Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Ani Biblia lɛ Gbaa Nibii ni Baaba Wɔsɛɛ?

Ani Biblia lɛ Gbaa Nibii ni Baaba Wɔsɛɛ?

 Kasemɔ Nii Kɛjɛ Nyɔŋmɔ Wiemɔ Lɛŋ

Ani Biblia lɛ Gbaa Nibii ni Baaba Wɔsɛɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Ani Biblia lɛ gbaa bɔ ni nibii baaba lɛ aha fitsofitso?

Nyɔŋmɔ Ofe lɛ pɛ baanyɛ ale nɔ ni baaba wɔsɛɛ. (Amos 3:7) Ákɛ nɔkwɛmɔnɔ lɛ, kɛjɛ blema beebe ni egba akɛ mɔ ko ni atsɛɔ lɛ Mesia, loo Kristo baaba. Mesia lɛ baajɛ anɔkwafo Abraham seshi lɛ mli. Ebaatsɔ nɔyelɔ, ni ebaaha adesai ni boɔ Nyɔŋmɔ toi lɛ anyɛ aná wala ni eye emuu ekoŋŋ, ni hela mɔŋ amɛ. (1 Mose 22:18; Yesaia 53:4, 5) Awo shi akɛ Mɔ nɛɛ baajɛ Betlehem.—Kanemɔ Mika 5:1.

Ebafee faŋŋ akɛ Yesu ji Mesia lɛ lɛɛlɛŋ. Biblia lɛ gba nɔ ni fe afii 700 kɛtsɔ hiɛ akɛ, oblayoo fro ko baafɔ́ Mesia lɛ, ni mɛi baagbe Mesia lɛ he guɔ. Ekɛ ewala baaha yɛ mɛi babaoo ahe eshai ahewɔ, ni abaafũ lɛ yɛ niiatsɛmɛi ateŋ. (Yesaia 7:14; 53:3, 9, 12) Biblia lɛ hu tsɔ hiɛ egba nɔ ni fe afii 500 akɛ, ebaata teji nɔ kɛbote Yerusalem, ni abaatsɔɔ esɛɛgbɛ ahe jwiɛtɛi kukuji 30. Nɔ fɛɛ nɔ ni awie lɛ ba mli fitsofitso.—Kanemɔ Zakaria 9:9; 11:12.

2. Ani Nyɔŋmɔ tsɔɔ be pɔtɛɛ ni nɔ ko baaba?

Biblia lɛ gba afi pɔtɛɛ nɔ ni Mesia lɛ baapue, nɔ ni fa fe afii 500 kɛtsɔ hiɛ. Abu be ni Mesia lɛ kɛbaapue lɛ yɛ okadifeemɔŋ otsii amli, ni otsi lɛ mli gbi fɛɛ gbi damɔ shi kɛha afi kome, ni tsɔɔ akɛ “otsi” kome feɔ afii kpawo. Otsii ni damɔ shi kɛha afii nɛɛ ekomekomei 7 kɛ 62, ní fɛɛ feɔ otsii 69 lɛ baaho. Enɛ feɔ afii 483. Mɛɛ be afii nɛɛ je shishi? Biblia lɛ tsɔɔ akɛ, be nɛɛ je shishi beni Nyɔŋmɔ tsulɔ Nehemia yashɛ Yerusalem ni ebɔi maŋ lɛ tswaa ekoŋŋ lɛ. Persiabii ayinɔsane tsɔɔ akɛ enɛ ba yɛ afi 455 D.Ŋ.B. (Nehemia 2:1-5) No sɛɛ afii 483 lɛ, abaptisi Yesu akɛ Mesia lɛ yɛ afi 29 Ŋ.B., yɛ be ni atsɔɔ lɛ naa pɛpɛɛpɛ.—Kanemɔ Daniel 9:25.

  3. Ani Biblia Gbalɛi Miiba mli Amrɔ Nɛɛ?

Yesu gba nibii ni sa kadimɔ waa ni baaya nɔ yɛ wɔbei nɛɛ amli. Egbalɛ lɛ tsĩ Nyɔŋmɔ Maŋtsɛyeli lɛ he sanekpakpa ni baaha adesai ni yɔɔ jeŋ fɛɛ ni sumɔɔ Nyɔŋmɔ lɛ ahe ajɔ amɛ lɛ tã. Maŋtsɛyeli lɛ kɛ nibii agbɛjianɔtoo fɔŋ ni wɔyɔɔ mli nɛɛ fɛɛ baaba naagbee.—Kanemɔ Mateo 24:14, 21, 22.

Biblia gbalɛi tsɔɔ bɔ ni nibii baaya nɔ aha yɛ nibii agbɛjianɔtoo nɛɛ naagbee be lɛ mli lɛ fitsofitso. Biblia lɛ tsɔɔ akɛ, yɛ hiɛ ni atee yɛ shihilɛ mli lɛ fɛɛ sɛɛ lɛ, adesai baaya nɔ afite shikpɔŋ lɛ. Haomɔi ni tai, hɔji, shikpɔŋhosomɔi, kɛ gbele helai kɛbaa lɛ baafa babaoo. (Luka 21:11; Kpojiemɔ 11:18) Mɛi ajeŋba baakpɔtɔ kwraa. Yɛ bei ni jaraa waa nɛɛ mli lɛ, Yesu sɛɛnyiɛlɔi lɛ baashiɛ Nyɔŋmɔ Maŋtsɛyeli lɛ he sanekpakpa lɛ yɛ je lɛŋ fɛɛ.—Kanemɔ Mateo 24:3, 7, 8; 2 Timoteo 3:1-5.

4. Mɛni Baaba Adesai Anɔ Wɔsɛɛ?

Nyɔŋmɔ Ofe lɛ yɛ nibii kpakpai kɛha adesai ni yeɔ lɛ anɔkwa lɛ. Yesu Kristo ni ji Mesia lɛ, kɛ mɛi ni ahala afata ehe lɛ baaye shikpɔŋ lɛ nɔ kɛjɛ ŋwɛi. Amɛji mɛi ni feɔ Maŋtsɛyeli nɔyeli ni baaye nɔ afii akpe lɛ. Abaatee gbohii lɛ ashi, ni amɛbaanyɛ amɛná hegbɛ kɛhi shi kɛya naanɔ. Kɛfata he lɛ, Maŋtsɛyeli lɛ baatsa mɛi fɛɛ ni yɔɔ shihilɛ mli nakai beaŋ lɛ. Hela kɛ gbele bɛ dɔŋŋ.—Kanemɔ Kpojiemɔ 5:10; 20:6, 12; 21:4, 5.—w12-E 01/1.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? baafa 23-25 kɛ 197-201 lɛ mli.