Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Biblia lɛ Tsakeɔ Mɛi

Biblia lɛ Tsakeɔ Mɛi

 Biblia lɛ Tsakeɔ Mɛi

MƐNI tsirɛ nuu ko ní kplaŋ kɛjɛ Nyɔŋmɔjamɔ ní akɛtsɔse lɛ lɛ he lɛ ni eku esɛɛ kɛba ekoŋŋ? Te fee tɛŋŋ ni oblanyo ko ná tsɛ ni baasumɔ lɛ ní etao ewala beaŋ fɛɛ lɛ? Kanemɔ nɔ ni mɛi nɛɛ yɔɔ kɛɛmɔ lɛ.

“Esa Akɛ Maku Sɛɛ Kɛba Yehowa Ŋɔɔ.”—ELIE KHALIL

BE NI AFƆ LƐ: 1976

MAŊ NƆ NI EJƐ: CYPRUS

MƆ NI EJI TSUTSU: BI NYENYEŊTSWI

MITSUTSU SHIHILƐ: Afɔ mi yɛ Cyprus, shi mida yɛ Australia. Mifɔlɔi ji Yehowa Odasefoi, ni amɛfee bɔ fɛɛ bɔ ni amɛbaanyɛ koni amɛdũ suɔmɔ kɛha Yehowa, kɛ e-Wiemɔ ni ji Biblia lɛ amɛwo mimli. Shi beni mishɛ afii 13 kɛmiimɔ afii 19 afii lɛ amli lɛ, mibɔi atua tsemɔ. Mijuɔ shi kɛjeɔ kpo gbɛkɛgbɛkɛ ni mikɛ oblahii kɛ oblayei krokomɛi yakpeɔ. Wɔjuɔ mɛi atsɔji, ni enɛ ha wɔná naagbai krokomɛi babaoo.

Shishijee mli lɛ, akɛni mishe gbeyei akɛ mawo mifɔlɔi amli la hewɔ lɛ, mifeɔ nibii nɛɛ kɛteɔ. Shi fiofio lɛ, nakai gbeyeishemɔ lɛ fɛɛ laaje. Mikɛ mɛi ni ye mi onukpa ní sumɔɔɔ Yehowa bɔ, ni amɛná minɔ hewalɛ gbonyo. Naagbee lɛ, mikɛɛ mifɔlɔi akɛ mikɛ amɛjamɔ lɛ bɛ nɔ ko feemɔ dɔŋŋ. Amɛná tsui amɛha mi, ni amɛbɔ mɔdɛŋ akɛ amɛbaaye amɛbua mi, shi mikpoo amɛyelikɛbuamɔi lɛ fɛɛ. Amɛtsui kumɔ waa diɛŋtsɛ.

Mifã kɛshi shĩa, ni no sɛɛ lɛ, mibɔi tsofai kɛnitsumɔ yɛ gbɛ ni ejaaa nɔ, aahu po akɛ mibɔi wii babaoo dũmɔ, ni mihɔɔ hu. Mikɛ mihe wo jeŋba sha mli, ni mikɛ bei babaoo yashwɛɔ mihiɛ gbɛkɛgbɛkɛ yɛ hiɛtserɛjiemɔhei. Agbɛnɛ hu, mibatsɔ mɔ ní tsui shaa lɛ waa. Kɛ́ mɔ ko wie loo efee nɔ ko ni misumɔɔɔ lɛ, mimli fũɔ waa, ni bei pii lɛ mibolɔɔ miwoɔ mɛi, ni mimamɔɔ amɛ atswɛrɛ. Kɛ́ makɛɛ lɛ, mifee nibii fɛɛ ni mile akɛ esaaa akɛ Kristofonyo feɔ.

BƆ NI BIBLIA LƐ TSAKE MISHIHILƐ: Mikɛ oblanyo ko ní mikɛ lɛ fɛɛ wɔkɛ tsofai tsuɔ nii yɛ gbɛ ni ejaaa nɔ lɛ bɔ kpaakpa, ni epapa je mli beni oblanyo lɛ ji gbekɛ fioo. Bei pii lɛ, wɔshĩɔ kpe gbɛkɛgbɛkɛ kɛgbaa sane. Bei komɛi kɛ́ wɔmiigba sane gbɛkɛ lɛ, efɔseɔ etsuiŋ ni egbaa mi bɔ ni ehiɛ tseɔ epapa ehaa. Akɛni mile gbohiiashitee he hiɛnɔkamɔ lɛ kɛjɛ migbekɛbiiashi tɔ̃ɔ hewɔ lɛ, mibɔi lɛ Yesu he sane gbaa—akɛ etee gbohii ashi, ni ewo shi akɛ ebaatee mɛi ni egboi lɛ ashi ekoŋŋ wɔsɛɛ. (Yohane 5:28, 29) Mikɛɔ lɛ akɛ: “Bo lɛ feemɔ he mfoniri okwɛ, akɛ okɛ opapa ekpe ekoŋŋ. Wɔ fɛɛ wɔbaanyɛ wɔhi shi kɛya naanɔ yɛ Paradeiso yɛ shikpɔŋ lɛ nɔ.” Nakai wiemɔi lɛ ta minaanyo lɛ tsuiŋ waa.

 Bei komɛi hu lɛ, minaanyo lɛ wóɔ saji tamɔ naagbee gbii lɛ loo Triniti tsɔɔmɔ lɛ anɔ. Mitsɔɔ lɛ ŋmalɛi srɔtoi ni tsɔɔ anɔkwalei ni kɔɔ Yehowa Nyɔŋmɔ, Yesu, kɛ naagbee gbii lɛ ahe lɛ yɛ lɛ diɛŋtsɛ e-Biblia lɛ mli. (Yohane 14:28; 2 Timoteo 3:1-5) Babaoo ní mikɛ minaanyo lɛ gbaa Yehowa he sane lɛ, babaoo ní misusuɔ Yehowa he.

Fiofio lɛ, Biblia mli anɔkwale dumɔwui ní mifɔlɔi gbo deŋme kɛdũ amɛwo mimli ní ekwɛ̃ko lɛ bɔi kwɛ̃ɛ agbɛnɛ. Ákɛ nɔkwɛmɔnɔ lɛ, bei komɛi kɛ́ mikɛ minanemɛi lɛ yɛ hiɛtserɛjiemɔhe ko ní wɔkɛ tsofai miitsu nii yɛ gbɛ ni ejaaa nɔ lɛ, nɔŋŋ kɛkɛ lɛ Yehowa he susumɔi ebayi mijwɛŋmɔ mli. Minanemɛi lɛ ateŋ babaoo kɛɔ akɛ amɛsumɔɔ Nyɔŋmɔ, shi amɛnifeemɔ etsɔɔɔ nakai kwraa. Akɛni misumɔɔɔ ni mitamɔɔ amɛ hewɔ lɛ, mibayɔse nɔ ni esa akɛ mafee. Esa akɛ maku sɛɛ kɛba Yehowa ŋɔɔ.

Anɔkwa, esoro wiemɔ, ni esoro efeemɔ. Tsakemɔi lɛ ekomɛi waaa kɛhaaa mi; mikpa tsofai kɛnitsumɔ yɛ gbɛ ni ejaaa nɔ ni etɔɔɔ mi tsɔ. Mikɛ mitsutsu nanemɛi lɛ hu kpa bɔɔ, ni mikɛ Kristofoi asafoŋ onukpa ko bɔi Biblia lɛ kasemɔ.

Shi ewa waa kɛha mi akɛ mafee tsakemɔi komɛi. No mli lɛ ewa waa kɛha mi akɛ maye mimlifu nɔ. Bei komɛi lɛ, mimiaa mihiɛ saŋŋ, shi nɔŋŋ kɛkɛ lɛ misaa miyawu mitsutsu ŋmɔtɔ lɛ ekoŋŋ. Kɛ́ ebalɛ nakai lɛ, egbaa minaa waa, ni minuɔ he akɛ misaaa. Akɛni minijiaŋ je wui hewɔ lɛ, miyana asafoŋ onukpa ni kɛ mi kaseɔ Biblia lɛ. Etoɔ etsui shi ehaa mi, ni ejieɔ mlihilɛ kpo etsɔɔ mi, ni ebafee hewalɛwoo jɛɛhe diɛŋtsɛ kɛha mi. Be ko lɛ, eha mikane sane ko yɛ Buu-Mɔɔ lɛ mli ni kɔɔ nɔ hewɔ ni esaaa akɛ mɔ nijiaŋ jeɔ wui lɛ he. * Ekɛ mi susu nibii komɛi ní manyɛ mafee kɛ́ mina akɛ mimli miitao afu lɛ ahe. Miha nakai sane lɛ hi mijwɛŋmɔŋ, ni misɔle miha Yehowa babaoo, ni fiofio lɛ, minyɛ miye mimlifu nɔ. Naagbee lɛ, abaptisi mi akɛ Yehowa Odasefonyo yɛ April 2000. Mifɔlɔi ná miishɛɛ waa.

BƆ NI MINÁ HE SƐƐ: Amrɔ nɛɛ, miyɛ toiŋjɔlɛ kɛ henilee kpakpa, ejaakɛ mile akɛ amrɔ nɛɛ, mikɛ tsofai kɛ jeŋba sha buleee mihe dɔŋŋ. Yɛ nitsumɔ mli jio, Kristofoi akpeeiyaa jio, loo hiɛtserɛjiemɔ mli jio lɛ, miyɛ miishɛɛ babaoo fe tsutsu lɛ. Miyɛ hiɛnɔkamɔ kpakpa.

Miida Yehowa shi waa akɛ eha mifɔlɔi lɛ tee nɔ amɛye amɛbua mi ni amɛhiɛ kpaaa minɔ. Misusuɔ nɔ ni Yesu wie yɛ Yohane 6:44 lɛ hu he waa. Ekɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” Le ni mile akɛ Yehowa ji mɔ ni gbala mi, ni no ha minyɛ miku misɛɛ kɛba eŋɔɔ lɛ taa mitsuiŋ waa.

 “Mishwe Akɛ Maná Tsɛ.”—MARCO ANTONIO ALVAREZ SOTO

BE NI AFƆ LƐ: 1977

MAŊ NƆ NI EJƐ: CHILE

MƆ NI EJI TSUTSU: RƆK LALATSWALƆI AKUU KO MLI NYO

MITSUTSU SHIHILƐ: Minyɛ ji mɔ ni kwɛ mi yɛ Punta Arenas, ni ji maŋ fɛofɛo ko ni yɔɔ Strait of Magellan, ní bɛŋkɛ South America wuoyigbɛ lɛ. Mimami kɛ mipapa gbála mli beni miye afii enumɔ, ni no ha minu he akɛ akpoo mi. Mishwe akɛ maná tsɛ.

No mli lɛ, Yehowa Odasefoi kɛ mimami kaseɔ Biblia lɛ, ni ekɛ mi yaa Kristofoi asafoŋ kpeei yɛ Maŋtsɛyeli Asa lɛ nɔ. Shi misumɔɔɔ kpeei nɛɛ yaa kwraa, ni bei babaoo lɛ kɛ́ wɔnyiɛ gbɛ kɛmiiya lɛ, mifóɔ ni mikɛ mihe tswiaa shi. Beni miye afii 13 lɛ, mikpa kpeei lɛ yaa kwraa.

No beaŋ lɛ mibasumɔ lala waa, ni mina hu akɛ mihe esa waa kɛ lamɔ. Beni miyeɔ afii 15 lɛ, miitswa rɔk lalai ni naa wa ni jieɔ awuiyeli yi yɛ gbijurɔyelii ashishi, daanumɔhei, kɛ henaabuamɔi krokomɛi ashishi. Mikɛ lalatswalɔi ni he esa jogbaŋŋ bɔ, ni no ha mibasumɔ lala henɔ ko ni atsɛɔ lɛ classical music lɛ waa. Mibɔi lala kasemɔ yɛ lalakasemɔhe ko ni yɔɔ wɔmaŋ lɛ mli lɛ. Beni miye afii 20 lɛ, mifã kɛtee Santiago, ni ji maŋtiase lɛ mli, koni miyatsa minikasemɔ nɔ. Mitee nɔ mikɛ lalatswalɔi akui fee ekome kɛtswa rɔk lalai ni naa wa ni jieɔ awuiyeli yi.

Be nɛɛ mli fɛɛ lɛ, minuɔ he akɛ mibɛ miishɛɛ. Bɔni afee ni mikanu he nakai lɛ, mitɔɔ dãa, ni mikɛ mɛi ni mikɛtswaa lala ní miŋɔ amɛ akɛ miweku lɛ kɛ tsofai tsuɔ nii yɛ gbɛ ni ejaaa nɔ. Mibatsɔ mɔ ní ebuuu saa, ni kɛ́ mipue ni ona mi nɔŋŋ lɛ, obaana nakai. Miwoɔ atadei diji, mito tsɛŋ, ni miha miyitsɔi tsa kusuu aahu kɛbashi mihɛ sɛɛ.

Minifeemɔi lɛ haa bei pii lɛ mɛi kɛ mi nɔɔ, ni polisifoi mɔɔ mi. Be ko beni mitɔ dãa lɛ, miyatutua kuu ko ni kɛ tsofai tsuɔ nii yɛ gbɛ ni ejaaa nɔ ní miigba mi kɛ minanemɛi lɛ anaa lɛ. Mɛi nɛɛ tsoo mi blɛŋtɛŋŋ ni mikadaa kpɔ.

Shi nɔ ni dɔ mi fe fɛɛ lɛ ji nɔ ni minanemɛi ni mikɛyaa kɛbaa lɛ fee mi lɛ. Be ko lɛ, mibaná mile akɛ minaanyo fe fɛɛ lɛ kɛ mijɔle lɛ etee nɔ amɛhɔlɔ shi afii abɔ, ni minanemɛi krokomɛi lɛ fɛɛ le shi amɛkɛɛɛ mi. Enɛ ha mitsui kumɔ waa.

Mifã kɛtee Punta Arenas ekoŋŋ, ni mibɔi lala tsɔɔmɔ kɛ saŋkutswaa yɛ jɛmɛ. Mitee nɔ mikɛ lalatswalɔi akui fee ekome kɛtswa rɔk lalai ni naa wa ni jieɔ awuiyeli yi, ni wɔrikɔɔdiɔ. Mikɛ oblayoo fɛofɛo ko ní atsɛɔ lɛ Sussan kpe, ni mikɛ lɛ hi shi, shi jeee akɛ wɔbote gbalashihilɛ mli. Sɛɛ mli lɛ, Sussan ná ele akɛ emami heɔ Triniti tsɔɔmɔ lɛ eyeɔ, shi mi lɛ miheee miyeee. Ebi mi akɛ: “No hewɔ lɛ, mɛni ji anɔkwale lɛ?” Mikɛɛ lɛ akɛ, mile akɛ Triniti tsɔɔmɔ lɛ ji amale tsɔɔmɔ, shi minyɛŋ majɛ Biblia lɛ mli magbala mli matsɔɔ lɛ. Shi mile mɛi ni baanyɛ agbala mli amɛtsɔɔ lɛ. Mikɛɛ lɛ akɛ Yehowa Odasefoi baanyɛ atsɔɔ lɛ anɔkwale lɛ kɛjɛ Biblia lɛ mli. Kɛkɛ ni mifee nɔ ko ni mifeko eko afii abɔ nɛ—misɔle miha Nyɔŋmɔ kɛha yelikɛbuamɔ.

Gbii fioo komɛi asɛɛ lɛ, mina nuu ko ní etamɔ nɔ ni mile lɛ, ni mibi lɛ kɛ́ eji Yehowa Odasefonyo. Eyɛ mli akɛ mihesaamɔ lɛ wo ehe gbeyei moŋ, shi ejɛ mlihilɛ mli eha misanebimɔi ni kɔɔ kpeei yɛ Maŋtsɛyeli Asa lɛ nɔ lɛ he lɛ ahetoo.  Sane nɛɛ ní wɔgba lɛ ha miná nɔmimaa akɛ aha misɔlemɔ lɛ hetoo. Mitee Maŋtsɛyeli Asa lɛ nɔ ni miyata sɛɛ kwraa koni mɔ ko akayoo mi. Shi mɛi babaoo yoo mi—amɛkai beni miji gbekɛ fioo ní mibaa asafoŋ kpeei lɛ. Amɛhere mi hiɛmɛɛ, ni amɛkɛ hedɔɔ fua mi, ni no ha mitsui nyɔ mimli waa. Minu he oookɛɛ miba shĩa. Beni mina nuu ni kɛ mi kase Biblia lɛ beni miji gbekɛ fioo lɛ, mikpa lɛ fai koni ekɛ mi akase Biblia lɛ ekoŋŋ.

BƆ NI BIBLIA LƐ TSAKE MISHIHILƐ: Be ko lɛ, mikane Abɛi 27:11 lɛ ni kɛɔ akɛ: “Mibi, feemɔ ohe nilelɔ, ní oha mitsui anyɔ mimli.” Le ní miná mile akɛ adesa ni bɛ nɔ ko mli lɛ baanyɛ aha Bɔlɔ lɛ tsui anyɔ emli lɛ ta mitsuiŋ waa. Enɛ ha miyɔse akɛ Yehowa ji Tsɛ ní mitao lɛ miwala beaŋ fɛɛ lɛ!

Miisumɔ waa akɛ masa miŋwɛi Tsɛ lɛ hiɛ, ní mafee esuɔmɔnaa nii, shi tsofai kɛnitsumɔ kɛ dãanumɔ eŋɔ mi nom afii abɔ. Mibanu Yesu wiemɔi ni yɔɔ Mateo 6:24 lɛ ni kɛɔ akɛ “mɔ ko nyɛŋ nuŋtsɔmɛi enyɔ asɔmɔ” lɛ shishi. Beni mimiaa mihiɛ koni mafee tsakemɔi yɛ mishihilɛ mli lɛ, mibana nɔ ni shishitoo mla ni yɔɔ 1 Korintobii 15:33 lɛ tsɔɔ lɛ diɛŋtsɛ. Jɛmɛ kɛɛ: “Naanyobɔɔ fɔŋ fiteɔ jeŋba kpakpa.” Mibayɔse akɛ kɛ́ mitee nɔ mikɛ nanemɛi gbohii lɛ bɔ, ní mitsa nɔ mitee hei ni wɔshwɛɔ wɔhiɛ yɛ lɛ, no lɛ minyɛŋ makpa minifeemɔi gbohii lɛ. Ŋaawoo ní Biblia lɛ kɛhaa lɛ yɛ faŋŋ: Esa akɛ mafee bɔ fɛɛ ni manyɛ ni matsi mihe kɛjɛ nibii ni tɔ̃tɔɔ minane lɛ ahe.—Mateo 5:30.

Akɛni misumɔɔ lala waa hewɔ lɛ, ebawa waa kɛha mi akɛ mikɛ rɔk lalai ní jieɔ awuiyeli yi lɛ aaafo tako mli. Shi nanemɛi ni miná yɛ asafo lɛ mli lɛ ye amɛbua mi, ni fiofio lɛ, minyɛ mikpa kwraa. Mikpa dãanumɔ shɛii lɛ, ni mikpa tsofai kɛnitsumɔ lɛ hu. Miku miyitsɔi, mishɛ mitsɛŋ, ni mikpa atadei diji lɛ woo. Beni mikɛɛ Sussan akɛ miitao maku miyitsɔi lɛ, ehiɛ fee lɛ yaa aahu akɛ etao akɛ ele nɔ ni miyafeɔ yɛ Maŋtsɛyeli Asa lɛ nɔ. Ekɛɛ akɛ, “Mikɛ bo miiya ní mayakwɛ nɔ kwraa ni afeɔ yɛ Maŋtsɛyeli Asa lɛ nɔ!” Akɛni enya nibii ni eyana yɛ jɛmɛ lɛ ahe waa hewɔ lɛ, etsɛɛɛ kwraa ni lɛ hu ebɔi Biblia lɛ kasemɔ. Sɛɛ mli lɛ, mikɛ Sussan bote gbalashihilɛ mli. Yɛ afi 2008 lɛ, abaptisi wɔ akɛ Yehowa Odasefoi. Eŋɔɔ wɔnaa waa akɛ amrɔ nɛɛ wɔkɛ mimami efee ekome kɛmiisɔmɔ Yehowa.

BƆ NI MINÁ HE SƐƐ: Miye mihe kɛjɛ jeŋ ni haaa mɔ aná anɔkwa miishɛɛ nɛɛ, kɛ nanemɛi fɔji lɛ hu ahe. Misumɔɔ lala lolo, shi amrɔ nɛɛ mihalaa mli. Mikɛ niiashikpamɔi ni miná lɛ woɔ miwekumɛi, kɛ mɛi krokomɛi, titri lɛ oblahii kɛ oblayei aŋaa. Miisumɔ ni maye mabua amɛ koni amɛna akɛ nibii ni yɔɔ je nɛɛ mli lɛ baanyɛ afee tamɔ nɔ ni amɛhi aahu, shi yɛ naagbee lɛ obaana akɛ amɛji “tumu nɔ nii.”—Filipibii 3:8.

Miná nanemɛi ni yeɔ anɔkwa yɛ Kristofoi asafo lɛ mli, he ni suɔmɔ kɛ toiŋjɔlɛ babaoo yɔɔ lɛ. Nɔ ni fe fɛɛ lɛ, akɛni mitsi mibɛŋkɛ Yehowa hewɔ lɛ, miná mi-Tsɛ.

[Shishigbɛ niŋmaa]

^ kk. 14 Sane ni ji “Omanyeyeli Kɛtsɔ Hiɛmiamɔ Nɔ” lɛ je kpo yɛ February 1, 2000, Buu-Mɔɔ lɛ mli, baafa 4-6.

[Wiemɔ ni akɔ ni akɛmiitsu nii ni yɔɔ baafa 13]

“Yehowa ji mɔ ni gbala mi, ni no ha minyɛ miku misɛɛ kɛba eŋɔɔ”