Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  April 2013

 KASEMƆ AMƐHEMƆKƐYELI LƐ

‘Ekɛ Anɔkwa Nyɔŋmɔ lɛ Nyiɛ’

‘Ekɛ Anɔkwa Nyɔŋmɔ lɛ Nyiɛ’

NOA kpã emli tĩaa. Feemɔ ehe mfoniri okwɛ ni eta tso lɛkɛtɛɛ ko nɔ, ehé be fioo kɛjɛ enitsumɔ lɛ mli kɛmiijɔɔ ehe, ni eekwɛ adeka wulu ni ekpɛɔ lɛ. Amã ni edɔ waa lɛ he fũ ehé kɔɔyɔɔ lɛŋ fɛɛ; ni dadei ni akɛtsuɔ tsei lɛ ahe nii lɛ hu agbɛɛmɔi miijije yɛ jɛmɛ. He ni Noa ta lɛ, enyɛɔ enaa ebihii lɛ miitsu nii dɛŋdɛŋ yɛ mplaŋi srɔtoi ni akɛmamɔ shi ni akɛkpɛɔ adeka lɛ he. Ebihii lɛ, amɛŋamɛi, kɛ Noa diɛŋtsɛ ŋa fɛɛ kɛ afii nyɔŋmai komɛi egbo deŋme yɛ adekakpɛɛ nitsumɔ nɛɛ he. Amɛgbe adeka lɛ fã ko naa, shi nibii babaoo yɛ ni amɛbaatsu lolo kɛgbe naa kwraa!

Mɛi ni yɔɔ kpokpaa lɛ nɔ lɛ susu akɛ Noa kɛ eweku lɛ fɛɛ lɛ, kwashiai ji amɛ loo amɛbɛ yitseiaŋ. Babaoo ni Noa kɛ ebihii lɛ kpɛɔ adeka lɛ, babaoo ni mɛi lɛ ŋmɔɔ amɛ akɛ nu afua ko nyɛŋ aba shikpɔŋ lɛ fɛɛ nɔ kɔkɔɔkɔ ji no. Hiɛkpatamɔ ni baa ni Noa tee nɔ ebɔ he kɔkɔ lɛ fee amɛ tamɔ nɔ ko ni nyɛŋ aba kɔkɔɔkɔ, loo jwɛŋmɔ bɛ mli kwraa! Amɛnaaa nɔ hewɔ ni esa akɛ nuu nɛɛ kɛ ebe fɛɛ—kɛ eweku lɛ hu nɔ̃—atsu kwashiai anitsumɔ nɛɛ. Kɛlɛ, Yehowa, Noa Nyɔŋmɔ lɛ enaaa Noa akɛ eji kwashia.

Nyɔŋmɔ Wiemɔ lɛ kɛɔ akɛ: ‘Noa kɛ anɔkwa Nyɔŋmɔ lɛ nyiɛ.’ (1 Mose 6:9) Mɛni no tsɔɔ? Jeee akɛ Nyɔŋmɔ banyiɛ shikpɔŋ lɛ nɔ loo ákɛ yɛ gbɛ ko nɔ lɛ Noa tee ŋwɛi. Moŋ lɛ, Noa ye e-Nyɔŋmɔ lɛ wiemɔ lɛ nɔ jogbaŋŋ, ni esumɔ lɛ aahu ákɛ etamɔ nɔ ni ekɛ Yehowa fɛɛ nyiɛ oookɛɛ nanemɛi feɔ lɛ. Afii akpei komɛi asɛɛ lɛ, Biblia lɛ wie yɛ Noa he akɛ: ‘Etsɔ ehemɔkɛyeli nɔ ebu je lɛ fɔ́.’ (Hebribii 11:7) Te fee tɛŋŋ etsɔ ehemɔkɛyeli nɔ efee nakai lɛ? Mɛni wɔ, ni wɔyɔɔ ŋmɛnɛ lɛ baanyɛ akase kɛjɛ ehemɔkɛyeli lɛ mli?

NUU NI SHWAMƆ KO BƐ EHE YƐ JEŊ KƆDƆŊ KO MLI

Noa da yɛ jeŋ ko ni jeŋba kpɔtɔ oyayaayai lɛ mli. Gbɔmɛi lɛ ashihilɛ bɔi kpɔtɔmɔ dani afɔ Noa, kɛjɛ enanakaŋsowa Henok, ni lɛ hu eji jalɔ ni kɛ Nyɔŋmɔ nyiɛ lɛ yinɔ tɔ̃ɔ. Henok gba fɔ̃ shi akɛ kojomɔ gbi ko miiba gbɔmɛi ni amɛjeŋba ekpɔtɔ yɛ no beaŋ je lɛ mli lɛ anɔ. Ni Noa beaŋ nɛɛ, mɛi ajeŋba ekpɔtɔ kwraa. Anɔkwa, yɛ Yehowa hiɛ lɛ, no mli lɛ, nakai je lɛ efite kwraa, ejaakɛ shikpɔŋ lɛ nɔ eyi obɔ kɛ yiwalɛ nifeemɔ. (1 Mose 5:22; 6:11; Yuda 14, 15) Mɛni ha nibii amli wo wu kwraa nakai lɛ?

No mli lɛ, oshara wulu ko miiya nɔ yɛ Nyɔŋmɔ bii ni ji bɔfoi lɛ ateŋ. Amɛteŋ mɔ kome ete shi ewo Yehowa momo, ni ebatsɔ Satan Abonsam ejaakɛ efɔlɔ Nyɔŋmɔ naa ni elaka Adam kɛ Hawa ni amɛfee esha. Noa beaŋ lɛ, bɔfoi krokomɛi te shi amɛwo Yehowa jalɛ nɔyeli lɛ. Amɛshi amɛshihilɛhe ni Nyɔŋmɔ kɛha amɛ yɛ ŋwɛi lɛ kɛba shikpɔŋ lɛ nɔ, ni amɛtsɔmɔ amɛhe gbɔmɛi, ni amɛŋɔ yei fɛfɛji lɛ amɛfee amɛŋamɛi. Nakai ŋwɛi bɔfoi henɔwolɔi atuatselɔi lɛ ná adesai anɔ hewalɛ gbonyo.—1 Mose 3:1-5; 6:1, 2; Yuda 6, 7.

Kɛfata he lɛ, abɔɔɔ ŋwɛi bɔfoi akɛ amɛbote gbalashihilɛ mli; shi bɔfoi nɛɛ batsɔmɔ amɛhe gbɔmɛi, ni amɛkɛ gbɔmɛi abiyei bote gbalashihilɛ mli kɛfɔ bii asaabui, oblaŋi ni he wala fe nɔ ko. Biblia lɛ tsɛ amɛ Oblaŋi agboi, ni Hebri wiemɔ ni atsɔɔ shishi akɛ Oblaŋi agboi lɛ shishi ŋmiiŋmi ji mɛi ni tsirɛɔ mɛi kɛtswiaa shi. Nɛkɛ Oblaŋi agboi ni yitseiaŋ wala gbeyeigbeyei nɛɛ ha nakai beaŋ je lɛ shihilɛ lɛ mli wo wu kwraa. Ebɛ naakpɛɛ mɔ akɛ Bɔlɔ lɛ  na akɛ “gbɔmɛi anɔfɔŋfeemɔ fá yɛ shikpɔŋ lɛ nɔ, ni amɛtsuiŋ susumɔi ajwɛŋmɔ fɛɛ lɛ efɔŋ kɛkɛ ji daa nɛɛ” lɛ. Yehowa kpɛ mli akɛ yɛ afii 120 mli lɛ, ebaakpata nakai yiwalɛ je lɛ hiɛ.—1 Mose 6:3-5.

Ehe bahia ni Noa kɛ eŋa fɛɛ abu amɛbihii lɛ ahe kɛjɛ nakai shihilɛ gbohii ni ebɔle amɛ lɛ ahe

Bo lɛ kwɛmɔ bɔ ni ebaawa waa akɛ abaafɔ bii koni atsɔse amɛ yɛ nakai je lɛŋ! Kɛlɛ, Noa fee nakai. Ená ŋa kpakpa. Beni Noa eye afii 500 sɛɛ lɛ, eŋa fɔ bihii etɛ eha lɛ, amɛji Shem, Ham, kɛ Yafet. * Ehe bahia ni Noa kɛ eŋa fɛɛ abu amɛbihii lɛ ahe kɛjɛ nakai shihilɛ gbohii ni ebɔle amɛ lɛ ahe. Efɔɔ kaa akɛ kɛ́ gbekɛbii na gbɔmɛi ‘kakalɔi kɛ mɛi ni ehé gbɛ́i’ lɛ, amɛnaa kpɛɔ amɛhe ni amɛsumɔɔ koni amɛbɛŋkɛ amɛ—no hewɔ lɛ gbekɛbii lɛ baasumɔ ni amɛbɛŋkɛ Oblaŋi agboi nɛɛ. Jeee amaniɛbɔi fɛɛ ni kɔɔ mɔdɛŋ ni asaabui lɛ bɔɔ akɛ amɛná gbekɛbii lɛ anɔ hewalɛ lɛ he lɛ anaa Noa kɛ eŋa baanyɛ atsĩ, shi amɛbaanyɛ amɛtsɔse amɛbii lɛ koni amɛle Yehowa Nyɔŋmɔ, mɔ ni hiɔ yiwalɛ nifeemɔi fɛɛ lɛ he anɔkwalei lɛ. Ehe bahia ni amɛye amɛbua amɛbihii lɛ koni amɛyɔse akɛ yiwalɛ nifeemɔ kɛ atuatsemɔi ni yaa nɔ yɛ je lɛ mli lɛ dɔɔ Yehowa waa diɛŋtsɛ.—1 Mose 6:6.

Ekã shi faŋŋ akɛ, fɔlɔi ni yɔɔ ŋmɛnɛ lɛ baanu he waa amɛha Noa kɛ eŋa lɛ. Jeŋ ni wɔyɔɔ mli ŋmɛnɛ lɛ hu mli eyi tɔ kɛ atuatsemɔ kɛ yiwalɛ nifeemɔ. Nibii ni gbekɛbii kɛjieɔ amɛhiɛtserɛ lɛ po amli eyi tɔ kɛ yiwalɛ kɛ atuatsemɔ nifeemɔi. Fɔlɔi ni hiɛ kã shi lɛ bɔɔ mɔdɛŋ fɛɛ ni amɛbaanyɛ koni amɛtsĩ nifeemɔi gbohii nɛɛ anaa ni ekaná amɛbii lɛ anɔ hewalɛ. Amɛfeɔ enɛ kɛtsɔ Yehowa, toiŋjɔlɛ Nyɔŋmɔ ni kɛ yiwalɛ nifeemɔi fɛɛ baaba naagbee gbi ko lɛ he nii ni amɛtsɔɔ amɛbii lɛ nɔ. (Lala 11:5; 37:10, 11) Fɔlɔi baanyɛ aye omanye yɛ enɛ feemɔ mli! Noa kɛ eŋa ye omanye. Gbekɛbii hii bibii lɛ dara kɛbatsɔmɔ hii nukpai kpakpai, ni amɛkɛ yei hu ni miisumɔ ni amɛkɛ Yehowa, anɔkwa Nyɔŋmɔ lɛ aye klɛŋklɛŋ gbɛhe yɛ amɛshihilɛ mli lɛ bote gbalashihilɛ mli.

‘FEEMƆ ADEKA OHA OHE’

Gbi ko lɛ, Noa shihilɛ batsake kɛmiiya naanɔ. Yehowa ha eyiŋtoo akɛ ekɛ nakai je lɛ baaba naagbee lɛ fee faŋŋ beni ekɛ Noa, nuu ni esumɔɔ esane waa lɛ wieɔ lɛ. Nyɔŋmɔ fã Noa akɛ: “Ŋɔɔ gofertso ofee adeka oha ohe.”—1 Mose 6:14.

Adeka nɛɛ jeee meele loo lɛlɛ ko taakɛ mɛi komɛi susuɔ lɛ. Etamɔɔɔ lɛlɛ, nɔ pɛ ni haa efeɔ tamɔ lɛlɛ ji nu hiɛ ni emaa lɛ. Eji adeka agbo ko kɛkɛ. Yehowa kɛ adeka lɛ kɛlɛ, elɛɛmɔ, ekwɔlɛ, kɛ bɔ ni esa akɛ afee lɛ aha lɛ he gbɛtsɔɔmɔi fitsofitso ha Noa, ni ekɛ gbɛtsɔɔmɔ ha lɛ hu akɛ ekɛ amã aha adeka lɛ mligbɛ kɛ ehewɔ fɛɛ. Ni ekɛɛ Noa akɛ: “Naa, mikɛ nu afua miiba shikpɔŋ lɛ nɔ . . . Nɔ fɛɛ nɔ ni yɔɔ shikpɔŋ lɛ nɔ aaaplenee.” Kɛlɛ, Yehowa kɛ gbɛtsɔɔmɔ nɛɛ hã Noa akɛ: “Ni ooobote adeka lɛ mli bo kɛ obihii lɛ kɛ oŋa kɛ obihii lɛ aŋamɛi lɛ.” Kɛfata he lɛ, akɛɛ Noa koni ekɛ kooloi srɔtoi lɛ fɛɛ eko awo adeka lɛ mli. Mɛi ni baahi adeka lɛ mli lɛ pɛ ayi baaná wala!—1 Mose 6:17-20.

Jeee nitsumɔ bibioo kwraa kã Noa hiɛ lɛ. Adeka nɛɛ baada diɛŋtsɛ—ekɛlɛ ji ninetalɔi 437 (mitai 133), elɛɛmɔ ji ninetalɔi 73 (mitai 22), ni ekwɔlɛ  ji ninetalɔi 44 (mitai 13). Eda kwraa fe ŋmɛnɛ beaŋ tso meele wuji fe fɛɛ ni akɛyaa woo lɛ. Ani Noa jo nitsumɔ lɛ naa foi, ewie naagbai ni ekɛbaakpe lɛ he nyanyaanya, loo etsake gbɛtsɔɔmɔ ni akɛha lɛ lɛ hiɛ bɔni afee ni ená etsumɔ mlɛo? Biblia lɛ ha hetoo akɛ: ‘Bɔ ni Nyɔŋmɔ fã Noa lɛ, nakai pɛpɛɛpɛ efee.’—1 Mose 6:22.

Nitsumɔ lɛ hé afii nyɔŋmai komɛi, ekolɛ afii 40 kɛmiimɔ afii 50. Ehe bahia ni afolɔ tsei, aloo tsei lɛ kɛya, agbala tsei lɛ amli, asaa tsei lɛ ahe, ni atsara. Esa akɛ afee adeka lɛ nsɔɔdoi etɛ, ajara mli babaoo, ni afee shinaa awo he. Ekã shi faŋŋ akɛ, ekolɛ afee samfɛji awo ŋwɛi gbɛ, ni awo eyiteŋ bɔ ni kɛ́ nu shwie nɔ lɛ etaŋ yiteŋ.—1 Mose 6:14-16.

Beni afii lɛ hoɔ yaa lɛ, ni akpɛ adeka lɛ kɛshɛ shɔŋŋ lɛ, ekolɛ Noa tsui baanyɔ emli waa akɛ eweku lɛ yeɔ amɛbuaa lɛ! Nitsumɔ ni akɛwo edɛŋ lɛ fã ko yɛ ni ekolɛ etsumɔ baajara kwraa fe adeka lɛ kpɛɛ. Biblia lɛ kɛɔ wɔ akɛ, Noa “ji jalɛ shiɛlɔ.” (2 Petro 2:5) No hewɔ lɛ, ekɛ ekãa nyiɛ hiɛ kɛbɔ efɔŋfeelɔi ni ekwa Nyɔŋmɔ lɛ kɔkɔ akɛ, aaba abakpata amɛhiɛ. Te gbɔmɛi lɛ fee amɛnii yɛ kɔkɔbɔɔ lɛ he amɛha tɛŋŋ? Sɛɛ mli lɛ, Yesu Kristo wie nakai be lɛ he, ni ekɛɛ akɛ “amɛhiɛ bɛ amɛhe nɔ.” Ewie akɛ amɛha daa gbi shihilɛ mli nibii—niyeli, ninumɔ, kɛ gbalahamɔ—hé amɛbe fɛɛ aahu ákɛ, amɛbooo Noa toi. (Mateo 24:37-39) Ŋwanejee ko kwraa bɛ he akɛ mɛi babaoo ye ekɛ eweku lɛ he fɛo, ekolɛ mɛi komɛi po wo ewala he gbeyei ni amɛkɛ basabasafeemɔ te shi amɛwo lɛ.

Yɛ odaseyelii fɛɛ ni tsɔɔ akɛ Yehowa miijɔɔ Noa lɛ fɛɛ sɛɛ po lɛ, mɛi ye ehe fɛo ni amɛbooo esane lɛ toi

Kɛlɛ, Noa kɛ eweku lɛ kpaaa nitsumɔ lɛ. Eyɛ mli akɛ mɛi ni hi shi yɛ Noa beaŋ lɛ tiu shihilɛ mli nibii asɛɛ kɛ susumɔ akɛ ehe ehiaaa akɛ akpɛ adeka, eji kwashiai asane ni jwɛŋmɔ bɛ mli hu, shi Noa kɛ eweku lɛ tee nɔ amɛkpɛ adeka lɛ. No hewɔ lɛ, ŋmɛnɛ lɛ wekui ni ji Kristofoi lɛ baanyɛ akase nɔ ko kpele kɛjɛ Noa kɛ eweku lɛ hemɔkɛyeli lɛ mli. Ejaakɛ, wɔ hu wɔyɛ be ni Biblia lɛ tsɛɔ lɛ akɛ je nɛŋ nibii agbɛjianɔtoo lɛ “naagbee gbii lɛ” amli. (2 Timoteo 3:1) Yesu kɛɛ akɛ wɔbe nɛɛ baatamɔ Noa beaŋ nɔŋŋ, beni ekpɛɔ adeka lɛ. Kɛ́ mɛi booo Nyɔŋmɔ Maŋtsɛyeli lɛ he sane lɛ toi, ni amɛkɛ fɛoyeli loo yiwaa po kpee sane lɛ naa lɛ, esa akɛ Kristofoi abɔ mɔdɛŋ amɛkai Noa. Jeee amɛ ji klɛŋklɛŋ bii ni kɛ nakai naagbai lɛ ekpe.

‘BOTEMƆ ADEKA LƐ MLI’

Afii nyɔŋmai komɛi eho, ni fiofio lɛ aahé agbe adeka lɛ naa. Beni Noa heɔ aná afii 600 lɛ, gbele batswa lɛ ojo. Etsɛ Lamek gbo. * Afii enumɔ sɛɛ lɛ, Lamek papa, ni ji Noa nii Metusela gbo beni eye afii 969—ni lɛ ji gbɔmɔ ni wala sɛɛ tsɛ fe fɛɛ ni Biblia lɛ bɔ he amaniɛ. (1 Mose 5:27) Metusela kɛ Lamek kɛ klɛŋklɛŋ gbɔmɔ Adam fɛɛ lɛ, yinɔ kome mli bii ji amɛ.

Nakai afi lɛ mli nɔŋŋ lɛ, Yehowa Nyɔŋmɔ kɛɛ blematsɛ Noa sane kroko hu akɛ: “Bo kɛ owe lɛ fɛɛ abote adeka lɛ mli.” Nakai beaŋ nɔŋŋ lɛ, Nyɔŋmɔ kɛɛ Noa akɛ eŋɔ kooloi srɔtoi lɛ fɛɛ eko ewo adeka lɛ mli—nɔ ni he tse ni abaanyɛ akɛshã afɔle lɛ, kpawo kpawo, kɛ nɔ ni eshwɛ lɛ enyɔɔnyɔ.—1 Mose 7:1-3.

Obaana akɛ enɛ baafee nɔ ko ni hiɛ kpaŋ nɔ kɔkɔɔkɔ. Kɛ́ okwɛ lɛ, onaa kooloi ohai abɔ ni amɛke yuu kɛjɛ shɔŋŋ kɛmiiba—nɔ ni nyiɛ, nɔ ni miifiliki, nɔ ni miiwamɔ, nɔ ni nyiɛ oyayaayai, nɔ ni nyiɛ shɔ̃ɔ—yɛ henɔi srɔtoi amli. Ehe ehiaaa ni wɔfeɔ he mfoniri yɛ wɔjwɛŋmɔŋ akɛ ekolɛ Noa bɔ mɔdɛŋ ewo kooloi lɛ tsuŋ, ekɛ amɛ shi mple loo enyɛ nakai kooloi ni hiɛ yɔɔ laŋlaŋ lɛ anɔ ewo adeka lɛŋ he ko. Amaniɛbɔɔ lɛ kɛɔ akɛ, kooloi lɛ ‘tee Noa ŋɔɔ yɛ adeka lɛ mli.’—1 Mose 7:9.

Ekolɛ, mɛi ni yiŋ etɛ̃ɛɛ amɛ yɛ sane nɛɛ he lɛ baabi akɛ: ‘Te aaafee tɛŋŋ ni nɔ ko tamɔ nakai aba lɛ? Ni te  aaafee tɛŋŋ ni nakai kooloi lɛ fɛɛ aaahi he kome yɛ toiŋjɔlɛ mli lɛ?’ Susumɔ enɛ he okwɛ: Ani jeŋ fɛɛ Bɔlɔ lɛ bɛ hewalɛ ni ekɛaakudɔ kooloi ni ebɔ amɛ lɛ, koni amɛkaye awui ni amɛfee kpoo po kɛ́ ehe bahia lɛ? Kaimɔ akɛ Yehowa lɛ, lɛ ji Nyɔŋmɔ ni gba Ŋshɔ Tsuru lɛ mli enyɔ, ni eha hulu wa damɔ shi aahu lɛ. Ani enyɛŋ eha nibii fɛɛ ni abɔ he amaniɛ yɛ Noa beaŋ lɛ aba? Ebaanyɛ aahu, ni efee nakai hu!

Eji anɔkwale akɛ, kulɛ Nyɔŋmɔ baanyɛ etsɔ gbɛ kroko nɔ ebaa kooloi ni ebɔ lɛ ayi. Kɛlɛ, ejɛ nilee mli ekɔ gbɛ ko ni baaha wɔkai nitsumɔ ni ekɛwo adesai adɛŋ yɛ shishijee kwraa akɛ amɛkwɛ nibii fɛɛ ni hiɛ kã yɛ shikpɔŋ lɛ nɔ lɛ anɔ lɛ. (1 Mose 1:28) Ŋmɛnɛ lɛ, fɔlɔi babaoo kɛ Noa sane lɛ tsɔɔ amɛbii lɛ nii akɛ, Yehowa naa gbɔmɛi kɛ kooloi ni ebɔ lɛ akɛ amɛhe hiaa waa.

Yehowa kɛɛ Noa akɛ biɛ otsi mli lɛ, Nu Afua lɛ baaba. Ekolɛ, efee be ni dekã bɛ mli kwraa kɛha weku lɛ. Susumɔ nitsumɔ ni ehe baahia ni atsu lɛ he okwɛ, esa akɛ akwɛ ni kooloi lɛ fɛɛ aya adeka lɛ mli, abua niyenii anaa ato, koni ato weku lɛ nibii awo adeka lɛ mli. Ekolɛ Noa ŋa kɛ ebihii Shem, Ham, kɛ Yafet ŋamɛi lɛ baasusu bɔ ni amɛbaafee amɛha adeka lɛ mli shihilɛ afee tamɔ shĩa lɛ he.

Mɛni maŋbii krokomɛi lɛ hu fee? Yɛ odaseyelii fɛɛ ni tsɔɔ akɛ Yehowa miijɔɔ Noa kɛ nitsumɔ ni etsuɔ lɛ fɛɛ sɛɛ po lɛ, gbɔmɛi lɛ ‘ahiɛ baaa amɛhe nɔ.’ Amɛmiikwɛ bɔ ni kooloi lɛ eke yuu kɛmiibote adeka lɛ mli lɛ. Shi esaaa akɛ efeɔ wɔ naakpɛɛ akɛ nɔ ni tee nɔ lɛ shiii amɛ kpu po. Ŋmɛnɛ lɛ, yɛ odaseyeli ni yɔɔ faŋŋ ni tsɔɔ akɛ wɔyɛ nibii agbɛjianɔtoo nɛɛ naagbee gbii lɛ amli lɛ fɛɛ sɛɛ lɛ, mɛi haaa amɛhiɛ ahi amɛhe nɔ. Ni taakɛ bɔfo Petro gba fɔ̃ shi lɛ, hefɛoyelɔi eba kɛ hefɛoyeli, ni amɛyeɔ mɛi ni boɔ Nyɔŋmɔ kɔkɔbɔɔ toi lɛ ahe fɛo. (2 Petro 3:3-6) Nakai nɔŋŋ ekã shi faŋŋ akɛ, mɛi ye Noa kɛ eweku lɛ he fɛo.

Mɛɛ be hefɛoyeli lɛ sɛɛ fo? Amaniɛbɔɔ lɛ kɛɔ wɔ akɛ, beni Noa, kɛ eweku lɛ kɛ kooloi lɛ bote adeka lɛ mli nɔŋŋ kɛkɛ ni “Yehowa ŋã eyi.” Kɛ́ no mli lɛ, hefɛoyelɔi lɛ eko bɛŋkɛ jɛmɛ lɛ, bɔ ni ajɛ ŋwɛi aŋa shinaa lɛ baaha amɛmu shi kɔi. Kɛ́ jeee nakai hu, nugbɔ lɛ ha amɛmu shi kɔi—ejaakɛ nugbɔ lɛ nɛ! Ni nui lɛ nɛ aahu, ni ehé shi yɛ shikpɔŋ lɛ nɔ aahu po, ni ekpele je lɛŋ taakɛ Yehowa wie akɛ ebaaba lɛ pɛpɛɛpɛ.—1 Mose 7:16-21.

Ani Yehowa nya efɔŋfeelɔi lɛ agbele lɛ he? Kɔkɔɔkɔ! (Ezekiel 33:11) Moŋ lɛ, ekɛ hegbɛ fɛɛ ni he hiaa lɛ ha amɛ akɛ amɛtsake amɛnifeemɔi lɛ koni amɛfee jalɛ nii. Ani kulɛ amɛbaanyɛ amɛfee nakai? Bɔ ni Noa hi shi eha lɛ haa nakai sanebimɔ lɛ hetoo. Noa kɛ Yehowa nyiɛ, no ji ebo Nyɔŋmɔ toi yɛ nɔ fɛɛ nɔ mli, ni ekɛtsɔɔ akɛ abaanyɛ aje hiɛkpatamɔ lɛ mli. Yɛ nakai shishinumɔ naa lɛ, Noa kɛ ehemɔkɛyeli lɛ bu ebeaŋ je lɛ fɔ; eha ana faŋŋ akɛ eyinɔ bii lɛ ji efɔŋfeelɔi ni ekpiliŋ amɛtsui lɛɛlɛŋ. Noa hemɔkɛyeli lɛ tee nɔ ebaa ekɛ eweku lɛ yi shweshweeshwe. Kɛ́ okase Noa hemɔkɛyeli lɛ, bo hu obaanyɛ obaa okɛ mɛi krokomɛi ni osumɔɔ lɛ ayi. Bo hu obaanyɛ okɛ Yehowa Nyɔŋmɔ anyiɛ akɛ onaanyo taakɛ Noa fee lɛ. Ni naanyobɔɔ lɛ baanyɛ ahi shi kɛya naanɔ!

^ kk. 10 Mɛi ni hi shi yɛ nakai beaŋ lɛ awala sɛɛ tsɛɔ kwraa fe wɔ nɔ̃ lɛ ŋmɛnɛ. Ekolɛ, akɛni amɛbɛŋkɛ emuuyeli ni Adam kɛ Hawa ná be ko lɛ hewɔ ni amɛwala sɛɛ tsɛɔ, ni amɛyɔɔ gbɔmɔtsoŋ hewalɛ nakai lɛ.

^ kk. 20 Lamek wo ebi lɛ gbɛ́i akɛ Noa—ekolɛ eshishi ji “Hejɔɔmɔ; Miishɛjemɔ”—ni egba akɛ Noa baatsu egbɛ́i lɛ he nii, ni ebaanyiɛ adesai ahiɛ kɛje tɔlɛ ni etɔɔ amɛ yɛ shikpɔŋ lɛ ni alomɔ lɛ hewɔ lɛ mli. (1 Mose 5:28, 29) Lamek enaaa gbalɛ nɛɛ mlibaa ni egbo.