Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Kpaako Miná Mile Nyɔnmɔ ni Mijaa Lɛ Lɛ

Kpaako Miná Mile Nyɔnmɔ ni Mijaa Lɛ Lɛ

 Kpaako Miná Mile Nyɔnmɔ ni Mijaa Lɛ Lɛ

Mɔ ni gba ji Marieta Manuel Bacudio

Pentekoste osɔfo ko ni akɛɛ eyɛ hewalɛ ni akɛtsaa mɔ lɛ basara wɔ. Beni eta mihe lɛ, migbee shi ní mileee nɔ ni yaa nɔ, “mumɔ lɛ yi minɔ.” Beni mihiɛ tserɛ mi lɛ, etamɔ nɔ ni miná nɔ ni mitaoɔ lɛ—hewalɛ ni akɛtsaa mɔ lɛ. Te fee tɛŋŋ ni miná niiashikpamɔ ni tamɔ nɛkɛ, ni mɛɛ hewalɛ enɛ ná yɛ mishihilɛ nɔ? Dani magba bo sane nɛɛ lɛ, ha matsɔɔ bo mɔ ni miji.

AFƆ mi yɛ Ilocos Norte, Philippines yɛ December 10, 1968, miji mɔ kpawo nɔ yɛ bii nyɔŋma ateŋ. Atsɔse wɔ akɛ Katolikbii taakɛ eji yɛ Filipinobii babaoo agbɛfaŋ lɛ. Migbe skul naa yɛ 1986, ni migbɛkpamɔ ji ní matsɔ nɛɛsifonyo. Kɛlɛ, akɛni hela ko ni naa wa waa bamɔ mi hewɔ lɛ, nakai shwelɛ lɛ baaa mli. Anɔkwa, mileee akɛ mahi wala mli. Bɔ ni hela lɛ ha mihao sɔŋŋ hewɔ lɛ, misɔle mibi Nyɔŋmɔ koni eye ebua mi, mikɛɛ lɛ akɛ kɛji etsa mi lɛ, mikɛ miwala fɛɛ baasɔmɔ lɛ.

Be kplaŋŋ sɛɛ beni mihe wa mi lɛ, mikai shi ni miwo Nyɔŋmɔ lɛ. No hewɔ lɛ, yɛ June 1991 lɛ, mikɛ mihe wo Pentekoste Biblia skul ko mli. Kɛfata nibii krokomɛi ahe lɛ, akɛɛ skul lɛ baaha mɔ aná “mumɔ krɔŋkrɔŋ nɔkeenɔ” lɛ eko. No mli lɛ, miisumɔ ni maná hewalɛ ni akɛtsaa mɔ. Atsɔɔ wɔ yɛ skul lɛ akɛ, wɔnine baanyɛ ashɛ nɔ kɛji wɔhi ŋmaa ni wɔsɔle. Be ko lɛ, bɔni afee ni mɛi ana akɛ miná “mumɔ krɔŋkrɔŋ nɔkeenɔ” lɛ eko lɛ, beni wɔsɔleɔ lɛ miyatee he ko dioo ni mibo miklasnyo ko ni miisɔle waa lɛ toi. Beni eshwɛ fioo ni ebaagbe sɔlemɔ lɛ naa lɛ, mikɛ oyaiyeli shi kɛtee he ni mikula shi yɛ lɛ. Sɛɛ mli lɛ, migba lɛ nɔ pɔtɛɛ ni ebiɔ yɛ esɔlemɔ lɛ mli lɛ, kɛkɛ ni ehe eye akɛ miná “mumɔ krɔŋkrɔŋ nɔkeenɔ” lɛ eko agbɛnɛ!

Beni mitsaa minikasemɔ lɛ nɔ yɛ skul lɛ, no mli lɛ miyɛ sanebimɔi babaoo. Akɛ nɔkwɛmɔnɔ lɛ, Mateo 6:9 lɛ tsĩ “Tsɛ” lɛ kɛ “egbɛ́i” lɛ tã. Mibi saji tamɔ “Namɔ ji Tsɛ lɛ ni Yesu tsĩ etã lɛ?” ni “Namɔ gbɛ́i he esa akɛ atse lɛ?” Bei pii lɛ, hetoi ni mitsɔɔlɔi lɛ kɛhaa lɛ bɛ faŋŋ, ni shishinumɔ bɛ he. Amɛwieɔ Triniti lɛ he, ni amɛkɛɔ akɛ eji teemɔŋ sane. Enɛ haa miyiŋ futuɔ mi waa. Fɛɛ sɛɛ lɛ, mitsa minikasemɔ lɛ nɔ koni matsɔ osɔfo.

Minu Yehowa Odasefoi Ahe

Atsɔɔ wɔ yɛ Biblia skul lɛ akɛ, Yehowa Odasefoi woɔ apasa jamɔ ni ehiii fe fɛɛ lɛ he hewalɛ. Atsɛɔ amɛhu akɛ antikristo lɛ. Mibaná nyɛɛ ko ni mli wa miha jamɔ kuu nɛɛ.

Beni miná afii enyɔ yɛ skul lɛ, mitee shĩa miyasara mifɔlɔi beni wɔba hejɔɔmɔ. Carmen, ni ji minyɛmimɛi yei onukpai lɛ ateŋ mɔ kome lɛ nu akɛ miba shĩa, ni lɛ hu eba shĩa lɛ. No mli lɛ, ebaptisi momo akɛ Yehowa Odasefonyo, ni eji be fɛɛ sɔɔlɔ. Beni eka akɛ ebaatsɔɔ mi Nyɔŋmɔ he nii lɛ, mikɛ mlifu ni naa wa kɛɛ lɛ akɛ: “Mile Nyɔŋmɔ ni mijaa lɛ lɛ momo!” Beni mibɔ lɛ ahora sɛɛ lɛ, mitsi  eyisɛɛ ni miŋmɛɛɛ lɛ gbɛ dɔŋŋ ni ekɛ mi awie.

Beni miku misɛɛ kɛtee Biblia skul lɛ, Carmen maje mi wolo ni ji Ani Esa Akɛ Ohe Triniti lɛ Oye? * Oya nɔŋŋ kɛkɛ ni mikota wolo lɛ ni mishɛ mifɔ la mli. No mli lɛ, ehe miiwo mimli la lolo.

Mitee Mihiɛ Kɛbatsɔ Osɔfo

Beni mitsaa minikasemɔ lɛ nɔ yɛ Biblia skul lɛ, mibɔ mɔdɛŋ mikɔne mɛi komɛi ayiŋ kɛba mijamɔ lɛ mli. Mimii shɛ mihe waa beni mimami kɛ minyɛmi nuu nukpa bafata mihe yɛ Pentekoste jamɔ lɛ mli lɛ.

Yɛ March 1994 mli lɛ, migbe Pentekoste Biblia skul lɛ naa. Taakɛ miwie kɛtsɔ hiɛ lɛ, osɔfo ko ba nifeemɔ ni tsɔɔ akɛ wɔgbe skul lɛ naa lɛ shishi. Wɔ mɛi ni miigbe skul naa lɛ fɛɛ tao akɛ wɔbɛŋkɛ lɛ ejaakɛ wɔheɔ wɔyeɔ akɛ eyɛ hewalɛ ni akɛtsaa mɛi. Beni atswaa lala lɛ, wɔyafata ehe yɛ kpoku lɛ nɔ, kɛtumɔmɔ kɛ dɛtswaa. Mɔ fɛɛ mɔ ni osɔfo lɛ taa ehe lɛ gbeɔ shi, ni “mumɔ lɛ yiɔ enɔ.” * Beni eta mihe lɛ, mi hu migbee shi ni mileee nɔ ni yaa nɔ. Beni mihiɛ tserɛ mi lɛ, mishe gbeyei, shi minu he akɛ amrɔ nɛɛ miná hewalɛ ni akɛtsaa mɛi, miná miishɛɛ naakpa.

Etsɛɛɛ kɛkɛ ni mikɛ hewalɛ nɛɛ tsa gbekɛ ko ni atiridii ni naa wa emɔ lɛ. Beni misɔle lɛ, amrɔ nɔŋŋ ni latsaa ko bɔi gbekɛ lɛ tsaa, ni atiridii lɛ laaje. Agbɛnɛ lɛ, minu he akɛ manyɛ maye shi ni miwo Nyɔŋmɔ lɛ nɔ. Shi naakpɛɛ sane ji, minu he akɛ mifee shwɛm. Yɛ mimli gbɛ tɔ̃ɔ lɛ, mile akɛ Nyɔŋmɔ koome pɛ yɔɔ, shi mɔ tuutu ni eji lɛ, mileee. Agbɛnɛ hu, miyiŋ etɛ̃ɛɛ mi yɛ jamɔ lɛ tsɔɔmɔi babaoo he.

Nibii ni Tsake Mijwɛŋmɔ

Nibii nɛɛ asɛɛ lɛ, mibanyɛ Yehowa Odasefoi lɛ fe tsutsu lɛ. Kɛ́ mina Yehowa Odasefoi lɛ awoji nɔŋŋ lɛ, mishaa. Kɛkɛ ni trukaa lɛ nɔ ko ba. Mibayɔse akɛ mimami nyaaa wɔjamɔ lɛ he dɔŋŋ, enɛ ha minaa kpɛ mihe waa. Asomoaŋ Carmen kɛ lɛ miikase Biblia lɛ! Mimli fu minyɛmi yoo lɛ waa.

Kɛkɛ ni mina Awake! wolo ko yɛ mimami shĩa lɛ. Be ko kulɛ, masha wolo lɛ. Shi, akɛni miishwe waa ni male nɔ ni ekaneɔ lɛ hewɔ lɛ, migbele wolo lɛ baafai lɛ amli mikwɛ. Mihiŋmɛi yagba sane ko nɔ, ni ekɔɔ mɔ ko ni kulɛ eheɔ esɔlemɔ lɛ tsɔɔmɔi lɛ eyeɔ waa lɛ he. Shi, beni ekaneɔ Odasefoi lɛ awoji lɛ ni ekaneɔ ŋmalɛi ni atsɛ yisɛɛ yɛ Biblia lɛ mli lɛ, ebahe eye akɛ Triniti, hɛl la, kɛ susuma ni gbooo tsɔɔmɔi lɛ damɔɔɔ ŋmalɛi lɛ anɔ. Enɛ ta mitsuiŋ. Saji nɔŋŋ ni mitaoɔ manu shishi lɛ nɛ. Kɛjɛ no nɔ kɛyaa lɛ, mikpa be ni manu Biblia mli anɔkwalei lɛ ashishi jogbaŋŋ lɛ gbɛ.

Beni mikane wala shihilɛ he sane kroko hu yɛ Awake! lɛ mli ni kɔɔ mɔ ko ni kulɛ etɔɔ dãa, ni ekɛ tsofai tsuɔ nii bɔ ni esaaa lɛ he, shi enyɛ efee tsakemɔ kpele akɛni ekase Biblia lɛ hewɔ lɛ, mibɔi Odasefoi awoji lɛ akanemɔ babaoo. Mina wolo ko ni ji The Divine Name  That Will Endure Forever. * Beni mikaneɔ lɛ, mibale akɛ Nyɔŋmɔ gbɛ́i ji Yehowa. Eha miná miishɛɛ waa akɛ makase anɔkwa Nyɔŋmɔ koome lɛ he anɔkwalei lɛ!—5 Mose 4:39; Yeremia 10:10.

Mitee nɔ mikane yɛ teemɔŋ, ni mibale Biblia mli anɔkwalei krokomɛi babaoo. Akɛ nɔkwɛmɔnɔ lɛ, beni mitee Pentekoste skul lɛ, atsɔɔ mi akɛ Yesu ji Nyɔŋmɔ, shi mikase yɛ Biblia lɛ mli akɛ Yesu ji “Nyɔŋmɔ, hiɛkãlɔ lɛ, bi lɛ.”—Mateo 16:15, 16.

Tsakemɔ ko ni Mifee

Beni mina Carmen ekoŋŋ lɛ, enaa kpɛ ehe akɛ mibi lɛ ni eha mi wolo ni ji The Divine Name That Will Endure Forever lɛ eko, kɛ woji krokomɛi hu. Miye afii babaoo yɛ nakai Biblia skul lɛ, shi atsɔɔɔ mi anɔkwale lɛ yɛ jɛmɛ; ashwila mi. Miishɛɛ bayi mitsuiŋ kɛteke nɔ yɛ Biblia mli anɔkwalei ni no mli lɛ mikaseɔ lɛ hewɔ. Yesu wiemɔi nɛɛ baná minɔ hewalɛ waa akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Nakai anɔkwalei lɛ babɔi mishihilɛ tsakemɔ.

Ebashɛ be ko lɛ, misusu akɛ manyɛ masɔmɔ Yehowa Nyɔŋmɔ yɛ teemɔŋ ni nakai beaŋ nɔŋŋ lɛ, makã he maye osɔfo. Etsɛɛɛ ni miyɔse akɛ, sɔlemɔ lɛ tsɔɔmɔi babaoo yɛ ni minyɛɛɛ matsɔɔ dɔŋŋ. Fɛɛ sɛɛ lɛ, migbeyeishemɔ ji akɛ, kɛ́ mikpa osɔfoyeli lɛ, nɛgbɛ maná shika yɛ kɛkwɛ mihe? Kwɛ bɔ ni ebaafee hiɛgbele kɛha sɔlemɔŋbii lɛ akɛ amɛsɔfoi lɛ ateŋ mɔ kome ebatsɔ Yehowa Odasefonyo! No hewɔ lɛ, mitee nɔ mitsɔɔ nii akɛ osɔfo, shi mikwa sɔlemɔ lɛ apasa tsɔɔmɔi lɛ.

Beni mina minyɛmi yoo Carmen ekoŋŋ lɛ, ewo mi ŋaa akɛ miya Yehowa Odasefoi akpei. Akɛni be kɛ beaŋ lɛ, mikɛ amaniɛbɔɔ yaa wɔsɔlemɔ ni yɔɔ Laoag City ni ajɛ mli atse nɔ ni miyɔɔ mli lɛ hewɔ lɛ, midɛkɛ shi kɛyatao Maŋtsɛyeli Asa, ni ji he ni Odasefoi lɛ kpeɔ yɛ lɛ. Akɛ mi tsɔɔ Alma Preciosa Villarin, ni ale lɛ hu akɛ “Precious,” ni miisɔmɔ akɛ be fɛɛ sɔɔlɔ yɛ nakai asafo lɛ mli lɛ. Eyɛ mli akɛ no mli lɛ minyɛko majie susumɔi ni ejaaa ni mihiɛ yɛ Odasefoi lɛ ahe lɛ fɛɛ moŋ, shi mikpɛlɛ akɛ ekɛ mi akase Biblia lɛ.

Minyɛmi yoo lɛ to etsui shi waa kɛtsɔɔ mi Biblia mli anɔkwalei lɛ. Mina nakai tsuishitoo lɛ nɔŋŋ eko yɛ Precious he. Eyɛ mli akɛ no mli lɛ, mimli fuɔ lɛ, mikɛ lɛ taa saji anaa, ni be komɛi po lɛ migbee yaa ŋwɛi, ni mimaa nɔ mi doo akɛ nibii komɛi ni atsɔɔ mi yɛ sɔlemɔ lɛ ja moŋ, shi eye ebua mi waa ni minu Biblia lɛ shishi. Bɔ ni Precious kɛ Odasefoi krokomɛi lɛ ná mihe miishɛɛ, amɛba  amɛhe shi, ni amɛjie mlijɔlɛ kpo lɛ ta mitsuiŋ waa. Enɛ ha misumɔ akɛ masɔmɔ Yehowa.

Yɛ July 1995 mli lɛ, mina akɛ kɛ́ masa Nyɔŋmɔ hiɛ lɛ, belɛ nɔ ko bɛ ni mafee akɛ ja mishi osɔfoyeli lɛ. Mɛni hewɔ? Kpojiemɔ 18:4 lɛ wieɔ apasa jamɔ he yɛ mfonirifeemɔŋ akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ní nyɛkaná ehaomɔi lɛ eko.” Te mafee tɛŋŋ maná shika kɛkwɛ mihe? Hebribii 13:5 lɛ ha mile akɛ, kɛ́ wɔfee Nyɔŋmɔ suɔmɔnaa nii lɛ, ewoɔ wɔ shi akɛ: “Mishiŋo ni misaa mikwaŋo gbi ko gbi ko.”

Eyɛ mli akɛ no mli lɛ, mipapa kɛ minyɛmi nuu lɛ teɔ shi woɔ mi waa moŋ, shi otsii enyɔ dani abaabaptisi mi lɛ, mifee ekãa ni mitee shĩa miyasha nibii fɛɛ ni mikɛtsu nii beni miyeɔ osɔfo lɛ. No sɛɛ lɛ, miyɔse akɛ hewalɛi krɛdɛi komɛi ni akɛha mi be ko lɛ fɛɛ etee. Tsutsu lɛ, kɛ́ mikã shi miwɔ lɛ, minuɔ he akɛ nɔ ko miinyɛ minɔ. Nakai nii lɛ hu tee kwraa. Nɔ ko hu ni tamɔ hɔŋ ni no mli lɛ minaa yɛ misamfɛlɛ lɛ naa lɛ, minaaa dɔŋŋ. Biblia lɛ ni mikase lɛ eha mile akɛ nɔ ni ŋmɛnɛ lɛ mɛi kɛɔ akɛ eji duromɔ keenɔ, tamɔ hewalɛi ni akɛtsaa mɛi lɛ jɛɛɛ Nyɔŋmɔ ŋɔɔ, moŋ lɛ ejɛ mumɔi fɔji aŋɔɔ. Eŋɔɔ minaa waa akɛ miye mihe kwraa kɛjɛ mumɔi fɔji lɛ adɛŋ, tamɔ bɔ nɔŋŋ ni tsulɔ yoo lɛ ye ehe beni Paulo kpɔ̃ lɛ kɛjɛ “klamɔ mumɔ” ko dɛŋ lɛ.—Bɔfoi lɛ Asaji 16:16-18.

Kwɛ miishɛɛ ni miná beni mi kɛ mimami fɛɛ kɛ wɔhe ha koni abaptisi wɔ akɛ Yehowa Odasefoi yɛ September 1996 lɛ! Mibaptisimɔ sɛɛ lɛ, mikɛ mihe wo Yehowa Odasefoi abe fɛɛ sɔɔmɔ nitsumɔ lɛ mli, ni mikɛ afii babaoo sɔmɔ kɛ miishɛɛ yɛ nɛkɛ hegbɛ nɛɛ mli.

Amrɔ nɛɛ mikɛ nuu ko ni atsɛɔ lɛ Silver ebote gbalashihilɛ mli. Wɔmiibɔ mɔdɛŋ waa koni wɔkɛ Biblia mli anɔkwalei lɛ atsɔse wɔbi yoo lɛ. Agbɛnɛ hu, minyɛmimɛi onukpai lɛ ekomɛi hu ebafata wɔhe kɛmiisɔmɔ Yehowa. Edɔɔ mi waa akɛ mihi shi afii babaoo ni mileee Nyɔŋmɔ jogbaŋŋ, shi eŋɔɔ minaa waa akɛ amrɔ nɛɛ mile Nyɔŋmɔ ni mijaa lɛ lɛ.—w12-E 9/1.

[Shishigbɛ niŋmai]

^ kk. 10 Yehowa Odasefoi ji mɛi ni fee, shi amrɔ nɛɛ akpa kalamɔ.

^ kk. 13 Jamɔi komɛi kɛ wiemɔ ni ji “mumɔ lɛ eyi enɔ” loo “mumɔ lɛ eyi minɔ” lɛ tsuɔ nii kɛtsɔɔ hemɔkɛyeli ni amɛyɔɔ akɛ “mumɔ” lɛ kɛ hewalɛ ko baa mɛi ni heɔ yeɔ lɛ anɔ, ni no haa amɛgbeɔ shi lɛ mli.

^ kk. 18 Yehowa Odasefoi ji mɛi ni fee.

[Mfoniri ni yɔɔ baafa 27]

Beni migbe skul naa akɛ osɔfo

[Wiemɔ ni akɔ ni akɛmiitsu nii ni yɔɔ baafa 27]

Mikɛ hewalɛ nɛɛ tsa gbekɛ ko ni atiridii ni naa wa emɔ lɛ

[Mfoniri ni yɔɔ baafa 28]

Precious kɛ mi kase Biblia lɛ

[Wiemɔ ni akɔ ni akɛmiitsu nii ni yɔɔ baafa 28]

Anɔkwalei nɛɛ babɔi mishihilɛ tsakemɔ

[Mfoniri ni yɔɔ baafa 29]

Beni abaptisi mi kɛ mimami lɛ

[Mfoniri ni yɔɔ baafa 29]

Ákɛ Yehowa Odasefoi abe fɛɛ sɔɔlɔ

[Mfoniri ni yɔɔ baafa 29]

Mikɛ miwu, wɔbi yoo lɛ, kɛ miwekumɛi krokomɛi ni ebafata wɔhe yɛ anɔkwa jamɔ mli lɛ

[Wiemɔ ni akɔ ni akɛmiitsu nii ni yɔɔ baafa 29]

Eha miná miishɛɛ waa akɛ makase anɔkwa Nyɔŋmɔ koome lɛ he anɔkwalei lɛ!