Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Obaanyɛ Okpɛ Yiŋ ni Baaha Oye Omanye Wɔsɛɛ​—Mɛɛ Gbɛ Nɔ?

Obaanyɛ Okpɛ Yiŋ ni Baaha Oye Omanye Wɔsɛɛ​—Mɛɛ Gbɛ Nɔ?

 Obaanyɛ Okpɛ Yiŋ ni Baaha Oye Omanye Wɔsɛɛ​—Mɛɛ Gbɛ Nɔ?

MƐƐ gbɛ nɔ oootsɔ okpɛ yiŋ ni baaha oye omanye yɛ shihilɛ mli? Gbɛ kome ji, ni okɛ nyɛmɔ ni oyɔɔ lɛ baatsu nii kɛsusu nɔ ni baajɛ yiŋ ni okpɛɔ amrɔ nɛɛ mli kɛba wɔsɛɛ lɛ he.

Anɔkwa sane ji akɛ, ekolɛ ebaawa kɛha bo akɛ obaakpɛ yiŋ ni obaaná he sɛɛ owala gbii abɔ fɛɛ. Mɛni hewɔ? Ejaakɛ mɛi babaoo ni yɔɔ ŋmɛnɛ lɛ sumɔɔ ni amɛnine ashɛ nibii ni amɛtaoɔ lɛ anɔ oya nɔŋŋ. Akɛ nɔkwɛmɔnɔ lɛ, ekolɛ oyɔse akɛ, kɛ́ okɛ Biblia mli ŋaawoo tsu nii lɛ, ebaakpɛ oweku lɛ, ni ebaaha miishɛɛ ahi mli. (Efesobii 5:22–6:4) Shi nakai feemɔ baabi ni daa nɛɛ oná be oha oweku lɛ, ni nakai beaŋ nɔŋŋ lɛ okwɛ jogbaŋŋ koni nitsumɔ kɛ hiɛtserɛjiemɔ akahé oshihilɛ fɛɛ. Taakɛ eji yɛ shihilɛi gbɛi babaoo amli lɛ, ebaabi ni ohala kɛji oosumɔ ni oye be kukuoo mli ŋɔɔmɔ loo oshihilɛ ahi wɔsɛɛ. Te ooofee tɛŋŋ oná ekãa ni okɛaakpɛ yiŋ ni ja? Okɛ gbɛtsɔɔmɔi ejwɛ ni nyiɛ sɛɛ nɛɛ atsu nii.

1 Susumɔ nɔ ni Baajɛ Oyiŋkpɛi lɛ Amli Kɛba lɛ He

Kɛ́ ehe bahia ni okpɛ yiŋ ko lɛ, susumɔ nɔ ni baajɛ mli kɛba lɛ he jogbaŋŋ diɛŋtsɛ. Biblia lɛ woɔ ŋaa akɛ: “Hiɛtɛ̃lɔ naa efɔŋ ní baa, ni eteɔ ehe.” (Abɛi 22:3) Kɛ́ osusu nibii ni baanyɛ ajɛ mli kɛba lɛ ahe jogbaŋŋ lɛ, ekã shi faŋŋ akɛ no baatsirɛ bo ni okpoo yiŋkpɛɛ ni baanyɛ afee oshara aha bo lɛ. Nakai nɔŋŋ kɛ́ osusu wɔsɛɛ sɛɛnamɔi ni baanyɛ ajɛ yiŋkpɛɛ ni ja lɛ mli kɛba lɛ ahe lɛ, no baatsirɛ bo ni okpɛ yiŋ ni ja.

Bi ohe akɛ: ‘Mɛni baajɛ yiŋ ni mikpɛɔ lɛ mli kɛba biɛ afi kome, afii 10 loo 20 mli? Te ebaasa mihenumɔŋ kɛ migbɔmɔtsoŋ hewalɛnamɔ he eha tɛŋŋ? Te miyiŋkpɛɛ lɛ baasa miweku lɛ, kɛ mɛi krokomɛi ni misumɔɔ lɛ ahe eha tɛŋŋ?’ Nɔ ni he hiaa fee fɛɛ lɛ, bi ohe akɛ: ‘Ani yiŋ ni mikpɛɔ lɛ baasa Nyɔŋmɔ hiɛ lo? Te ebaasa mikɛ lɛ teŋ naanyobɔɔ lɛ he eha tɛŋŋ?’ Akɛni ajɛ Nyɔŋmɔ mumɔ lɛŋ aŋma Biblia lɛ hewɔ lɛ, ebaanyɛ eye ebua bo koni ona nibii ni saa ehiɛ, ni ebaaha ona osharai komɛi ni kulɛ obaaku ohiɛ oshwie nɔ lɛ.—Abɛi 14:12; 2 Timoteo 3:16.

2 Bo Diɛŋtsɛ Pɛimɔ Nibii ni Oyɔɔ Hegbɛ akɛ Ohalaa Mli lɛ Amli

Nɔ najiaŋ ni mɛi baakpɛ amɛ diɛŋtsɛ amɛyiŋ lɛ, amɛkɔɔ gbɛ ni mɛi krokomɛi ni ebɔle amɛ lɛ ekɔ lɛ nɔŋŋ. Shi jeee gbɛ ni mɛi babaoo kɔɔ lɛ tsɔɔ akɛ no baaha aye omanye. Bo diɛŋtsɛ pɛimɔ nibii ni oyɔɔ hegbɛ akɛ ohalaa mli lɛ amli. Akɛ nɔkwɛmɔnɔ lɛ, susumɔ Natalie * he okwɛ. Etsɔɔ mli akɛ: “No mli lɛ miitao gbãla kpakpa. Shi miyɔse akɛ bɔ ni mibaa mijeŋ lɛ haŋ maná gbãla ni tamɔ nakai. Beni miyɔɔ kɔleji lɛ, minanemɛi lɛ fɛɛ ji oblahii kɛ oblayei ni le nii jogbaŋŋ. Kɛlɛ, be fɛɛ be lɛ, amɛkpɛɛɛ yiŋ ni ja yɛ amɛshihilɛ mli. Amɛtsakeɔ jɔlemɛi be fɛɛ be. No mli lɛ, mihu miyɛ jɔlemɛi tamɔ amɛ nɔŋŋ. Shihilɛ nɛɛ ha mihao waa.”

Natalie ha Yehowa Odasefoi kɛlɛ bɔi Biblia lɛ kasemɔ. Ekɛɛ akɛ, “Mina oblahii kɛ oblayei ni yɔɔ miishɛɛ kɛ gbalashihilɛi hu ni miishɛɛ yɔɔ mli yɛ Yehowa Odasefoi lɛ ateŋ. Tsɛ mináaa lɛ mlɛo moŋ, shi fiofio lɛ, mitsake misubaŋ kɛ bɔ ni mihiɔ shi mihaa.” Mɛni jɛ mli kɛba? Natalie kɛɛ, “No mli lɛ, nɔ ni kã mitsui nɔ waa ji ni  mikɛ nuu ko ni misumɔɔ lɛ waa abote gbãla mli. Yɛ be ni sa mli lɛ, mikɛ nuu ko ni mikɛ lɛ fɛɛ hiɛ hemɔkɛyeli kome lɛ bote gbalashihilɛ mli. Minuɔ he akɛ Nyɔŋmɔ eha mi gbalashihilɛ kpakpa ni hi kwraa fe nɔ ni mikpa gbɛ lɛ.”

3 Susumɔ Bɔ ni Yiŋ ni Okpɛɔ Amrɔ Nɛɛ Baasa Oshihilɛ He Wɔsɛɛ lɛ He

Bɔni afee ni okakpɛ yiŋ ni onaŋ he sɛɛ wɔsɛɛ lɛ, ehe baahia ni osusu bɔ ni obaasumɔ ni oshihilɛ aji wɔsɛɛ lɛ he, ni oto gbɛjianɔ ni baaha onyɛ oshɛ he. (Abɛi 21:5) Kaadamɔ adesa wala ni ji afii 70 loo 80 lɛ pɛ kɛkɛ nɔ okpɛ oyiŋ. Moŋ lɛ, feemɔ ohe mfoniri akɛ ooná wɔsɛɛ shihilɛ ni baŋ naagbee ni Biblia lɛ wieɔ he lɛ mli ŋɔɔmɔ.

Biblia lɛ tsɔɔ mli akɛ, Nyɔŋmɔ etsɔ Kristo Yesu kpɔ̃mɔ afɔleshãa lɛ nɔ eto gbɛjianɔ ni baaha adesai aná naanɔ wala. (Mateo 20:28; Romabii 6:23) Nyɔŋmɔ ewo shi akɛ etsɛŋ ni eyiŋtoo kɛha adesai kɛ shikpɔŋ lɛ baaba mli. Mɛi ni sumɔɔ Nyɔŋmɔ lɛ baaná hegbɛ kɛhi shi kɛya naanɔ yɛ shikpɔŋ ni afee lɛ ehee lɛ nɔ. (Lala 37:11; Kpojiemɔ 21:3-5) Obaanyɛ oná nakai wɔsɛɛ shihilɛ lɛ kɛ́ okpɛ yiŋ ni ja amrɔ nɛɛ.

4 Bɔɔ Mɔdɛŋ ni Oshɛ Otii ni Okɛmamɔ Ohiɛ lɛ Ahe

Te ooofee tɛŋŋ oná nakai wɔsɛɛ shihilɛ lɛ mli gbɛfaŋnɔ? Jee shishi okase Nyɔŋmɔ he anɔkwa nilee. (Yohane 17:3) Biblia mli anɔkwa nilee baaha oná hekɛnɔfɔɔ akɛ Nyɔŋmɔ shiwoo ni kɔɔ wɔsɛɛ be he lɛ baaba mli anɔkwale. Hemɔkɛyeli ni tamɔ nakai lɛ baatsirɛ bo koni ofee tsakemɔi ni baaha oná Nyɔŋmɔ nɔkpɛlɛmɔ.

Susumɔ Michael niiashikpamɔ lɛ he okwɛ. Ewie akɛ: “Mibɔi dãa tɔɔ kɛ tsofai kɛnitsumɔ bɔ ni esaaa be ni miye afii 12 lɛ. Mikɛ mihe bɔ kuu ko, ni misusu akɛ magbo dani maye afii 30. Bɔ ni mimli fuɔ sɔŋŋ kɛ bɔ ni mihaoɔ lɛ ha mika shii abɔ akɛ magbe mihe. No mli lɛ mináa hiɛnɔkamɔ akɛ jeee shihilɛ lɛ fɛɛ nɛ, shi mileee bɔ ni mafee ni maná shihilɛ kpakpa.” Beni Michael yɔɔ sɛkɛndre skul lɛ, Yehowa Odasefoi kɛ ekuu lɛ mlinyo ko bɔi Biblia lɛ kasemɔ. Michael hu kpɛlɛ ni akɛ lɛ akase Biblia lɛ.

Nɔ ni Michael kase yɛ Biblia lɛ mli lɛ tsake bɔ ni esusuɔ ewɔsɛɛ he ehaa lɛ. Ewie akɛ, “Mikase akɛ wɔsɛɛ ko lɛ, abaafee shikpɔŋ lɛ paradeiso ekoŋŋ, ni gbɔmɛi baahi shi yɛ toiŋjɔlɛ mli, amɛfeŋ yeyeeye. Enɛ bafee shihilɛ ni mikpaa gbɛ. Mikɛfee oti ni ma mihiɛ akɛ maha naanyobɔɔ kpakpa abakã mi kɛ Yehowa teŋ. Kɛlɛ, jeee be fɛɛ be minyɛɔ mifeɔ nɔ ni saa Yehowa hiɛ. Be ni mibɔi Biblia lɛ kasemɔ po sɛɛ lɛ, mitɔɔ dãa bei komɛi. Mi kɛ oblayoo ko po yaná nɔ ko feemɔ.”

Te Michael fee tɛŋŋ eye gbɛtsĩi nii nɛɛ anɔ ni enyɛ efee tsakemɔi yɛ eshihilɛ mli lɛ? Ekɛɛ akɛ: “Mɔ ni kɛ mi kaseɔ Biblia lɛ wo mi hewalɛ akɛ daa gbi lɛ, mikane Biblia lɛ fã ko, ní mikɛ mɛi ni sumɔɔ akɛ amɛsa Nyɔŋmɔ hiɛ lɛ abɔ. Miyɔse akɛ mɛi ni yɔɔ kuu ni mikɛbɔɔ lɛ mli lɛ miiná minɔ hewalɛ lolo. Eyɛ mli akɛ amɛkɛ mi yɛ tamɔ weku moŋ, shi mikɛ amɛ fo tako mli.”

Michael kɛ otii ni ebaanyɛ eshɛ he be kukuoo mli lɛ mamɔ ehiɛ, ni efee nibii ni he hiaa jogbaŋŋ ni baaye abua lɛ koni enyɛ eshɛ oti ni fe fɛɛ akɛ ebaaha eshihilɛ kɛ Nyɔŋmɔ taomɔ nii lɛ akpã gbee lɛ he. Bo hu obaanyɛ ofee nakai. Ŋmaa oti ni ebaahe bo be saŋŋ dani onyɛ oshɛ he lɛ, kɛ nibii ni baaye abua bo ni oshɛ he lɛ oshwie shi. Okɛ mɛi ni baaye abua bo kɛshɛ oti lɛ he lɛ agba he sane, ni oha amɛkwɛ bɔ ni oyaa nɔ ohaa.

Kaatsi Nyɔŋmɔ he nilee ni obaakase kɛ egbɛtsɔɔmɔi ni okɛbaatsu nii yɛ oshihilɛ mli lɛ oto sɛɛ. Feemɔ nibii amrɔ nɛɛ ni baaha suɔmɔ ni oyɔɔ kɛha Nyɔŋmɔ kɛ e-Wiemɔ ni ji Biblia lɛ mli awa. Nyɔŋmɔ Wiemɔ lɛ wie yɛ mɔ ni kɛ Biblia mli shishitoo mlai tsuɔ nii lɛ he akɛ: “Nɔ fɛɛ nɔ ni efeɔ lɛ shwereɔ [loo eyeɔ omanye].”—Lala 1:1-3.—w12-E 05/1.

[Shishigbɛ niŋmaa]

^ kk. 8 Atsake gbɛi lɛ ekomɛi yɛ sane nɛɛ mli.