Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Tsi Obɛŋkɛ Sɔlemɔ Toibolɔ Lɛ

Tsi Obɛŋkɛ Sɔlemɔ Toibolɔ Lɛ

 Tsi Obɛŋkɛ Sɔlemɔ Toibolɔ Lɛ

MƐI babaoo ni kɛɔ akɛ amɛheɔ Nyɔŋmɔ nɔ amɛyeɔ lɛ nyɛɛɛ atsɔɔ nɔ tuuntu hewɔ ni amɛyɔɔ hemɔkɛyeli lɛ. Nakai nɔŋŋ amɛnyɛɛɛ amɛtsɔɔ nɔ hewɔ ni bei pii lɛ, jamɔi feɔ nibii gbohii loo nɔ hewɔ ni Nyɔŋmɔ ŋmɛɔ piŋmɔ gbɛ lɛ. Nɔ pɛ ni amɛnyɛɔ amɛfeɔ ji ní amɛsɔle amɛha Nyɔŋmɔ ni amɛnuuu lɛ shishi lɛ.

Kɛlɛ, obaanyɛ otsi obɛŋkɛ Nyɔŋmɔ kpaakpa fe nakai. Kɛ́ onu Nyɔŋmɔ shishi jogbaŋŋ lɛ, ohiɛ baasɔ lɛ ni obaasumɔ esane, ni no baatswa ohemɔkɛyeli lɛ ema shi. Anɔkwa hemɔkɛyeli damɔ nɔ ko ni yɔɔ diɛŋtsɛ nɔ. (Hebribii 11:1) Kɛ́ okase anɔkwalei ni kɔɔ Nyɔŋmɔ he lɛ, obaale lɛ ni obaanyɛ okɛ lɛ agba sane akɛ onaanyo. Susumɔ mɛi komɛi ni kulɛ amɛsɔleɔ shi nakai beaŋ nɔŋŋ lɛ amɛheee amɛyeee akɛ Nyɔŋmɔ yɛ lɛ aniiashikpamɔi lɛ ahe okwɛ.

Patricia, ni atsĩ etã yɛ klɛŋklɛŋ sane lɛ mli lɛ. “Gbi ko lɛ, mifata kuu ko ni wɔyi aaashɛ nyɔŋma he, ni amɛbɔi jamɔ he sanegbaa. No mli lɛ, mikɛɛ amɛ momo akɛ Yehowa Odasefoi komɛi eba amɛkɛ mipapa ni heee yeee akɛ Nyɔŋmɔ yɛ lɛ miigba sane, ni mishi amɛ yɛ shĩa. Minanemɛi lɛ ateŋ mɔ kome kɛɛ akɛ, ‘Ekolɛ Yehowa Odasefoi lɛ asane ja.’

“Mɔ kroko hu kɛɛ akɛ, ‘Mɛni hewɔ nyɛhaaa wɔya amɛkpee lɛ eko wɔkwɛ?’ Ni nakai pɛpɛɛpɛ wɔfee. Eyɛ mli akɛ wɔyiŋ fee wɔ enyɔɔnyɔ moŋ, shi wɔteaŋ mɛi komɛi kpaaa kpee lɛ yaa ejaakɛ Yehowa Odasefoi lɛ jie naanyobɔɔ su kpo waa.

“Kɛlɛ, gbi ko Hɔgbaa lɛ, minu nɔ ko ni ha mitsake misusumɔ. Mɔ ni ha wiemɔ lɛ tsɔɔ nɔ hewɔ ni gbɔmɛi piŋɔ lɛ mli. Kulɛ, mileee da akɛ abɔ gbɔmɔ akɛ mɔ ni eye emuu, ni esha kɛ gbele tsɔ gbɔmɔ kome nɔ kɛba, ni etsɛŋe gbɔmɛi fɛɛ. Wielɔ lɛ tsɔɔ nɔ hewɔ hu ni ehe bahia ni Yesu agbo bɔni afee ni adesai anine ashɛ nɔ ni ŋmɛɛ klɛŋklɛŋ gbɔmɔ lɛ nɔ. * (Romabii 5:12, 18, 19) Minu nɔ fɛɛ nɔ shishi amrɔ nɔŋŋ. Mimu sane naa akɛ, ‘Nyɔŋmɔ ko yɛ ni susuɔ wɔhe lɛɛlɛŋ.’ Mitee nɔ mikase Biblia lɛ, ni etsɛɛɛ kɛkɛ ni miyɔse klɛŋklɛŋ kwraa yɛ mishihilɛ mli akɛ, manyɛ masɔle maha mɔ ko ni yɔɔ diɛŋtsɛ.”

Allan, ni atsĩ lɛ hu etã yɛ klɛŋklɛŋ sane lɛ mli lɛ. “Gbi ko lɛ, Yehowa Odasefoi ba wɔshĩa lɛ, ni miŋa here amɛ hiɛmɛɛ ejaakɛ eetao ele sane ni Odasefoi lɛ wie akɛ abaahi shi kɛya  naanɔ yɛ shikpɔŋ lɛ nɔ lɛ he nii babaoo. Mimli wo la waa. Wɔshi gbɔi lɛ yɛ asa lɛ nɔ, ni mitsɛ miŋa kɛtee kpata lɛ shi ni mikɛɛ lɛ akɛ, ‘Kaafee buulu. Esaaa akɛ oheɔ nibii tamɔ nɛkɛ oyeɔ!’

“Eha hetoo akɛ, ‘Belɛ yaa ni oyatsɔɔ amɛ akɛ nɔ ni amɛwieɔ lɛ bɛ mli.’

“Anɔkwa, minyɛɛɛ amɛ nɔ ko matsɔɔ. Shi, amɛjie mlihilɛ kpo amɛtsɔɔ mi, ni amɛshi mi wolo ko ni wieɔ nibii ni yɔɔ wala mli lɛ ahe, kɛji abɔ nibii loo amɛba kɛtsɔ sutsakemɔ nɔ. Sane naatsɔɔmɔ ni wolo lɛ kɛha lɛ mli kã shi faŋŋ ni eyɛ nɔdaamɔ nɔ diɛŋtsɛ, ni no ha mikpɛ mli akɛ makase Nyɔŋmɔ he nii babaoo. Miha Yehowa Odasefoi lɛ kɛ mi bɔi Biblia lɛ kasemɔ, etsɛɛɛ kwraa ni mibayɔse akɛ nɔ ni Biblia lɛ kɛɔ lɛ yɛ srɔto kwraa yɛ susumɔ ni kulɛ mihiɛ yɛ jamɔ he lɛ he. Beni mikaseɔ Yehowa he nii lɛ, mibɔi sɔlemɔ kɛ lɛ diɛŋtsɛ hamɔ. No mli lɛ, miyɛ sui komɛi ni esaaa, no hewɔ lɛ misɔle koni eye ebua mi. Miná nɔmimaa akɛ Yehowa ebo misɔlemɔ lɛ toi.”

Andrew, ni yɔɔ England lɛ. “Minyaa jeŋ niiashikpamɔ he waa, ni misumɔɔ akɛ makase he nii moŋ, shi miheɔ sutsakemɔ tsɔɔmɔ lɛ miyeɔ akɛni mɛi krokomɛi wieɔ akɛ eji anɔkwale  lɛ hewɔ. Nifɔjianii ni yaa nɔ lɛ hewɔ lɛ miheee miyeee akɛ Nyɔŋmɔ yɛ.

“Shi bei komɛi lɛ, misusuɔ akɛ: ‘Kɛ́ Nyɔŋmɔ ko yɛ ŋwɛi lɛ, no lɛ masumɔ ni male nɔ ni enɛɛmɛi fɛɛ tsɔɔ. Mɛni hewɔ juu kɛ fɔ̃ kɛ tai babaoo yaa nɔ lɛ?’ No beaŋ lɛ, kɛ́ mikɛ naagbai kpe lɛ, bei komɛi lɛ misɔleɔ kɛha yelikɛbuamɔ, shi mileee mɔ ni mikɛwieɔ lɛ.

“Kɛkɛ ni mɔ ko ha miŋa dɛhiɛmɔ wolo ko ni Yehowa Odasefoi fee ni hiɛ saneyitso akɛ Ani Je Nɛɛ Baaya nɔ Ahi Shi? Misusu nakai sane lɛ nɔŋŋ he shii abɔ. Wolo lɛ ha mishwie miyiŋ yɛ Biblia lɛ he akɛ, ‘Ani ehe baahia ni masusu hetoi ni ekɛhaa lɛ ahe?’ Sɛɛ mli be ni mitee hejɔɔmɔ ko lɛ, mɔ ko ha mi wolo ni ji The Bible—God’s Word or Man’s? * Beni miyɔse akɛ Biblia lɛ kɛ jeŋ niiashikpamɔ kpãa gbee diɛŋtsɛ lɛ, minu he akɛ esa akɛ makase Biblia lɛ he nii babaoo. No hewɔ lɛ, beni Yehowa Odasefonyo ko kɛɛ ekɛ mi baakase Biblia lɛ, mikpɛlɛ nɔ. Beni mibanu Yehowa yiŋtoi lɛ ashishi lɛ, mibanu he akɛ eji mɔ ko ni yɔɔ diɛŋtsɛ, mɔ ko ni manyɛ majɛ mitsuiŋ mikɛ lɛ agba sane yɛ sɔlemɔ mli.”

Jan, ni atsɔse lɛ akɛ Protestantnyo yɛ London. “Jamɔŋ osatofeemɔ kɛ piŋmɔ ni egbɛ eshwa lɛ ha mijie mijwɛŋmɔ yɛ jamɔ nɔ kwraa. Mikpa kɔleji yaa ni mibɔi lala lamɔ kɛ saŋku tswaa koni maná shika. Bei nɛɛ mli ni mikɛ nuu ko ni atsɛɔ lɛ Pat kpe. Atsɔse lɛ akɛ Katoliknyo, shi lɛ hu jamɔ sane eje etsine tamɔ mi nɔŋŋ.

“Wɔkɛ mɛi krokomɛi ni amɛhu amɛkpa skulyaa ni amɛnyaa bokagbɛ jamɔ he lɛ yɔɔ shĩa ko ni kã shi amaŋfɔ lɛ mli. Wɔkɛ ŋmlɛtswai abɔ gbaa yiŋtoo ni yɔɔ shihilɛ sɛɛ lɛ he saji aahu kɛboteɔ nyɔɔŋteŋ tɔ̃ɔ. Eyɛ mli akɛ mi kɛ Pat fɛɛ heee Nyɔŋmɔ nɔ wɔyeee moŋ, shi wɔle akɛ ‘hewalɛ ko yɛ ni bɔ nibii.’

“Beni wɔshi kɛtee England kooyigbɛ kɛyatao nitsumɔ akɛ lalatswalɔi lɛ, wɔfɔ wɔbi nuu lɛ. Gbi gbɛkɛ ko lɛ, ehe baye, ni beni mihɛleɔ shi lɛ miisɔle miiha Nyɔŋmɔ ni miheee lɛ miyeee lɛ. No sɛɛ etsɛɛɛ nɔŋŋ lɛ, mikɛ Pat shihilɛ lɛ bafite kwraa, no hewɔ lɛ mimɔ mibi lɛ ni wɔshi lɛ wɔtee. Shi kome ekoŋŋ lɛ, misɔle kɛha yelikɛbuamɔ akɛ aleee nɔ mɔ ko baabo mi toi lo. Pat hu fee nakai nɔŋŋ ni mileee.

“Sɛɛ mli yɛ nakai gbi lɛ nɔ lɛ, Yehowa Odasefoi enyɔ komɛi yatswa Pat shinaa, ni amɛtsɔɔ lɛ Biblia mli ŋaawoo ni sa jogbaŋŋ lɛ ekomɛi. Pat tswa mi ni ebi kɛji masumɔ ni Yehowa Odasefoi kɛ wɔ akase Biblia lɛ lo. Etsɛɛɛ kɛkɛ ni wɔbana akɛ kɛ́ wɔbaasa Nyɔŋmɔ hiɛ lɛ, esa akɛ wɔkɛ wɔgbalashihilɛ lɛ ayawo mla shishi. Enɛ bafee tamɔ nɔ ko ni wa kɛha wɔ ejaakɛ wɔgbãla lɛ diɛŋtsɛ po bɛ jogbaŋŋ.

“No mli lɛ, wɔmiitao wɔle nibii babaoo ni kɔɔ Biblia mli gbalɛi amlibaa, nɔ hewɔ ni mɛi piŋɔ, kɛ nɔ ni Nyɔŋmɔ Maŋtsɛyeli lɛ ji lɛ he. Fiofio lɛ, wɔbayɔse akɛ Nyɔŋmɔ susuɔ mɔ he, ni wɔbasumɔ akɛ wɔfee nɔ ni ebiɔ yɛ wɔdɛŋ lɛ. Wɔkɛ wɔgbalashihilɛ lɛ wo mla shishi. Nyɔŋmɔ Wiemɔ lɛ mli nilee lɛ eye ebua wɔ ni wɔtsɔse wɔbii etɛ lɛ. Wɔyɛ hekɛnɔfɔ̃ɔ akɛ Yehowa bo wɔsɔlemɔi atoi.”

Bo Diɛŋtsɛ Pɛimɔ Nibii Amli

Taakɛ eji yɛ mɛi akpekpei abɔ agbɛfaŋ lɛ, mɛi ni atsĩ amɛtã yɛ sane nɛɛ mli lɛ haaa apasa jamɔ tsɔɔmɔi lɛ alaka amɛ, moŋ lɛ, amɛpɛi nibii amli ni amɛna nɔ hewɔ ni Nyɔŋmɔ ŋmɛɔ piŋmɔ gbɛ lɛ. Ani okadi akɛ, yɛ shihilɛ lɛ fɛɛ eko mli lɛ, Biblia lɛ ni aŋkroaŋkroi nɛɛ nu shishi jogbaŋŋ lɛ ji nɔ ni kɔne amɛyiŋ akɛ Yehowa boɔ sɔlemɔi atoi lɛɛlɛŋ?

Ani obaasumɔ ni opɛi nibii ni tsɔɔ akɛ Nyɔŋmɔ yɛ shihilɛ mli lɛ amli? Yehowa Odasefoi baaná he miishɛɛ akɛ amɛye amɛbua bo koni okase Yehowa he nii, kɛ bɔ ni ooofee otsĩ obɛŋkɛ ‘sɔlemɔ Toibolɔ’ lɛ.—Lala 65:3—w12-E 7/1.

[Shishigbɛ niŋmai]

^ kk. 6 Kɛ́ ootao ole nɔ hewɔ ni ehe bahia akɛ Yesu agbo kɛkpɔ̃ wɔ lɛ he saji babaoo lɛ, kwɛmɔ wolo ni ji Mɛni Biblia lɛ Tsɔɔ Diɛŋtsɛ? ni Yehowa Odasefoi fee lɛ, yitso 5 lɛ.

^ kk. 12 Yehowa Odasefoi ji mɛi ni fee.

[Wiemɔ ni akɔ ni akɛmiitsu nii ni yɔɔ baafa 10]

“Beni mibanu Yehowa yiŋtoi lɛ ashishi lɛ, mibanu he akɛ eji mɔ ko ni yɔɔ diɛŋtsɛ, mɔ ko ni manyɛ majɛ mitsuiŋ mikɛ lɛ agba sane yɛ sɔlemɔ mli”

[Mfoniri ni yɔɔ baafa 9]

Anɔkwa hemɔkɛyeli damɔ nɔ ko ni yɔɔ diɛŋtsɛ, kɛ shwelɛ ni ayɔɔ akɛ abaale Nyɔŋmɔ he anɔkwalei lɛ anɔ