Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  April 2013

 TSI OBƐŊKƐ NYƆŊMƆ

“[Nyɛyaa Nɔ] Nyɛbia, ni Aaaha Nyɛ”

“[Nyɛyaa Nɔ] Nyɛbia, ni Aaaha Nyɛ”

“Nuŋtsɔ, tsɔɔmɔ wɔ sɔlemɔ.” (Luka 11:1) Yesu kaselɔi lɛ ateŋ mɔ kome ji mɔ ni kɛ nibimɔ nɛɛ fɔ̃ ehiɛ. Hetoohamɔ mli lɛ, Yesu gba nɔkwɛmɔnii enyɔ ni tsɔɔ wɔ bɔ ni esa akɛ wɔsɔle wɔha koni Nyɔŋmɔ abo toi. Kɛ́ oshwie oyiŋ pɛŋ akɛ Nyɔŋmɔ boɔ osɔlemɔi atoi lo lɛ, no lɛ obaasumɔ ni ole hetoo ni Yesu kɛha lɛ.—Kanemɔ Luka 11:5-13.

Klɛŋklɛŋ nɔkwɛmɔnɔ lɛ gbalaa jwɛŋmɔ kɛyaa mɔ ni sɔleɔ lɛ nɔ. (Luka 11:5-8) Yɛ sane ni Yesu gba lɛ mli lɛ, nuu ko ná gbɔ nyɔɔŋteŋ shi ebɛ niyenii ni ekɛbaafee lɛ gbɔ. Yɛ shĩatsɛ lɛ gbɛfaŋ lɛ, esa akɛ ekɛ oyaiyeli atsu sane nɛɛ he nii. Yɛ bɔ ni jenamɔ yi ewa lɛ fɛɛ sɛɛ lɛ, shĩatsɛ lɛ tee enaanyo ko ŋɔɔ koni eyafa aboloo. Shishijee mli lɛ, enaanyo lɛ emiii nɔ akɛ eteɔ shi ejaakɛ eweku lɛ mli bii lɛ ewɔ vii. Shi akɛni mɔ ni abato lɛ gbɔ lɛ kɛfeee hiɛgbele hewɔ lɛ, etee nɔ ebi aahu kɛyashi enaanyo lɛ te shi ni ebaha lɛ aboloo lɛ. *

Mɛni nɔkwɛmɔnɔ nɛɛ tsɔɔ wɔ yɛ sɔlemɔ he? Yesu miikɛɛ wɔ akɛ esaaa akɛ wɔnijiaŋ jeɔ wui—wɔya nɔ wɔbi, wɔya nɔ wɔtao, ni wɔya nɔ wɔshi. (Luka 11:9, 10) Mɛni hewɔ? Ani Yesu miitsɔɔ akɛ kɛ́ wɔsɔle lɛ, yɛ gbɛ ko nɔ lɛ, wɔmiishi Nyɔŋmɔ ko, ni sumɔɔɔ akɛ eboɔ wɔ toi lɛ shinaa? Dabi. Oti ni Yesu tsɔɔ lɛ ji akɛ Nyɔŋmɔ tamɔɔɔ naanyo ni emiii nɔ akɛ eteɔ shi lɛ, moŋ lɛ eeshwe koni etsu nibii ni sa, ni mɛi jɛɔ hemɔkɛyeli mli amɛsɔleɔ kɛbiɔ lɛ lɛ ahe nii. Kɛ́ wɔsɔleɔ ni wɔnijiaŋ ejeee wui lɛ, wɔkɛtsɔɔ akɛ wɔyɛ hemɔkɛyeli ni tamɔ nakai. Kɛ́ wɔtee nɔ wɔbi lɛ, wɔhaa efeɔ faŋŋ akɛ nɔ ni wɔbiɔ lɛ he miihia wɔ waa, ni ákɛ wɔheɔ wɔyeɔ diɛŋtsɛ akɛ Nyɔŋmɔ kɛbaaha wɔ—kɛ́ wɔnibimɔ lɛ kɛ esuɔmɔnaa nii kpãa gbee.Marko 11:24; 1 Yohane 5:14.

Nɔkwɛmɔnɔ ni ji enyɔ lɛ gbalaa jwɛŋmɔ kɛyaa Yehowa, ni ji ‘Sɔlemɔ Toibolɔ’ lɛ nɔ. (Lala 65:3) Yesu bi akɛ: “Mɛɛ tsɛ yɔɔ nyɛteŋ ni kɛji ebi bi lɛ aboloo, ni eeeha lɛ tɛ? aloo kɛji ebi lɛ loo lɛ, ni eeeŋɔ onufu efee loo eha lɛ? Aloo kɛji ebi wuɔ wɔlɔ lɛ, ni eeeha lɛ nyɔŋmɔŋkrakro?” Hetoo lɛ yɛ faŋŋ—tsɛ ni sumɔɔ ebi ko bɛ ni ekɛ nibii ni yeɔ awui haa ebii. No sɛɛ lɛ, Yesu tsɔɔ nɔkwɛmɔnɔ lɛ mli: Kɛ́ tsɛmɛi, adesai ni yeee emuu lɛ po kɛ “nikeenii kpakpai” haa amɛbii lɛ, ‘enyiɛ nɔŋŋ Tsɛ ni yɔɔ ŋwɛi lɛ eŋɔŋ mumɔ krɔŋkrɔŋ lɛ’—nikeenii ni fe fɛɛ lɛ—ehaŋ ebii ni yɔɔ shikpɔŋ nɛɛ nɔ, ni biɔ lɛ nii lɛ! *Luka 11:11-13; Mateo 7:11.

Nyɔŋmɔ miishwe koni etsu nibii ní sa, ni mɛi jɛɔ hemɔkɛyeli mli amɛsɔleɔ kɛbiɔ lɛ lɛ ahe nii

Mɛni nɔkwɛmɔnɔ nɛɛ tsɔɔ wɔ yɛ Yehowa, ‘sɔlemɔ Toibolɔ’ lɛ he? Yesu miitao eha wɔle akɛ Yehowa ji tsɛ ni susuɔ mɔ he, ni miishwe ni ekɛ ebii lɛ ahiamɔ nii aha amɛ. No hewɔ lɛ, mɛi ni jáa Yehowa lɛ baanyɛ aya eŋɔɔ be fɛɛ be ni amɛsumɔɔ koni amɛbi lɛ nibii ni kã amɛtsui nɔ lɛ. Ni akɛni amɛle akɛ amɛhilɛkɛhamɔ kã etsui nɔ hewɔ lɛ, ewaaa haaa amɛ akɛ amɛbaakpɛlɛ hetoo ni ehaa amɛ lɛ nɔ, kɛ́ hetoo lɛ jeee nɔ ni amɛkpaa gbɛ po. *

Biblia kanemɔ kɛha April

Luka 7-21

^ kk. 4 Yesu nɔkwɛmɔnɔ lɛ tsɔɔ nifeemɔi kɛ kusumii ni yaa nɔ diɛŋtsɛ yɛ shihilɛ mli. Yudafoi lɛ buɔ gbɔfeemɔ akɛ nifeemɔ ko ni he hiaa waa. Wekui shãa aboloo ni fa bɔ ni sa kɛha gbi lɛ, no hewɔ lɛ efɔɔ kaa akɛ, kɛ́ mɔ ko nɔ̃ tã lɛ enyɛɔ eyafaa eko. Agbɛnɛ hu, kɛ́ weku lɛ ji ohiafoi lɛ, weku lɛ mli bii lɛ fɛɛ kãa shikpɔŋ yɛ tsu kome mli.

^ kk. 6 Bei pii lɛ, Yesu kɛ wiemɔ ni ji “enyiɛ nɔŋŋ” tsuɔ nii—ni ekɛ mɛi susuɔ nii ahe kɛjɛɔ nɔ ko ni he ehiaaa tsɔ nɔ kɛyaa nɔ ko ni he hiaa waa nɔ. Woloŋlelɔ ko tsɔɔ mli akɛ: “Niiahesusumɔ lɛ ji akɛ, ‘kɛ́ klɛŋklɛŋ nɔ lɛ ji anɔkwale lɛ, belɛ enyiɛ nɔŋŋ ni nɔ ni ji enyɔ lɛ efeŋ anɔkwale aahu.’”

^ kk. 7 Kɛ́ ootao ole gbɛi krokomɛi ni obaatsɔ nɔ osɔle ni Nyɔŋmɔ abo bo toi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 17 lɛ.