Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ APRIL 2013

 BIBLIA LƐ TSAKEƆ MƐI

Biblia lɛ Tsakeɔ Mɛi

Biblia lɛ Tsakeɔ Mɛi
  • BE NI AFƆ LƐ: 1960
  • MAŊ NƆ NI EJƐ: FINLAND
  • MƆ NI EJI TSUTSU: HEAVY-METAL LALAFOLƆ

MITSUTSU SHIHILƐ:

Mida yɛ ŋshɔnaa maŋ ko ni ji Turku lɛ mli, ni mɛi ni yɔɔ jɛmɛ lɛ bɛ nii tsɔ. No mli lɛ, anyɛɛɛ mipapa kwraa yɛ atswɛrɛnɔmɔ nitsumɔ lɛ mli, ni mi kɛ minyɛmi nuu fioo lɛ hu náaa hiɛ kwraa kɛ atswɛrɛnɔmɔ. Beni miyaa skul lɛ, misumɔɔ mɛi kɛ nɔmɔ waa. Beni mi ji oblanyo fioo lɛ, mikɛ mihe yadɔmɔ yiwalɔi akuu ko ni no ha mikɛ mihe wo basabasafeemɔ mli fe nine. Agbɛnɛ hu lɛ, mibana mile heavy-metal lala, ni mishwe akɛ matsɔ rɔk lalɔ ni ehé gbɛ́i waa.

Mihé obonui komɛi, mitse lalatswaa kuu ko, ni etsɛɛɛ ni mibatsɔ kuu lɛ lalɔi lɛ ahiɛnyiɛlɔ. Kɛ́ midamɔ kpoku lɛ nɔ yɛ mɛi ahiɛ lɛ, no ji anyɛɛɛ mi akudɔ kwraa. Ákɛ kuu lɛ, wɔkɛ wɔnitsumɔ shwɛɛɛ kwraa, ni akɛni kɛ́ wɔdamɔ kpoku nɔ lɛ anyɛɛɛ wɔ kwraa hewɔ lɛ, fiofio lɛ wɔbahé gbɛ́i waa. Be bashɛ ni kɛ́ wɔbaalá lɛ mɛi babaoo baboɔ wɔ toi, ni wɔfo lalai fioo komɛi, ni mɛi nya naagbee nɔ kwraa lɛ he waa diɛŋtsɛ. Afi 1980 naagbee afii lɛ amli lɛ, wɔfã gbɛ kɛtee United States bɔni afee ni anu wɔhe yɛ jɛmɛ hu. Wɔlá yɛ hei fioo komɛi yɛ New York kɛ Los Angeles, ni wɔkɛ mɛi ni he esa yɛ lala nitsumɔ lɛ mli lɛ ekomɛi ná sharamɔ dani wɔku wɔsɛɛ kɛba Finland.

Minya he akɛ miyɛ lalafoo kuu lɛ mli moŋ nɛ, shi mitsui enyɔɔɔ mimli tsɔ yɛ shihilɛ mli. Miyanyaaa akaŋshii mumɔ kɛ sui krokomɛi ni tee nɔ yɛ lalafoo nitsumɔ lɛ mli lɛ ahe, ni mihi shi hu akɛ mɔ ko ni shwɛmɔ yɔɔ ehiɛ, ni enɛ baje mitsine. Minu he akɛ eshafeelɔ ji mi, ni mishe gbeyei akɛ abaashã mi yɛ hɛl la mli. Mikane jamɔi awoji srɔtoi babaoo kɛ susumɔ akɛ maná misanebimɔi lɛ ahetoo, ni minu he hu akɛ minyɛŋ masa Nyɔŋmɔ hiɛ kɔkɔɔkɔ moŋ, shi misɔle waa koni eye ebua mi.

BƆ NI BIBLIA LƐ TSAKE MISHIHILƐ:

Mitsu nii yɛ woji amajemɔhe yɛ he ni wɔyɔɔ lɛ koni mikɛkwɛ mihe. Gbi ko lɛ, miyɔse akɛ nitsulɔi lɛ ateŋ mɔ kome lɛ, Yehowa Odasefonyo ni. Mito sanebimɔi mishwie enɔ. Bɔ ni ejɛ Ŋmalɛi lɛ amli ekɛ mi susu saji ahe kɛha misanebimɔi lɛ ahetoo lɛ ha minaa kpɛ mihe waa, ni mikpɛlɛ koni ekɛ mi akase Biblia lɛ. Beni mikase  Biblia lɛ otsii komɛi asɛɛ lɛ, milalafoo kuu lɛ ná nitsumɔ ko ni baaha wɔná shika babaoo, no ji akɛ wɔbaafo lalai ni abaanyɛ ajie lɛ kpo yɛ United States. Minu he akɛ kɛ́ enɛ ŋmɛɛ mi lɛ, mináŋ eko nakai dɔŋŋ.

Mikɛɛ Odasefonyo ni kɛ mi kaseɔ Biblia lɛ akɛ masumɔ ni mafo lala shi kome nɛɛ pɛ, ni no sɛɛ lɛ, mikɛ Biblia shishitoo mlai lɛ baatsu nii kɛ hiɛdɔɔ yɛ mishihilɛ mli agbɛnɛ. Etsɔɔɔ ejwɛŋmɔ yɛ sane lɛ he; ekɛɛ mi kɛkɛ akɛ miyakane Yesu wiemɔi ni yɔɔ Mateo 6:24 lɛ. Nakai kuku lɛ kɛɛ: “Mɔ ko nyɛŋ nuŋtsɔmɛi enyɔ asɔmɔ.” Beni minu Yesu wiemɔi nɛɛ ashishi lɛ, minaa kpɛ mihe waa. Shi be fioo komɛi asɛɛ lɛ, ebashɛ mi-Biblia tsɔɔlɔ lɛ nɔ ni enaa baakpɛ ehe! Mikɛɛ lɛ akɛ akɛni miitao manyiɛ Yesu sɛɛ hewɔ lɛ, mikɛ kuu lɛ efo tako mli!

Biblia lɛ bafee tamɔ ashwishwɛ eha mi, eha mina migbɔjɔmɔi. (Yakobo 1:22-25) Miyɔse akɛ miba mijeŋ bɔ ni esaaa kwraa: No mli lɛ, miwoɔ mihe nɔ waa ni mishweɔ waa akɛ matsɔ niiatsɛ. Mikɛ wiemɔ sha tsu nii, minɔɔ, mishɛreɔ tawa, ni mitɔɔ dãa kpɔtɔɔ hu. Beni miyɔse akɛ mijeŋba kɛ Biblia lɛ kpãaa gbee kwraa lɛ, minijiaŋ je wui waa. Eyɛ mli akɛ mináaa lɛ mlɛo moŋ, shi mibɔ mɔdɛŋ akɛ mafee tsakemɔi.—Efesobii 4:22-24.

“Wɔŋwɛi Tsɛ lɛ naa mɔbɔ, ni esumɔɔ akɛ etsa mɛi ni etsake amɛtsui lɛ apilamɔi lɛ”

Titri lɛ, shishijee lɛ mitsutsu tɔmɔi lɛ ha mihao waa. Shi Odasefonyo ni kɛ mi kase nii lɛ ye ebua mi babaoo. Etsɔɔ mi nɔ ni Biblia lɛ kɛɔ yɛ Yesaia 1:18 lɛ akɛ: “Kɛ́ nyɛhe eshai lɛ tsuɔ tamɔ la po, amɛaayɛ tamɔ snoo.” Enɛ kɛ Biblia ŋmalɛi krokomɛi ye ebua mi ni mina akɛ wɔŋwɛi Tsɛ lɛ naa mɔbɔ, ni esumɔɔ akɛ etsa mɛi ni etsake amɛtsui lɛ apilamɔi lɛ.

Beni mibale Yehowa ni miná suɔmɔ miha lɛ lɛ, minu he akɛ esa akɛ majɔɔ miwala nɔ maha lɛ. (Lala 40:9) Abaptisi mi yɛ Afi 1992 yɛ Yehowa Odasefoi amajimaji ateŋ kpee ni afee lɛ shishi yɛ St. Petersburg, yɛ Russia.

BƆ NI MINÁ HE SƐƐ:

Miná nanemɛi babaoo yɛ Yehowa webii ateŋ. Be kɛ beaŋ lɛ, wɔbuaa wɔhe naa ni wɔtswaa lalai ni sa ni wɔnáa Nyɔŋmɔ dɛŋ nikeenii nɛɛ he sɛɛ waa. (Yakobo 1:17) Miná jɔɔmɔ krɛdɛɛ ko, ni no ji miŋa Kristina ni misumɔɔ lɛ waa lɛ. Mikɛ lɛ ená nifeemɔi babaoo amli gbɛfaŋnɔ—shihilɛ mli miishɛɛ kɛ naagbai, kɛ mitsuiŋ saji tete.

Eji mibatsɔɔɔ Yehowa Odasefoi ateŋ mɔ ko kulɛ, be nɛ mibɛ jeŋ. Be ko ni eho lɛ, etsɛɛɛ nɔŋŋ kɛkɛ lɛ miyagbee naagba ko mli. Shi amrɔ nɛɛ, mitsui enyɔ mimli diɛŋtsɛ yɛ shihilɛ mli.