Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Hiɛkɔɔ Gbee Gehazi Shi

Hiɛkɔɔ Gbee Gehazi Shi

 Tsɔɔmɔ Obii lɛ Anii

Hiɛkɔɔ Gbee Gehazi Shi

ANI oshwe waa akɛ onine ashɛ nɔ ko nɔ pɛŋ? * Kɛ́ nakai ni lɛ, jeee bo pɛ. Shi, ani esa akɛ oto abla kɛná nɔ ni otaoɔ?— Dabi, esaaa akɛ ofeɔ nakai. Hiɛkɔlɔ pɛ feɔ nakai. Ha wɔkwɛ bɔ ni hiɛkɔɔ gbee nuu ko ni atsɛɔ lɛ Gehazi lɛ shi. No mli lɛ, eji Elisha tsulɔ; Elisha ji Yehowa, anɔkwa Nyɔŋmɔ lɛ gbalɔ.

Elisha kɛ Gehazi hi shi jeeŋmɔ, aaafee afii akpe dani afɔ Yesu Kristo, Nyɔŋmɔ Bi lɛ, yɛ shikpɔŋ lɛ nɔ. Yehowa kɛ Elisha tsu nii kɛfee nibii kpakpai babaoo—naakpɛɛ nibii! Akɛ nɔkwɛmɔnɔ lɛ, Biblia lɛ gbaa wɔ Siria asraafonyo nukpa ko ni ye hela gbonyo ni ji kpiti lɛ he sane. Mɔ ko nyɛɛɛ ehela lɛ atsa, shi Elisha tsaa.

Kɛ́ Nyɔŋmɔ kɛ Elisha tsu nii kɛye ebua mɛi ni amɛhe wa amɛ lɛ, Elisha heee amɛ shika. Ole nɔ hewɔ?— Ejaakɛ Elisha le akɛ Yehowa ji mɔ ni feɔ nakai naakpɛɛ nibii lɛ—jeee lɛ. Beni atsa Naeman lɛ, ená miishɛɛ aahu akɛ esumɔ akɛ eke Elisha shika, jwiɛtɛi, kɛ atadei fɛfɛji. Elisha sumɔɔɔ ni ehé nɔ ko, shi Gehazi miitao nibii nɛɛ waa.

Beni Naeman shi etee lɛ, Gehazi wo foi kɛnyiɛ esɛɛ ni Elisha leee he nɔ ko. Beni eyanina Naeman lɛ, ole nɔ ni Gehazi kɛɛ lɛ?— ‘Elisha tsu mi ni mibakɛɛ bo akɛ ená gbɔi enyɔ amrɔ nɛɛ nɔŋŋ. Eesumɔ ni oha lɛ wulamɔ atadei enyɔ ni ekɛha gbɔi lɛ.’

Shi nɔ ni ewie lɛ ji amale! Gehazi fo sane ni ewie yɛ gbɔi enyɔ nɛɛ ahe lɛ etã. Emale  ejaakɛ eetao ni enine ashɛ atadei ni Naeman ka akɛ ekɛbaaha Elisha lɛ nɔ. Kɛlɛ, Naeman leee enɛ he nɔ ko. No hewɔ lɛ, ená he miishɛɛ waa akɛ ekɛ nikeenii nɛɛ aaaha Gehazi. Naeman ha Gehazi nibii babaoo po fe nɔ ni Gehazi bi lɛ. Ole nɔ ni ba yɛ enɛ sɛɛ?

Beni Gehazi yashɛ shĩa lɛ, Elisha bi lɛ akɛ: ‘Nɛgbɛ otee?’

Gehazi ha hetoo akɛ: ‘Oo, miyako he ko he ko.’ Shi no mli lɛ, Yehowa eha Elisha ele nɔ ni Gehazi eyafee lɛ. No hewɔ lɛ, Elisha kɛɛ lɛ akɛ: ‘Jeee be ni akɛheɔ shika kɛ atadei nɛ!’

Gehazi eyaŋɔ shika kɛ atadei ni jeee enɔ. No hewɔ lɛ, Nyɔŋmɔ ha Naeman kpiti lɛ shwie Gehazi. Mɛni osusuɔ akɛ wɔbaanyɛ wɔkase yɛ enɛ mli?— Nɔ kome ni wɔkaseɔ yɛ mli ji akɛ esaaa akɛ wɔmaleɔ loo wɔfoɔ saji wɔtãa.

Mɛni hewɔ Gehazi fo sane, ni yɛ faŋŋ mli lɛ eji amale, etã lɛ?— Ejaakɛ Gehazi hiɛ kɔɔ nii anɔ. Eetao ená nɔ ko ni jeee enɔ, ni emale koni enine ashɛ nɔ. Enɛ ha eye hela gbonyo nɛɛ ewala gbii abɔ fɛɛ.

Anɔkwa, Gehazi na nɔ kwraa fe kpiti ni shwie lɛ lɛ. Ole nɔ ni fe kpiti ni shwie lɛ lɛ?— No ji Nyɔŋmɔ hiɛ duromɔ, esuɔmɔ ni bɔ lɛ lɛ. Ekaba akɛ wɔbaafee nɔ ko ni baaha enɛ abɔ wɔ! No najiaŋ lɛ, esa akɛ wɔmli ahi, ni wɔkɛ mɛi aja nibii ni wɔyɔɔ lɛ.—w12-E 9/1.

Kanemɔ yɛ obiblia lɛ mli

2 Maŋtsɛmɛi 5:5, 20-27; Yuda 21

Yohane 15:10

[Shishigbɛ niŋmaa]

^ kk. 3 Kɛji okɛ gbekɛ ko miikane sane nɛɛ, liamɔ ni yɔɔ mli lɛ ji kaimɔnɔ ni tsɔɔ akɛ esa akɛ omi osɛŋ nu fioo, koni owo gbekɛ lɛ hewalɛ ni lɛ hu etsɔɔ ejwɛŋmɔ.