Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Be ni Esaaa akɛ Wɔwɔɔ

Be ni Esaaa akɛ Wɔwɔɔ

 Tsɔɔmɔ Obii lɛ Anii

Be ni Esaaa akɛ Wɔwɔɔ

OBAAKPƐLƐ nɔ akɛ esaaa akɛ owɔɔ kɛ́ otee skul. Mɛi babaoo wɔɔ wɔdɔi kɛ́ aatsɔɔ nii yɛ skul, shi esaaa akɛ owɔɔ koni onyɛ okase nii. Ekolɛ oyaa asafoŋ kpeei hu koni oyakase Biblia lɛ.

Mɛni osusuɔ akɛ obaanyɛ ofee koni okawɔ? * Nɔ̃ kome ji akɛ, kɛ́ je na lɛ esa akɛ owɔ mra. Ekolɛ ehe baahia hu ni owɔ fioo shwane. Gbekɛ ko wɔ beni je ena waa ní bɔfo Paulo miiha wiemɔ. Ha wɔkwɛ nɔ ni wɔbaanyɛ wɔkase kɛjɛ nɔ ni ba enɔ lɛ mli. Gbelemɔ Biblia lɛ kɛya Bɔfoi lɛ Asaji yitso 20, kuku 7 kɛyashi 12 lɛ, ni okwɛ nɔ ni ba.

No mli lɛ Paulo ebasara asafo ni yɔɔ Troia, ni ji ŋshɔnaa maŋ ní lɛji kpelekeɔ yɛ jɛmɛ lɛ. Biblia lɛ tsɔɔ akɛ Paulo kɛ lɛlɛ ‘baayi mli kɛ́ je tsɛre.’ No hewɔ lɛ, “ekã wiemɔ lɛ he kɛyashi nyɔɔŋteŋ.” Wɔkaneɔ akɛ: “Oblanyo ko ni atsɛɔ lɛ Eutiko lɛ tá samfɛlɛ naa, ni wɔ ni tsii loo lɛ, ejaakɛ Paulo wiemɔ lɛ sɛɛ jɛkɛ.” Mɛni ba yɛ no sɛɛ?

Eutiko kpá kɛtsɔ samfɛlɛ lɛ mli “kɛjɛ nsɔɔdoi etɛ lɛ nɔ ebagbee shi.” Paulo kɛ mɛi krokomɛi lɛ wó foi kɛkpeleke shi. Amɛbana Eutiko kã shikpɔŋ ní egbo! Ani onaaa akɛ amɛbaaye awerɛho waa?— Biblia lɛ tsɔɔ akɛ Paulo wó Eutiko, ni eloo lɛ atuu. No sɛɛ etsɛɛɛ lɛ, Paulo kɛ miishɛɛ bo akɛ: ‘Nyɛkayea nyɛtsui, nɔ ko efeko lɛ!’ Nyɔŋmɔ etée Eutiko shi kɛba wala mli!

 Mɛni nɔ ni ba Eutiko nɔ lɛ haa wɔkaseɔ yɛ Nyɔŋmɔ he?— Nɔ kome ji akɛ, Yehowa, wɔŋwɛi Tsɛ lɛ baanyɛ atée gbohii ashi, ni gbekɛbii fata he. Yehowa nuɔ bo shishi ni esumɔɔ bo fe bɔ ni ofɔlɔi nuɔ bo shishi ní amɛsumɔɔ bo lɛ po. Beni Yesu yɔɔ shikpɔŋ lɛ nɔ lɛ, eloo gbekɛbii atuu ni ejɔɔ amɛ, ni ekɛ no tsɔɔ bɔ ni Tsɛ lɛ ji ha. Etée gbekɛbii ashi hu, ni gbekɛ yoo ko ni eye afii 12 fata he.

Te le ni ole akɛ oŋwɛi Tsɛ lɛ sumɔɔ bo lɛ haa onuɔ he ohaa tɛŋŋ?— Hɛɛ, ehaa wɔ hu wɔsumɔɔ Yehowa, ni wɔsumɔɔ akɛ wɔbo lɛ toi. Ani ole nɔ ni wɔbaanyɛ wɔfee kɛtsɔɔ akɛ wɔsumɔɔ lɛ?— Kɛɛmɔ ni wɔɔkɛɛ akɛ wɔsumɔɔ lɛ lɛ ji gbɛ kome ni wɔɔtsɔ nɔ wɔfee nakai. Yesu kɛɛ akɛ: “Misumɔɔ Tsɛ lɛ.” Shi Yesu ekɛɛɛ kɛkɛ akɛ esumɔɔ Nyɔŋmɔ. Efee nibii ni tsɔɔ akɛ esumɔɔ lɛ.

Yesu bo Nyɔŋmɔ toi. Yesu kɛɛ akɛ: “Mi lɛ, nɔ ni sa ehiɛ mifeɔ daa.” Kɛ́ wɔ hu wɔfeɔ nakai lɛ, no lɛ wɔbaabɔ mɔdɛŋ waa koni wɔkawɔ beni esaaa akɛ wɔwɔɔ, bɔni afee ni wɔsa Yehowa kɛ e-Bi Yesu hiɛ.—w11-E 10/1.

Kanemɔ yɛ obiblia lɛ mli

Bɔfoi lɛ Asaji 20:7-12

Luka 8:49-56

Yohane 8:29; 14:31

[Shishigbɛ niŋmaa]

^ kk. 4 Kɛ́ okɛ gbekɛ fioo ko miikane sane nɛɛ, ni oshɛ okadi ni ji (—) he lɛ, esa akɛ omɛ fioo, ní owo gbekɛ lɛ hewalɛ ni etsɔɔ ejwɛŋmɔ.