Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Te Oweku lɛ Aaafee Tɛŋŋ Aná Miishɛɛ?

Te Oweku lɛ Aaafee Tɛŋŋ Aná Miishɛɛ?

 Kasemɔ Nii Kɛjɛ Nyɔŋmɔ Wiemɔ Lɛŋ

Te Oweku lɛ Aaafee Tɛŋŋ Aná Miishɛɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Mɛni hewɔ gbalamlibotemɔ yɛ gbɛ ni ja nɔ kɛ weku miishɛɛ baa lɛ?

Yehowa, miishɛɛ Nyɔŋmɔ lɛ, ji mɔ ni to gbalashihilɛ shishi. Gbalamlibotemɔ yɛ gbɛ ni ja nɔ kɛ weku miishɛɛ baa ejaakɛ ehaa hefatalɔi lɛ feɔ ekome, ni ehaa weku lɛ feɔ shweshweeshwe kɛha bii atsɔsemɔ. Te Nyɔŋmɔ buɔ gbalashihilɛ ehaa tɛŋŋ? Eesumɔ ni nuu kɛ yoo kɛ amɛgbãla awo mla shishi ni amɛhi shi daa. (Luka 2:1-5) Nyɔŋmɔ miisumɔ ni wu kɛ ŋa aye amɛhe anɔkwa. (Hebribii 13:4) Ákɛ Kristofoi lɛ, ja wu loo ŋa ebɔ ajwamaŋ dani Yehowa ŋmɛɔ gbɛ ni amɛtse gbala ní amɛkɛ mɔ kroko ahi shi.—Kanemɔ Mateo 19:3-6, 9.

2. Te esa akɛ wu kɛ ŋa kɛ amɛhe aye tɛŋŋ?

Yehowa bɔ nuu kɛ yoo koni amɛye amɛbua amɛhe yɛ gbalashihilɛ mli. (1 Mose 2:18) Wu lɛ ji weku lɛ yitso, ni lɛ tsutsu esa akɛ eha eweku lɛ amɛheloonaa hiamɔ nii, ní etsɔɔ amɛ Nyɔŋmɔ he nii. Esa akɛ esumɔ eŋa lɛ ní ekɛ ehe ashã afɔle eha lɛ. Esa akɛ wumɛi kɛ ŋamɛi asumɔ amɛhe, ni amɛjie bulɛ kpo amɛtsɔɔ amɛhe. Akɛni wumɛi kɛ ŋamɛi fɛɛ yeee emuu hewɔ lɛ, esa akɛ amɛkɛ tɔmɔi akekee amɛhe, ni no titri baaha miishɛɛ ahi amɛgbalashihilɛ lɛ mli.—Kanemɔ Efesobii 4:31, 32; 5:22-25, 33; 1 Petro 3:7.

3. Kɛ́ onáaa miishɛɛ yɛ ogbalashihilɛ mli lɛ, ani esa akɛ oshi ohefatalɔ lɛ?

Kɛ́ okɛ ohefatalɔ lɛ miiná naagbai lɛ, nyɛbɔa mɔdɛŋ nyɛjiea suɔmɔ kpo nyɛtsɔa nyɛhe. (1 Korintobii 13:4, 5) Nyɔŋmɔ Wiemɔ lɛ ejieee yi akɛ atsɔ mligbalamɔ nɔ atsu gbalashihilɛ mli naagbai ahe nii. Shi yɛ shihilɛi komɛi ni naa wa waa amli lɛ, Kristofonyo ko baanyɛ akpɛ yiŋ akɛ egbala mli loo ekafee nakai.—Kanemɔ 1 Korintobii 7:10-13.

  4. Gbekɛbii, mɛni Nyɔŋmɔ taoɔ ni nyɛná?

Yehowa miitao ni nyɛná miishɛɛ. Ekɛ gbɛtsɔɔmɔi ni hi fe fɛɛ ni baaha nyɛná miishɛɛ yɛ nyɛblahiiaŋ lɛ haa nyɛ. Eetao ni nyɛná nilee kɛ niiashikpamɔ ní nyɛfɔlɔi yɔɔ lɛ he sɛɛ. (Kolosebii 3:20) Yehowa hiɛ sɔɔ nɔ fɛɛ nɔ ni nyɛfeɔ kɛjieɔ eyi lɛ naakpa.—Kanemɔ Jajelɔ 11:9–12:1; Mateo 19:13-15; 21:15, 16.

5. Fɔlɔi, te nyɛbii lɛ aaafee tɛŋŋ amɛná miishɛɛ?

Esa akɛ nyɛtsu nii waa koni nyɛná niyenii, shihilɛhe, kɛ hehaanii nyɛha nyɛbii lɛ. (1 Timoteo 5:8) Shi bɔni afee ni nyɛbii lɛ aná miishɛɛ lɛ, ehe miihia hu ni nyɛtsɔɔ amɛ ni amɛsumɔ Nyɔŋmɔ, ní amɛkase nii kɛjɛ eŋɔɔ. (Efesobii 6:4) Nɔkwɛmɔnɔ ni nyɛfeɔ kɛtsɔɔ akɛ nyɛsumɔɔ Nyɔŋmɔ lɛ baanyɛ aná nyɛbii lɛ anɔ hewalɛ waa. Kɛ́ nyɛjɛ Nyɔŋmɔ Wiemɔ lɛ mli nyɛtsɔɔ nyɛbii lɛ agbɛ lɛ, ebaanyɛ ená nyɛbii lɛ ajwɛŋmɔ nɔ hewalɛ yɛ gbɛ kpakpa nɔ.—Kanemɔ 5 Mose 6:4-7; Abɛi 22:6.

Kɛ́ nyɛwo nyɛbii lɛ hewalɛ, ni nyɛjie amɛyi lɛ, amɛnáa he sɛɛ waa. Jajemɔ kɛ tsɔsemɔ hu he miihia amɛ. Tsɔsemɔ ni tamɔ nɛkɛ lɛ baabu amɛhe kɛjɛ nifeemɔi ni haŋ amɛná miishɛɛ lɛ ahe. (Abɛi 22:15) Kɛlɛ, esaaa ákɛ akɛ yitsoŋwalɛ tsɔseɔ bii.—Kanemɔ Kolosebii 3:21.

Yehowa Odasefoi kalaa woji babaoo ni ato he gbɛjianɔ titri koni eye ebua fɔlɔi kɛ gbekɛbii. Ajɛɔ Biblia lɛ mli aŋmalaa woji nɛɛ.—Kanemɔ Lala 19:8, 12.w11-E 10/1.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 14 lɛ mli.