Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ FEBRUARY 2013

 Tsi Obɛŋkɛ Nyɔŋmɔ

“Nyɔŋmɔ lɛ . . . Hiɛkãlɔi A-Nyɔŋmɔ Ni”

“Nyɔŋmɔ lɛ . . . Hiɛkãlɔi A-Nyɔŋmɔ Ni”

Ani gbele he wa kwraa fe Nyɔŋmɔ? Dabida! Te feɔ tɛŋŋ ni gbele—loo “henyɛlɔ” kroko—he waa fe “Nyɔŋmɔ Ofe” lɛ? (1 Korintobii 15:26; 2 Mose 6:3) Nyɔŋmɔ yɛ hewalɛ ni ebaanyɛ etsɔ gbohiiashitee lɛ nɔ ejie gbele yɛ shihilɛ mli, ni nakai pɛpɛɛpɛ ji bɔ ni ewo shi akɛ ebaafee yɛ jeŋ hee lɛ mli. * Mɛni tsɔɔ akɛ nakai shiwoo lɛ baaba mli? Yesu, ni eji Nyɔŋmɔ Bi lɛ kɛ wiemɔi ni baanyɛ aha hiɛnɔkamɔ ayi wɔtsuiaŋ obɔ lɛ haa wɔ.—Kanemɔ Mateo 22:31, 32.

Beni Yesu kɛ Sadukifoi ni heee gbohiiashitee lɛ amɛyeee lɛ wieɔ lɛ, ekɛɛ amɛ akɛ: “Shi gbohiiashitee lɛ hewɔ lɛ nyɛkaneko nɔ ni Nyɔŋmɔ kɛɛ nyɛ akɛ: “Mi lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi lɛ”? Nyɔŋmɔ lɛ jeee gbohii a-Nyɔŋmɔ ni, shi moŋ hiɛkãlɔi a-Nyɔŋmɔ ni.” Yɛ sane nɛɛ mli lɛ, Yesu tsɛ sane ni Yehowa kɛ Mose gba yɛ ŋmɛitso ni miitso lɛ he aaafee afi 1514 D.Ŋ.B. lɛ yisɛɛ. (2 Mose 3:1-6) Taakɛ Yesu tsɔɔ mli lɛ, sane ni Yehowa kɛɛ Mose lɛ—“Mi ji, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ lɛ”—tsɔɔ akɛ kɛ́ ŋwɛi kpa ebu shi tete lɛ, gbohiiashitee he shiwoo lɛ baaba mli. Mɛni tsɔɔ nakai?

Klɛŋklɛŋ lɛ, susumɔ shihilɛ lɛ he okwɛ. Beni Yehowa kɛ Mose wie nakai sane lɛ, no mli lɛ blematsɛmɛi Abraham, Isak, kɛ Yakob egboi jeeŋmɔ—Abraham egbo afii 329, Isak egbo afii 224, ni Yakob hu egbo afii 197. Kɛlɛ, Yehowa kɛɛ akɛ “Mi ji”—ekɛɛɛ akɛ “kulɛ Mi ji”—amɛ-Nyɔŋmɔ. Yehowa wie nakai blematsɛmɛi etɛ ni egboi lɛ ahe oookɛɛ amɛhiɛ kamɔ lolo. Mɛni hewɔ?

Yesu tsɔɔ mli akɛ: “Nyɔŋmɔ [loo Yehowa] lɛ jeee gbohii a-Nyɔŋmɔ ni, shi moŋ hiɛkãlɔi a-Nyɔŋmɔ ni.” Bo lɛ ŋɔɔ be fioo ko ni okɛsusu nɔ ni nakai wiemɔi lɛ tsɔɔ lɛ ahe okwɛ. Eji ateee gbohii ashi kulɛ, belɛ no tsɔɔ akɛ gbele eŋɔ Abraham, Isak, kɛ Yakob nom kɛmiiya naanɔ. Kɛ́ ebalɛ nakai lɛ, no lɛ Yehowa etsɔ gbohii a-Nyɔŋmɔ kɛmiiya naanɔ. Ni no hu baatsɔɔ akɛ gbele he wa kwraa fe Yehowa—oookɛɛ Yehowa bɛ hewalɛ kwraa ni ekɛbaakpɔ̃ enɔkwa tsuji kɛjɛ gbele dɛŋ.

Mɛni wɔbaanyɛ wɔkɛɛ mɔ yɛ Abraham, Isak, Yakob, kɛ Yehowa jalɔi anɔkwafoi fɛɛ ni amɛgboi lɛ ahe? Yesu wie kɛ nɔmimaa diɛŋtsɛ akɛ: “Ehiɛ lɛ mɛi fɛɛ hiɛ kamɔ.” (Luka 20:38) Anɔkwa, Yehowa yɛ nɔmimaa diɛŋtsɛ akɛ eyiŋ ni eto akɛ ebaatee enɔkwa tsuji ni egboi lɛ ashi lɛ baaba mli, no hewɔ ewie amɛhe oookɛɛ hiɛkalɔi lɛ. (Romabii 4:16, 17) Yehowa kɛ etsuji fɛɛ ni egboi lɛ baawo ekaimɔ mli kɛyashi be ni eto akɛ ebaatee amɛshi kɛba wala mli ekoŋŋ lɛ baashɛ.

Yehowa yɛ hewalɛ ni faŋ nɔ ni akɛteɔ gbohii ashi

Ani eŋɔɔ onaa akɛ okɛ osuɔlɔi ni egboi lɛ baakpe ekoŋŋ? Kɛ́ nakai lɛ, kaimɔ akɛ Yehowa yɛ hewalɛ ni faŋ nɔ ni akɛteɔ gbohii ashi. Nɔ ko bɛ ni baanyɛ atsi enaa yɛ eshiwoo akɛ ebaatee gbohii ashi lɛ mli. Mɛni hewɔ okaseee gbohiiashitee lɛ kɛ Nyɔŋmɔ ni baaha eba mli lɛ he saji krokomɛi hu? Kɛ́ ofee nakai lɛ, obaatsi obɛŋkɛ Yehowa, “hiɛkãlɔi a-Nyɔŋmɔ” lɛ. ▪

Biblia Kanemɔ Kɛha February

Mateo 22-28Marko 1-8

^ kk. 3 Kɛ́ ootao ole Nyɔŋmɔ shiwoo akɛ ebaatee gbohii ashi kɛba wala mli yɛ jalɛ jeŋ hee lɛ mli lɛ he saji krokomɛi lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 7 lɛ.