Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  February 2013

Mose—Nuu ni Hemɔkɛyeli Mli Wa

Mose—Nuu ni Hemɔkɛyeli Mli Wa

MƐNI JI HEMƆKƐYELI?

Taakɛ akɛtsu nii yɛ Biblia lɛ mli lɛ, “hemɔkɛyeli” tsɔɔ nɔ ko ni aheɔ ayeɔ akɛ eyɛ, ni edamɔ odaseyeli ni ma shi shiŋŋ nɔ. Mɔ ni yɔɔ hemɔkɛyeli yɛ Nyɔŋmɔ mli lɛ yɛ nɔmimaa akɛ Nyɔŋmɔ baaye eshiwoi lɛ fɛɛ anɔ.

MƐƐ GBƐ NƆ MOSE JIE HEMƆKƐYELI KPO?

Mose kpɛ yiŋ srɔtoi ni tsɔɔ akɛ eheɔ Nyɔŋmɔ shiwoi lɛ eyeɔ. (1 Mose 22:15-18) Ená hegbɛ akɛ ebaahi ogbɔjɔ shihilɛ mli yɛ Mizraim, shi ekpoo nakai hegbɛ lɛ, ni “eesumɔ moŋ akɛ ekɛ Nyɔŋmɔ maŋ lɛ ana amanehulu, fe nɔ ni eeeye esha mli ŋɔɔmɔ be fioo ko lɛ.” (Hebribii 11:25) Ani eji yiŋ ko ni ekpɛ kɛkɛ, nɔ ni wɔsɛɛ ko lɛ ebaashwa ehe yɛ he? Dabi, ejaakɛ Biblia lɛ kɛɔ akɛ, Mose [tee nɔ] emɔ mɔ ni anaaa lɛ lɛ mli tamɔ nɔ ni eena lɛ.” (Hebribii 11:27) Mose shwaaa ehe kɔkɔɔkɔ yɛ yiŋ ni ejɛ hemɔkɛyeli mli ekpɛ lɛ he.

Mose bɔ mɔdɛŋ akɛ ebaaye ebua mɛi krokomɛi koni amɛhemɔkɛyeli lɛ mli awa. Akɛ nɔkwɛmɔnɔ lɛ, susumɔ beni Israelbii lɛ yaje Ŋshɔ Tsuru lɛ kɛ Farao asraafoi lɛ teŋ ni amɛsusu akɛ tsɔmɔhe ko kwraa bɛ lɛ he okwɛ. Israelbii lɛ yashe gbeyei akɛ amɛhiɛ ekpãta etã, kɛkɛ ni amɛbo amɛtsɛ Yehowa kɛ Mose. Mɛni Mose baafee?

Ekolɛ, Mose leee po akɛ Nyɔŋmɔ miiba ebagba Ŋshɔ Tsuru lɛ mli kɛje gbɛ eha Israelbii lɛ. Kɛlɛ, Mose ná hekɛnɔfɔ̃ɔ akɛ Nyɔŋmɔ baafee nɔ ko kɛ̃ kɛbu Nyɔŋmɔ webii lɛ ahe. Ni Mose tao akɛ enyɛmimɛi Israelbii lɛ aná nakai hekɛnɔfɔ̃ɔ lɛ nɔŋŋ eko. Wɔkaneɔ akɛ: “Mose kɛɛ maŋ lɛ akɛ: ‘Nyɛkashea gbeyei, nyɛdamɔa shi shiŋŋ, ní nyɛkwɛa nyɛyiwala ní Yehowa baahere ŋmɛnɛ.’” (2 Mose 14:13) Ani Mose nyɛ eye ebua Israelbii lɛ koni amɛhemɔkɛyeli lɛ mli awa? Enyɛ efee nakai, ejaakɛ Biblia lɛ wie yɛ Mose kɛ Israelbii lɛ fɛɛ ahe akɛ: ‘Hemɔkɛyeli amɛkɛfo Ŋshɔ Tsuru lɛ tamɔ shikpɔŋ gbiŋ.’ (Hebribii 11:29) Jeee Mose pɛ ná ehemɔkɛyeli lɛ he sɛɛ, shi mɛi fɛɛ ni kase nii kɛjɛ mli lɛ hu ná he sɛɛ.

MƐNI WƆKASEƆ KƐJƐƆ MLI?

Wɔbaanyɛ wɔkase Mose kɛ́ wɔkpɛ yiŋ ni tsɔɔ akɛ wɔheɔ Nyɔŋmɔ shiwoi anɔ wɔyeɔ lɛ. Akɛ nɔkwɛmɔnɔ lɛ, Nyɔŋmɔ ewo wɔ shi akɛ kɛ́ wɔkɛ ejamɔ ye klɛŋklɛŋ gbɛhe yɛ wɔshihilɛ mli lɛ, ekɛ wɔheloonaa hiamɔnii baaha wɔ. (Mateo 6:33) Eji anɔkwale akɛ wɔnáŋ lɛ mlɛo akɛ wɔbaawu wɔshi heloonaa nibii asɛɛtiumɔ ni ehé shi waa ŋmɛnɛ lɛ. Shi wɔbaanyɛ wɔná hekɛnɔfɔ̃ɔ akɛ kɛ́ wɔbɔ mɔdɛŋ wɔha wɔshihilɛ fee mlɛo, ni wɔkɛ wɔjwɛŋmɔ ma wɔjamɔ lɛ nɔ lɛ, Yehowa kɛ wɔhiamɔ nii fɛɛ baaha wɔ. Ewoɔ wɔ shi akɛ: “Mishiŋo ni misaa mikwaŋo gbi ko gbi ko.”—Hebribii 13:5.

Kɛfata he lɛ, wɔbɔɔ mɔdɛŋ akɛ wɔye wɔbua mɛi krokomɛi koni amɛhemɔkɛyeli lɛ mli awa. Akɛ nɔkwɛmɔnɔ lɛ fɔlɔi ni hiɛ kã shi lɛ yɔseɔ hegbɛi babaoo ni amɛnáa ni amɛkɛbaaye amɛbua amɛbii bibii lɛ koni amɛná hemɔkɛyeli yɛ Nyɔŋmɔ mli. Ehe miihia ni fɔlɔi aha amɛbii ale kɛjɛ amɛgbekɛbiiashi tɔ̃ɔ akɛ Nyɔŋmɔ yɛ, ni ákɛ lɛ etsɔɔ wɔ nɔ ni hi kɛ nɔ ni ehiii. Kɛfata he lɛ, esa akɛ fɔlɔi aye abua amɛbii lɛ koni amɛna akɛ Nyɔŋmɔ gbɛtsɔɔmɔi ni akɛtsuɔ nii lɛ ji nɔ ni hi fe fɛɛ yɛ shihilɛ mli. (Yesaia 48:17, 18) Nikeenii ni nɔ bɛ kwraa ni fɔlɔi baanyɛ amɛkɛha amɛbii lɛ ji ni amɛye amɛbua amɛ koni amɛná hemɔkɛyeli yɛ Nyɔŋmɔ mli akɛ “eji mɔ ko ni yɔɔ diɛŋtsɛ, ni ejɔɔ mɛi ni bɔɔ mɔdɛŋ amɛtaoɔ esɛɛ gbɛ lɛ.”—Hebribii 11:6, Holy Bible—Easy-to-Read Version.