɛ lɛ shi etsɔɔ—eha ale e-Tsɛ lɛ gbɛ́i, eyiŋtoi, kɛ esui. Yesu tsɔ ewiemɔi, enifeemɔi, kɛ esui anɔ eha ana bɔ ni e-Tsɛ ji jogbaŋŋ—aahu ákɛ kɛ́ wɔkane Yesu he saji lɛ, efeɔ tamɔ wɔmiikane e-Tsɛ lɛ he nii. No hewɔ ni beni Filipo bi Yesu akɛ: “Tsɔɔmɔ wɔ tsɛ lɛ,” Yesu ha lɛ hetoo akɛ: “Mɔ ni ena mi lɛ, ena tsɛ lɛ.”—Yohane 14:8, 9.

Yesu sumɔ e-Tsɛ lɛ aahu akɛ esumɔ koni ebo lɛ toi, kɛ́ no baaha egbo tete po. (Filipibii 2:7, 8; 1 Yohane 5:3) Nakai suɔmɔ ni mli wa waa ni Yesu ná kɛha Nyɔŋmɔ lɛ ha etsui nyɔ emli yɛ shihilɛ mli.

 3. YESU SUMƆ MƐI.

“Mɔ ko bɛ suɔmɔ ni da fe enɛ, akɛ mɔ aaaŋɔ ewala eŋmɛ shi eha eshieŋtsɛmɛi.”—Yohane 15:13.

Ŋwanejee ko kwraa bɛ he akɛ, ákɛ adesai ni yeee emuu lɛ, wɔbɛ gbɛkpamɔ kpakpa ko kɛha wɔsɛɛ. Biblia lɛ tsɔɔ mli akɛ: “Gbɔmɔ kome [Adam] nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha lɛ.” (Romabii 5:12) Wɔnyɛŋ wɔkɛ wɔ diɛŋtsɛ wɔmɔdɛŋbɔɔ ajo nɔ ni jɛɔ esha mli kɛbaa, ni ji gbele, lɛ naa foi kɔkɔɔkɔ.—Romabii 6:23.

Miishɛɛ sane ji akɛ, Yehowa jɛ suɔmɔ mli ekɛ adesai anaagba nɛɛ naa tsabaa ha. Eŋmɛ gbɛ ni e-Bi ni eye emuu, ni esha ko kwraa bɛ ehe ni atsɛɔ lɛ Yesu lɛ na nɔ, ni egbo bɔni afee ni ekɛ kpɔ̃mɔnɔ ni he hiaa koni akɛkpɔ̃ adesai kɛjɛ esha kɛ gbele nyɔŋyeli mli lɛ aha. Suɔmɔ ni Yesu ná kɛha e-Tsɛ lɛ kɛ adesai lɛ, tsirɛ lɛ koni ejɛ esuɔmɔ mli ekpɛlɛ ni ekɛ adesa wala ni yeɔ emuu ni eyɔɔ lɛ aha yɛ wɔnajiaŋ. (Romabii 5:6-8) Suɔmɔ ni pɛsɛmkunya bɛ mli ni Yesu ná lɛ ha etsui nyɔ emli yɛ shihilɛ mli. *

4. YESU LE AKƐ ETSƐ SUMƆƆ LƐ NI EKPƐLƐƆ ENƆ.

“Mɔnɛ ji misuɔmɔ bi ní mináa ehe tsui lɛ.”Mateo 3:17.

Yehowa jɛ ŋwɛi ewie wiemɔi nɛɛ beni abaptisiɔ Yesu lɛ. No hewɔ lɛ, Yehowa fee lɛ faŋŋ akɛ esumɔɔ e-Bi Yesu, ni ekpɛlɛɔ enɔ. Ebɛ naakpɛɛ mɔ akɛ Yesu kɛ nɔmimaa wie akɛ: “Tsɛ lɛ sumɔɔ mi” lɛ. (Yohane 10:17) Akɛni Yesu le akɛ e-Tsɛ lɛ sumɔɔ lɛ, ni ekpɛlɛɔ enɔ hewɔ lɛ, ená ekãa kɛkpee shiteekɛwoo kɛ naafolɔmɔi anaa. Suɔmɔ kɛ nɔkpɛlɛmɔ nɛɛ ye ebua Yesu ni eyasheee gbele tete gbeyei. (Yohane 10:18) Ŋwanejee ko kwraa bɛ he akɛ, bɔ ni Yesu nu he akɛ e-Tsɛ lɛ sumɔɔ lɛ, ni ekpɛlɛɔ enɔ lɛ hu ha etsui nyɔ emli fe fɛɛ yɛ shihilɛ mli lɛ.

Eji anɔkwale akɛ Yesu tsui nyɔ emli diɛŋtsɛ yɛ shihilɛ mli. Eyɛ pefee akɛ wɔbaanyɛ wɔkase bɔ ni wɔbaafee wɔha wɔtsui anyɔ wɔmli diɛŋtsɛ yɛ shihilɛ mli lɛ he nii babaoo kɛjɛ edɛŋ. Sane ni nyiɛ sɛɛ lɛ baawie ŋaawoi ni mli kã shi faŋŋ ni Yesu kɛha esɛɛnyiɛlɔi lɛ, ni kɔɔ bɔ ni esa akɛ amɛhi shi amɛha lɛ ahe.

^ kk. 6 Yehowa ji Nyɔŋmɔ gbɛ́i ni akɛtsuɔ nii yɛ Biblia lɛ mli.

^ kk. 15 Kɛ́ ootao ole Yesu gbele ni ekɛkpɔ̃ wɔ lɛ he sɛɛnamɔi krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 5 lɛ.