Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Egbele Mihiŋmɛi

Yehowa Egbele Mihiŋmɛi

 Yehowa Egbele Mihiŋmɛi

Mɔ ni gba ji Patrice Oyeka

No mli lɛ hulu miihe anyɔ shi. Mihi shi gbi kome ekoŋŋ ní minaaa nɔ ko naa—mishwila, ni mihe efee shoo kɛta redio ko he miibo nɔ fɛɛ nɔ ni afeɔ lɛ toi—ni mikpɛ miyiŋ akɛ magbe mihe ejaakɛ minii yɛ mɔbɔ. Mitsɔ tsofa ko ní ebɔɔ yɔɔ mli miwo nu kɛ kɔɔpoo ni ma okpɔlɔ lɛ nɔ yɛ mihiɛ lɛ mli. Mite shi akɛ miyaju mihe naagbee nɔ, ni masaa mihe fɛfɛo dani manu ebɔɔ lɛ koni magbo. Mɛni hewɔ mitao akɛ magbe mihe lɛ? Ni te fee tɛŋŋ ni miyɔɔ wala mli lolo ni migbaa sane nɛɛ?

AFƆ mi February 2, 1958, yɛ Kasaï Oriental kpokpaa lɛ nɔ yɛ Democratic Republic of the Congo. Mipapa gbo beni miye afii nɛɛhu, ni minyɛmi nuu nukpa ji mɔ ni kwɛ mi.

Beni migbe skul naa lɛ, miná nitsumɔ yɛ amã tsei ŋmɔ ko mli. Gbi ko leebi yɛ afi 1989 mli beni miiŋmala minitsumɔ lɛ he nibii komɛi yɛ ɔfis lɛ, shi kome too beni mana lɛ, mihiɛ ewo duŋ kwraa. Misusu akɛ agbe kane, shi minu akɛ tsɔne ni haa sarawa hewalɛ lɛ miigbɛɛ lolo, ni jeŋ hu etsɛre! Mitsui fã waa, ni miyɔse akɛ minaaa nɔ ko nɔ ko, ni wolo ni kã mihiɛ lɛ po minaaa!

Nɔŋŋ kɛkɛ ni mitsɛ mɛi ni tsuɔ nii yɛ mishishi lɛ ateŋ mɔ kome koni ekɛ mi ayana datrɛfonyo ni yɔɔ helatsamɔhe lɛ. Datrɛfonyo lɛ kɛɛ akɛ mi ayana datrɛfonyo ko ni he esa yɛ maŋtiase lɛ mli. Ena akɛ mihiŋmɛiiaŋ fãji lɛ ekomɛi etserɛ ni nɔ ni feɔ mi lɛ yɛ hiɛdɔɔ waa, no hewɔ lɛ ekɛ mi tee Kinshasa, ni ji maŋtiase lɛ.

Kinshasa Shihilɛ

Miyana hiŋmɛi datrɛfoi babaoo yɛ Kinshasa, shi amɛteŋ mɔ ko kwraa nyɛɛɛ atsa mi. Beni mihi helatsamɔhe lɛ gbii 43 sɛɛ lɛ, datrɛfoi lɛ ha mile akɛ minyɛŋ mana nii dɔŋŋ miwala gbii abɔ fɛɛ! Miwekumɛi kɛ mi tee sɔlemɔi srɔtoi amli akɛ aleenɔ abaanyɛ afee naakpɛɛ nii ko lo, shi fɛɛ lɛ, yɔɔyi.

Naagbee lɛ, mimu sane naa akɛ minaŋ nii dɔŋŋ. Mishihilɛ fɛɛ etsɔ haomɔ sɔŋŋ. Mihiŋmɛi enaaa nii, minitsumɔ eŋmɛɛ mi. Miŋa hu shi mi, ni eloo nɔ fɛɛ nɔ ni wɔyɔɔ yɛ shĩa lɛ kɛtee. Efee mi hiɛgbele akɛ maje kpo, loo mikɛ mɛi abɔ. Mitse mihe yɛ mɛi ahe, ni be fɛɛ be lɛ mikome too mihɔɔ shi yɛ shĩa. Mibatsɔ mɔ kome mɔ, ni minu he akɛ mibɛ nɔ ko mli.

Mika mihe gbee shii enyɔ sɔŋŋ. Nɔ ni tĩa enyɔ nɔ lɛ ji nɔ ni miwie he yɛ sane nɛɛ shishijee gbɛ lɛ. Gbekɛ nuu fioo ko ni yɔɔ weku lɛ mli ji mɔ ni here miyiwala. Beni mijuɔ mihe lɛ, ewo kɔɔpoo lɛ ni etsi nɔ ni yɔɔ mli lɛ eshwie ní ejeee gbɛ. Duromɔ naa lɛ, enuuu nɔ ni yɔɔ mli lɛ. Shi edɔ mi waa akɛ minaaa kɔɔpoo lɛ. Kɛkɛ ni mikɛɛ miwekumɛi lɛ nɔ hewɔ ni mitaoɔ kɔɔpoo lɛ, kɛ nɔ ni kulɛ mito akɛ mafee.

Miida Nyɔŋmɔ kɛ miwekumɛi lɛ ashi akɛ amɛha amɛhiŋmɛi hi mihe. Mɔdɛŋ ni mibɔ akɛ magbe mihe lɛ fɛɛ eyayeee omanye.

 Miná Miishɛɛ yɛ Shihilɛ mli Ekoŋŋ

Be ko Hɔgbaa yɛ afi 1992 mli beni mita shĩa ni miishɛre zigareti lɛ, Yehowa Odasefoi enyɔ komɛi ní miishiɛ yɛ shĩa kɛ shĩa lɛ ba miŋɔɔ. Be ni amɛyɔse akɛ mishwila lɛ, amɛkane Yesaia 35:5 lɛ amɛtsɔɔ mi. Jɛmɛ kɛɔ akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii.” Beni minu wiemɔi nɛɛ lɛ, mitsui nyɔ mimli waa! Odasefoi lɛ wooo mi shi akɛ amɛbaatsa mi yɛ naakpɛɛ gbɛ nɔ tamɔ bɔ ni sɔlemɔi ni mitee lɛ fee lɛ. Moŋ lɛ, amɛgbala mli amɛtsɔɔ mi akɛ manyɛ mana nii ekoŋŋ yɛ jeŋ hee ni Nyɔŋmɔ ewo he shi lɛ mli kɛ́ mikase Nyɔŋmɔ he nii. (Yohane 17:3) Amrɔ nɔŋŋ lɛ miha Odasefoi lɛ kɛ mi bɔi Biblia lɛ kasemɔ. Amɛkɛ mi kase Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ. Mibɔi asafoŋ kpeei ni afeɔ yɛ Maŋtsɛyeli Asa ni yɔɔ he ni wɔyɔɔ lɛ yaa, ni mifee tsakemɔi yɛ mishihilɛ mli. Mikpa zigareti shɛremɔ.

Shi, mishwilamɔ lɛ haaa maya mihiɛ yɛ mumɔŋ oyayaayai. No hewɔ lɛ, mitee shwilafoi askul koni mayakase Braille kanemɔ kɛ eŋmaa. Enɛ ha minyɛ mikɛ mihe wo tsɔsemɔ ni akɛhaa yɛ Maŋtsɛyeli Asa lɛ nɔ lɛ mli. Etsɛɛɛ ni mibɔi shiɛmɔ yɛ mikutso lɛ mli. Mibɔi miishɛɛ namɔ yɛ shihilɛ mli ekoŋŋ. Mitee hiɛ ni mijɔɔ miwala nɔ miha Yehowa. Abaptisi mi May 7, 1994.

Beni suɔmɔ ni miyɔɔ kɛha Yehowa kɛ adesai lɛ yaa nɔ emli waa lɛ, miná shwelɛ akɛ mikɛ mibe fɛɛ baashiɛ. Kɛjɛ December 1, 1995 lɛ, mibatsɔ daa gbɛgbalɔ, ni tsɔɔ akɛ mikɛ mibe fɛɛ shiɛɔ. Miná hegbɛ kpele hu akɛ miisɔmɔ akɛ asafoŋ onukpa yɛ misafo lɛ mli kɛjɛ February 2004. Bei komɛi lɛ, afɔ̃ɔ mi nine ni miyahaa Biblia mli wiemɔi yɛ asafoi krokomɛi amli yɛ he ni miyɔɔ lɛ niiaŋ. Jɔɔmɔi nɛɛ fɛɛ haa mináa miishɛɛ waa, ni ehaa miyɔseɔ akɛ kɛ́ wɔje kpa tete po lɛ, no nyɛŋ atsĩ wɔnaa koni wɔkasɔmɔ Yehowa Nyɔŋmɔ.

Yehowa Eha Mi “Hiŋmɛi”

Taakɛ mitsĩ tã kɛtsɔ lɛ, miŋa shi mi ejaakɛ mishwila. Shi miná jɔɔmɔ kroko hu kɛjɛ Yehowa dɛŋ. Kɛ́ makɛɛ lɛ, eha mi hiŋmɛi koni mikɛna nii. Anny Mavambu kɛ mi hi shi akɛ ewu yɛ mikpajee lɛ fɛɛ sɛɛ, ni lɛ ebatsɔ mihiŋmɛi. Akɛ ni lɛ hu eji be fɛɛ shiɛlɔ hewɔ lɛ, ekɛ mi yaa shiɛmɔ be fɛɛ be. Agbɛnɛ hu ekaneɔ woji ni esa akɛ makwɛ mli kɛha Biblia mli wiemɔi lɛ amli ehaa mi koni manyɛ maŋma yɛ Braille mli. Yoo nɛɛ ji jɔɔmɔ diɛŋtsɛ kɛha mi. Eha mina bɔ ni wiemɔi ni yɔɔ Abɛi 19:14 lɛ ji anɔkwale ha, akɛ: “Shĩa kɛ nii lɛ, tsɛmɛi agboshinii ni; shi ŋa hiɛtɛlɔ lɛ, Yehowa ŋɔɔ jɛɔ.”

Agbɛnɛ hu, Yehowa kɛ bii enyɔ—nuu kome kɛ yoo kome—ejɔɔ mi kɛ Anny. Miishwe waa akɛ mana amɛhiɛ yɛ Paradeiso! Jɔɔmɔ kroko ni miná ji akɛ minyɛmi nuu nukpa, ni ha wɔbahi eshikpɔŋ lɛ nɔ lɛ hu kpɛlɛ Biblia mli anɔkwale lɛ nɔ ni abaptisi lɛ! Wɔ fɛɛ wɔyɛ asafo kome mli.

Eyɛ mli akɛ mihiŋmɛi eshwila moŋ, shi mishwelɛ ji akɛ mafee babaoo yɛ Nyɔŋmɔ sɔɔmɔ mli ejaakɛ ejɔɔ mi waa. (Maleaki 3:10) Daa gbi lɛ, misɔleɔ koni Nyɔŋmɔ Maŋtsɛyeli lɛ aba ni ebajie nɔnai fɛɛ kɛjɛ shikpɔŋ lɛ nɔ. Kɛjɛ beni mibale Yehowa nɛɛ, manyɛ makɛɛ yɛ anɔkwale mli akɛ: “Yehowa jɔɔmɔ lɛ, no feɔ mɔ niiatsɛ; shi deŋmegbomɔ nyɛŋ ekɛ nɔ ko afata he.”—Abɛi 10:22.—w12-E 06/1.

[Mfonirii ni yɔɔ baafa 15]

Miiha Biblia mli wiemɔ; mi kɛ miweku lɛ kɛ minyɛmi nuu lɛ