Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Biblia lɛ Tsakeɔ Mɛi

Biblia lɛ Tsakeɔ Mɛi

 Biblia lɛ Tsakeɔ Mɛi

MƐNI tsirɛ oblayoo ko ni du gbɛ kɛjɛ Nyɔŋmɔjamɔ ni akɛtsɔse lɛ lɛ he, ni eku esɛɛ eba? Kanemɔ nɔ ni lɛ diɛŋtsɛ ekɛɛ.

“Amrɔ nɛɛ mina yiŋtoo hewɔ ni miyɔɔ shihilɛ mli.”—LISA ANDRÉ

BE NI AFƆ LƐ: 1986

MAŊ NƆ NI EJƐ: LUXEMBOURG

MƆ NI EJI TSUTSU: BI NYENYEŊTSWI

MITSUTSU SHIHILƐ: Mida yɛ Luxembourg maŋ bibioo ko ni ji Bertrange lɛ mli, ni maŋ nɛɛ mli yɛ falefale, emli yɛ shweshweeshwe, ni shika hu jɛi. Afɔ wɔyi enumɔ, ni miji naagbee mɔ. Mifɔlɔi ji Yehowa Odasefoi, ni amɛbɔ mɔdɛŋ waa koni amɛdu Kristofoi asui kpakpai amɛwo mi kɛ minyɛmimɛi lɛ amli.

Beni mishɛ mikpokuaiaŋ lɛ, miyiŋ bɔi mi kɔshikɔshi feemɔ yɛ Yehowa Odasefoi atsɔɔmɔi lɛ ahe. Shishijee lɛ, mibuuu enɛ nɔ ko, shi fiofio lɛ mihemɔkɛyeli lɛ bɔi gbɔjɔmɔ. Mifɔlɔi fee nɔ fɛɛ nɔ ni amɛaanyɛ koni amɛye amɛbua mi ni mafee nɔ ni ja, shi mikpɛlɛɛɛ. Mikɛ oblahii kɛ oblayei ni ebuuu nɔ ko bɔi bɔɔ ni mifɔlɔi leee. Mishwe akɛ maná heyeli ní etamɔ nɔ ni nakai oblahii kɛ oblayei lɛ ená lɛ eko. Wɔshwɛ wɔhiɛ waa, wɔkɛ wɔhe ná bɔlɛ, wɔkɛ tsofai tsu nii yɛ gbɛ ni ejaaa nɔ, ni wɔtɔrɔ dãa. Shishijee lɛ, miná miishɛɛ waa akɛ mi kɛ mɛi ni etamɔ nɔ ni amɛmiiye wala waa bɔɔ.

Shi yɛ anɔkwale mli lɛ, no mli lɛ mibɛ miishɛɛ diɛŋtsɛ. Mina akɛ sɛɛnamɔ ko kwraa bɛ mi kɛ minanemɛi lɛ ashihilɛ lɛ he; amɛteŋ mɔ ko jwɛŋŋ nɔ ko he. Shi mi lɛ, nibii tamɔ jalɛ sane ni ayeee yɛ jeŋ fɛɛ lɛ haoɔ mi waa. Beni be shwie mli lɛ, mihao waa fe nine.

BƆ NI BIBLIA LƐ TSAKE MISHIHILƐ: Beni miye afii 17 lɛ, gbi ko lɛ minu he akɛ mifee shwɛm waa. Akɛni mimami na akɛ mibɛ miishɛɛ hewɔ lɛ, ekɛɛ mi akɛ miha akɛ mi akase Biblia lɛ ekoŋŋ. Ewo mi hewalɛ akɛ mipɛi Biblia lɛ tsɔɔmɔi lɛ amli koni no sɛɛ lɛ mi diɛŋtsɛ mikpɛ miyiŋ kɛji miisumɔ ni mahi shi yɛ nɔ ni mikase lɛ naa loo misumɔɔɔ. Nakai sane ni ejɛ etsuiŋ ekɛ mi gba lɛ ji nɔ ni ha mitsake. Mikpɛlɛ koni minyɛmi yoo nukpa Caroline kɛ ewu Akif kɛ mi akase Biblia lɛ. Akif fɔlɔi jeee Yehowa Odasefoi, shi ebatsɔ Odasefonyo beni eda. Akif tsutsu shihilɛ ha minu he akɛ manyɛ mikɛ lɛ agba sane ni mishiuuu nɔ ko nɔ, ejaakɛ enɛ he miihia mi waa.

 Mile akɛ mijeŋba esaaa Odasefonyo, shi shishijee lɛ, misusu akɛ bɔ ni miba mijeŋ miha lɛ ji mi diɛŋtsɛ misane. Shi beni mikase Biblia lɛ, miyɔse akɛ bɔ ni miba mijeŋ miha lɛ dɔ Yehowa. (Lala 78:40, 41; Abɛi 27:11) Mibana hu akɛ, bɔ ni miba mijeŋ miha lɛ gba mɛi krokomɛi hu anaa.

Beni mikase Biblia lɛ kɛshɛ he ko lɛ, mina akɛ yiŋtoi kpakpai ni kɔneɔ mɔ yiŋ yɛ ni manyɛ madamɔ nɔ mahe maye akɛ Biblia lɛ ji Nyɔŋmɔ Wiemɔ lɛɛlɛŋ. Ákɛ nɔkwɛmɔnɔ lɛ, mikase akɛ Biblia mli gbalɛi babaoo eba mli, ni amɛmlibaa lɛ ja jogbaŋŋ kɛmɔ shi. Nilee nɛɛ haaa miyiŋ afee mi kɔshikɔshi dɔŋŋ tamɔ tsutsu lɛ.

Aaafee afi kome sɛɛ beni mibɔi Biblia lɛ kasemɔ lɛ, mi kɛ mifɔlɔi tee wɔyasara minyɛmi nuu onukpa ni tsuɔ nii yɛ Yehowa Odasefoi anitsumɔhe nine lɛ yɛ Germany. Beni mina akɛ minyɛmi nuu lɛ yɛ miishɛɛ waa lɛ, eta mitsuiŋ naakpa. Miishɛɛ ni tamɔ nakai tuuntu mitaoɔ kɛjɛ shoo nɛɛ! Minya Odasefoi krokomɛi hu ni tsuɔ nii yɛ jɛmɛ lɛ ahe waa. Amɛtamɔɔɔ mɛi ni yeee anɔkwa ní sumɔɔ ŋɔɔmɔyeli ni mikɛbɔ tsutsu lɛ kwraa. No sɛɛ etsɛɛ lɛ, mijɛ mitsuiŋ misɔle miha Yehowa, ni miwo lɛ shi akɛ masɔmɔ lɛ miwala gbii ni eshwɛ lɛ fɛɛ. Beni miye afii 19 lɛ, miha abaptisi mi kɛma mihe nɔ ni mijɔɔ miha Yehowa lɛ nɔ mi.

BƆ NI MINÁ HE SƐƐ: Amrɔ nɛɛ mina yiŋtoo hewɔ ni miyɔɔ shihilɛ mli. Biblia lɛ ni mitsɔɔ mɛi koni amɛle Yehowa kɛ eshiwoi kɛha wɔsɛɛ lɛ ahe nii lɛ haa mináa miishɛɛ waa. Miweku lɛ hu ená he sɛɛ jogbaŋŋ—amrɔ nɛɛ amɛtsui yeee dɔŋŋ yɛ mihewɔ.

Mile mitsutsu tɔmɔi lɛ, shi mibɔɔ mɔdɛŋ koni mikɛ mijwɛŋmɔ akaya nɔ. Moŋ lɛ, mikɛ mijwɛŋmɔ maa bɔ ni Yehowa kɛ eshai faa kɛ bɔ ni esumɔɔ mi lɛ nɔ. Mikɛ mitsui muu fɛɛ kpɛlɛɔ wiemɔi ni yɔɔ Abɛi 10:22 (NW) lɛ nɔ akɛ: “Yehowa jɔɔmɔ lɛ, no feɔ mɔ niiatsɛ, ni ekɛ piŋmɔ ko kwraa fataaa he.”—w11-E 10/1.

[Wiemɔ ni akɔ ni akɛmiitsu nii ni yɔɔ baafa 10]

“Wɔshwɛ wɔhiɛ waa, wɔkɛ wɔhe ná bɔlɛ, wɔkɛ tsofai tsu nii yɛ gbɛ ni ejaaa nɔ, ni wɔtɔrɔ dãa”

[Wiemɔ ni akɔ ni akɛmiitsu nii ni yɔɔ baafa 11]

“Mile mitsutsu tɔmɔi lɛ, shi mibɔɔ mɔdɛŋ koni mikɛ mijwɛŋmɔ akaya nɔ”