Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  January 2013

 BIBLIA LƐ TSAKEƆ MƐI

“Kpaako Miná Heyeli Diɛŋtsɛ.”

“Kpaako Miná Heyeli Diɛŋtsɛ.”
  • BE NI AFƆ LƐ: 1981
  • MAŊ NƆ NI EJƐ: UNITED STATES
  • MƆ NI EJI TSUTSU: BI NYENYEŊTSWI

MITSUTSU SHIHILƐ:

Afɔ mi yɛ Moundsville, maŋ ko ni mli jɔɔ yɛ Ohio Faa ni yɔɔ West Virginia kooyigbɛ yɛ U.S.A. lɛ mli. Mi ji bi enyɔ nɔ yɛ bii ejwɛ ateŋ; hii etɛ kɛ yoo kome, no hewɔ lɛ miishɛɛ sɛɛ efooo yɛ wɔshĩa kɔkɔɔkɔ. Mifɔlɔi tsuɔ nii waa, amɛyeɔ anɔkwa ni amɛsumɔɔ mɔ waa. Wɔgboŋ bɛ loo tsɔ yɛ shika gbɛfaŋ, shi wɔhiamɔ nibii ebɔɔɔ wɔ. Akɛni mifɔlɔi ji Yehowa Odasefoi hewɔ lɛ, amɛbɔ mɔdɛŋ amɛkɛ Biblia mli shishitoo mlai tsɔse wɔ kɛjɛ wɔgbekɛbiiashi tɔ̃ɔ.

Kɛlɛ, beni miye aaafee afii 13 kɛyaa lɛ, no mli lɛ mitsui ebɔi kplaŋmɔ momo kɛmiijɛ tsɔsemɔ ni miná lɛ he. Miyiŋ etɛ̃ɛɛ mi akɛ kɛ́ miba mijeŋ yɛ Biblia mli shishitoo mlai anaa lɛ, mishihilɛ baahi loo mitsui baanyɔ mimli. Miyasusu akɛ kɛ́ aha miná heyeli kɛfee nɔ fɛɛ nɔ ni mitsui tsirɛɔ mi akɛ mifee lɛ, no dani maná miishɛɛ diɛŋtsɛ. Etsɛɛɛ kɛkɛ ni mikpa Kristofoi akpeei yaa. Minyɛmi nuu nukpa kɛ minyɛmi yoo fioo ko hu bafata mihe yɛ atuatsemɔ nɛɛ mli. Wɔfɔlɔi lɛ fee nɔ fɛɛ nɔ kwraa ni yɔɔ amɛnyɛmɔ mli koni amɛkɛye abua wɔ, shi wɔkpoo yelikɛbuamɔi fɛɛ ni amɛkɛha wɔ lɛ.

Miyaleee akɛ nɔ ni mitsɛɔ lɛ akɛ heyeli lɛ baaha mikɛ mihe awo tsofai ni akɛtsuɔ nii bɔni esaaa mli koni matsɔ nyɔŋ maha nifeemɔ nɛɛ. Gbi ko beni wɔkpa skul ni miiya shĩa lɛ, minaanyo ko ha mi zigarɛt. Mihé ni mishɛre. Kɛjɛ no nɔ kɛyaa lɛ, mikɛ mihe wo nibii gbohii babaoo afeemɔ mli. Ebashɛ be ko ni mikɛ tsofai kɛ dãa ni naa wawai tsu nii yɛ gbɛ ni ejaaa nɔ, ni mikɛ mihe wo jeŋba sha hu mli. Mitee nɔ mikɛ tsofai ni naa wala ni fiteɔ mɔ lɛ hu tsu nii afii babaoo. Mikɛ mihe wo nifeemɔ nɛɛ mli vii aahu akɛ mibɔi tsofai nɛɛ ahɔɔmɔ bɔni afee ni manyɛ maná shika kɛfĩ mishihilɛ nɛɛ sɛɛ.

Mika shii abɔ akɛ magbe mihenilee, shi fɛɛ sɛɛ lɛ eyaa nɔ ekaiɔ mi daa akɛ gbɛ ni mikɔ lɛ ejaaa. Kɛlɛ, minu he akɛ, he ni mifite mishihilɛ kɛshɛ lɛ, nɔ ko kwraa bɛ ni manyɛ mafee yɛ he dɔŋŋ. Eyɛ mli akɛ mikɛ mɛi babaoo sharaa yɛ yelikɛnumɔi kɛ kɔnsɛtii ashishi moŋ nɛ, shi bei pii lɛ, minuɔ shoofeemɔ he, ni mináaa miishɛɛ kwraa. Bei komɛi lɛ, kɛ́ misusu bɔ ni mifɔlɔi yeɔ anɔkwa kɛ gbɔmɛi kpakpai ni amɛji lɛ he lɛ, minaaa nɔ hewɔ ni migba afã kwraa nakai lɛ.

 BƆ NI BIBLIA LƐ TSAKE MISHIHILƐ:

Eyɛ mli akɛ miyabɔleee akɛ manyɛ matsake moŋ, shi jeee nakai kwraa mɛi krokomɛi na mi. Mifɔlɔi fɔ̃ mi nine kɛtee Yehowa Odasefoi akpokpaa wulu nɔ kpee ni afee yɛ afi 2000 mli lɛ. Kulɛ misumɔɔɔ ni maya, shi mitee kɛ̃. Asomoaŋ minyɛmimɛi enyɔ ni ekplaŋ lɛ hu tee, enɛ ha minaa kpɛ mihe pam.

Beni miyɔɔ kpee lɛ shishi lɛ, mikai akɛ aaafee afi nɛ lɛ, miba kɔnsɛt ko yɛ biɛ nɔŋŋ. Kpee nɛɛ yɛ srɔto kwraa yɛ no he; enɛ ta mitsuiŋ waa. Beni miba nakai kɔnsɛt lɛ, biɛ fɛɛ yi kɛ jwɛi kpɔtɔɔ, ni kɔɔyɔɔ lɛ mli fɛɛ hu yi kɛ zigarɛt lasu kpɔ̃ɔ. Mɛi ni ba nakai kɔnsɛt lɛ ateŋ babaoo bɛ mlihilɛ, ni lalai ni atswa lɛ mli wiemɔi lɛ hu ehiii. Shi yɛ kpee lɛ shishi lɛ, mɛi ateŋ ni miyɔɔ lɛ fɛɛ yɛ miishɛɛ diɛŋtsɛ—mɛi nɛɛ ná mihe miishɛɛ waa diɛŋtsɛ, eyɛ mli akɛ mina amɛ nɛɛ afii abɔ nɛ. Kpeehe lɛ tse keŋkeŋ, ni wiemɔi ni aha lɛ haa mɔ náa hiɛnɔkamɔ. Beni mina bɔni Biblia mli anɔkwale lɛ náa mɔ nɔ hewalɛ kpakpa lɛ, eha mishwie miyiŋ yɛ nɔ hewɔ ni mikwa anɔkwale lɛ he.—Yesaia 48:17, 18.

“Biblia lɛ ye ebua mi ní mikpa tsofai kɛ nitsumɔ bɔ ni esaaa kɛ ehɔɔmɔ, ni mibatsɔ gbɔmɔ kpakpa”

Beni agbe kpee lɛ naa nɔŋŋ lɛ, mikpɛ mli akɛ mabɔi Kristofoi akpee yaa ekoŋŋ. Minyɛmimɛi lɛ hu kpɛ mli nakai nɔŋŋ yɛ nɔ ni amɛna yɛ kpee lɛ shishi lɛ hewɔ. Wɔyi etɛ lɛ fɛɛ kpɛlɛ koni akɛ wɔ akase Biblia lɛ.

Biblia mli ŋmalɛ ko ni ta mitsuiŋ waa ji Yakobo 4:8 lɛ, ekɛɛ: “Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.” Mibayɔse akɛ, dani manyɛ matsi mabɛŋkɛ Nyɔŋmɔ lɛ, esa akɛ maha mijeŋba he atse. Tsakemɔi ni ehe bahia ni mafee lɛ ekomɛi ji ní makpa tawa shɛremɔ, kɛ tsofai kɛ dãa ni mikɛtsuɔ nii bɔ ni esaaa lɛ.—2 Korintobii 7:1.

Mikɛ mitsutsu nanemɛi lɛ fo tako mli, ni mikɛ nanemɛi heei ni jɛ Yehowa jálɔi ateŋ lɛ baye amɛnajiaŋ. Asafoŋ onukpa ni kɛ mi kase Biblia lɛ ye bua mi jogbaŋŋ diɛŋtsɛ. Etswaa mi tɛlifoŋ yɛ be kɛ beaŋ, ni ebasaraa mi kɛkwɛɔ bɔ ni miyaa nɔ mihaa. Kɛbashi amrɔ nɛɛ, eji minanemɛi ni mikɛbɔɔ gbagbalii lɛ ateŋ mɔ kome.

Yɛ afi 2001 mli lɛ, mikɛ nu mli baptisimɔ fee mihenɔjɔɔmɔ lɛ he okadi, ni nakai nɔŋŋ minyɛmimɛi enyɔ lɛ hu fee. Bo lɛ, feemɔ miishɛɛ ni mifɔlɔi kɛ minyɛmi nuu fioo anɔkwafo lɛ ná beni wɔweku lɛ fee ekome ekoŋŋ kɛmiijá Yehowa lɛ he mfoniri okwɛ.

BƆ NI MINÁ HE SƐƐ:

Miyasusu akɛ Biblia mli shishitoo mlai lɛ yɛ kpɛŋŋ tsɔ, shi amrɔ nɛɛ mibuɔ shishitoo mlai lɛ akɛ amɛji hebuu ni nɔ bɛ. Biblia lɛ ye ebua mi ní mikpa tsofai kɛ nitsumɔ bɔ ni esaaa kɛ ehɔɔmɔ, ni mibatsɔ gbɔmɔ kpakpa.

Miná hegbɛ akɛ mifata Yehowa jálɔi ni efee ekome akɛ nyɛmimɛi yɛ je lɛŋ fɛɛ lɛ ahe. Mɛi nɛɛ sumɔɔ amɛhe lɛɛlɛŋ, ni amɛfee ekome kɛmiisɔmɔ Nyɔŋmɔ. (Yohane 13:34, 35) Miná jɔɔmɔ krɛdɛɛ ko yɛ nyɛmimɛi nɛɛ ateŋ, no ji miŋa, Adrianne, ni misumɔɔ lɛ waa ni mishwɛɛɛ ehe kwraa lɛ. Wɔmii shɛɔ wɔhe waa akɛ wɔfee ekome kɛmiisɔmɔ wɔ-Bɔlɔ lɛ.

Nɔ najiaŋ ni mafee nibii ni mikome pɛ maná he sɛɛ lɛ, amrɔ nɛɛ mikɛ mihe eha akɛ bei fɛɛ sɔɔlɔ, ni mitsɔɔ mɛi bɔ ni amɛbaafee ni amɛ hu amɛná Nyɔŋmɔ Wiemɔ lɛ he sɛɛ. Nitsumɔ nɛɛ eha miná miishɛɛ ni waa. Manyɛ mawie kɛ nɔmimaa diɛŋtsɛ akɛ Biblia lɛ tsake mi. Kpaako miná heyeli diɛŋtsɛ.