Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  January 2013

 SANEYITSO LƐ MLITSƆƆMƆ: ANI ESA AKƐ OSHE JE LƐ NAAGBEE LƐ GBEYEI?

Ani Esa akɛ Oshe Je lɛ Naagbee lɛ Gbeyei?

Ani Esa akɛ Oshe Je lɛ Naagbee lɛ Gbeyei?

Mɛi babaoo kɛɛ December 21, 2012 lɛ ji gbi ni kɛ tsakemɔ kpele baaba je lɛŋ fɛɛ, te onuɔ he ohaa tɛŋŋ? Ekɔɔɔ he eko nɔ ni okpa gbɛ lɛ, ekolɛ otsui baanyɔ omli, onijiaŋ baaje wui, loo ebaaje otsine. Mɛi eka amɛyiŋ amɛtsɔɔ yɛ bei srɔtoi amli akɛ je lɛ baaba naagbee, shi eyabaaa lɛ nakai, ani eko ji nɔ ni ho nɛɛ?

Ni “je nɛɛ naagbee lɛ” ní Biblia lɛ wie he lɛ hu? (Mateo 24:3) Mɛi komɛi sheɔ gbeyei ákɛ akɛ la baashã shikpɔŋ lɛ kwraa. Mɛi komɛi hu kɛ miishɛɛ miikpa nɔ ni baaba yɛ je nɛɛ naagbee lɛ gbɛ. Mɛi komɛi hu lɛ, je nɛɛ naagbee ni akɛɛ ebɛŋkɛ lɛ he sane eje amɛtsine. Shi, ani mɛi nɛɛ anifeemɔi lɛ damɔ saji ni aka yiŋ awie lɛ anɔ moŋ fe anɔkwa saji?

Ekolɛ, onaa baakpɛ ohe yɛ nɔ ni Biblia lɛ kɛɔ yɛ je nɛɛ naagbee lɛ he. Jeee akɛ Biblia lɛ haa wɔnaa yiŋtoi ahewɔ ni esa akɛ wɔkpa naagbee lɛ gbɛ pɛ kɛkɛ, shi etsɔɔ hu akɛ mɛi komɛi baanu he akɛ naagbee lɛ sɛɛ etsɛ tsɔ ni ebaaje amɛtsine loo ebaawo amɛmli la. Mɛi komɛi fɔɔ saji komɛi abimɔ yɛ je nɛɛ naagbee lɛ he, ha wɔsusu Biblia lɛ hetoi kɛha sanebimɔi nɛɛ ahe.

 Ani abaashã shikpɔŋ nɛɛ ni akpãta hiɛ?

HETOO NI BIBLIA LƐ KƐHAA: ‘Nyɔŋmɔ eŋɔ shikpɔŋ lɛ eto eshishitoo nii lɛ anɔ, koni ekahoso gbi ko gbi ko.’LALA 104:5.

Akɛ la loo nɔ ko kwraa kpãtaŋ shikpɔŋ lɛ hiɛ kɔkɔɔkɔ. Moŋ lɛ, Biblia lɛ tsɔɔ akɛ, wɔshibɔlemɔ ŋulami nɛɛ ji adesai anaanɔ shĩa. Lala 37:29 lɛ kɛɔ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 115:16; Yesaia 45:18.

Beni Nyɔŋmɔ bɔ shikpɔŋ lɛ egbe naa lɛ, ekɛɛ akɛ “ehi naakpa,” ni enuɔ he nakai loloolo. (1 Mose 1:31) Nyɔŋmɔ ekpɛko eyiŋ akɛ ebaafite shikpɔŋ lɛ kɔkɔɔkɔ, moŋ lɛ ewo shi akɛ ‘ebaafite mɛi ni fiteɔ shikpɔŋ lɛ’—no tsɔɔ akɛ, ebaabu shikpɔŋ lɛ he koni akafite lɛ kwraa.—Kpojiemɔ 11:18.

Ekolɛ, obaasusu nɔ ni 2 Petro 3:7 lɛ wie lɛ he. Biblia lɛ kɛɛ yɛ jɛmɛ akɛ: “Ŋwɛi kɛ shikpɔŋ ní yɔɔ nɛɛ, lɛ nɔŋŋ ewiemɔ akɛto amɛ aha la.” Ani wiemɔ nɛɛ etsɔɔɔ akɛ abaashã shikpɔŋ lɛ? Bei komɛi lɛ, Biblia lɛ kɛ wiemɔi ni ji “ŋwɛi,” “shikpɔŋ,” kɛ “la” tsuɔ nii yɛ mfonirifeemɔŋ. Akɛ nɔkwɛmɔnɔ lɛ, beni 1 Mose 11:1 kɛɛ akɛ: “Ni shikpɔŋ muu lɛ fɛɛ yɛ naabu kome” lɛ, ekɛ wiemɔ ni ji “shikpɔŋ” lɛ damɔ shi kɛha gbɔmɛi adesai.

Sane ni no mli lɛ 2 Petro 3:7 lɛ wieɔ he lɛ tsɔɔ akɛ, ŋwɛi, shikpɔŋ, kɛ la ni atsĩtsĩi tã lɛ hu ji okadifeemɔ nibii. Kuku 5 kɛ 6 lɛ tsɔɔ ákɛ akɛ Noa beaŋ nu afua lɛ kpãta ŋwɛi kɛ shikpɔŋ ni hi shi yɛ no beaŋ lɛ hiɛ, kɛlɛ wɔshibɔlemɔ ŋulami lɛ ejeee shihilɛ mli. No najiaŋ lɛ, nu afua lɛ kpãta gbɔmɛi ni yitseiaŋ wala loo “shikpɔŋ” lɛ ahiɛ. Nakai nɔŋŋ hu ekpãta “ŋwɛi” henɔ ko, ni ji gbɔmɛi ni ye adesai anɔ yɛ shikpɔŋ lɛ nɔ lɛ ahiɛ. (1 Mose 6:11) Nakai gbɛ nɔ nɔŋŋ hu 2 Petro 3:7 lɛ tsɔɔ akɛ abaakpãta gbɔmɛi ni yitseiaŋ wala kɛ amɛnɔyelɔi ni jeŋba ekpɔtɔ lɛ ahiɛ kwraa tamɔ akɛ la kpãtaa nɔ ko hiɛ lɛ.

Kɛ́ je nɛɛ ba naagbee lɛ, mɛni baaba?

HETOO NI BIBLIA LƐ KƐHAA: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”1 YOHANE 2:17.

Jeee shikpɔŋ lɛ ji “je” lɛ ni baaho aya lɛ, moŋ lɛ adesai fɛɛ ni yɔɔ je lɛ mli ni amɛhiii shi yɛ Nyɔŋmɔ suɔmɔnaa nifeemɔ naa lɛ. Taakɛ datrɛfonyo ko ni feɔ opireshɛŋ lɛ baajie fũumɔ ko ni haa mɔ kansa yɛ mɔ ko mli bɔni afee ni mɔ lɛ akagbo lɛ, nakai nɔŋŋ Nyɔŋmɔ hu ‘aaafolɔ efɔŋfeelɔi lɛ ashwie’ bɔni afee ni gbɔmɛi  kpakpai lɛ ahi shi yɛ toiŋjɔlɛ mli yɛ shikpɔŋ lɛ nɔ. (Lala 37:9) Yɛ shishinumɔ nɛɛ naa lɛ, “je nɛɛ naagbee lɛ” ji nɔ ko kpakpa.

Biblia shishitsɔɔmɔi komɛi haa jwɛŋmɔ ni ja ni yɔɔ “je nɛɛ naagbee lɛ” he lɛ bafeɔ faŋŋ, ekomɛi tsɔɔ nakai wiemɔ lɛ shishi akɛ “nibii agbɛjianɔtoo lɛ naagbee,” loo “yinɔ lɛ naagbee.” (Mateo 24:3; New International Version) Akɛni adesai komɛi kɛ shikpɔŋ lɛ fɛɛ jeɔ hiɛkpatamɔ lɛ mli lɛ hewɔ lɛ, ani nilee bɛ mli akɛ nibii agbɛjianɔtoo hee ko baanyiɛ sɛɛ aba? Biblia lɛ haa hetoo akɛ hɛɛ, ejaakɛ ewieɔ “je ni baa lɛ” loo nibii agbɛjianɔtoo ni baa lɛ he shii abɔ.—Luka 18:30.

Yesu wie nakai be ni baaba lɛ he akɛ “abaafee nibii fɛɛ ehee.” Kɛ́ nakai be lɛ shɛ lɛ, ebaaku sɛɛ ekɛ adesai aba shihilɛ ni Nyɔŋmɔ to eha amɛ yɛ shishijee lɛ mli ekoŋŋ. (Mateo 19:28, NIV) No beaŋ lɛ wɔbaaná nibii ni nyiɛ sɛɛ nɛɛ ahe sɛɛ:

  • Shikpɔŋ lɛ baatsɔ paradeiso, ni mɔ fɛɛ mɔ baahi shi shweshweeshwe, nɔ ko he ehiaŋ lɛ. —Yesaia 35:1; Mika 4:4.
  • Nitsumɔ kpakpa ni haa mɔ tsui nyɔɔ emli. —Yesaia 65:21-23.
  • Abaatsa helai fɛɛ.—Yesaia 33:24.
  • Mɛi ni egbɔlɔ lɛ baatsɔmɔ oblahii kɛ oblayei ekoŋŋ.—Hiob 33:25.
  • Abaatee gbohii ashi.—Yohane 5:28, 29.

Kɛ́ wɔfeɔ “Nyɔŋmɔ suɔmɔnaa nii,” ni ji nɔ ni ebiɔ yɛ wɔdɛŋ lɛ, no lɛ esaaa akɛ wɔsheɔ je lɛ naagbee lɛ gbeyei. No najiaŋ lɛ, wɔbaanyɛ wɔkpa lɛ gbɛ.

Ani je lɛ naagbee lɛ ebɛŋkɛ lɛɛlɛŋ?

HETOO NI BIBLIA LƐ KƐHAA: ‘Beni nyɛnaa akɛ nibii nɛɛ etsɔ naa shi lɛ, nyɛnáa nyɛlea akɛ Nyɔŋmɔ maŋtsɛyeli lɛ eshɛ etã.’LUKA 21:31.

Woloŋlelɔ kpanaa ko ni atsɛɔ lɛ Richard Kyle lɛ ŋma yɛ wolo ko (The Last Days Are Here Again) mli akɛ, “tsakemɔ ni baa trukaa kɛ maŋ hirihiri haa mɛi kaa amɛyiŋ amɛtsɔɔ be ni je lɛ baaba enaagbee.” Enɛ baa lɛ nakai, titri lɛ kɛ́ ewa akɛ abaanu nɔ ni kɛ tsakemɔ kɛ hirihiri lɛ ba lɛ shishi.

Kɛlɛ, jeee nibii ni tee nɔ yɛ gbalɔi ni gba kɛkɔ je nɛɛ naagbee lɛ he lɛ abeaŋ ni amɛnuuu shishi lɛ amɛbɔ mɔdɛŋ akɛ amɛaagbala mli. Moŋ lɛ, Nyɔŋmɔ kɛ emumɔ lɛ tsirɛ amɛ koni amɛtsɔɔ nibii ni baaya nɔ ni baatsɔɔ akɛ je nɛɛ naagbee lɛ ebɛŋkɛ kpaakpa. Susumɔ gbalɛi nɛɛ ekomɛi ahe koni bo diɛŋtsɛ okwɛ kɛji gbalɛi nɛɛ miiba mli yɛ wɔbei nɛɛ amli lo.

  •   Tai, hɔji, shikpɔŋhosomɔi, kɛ tsɛŋemɔ helai srɔtoi ni gbeɔ mɔ.—Mateo 24:7; Luka 21:11.
  • Efɔŋfeemɔ baafa babaoo.—Mateo 24:12.
  • Adesai baafite shikpɔŋ lɛ.—Kpojiemɔ 11:18.
  • Mɛi ni sumɔɔ amɛ pɛ amɛhe, shika, kɛ shwɛmɔ kɛ ŋɔɔmɔ shi amɛsumɔɔɔ Nyɔŋmɔ.—2 Timoteo 3:2, 4.
  • Weku shihilɛ ni baafite.—2 Timoteo 3:2, 3.
  • Mɛi kɛ amɛnifeemɔ baatsɔɔ akɛ okadii ni tsɔɔ akɛ naagbee lɛ miibɛŋkɛ lɛ jeee amɛhe sane ko.—Mateo 24:37-39.
  • Abaashiɛ Nyɔŋmɔ Maŋtsɛyeli lɛ he sanekpakpa lɛ kɛkpele jeŋ muu lɛ fɛɛ.—Mateo 24:14.

Taakɛ Yesu kɛɛ lɛ, kɛ́ wɔna “nii nɛɛ fɛɛ lɛ,” no haa wɔleɔ akɛ je nɛɛ naagbee lɛ ebɛŋkɛ. (Mateo 24:33) Yehowa Odasefoi heɔ amɛyeɔ akɛ nibii ni tsɔɔ akɛ naagbee lɛ ebɛŋkɛ lɛ yɛ faŋŋ, no hewɔ lɛ amɛshiɛɔ amɛhemɔkɛyeli lɛ amɛtsɔɔ mɛi yɛ shikpɔji ni naa shɛɔ 236 anɔ.

Ani gbɛ ni mɛi yakpa ákɛ je nɛɛ baaba naagbee, shi eyabaaa lɛ nakai lɛ tsɔɔ akɛ ebaŋ kɔkɔɔkɔ?

HETOO NI BIBLIA LƐ KƐHAA: “Be mli ni amɛaakɛɛ akɛ: ‘Hejɔlɛ yɛ ni wɔyɛ shweshweeshwe!’ lɛ, no mli nɔŋŋ hiɛkpatamɔ aaabatua amɛ trukaa, tamɔ kɔɔmɔ tuaa yoo ni musu eda lɛ, ni amɛjeŋ mli kɔkɔɔkɔ.”1 TESALONIKABII 5:3.

Biblia lɛ kɛ je nɛɛ naagbee lɛ to yoo ni miikɔmɔ ni ebaafɔ he—yoo lɛ nyɛɛɛ ajo piŋmɔ lɛ naa foi, ni ebaa trukaa. Bei ni tsɔɔ je nɛɛ naagbee lɛ hiɛ lɛ hu tamɔ hɔŋɔɔ, ejaakɛ yoo hɔlɔ lɛ naa okadii ni tsɔɔ akɛ eshwɛ fioo ni ebaafɔ. Ekolɛ, edatrɛfonyo lɛ baatsɔɔ be ni ebaafɔ; kɛlɛ, kɛ́ eshashao shi hu jiŋŋ, yoo lɛ yaa nɔ enáa nɔmimaa akɛ kɛ́ ŋwɛi kpa ebu shi tete lɛ, ebaafɔ. Nakai nɔŋŋ kɛ́ mɛi ekpa gbɛ ákɛ je nɛɛ baaba naagbee shi eyabaaa lɛ nakai lɛ, no tsakeee okadii ni tsɔɔ akɛ wɔyɛ “naagbee gbii lɛ” amli lɛ.—2 Timoteo 3:1.

Ekolɛ obaabi akɛ, ‘Kɛ́ okadii ni tsɔɔ akɛ wɔbɛŋkɛ naagbee gbii lɛ kpaakpa lɛ yɛ faŋŋ lɛ, mɛni hewɔ mɛi babaoo yɔseee mɔ?’ Biblia lɛ tsɔɔ akɛ kɛ́ naagbee gbii lɛ miibɛŋkɛ lɛ, mɛi babaoo baaku amɛhiɛ amɛshwie okadii lɛ anɔ. Nɔ najiaŋ ni amɛbaakpɛlɛ nɔ akɛ shihilɛ lɛ mli ewo wu, ni tsɔɔ akɛ nibii etsake kwraa lɛ, amɛbaaye he fɛo amɛkɛɛ: “Kɛjɛ beyinɔ ní tsɛmɛi lɛ tee yawɔwɔi nɛɛ, bɔ ni  nibii yɔɔ kɛjɛ jeŋbɔɔ shishijee mli lɛ, nakai nɔŋŋ amɛyɔɔ nɛɛ.” (2 Petro 3:3, 4) Yɛ gbɛ ko nɔ lɛ, naagbee gbii lɛ he okadii lɛ yɛ faŋŋ, kɛlɛ mɛi babaoo baaku amɛhiɛ amɛshwie nɔ.—Mateo 24:38, 39.

Ŋmalɛ naa odaseyelii fioo komɛi ni tsɔɔ akɛ naagbee lɛ ebɛŋkɛ lɛ ahe wɔsusu yɛ sane nɛɛ mli lɛ. * Ani obaasumɔ ni ole babaoo? Kɛ́ nakai lɛ, mɛni hewɔ onaaa Yehowa Odasefoi lɛ koni oha amɛkɛ bo afee Biblia mli nikasemɔ ni aheee nɔ ko? Abaanyɛ afee nikasemɔ lɛ yɛ oshĩa, he ni baahi aha bo, loo kɛtsɔ tɛlifoŋ nɔ. Nɔ pɛ ni ebaabi ni okɛha ji obe, ni obaaná he sɛɛ babaoo diɛŋtsɛ.