Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛni Hewɔ Sɔlemɔ Toibolɔ lɛ Ŋmɛɔ Piŋmɔ Gbɛ Lɛ?

Mɛni Hewɔ Sɔlemɔ Toibolɔ lɛ Ŋmɛɔ Piŋmɔ Gbɛ Lɛ?

 Mɛni Hewɔ Sɔlemɔ Toibolɔ lɛ Ŋmɛɔ Piŋmɔ Gbɛ Lɛ?

MƐI komɛi yɛ ni amɛsɔleɔ moŋ nɛ, shi amɛyiŋ etɛ̃ɛɛ amɛ akɛ Nyɔŋmɔ yɛ. Mɛni hewɔ amɛyiŋ feɔ amɛ enyɔɔnyɔ lɛ? Ekolɛ, ejɛ piŋmɔ babaoo ni amɛnaa yɛ je lɛŋ lɛ hewɔ. Ani osusu nɔ hewɔ ni Nyɔŋmɔ ŋmɛɔ piŋmɔ gbɛ lɛ he pɛŋ?

Ani Nyɔŋmɔ ji mɔ ni eha adesai ebaje shihilɛ mli ni amɛyɔɔ amrɔ nɛɛ—mɛi ni yeee emuu, ní miipiŋ lɛ? Ebaawa akɛ wɔbaaná bulɛ wɔha nyɔŋmɔ ko ni sumɔɔ ni adesai apiŋ. Shi, susumɔ enɛ he okwɛ: Kɛ́ okɛ miishɛɛ miikwɛ kar hee fɛfɛo ko hewɔŋ, kɛkɛ ni ona akɛ kar lɛ afã ko eboda lɛ, ani obaamu sane naa akɛ mɔ ni fee kar lɛ je gbɛ efee lɛ nakai? Kɔkɔɔkɔ! Obaamu naa akɛ, mɔ ni fee kar lɛ fee lɛ jogbaŋŋ ni “kpa ko kwraa bɛ he,” ni ákɛ mɔ ko boda kar lɛ loo nɔ ko fee lɛ nakai.

Nakai nɔŋŋ kɛ́ wɔkɛ miishɛɛ kwɛ bɔ ni ato adebɔɔ nibii ahe gbɛjianɔ jogbaŋŋ aha kɛ bɔ ni afee amɛ aha lɛ, ni no sɛɛ lɛ wɔna bɔ ni adesai aweku lɛ efee basaa ni juu kɛ fɔ̃ eyi amɛshihilɛ mli lɛ, te wɔmuɔ sane naa wɔhaa tɛŋŋ? Biblia lɛ tsɔɔ akɛ Nyɔŋmɔ bɔ klɛŋklɛŋ adesai enyɔ lɛ ni kpa ko kwraa bɛ amɛhe, shi sɛɛ mli lɛ amɛ diɛŋtsɛ amɛto amɛhe kpa. (5 Mose 32:4, 5) Miishɛɛ sane ji akɛ Nyɔŋmɔ ewo shi akɛ ebaajaje nibii ni etɔtɔ lɛ—ebaaha adesai ni boɔ lɛ toi lɛ aye emuu ekoŋŋ. Shi, mɛni hewɔ esɛɛ etsɛ kɛ enɛ feemɔ lɛ?

Mɛni Hewɔ Nyɔŋmɔ Eŋmɛ Piŋmɔ Gbɛ Be Kplaŋŋ Nakai?

Nɔ hewɔ ni etsɛ nakai lɛ kɔɔ mɔ ni sa akɛ eyeɔ adesai anɔ lɛ he. Jeee Yehowa yiŋtoo ji adesai aye amɛ diɛŋtsɛ amɛnɔ. Kulɛ, Nyɔŋmɔ ji mɔ ni sa akɛ eye amɛnɔ. Biblia lɛ kɛɔ akɛ: “Adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Dɔlɛ  sane ji akɛ, klɛŋklɛŋ adesai enyɔ lɛ je gbɛ amɛtse Nyɔŋmɔ nɔyeli lɛ hiɛ atua. Amɛmlakwamɔ lɛ ha amɛbatsɔmɔ eshafeelɔi. (1 Yohane 3:4) Nɔ ni jɛ mli ba ji akɛ, emuu ni amɛyeɔ lɛ ŋmɛɛ amɛ, ni amɛto amɛ kɛ amɛshwie fɛɛ kpa.

Afii akpei abɔ nɛ ni Yehowa ŋmɛ adesai agbɛ koni amɛye amɛ diɛŋtsɛ amɛnɔ, ni nibii ni etee nɔ lɛ feɔ lɛ faŋŋ akɛ gbɔmɔ nyɛŋ aye gbɔmɛi anɔ ni eye omanye. Enɛ tsɔɔ akɛ adesai anɔyelii fɛɛ haa mɛi piŋɔ. Nɔyelii nɛɛ ateŋ ekome folo po nyɛko ajie ta, juu kɛ fɔ̃, jalɛsane ni ayeee, loo hela kɛjɛ shihilɛ mli.

Mɛɛ Gbɛ Nɔ Nyɔŋmɔ Aaatsɔ Ajaje Nibii ni Etɔtɔ Lɛ?

Biblia lɛ woɔ shi akɛ, etsɛŋ Nyɔŋmɔ kɛ jalɛ jeŋ hee ko baaba. (2 Petro 3:13) Mɛi pɛ ni jɛɔ amɛsuɔmɔ mli amɛjieɔ suɔmɔ kpo amɛtsɔɔ mɛi krokomɛi, ni amɛjieɔ suɔmɔ kpo amɛtsɔɔ Nyɔŋmɔ hu lɛ baahi je hee lɛŋ.—5 Mose 30:15, 16, 19, 20.

Biblia lɛ kɛɔ hu akɛ Nyɔŋmɔ baajie piŋmɔ kɛ mɛi ni kɛbaa lɛ kɛjɛ shihilɛ mli yɛ ‘kojomɔ gbi’ ni baa oyayaayai lɛŋ. (2 Petro 3:7) No sɛɛ lɛ, Nɔyelɔ ni Nyɔŋmɔ ehala lɛ, ni ji Yesu Kristo, baaye adesai ni feɔ toiboo lɛ anɔ. (Daniel 7:13, 14) Mɛni Yesu nɔyeli lɛ baatsu? Biblia lɛ kɛɔ akɛ: “Mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.”—Lala 37:11.

Ákɛ Maŋtsɛ ni yeɔ nɔ yɛ ŋwɛi lɛ, Yesu baajie naagbai fɛɛ ni ba—hela, gbɔlɛ, kɛ gbele—beni adesai tse Yehowa, ni ji “wala nubu” lɛ hiɛ atua lɛ kɛya. (Lala 36:9) Yesu baatsa mɛi fɛɛ ni kpɛlɛɔ esuɔmɔ nɔyeli lɛ nɔ lɛ. Yɛ Yesu nɔyeli lɛ shishi lɛ, Biblia mli shiwoi nɛɛ baaba mli:

 ▪ “Maŋbii lɛ ateŋ mɔ ko ekɛŋ akɛ: Migbɔjɔ! Ejaakɛ mɛi ní yɔɔ mli lɛ, aaaŋɔ amɛnishaianii lɛ afa amɛ.”—Yesaia 33:24.

▪ “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.

Ani le ni obale akɛ etsɛŋ Nyɔŋmɔ baaye eshiwoo akɛ ekɛ piŋmɔi fɛɛ baaba naagbee lɛ nɔ lɛ haaa otsui anyɔ omli? Kɛlɛ, kɛ́ Nyɔŋmɔ eŋmɛ piŋmɔ gbɛ amrɔ nɛɛ po lɛ, wɔbaanyɛ wɔná hekɛnɔfɔ̃ɔ akɛ eboɔ wɔsɔlemɔi atoi.

Nyɔŋmɔ yɛ. Ebaanyɛ enu ohe, ni ele piŋmɔ kɛ awerɛho ni oyeɔ lɛ po. Ekã etsui nɔ waa akɛ ohi shi koni be mli ni piŋmɔi kɛ yiŋkɔshikɔshifeemɔi fɛɛ baaho aya lɛ oná mli gbɛfaŋnɔ.