Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

 Kasemɔ Nii Kɛjɛ Nyɔŋmɔ Wiemɔ Lɛŋ

Mɛni Hewɔ Nyɔŋmɔ Ŋmɛɔ Efɔŋfeemɔ kɛ Piŋmɔ Gbɛ?

Fã nɛɛ teɔ saji komɛi ní ekolɛ obi pɛŋ lɛ ashi, ni etsɔɔ o-Biblia lɛ mli hei ni obaanyɛ ona hetoi lɛ yɛ. Yehowa Odasefoi yɛ he miishɛɛ akɛ amɛkɛ bo aaasusu hetoi nɛɛ ahe.

1. Te fee tɛŋŋ ni efɔŋfeemɔ ba?

Efɔŋfeemɔ je shishi yɛ shikpɔŋ lɛ nɔ beni Satan male klɛŋklɛŋ kwraa lɛ. Abɔɔɔ Satan akɛ mɔ fɔŋ. Eji bɔfo ni eye emuu, shi “edamɔɔɔ anɔkwale lɛ mli.” (Yohane 8:44) Nyɔŋmɔ pɛ ji mɔ ni esa akɛ ajá, shi Satan ná shwelɛ lɛ akɛ ajá lɛ moŋ. Satan laka Hawa, ni ji klɛŋklɛŋ yoo lɛ, ni ekɔne eyiŋ koni ebo lɛ moŋ toi fe Nyɔŋmɔ. Adam yafata Hawa he kɛgbo Nyɔŋmɔ nɔ toi. Piŋmɔ kɛ gbele jɛ nɔ ni Adam fee lɛ mli kɛba.—Kanemɔ 1 Mose 3:1-6, 17-19.

Satan tsɔ kɛɛmɔ ni ekɛɛ Hawa akɛ egbo Nyɔŋmɔ nɔ toi lɛ nɔ etse Nyɔŋmɔ nɔyeli lɛ hiɛ atua. Adesai babaoo eyafata Satan he ni amɛkpoo Nyɔŋmɔ akɛ amɛ-Nɔyelɔ. Enɛ eha Satan etsɔ “je lɛŋ lumɔ.”—Kanemɔ Yohane 14:30; Kpojiemɔ 12:9.

2. Ani nibii ni Nyɔŋmɔ bɔ lɛ eko tɔ fã?

Nyɔŋmɔ bɔ adesai kɛ ŋwɛi bɔfoi lɛ bɔ ni amɛbaanyɛ amɛshɛ etaomɔ nii lɛ ahe pɛpɛɛpɛ. (5 Mose 32:5) Nyɔŋmɔ bɔ wɔ bɔ ni baaha wɔnyɛ wɔkpɛ wɔyiŋ akɛ wɔbaafee ekpakpa loo efɔŋ. Nyɛmɔ nɛɛ haa wɔ hegbɛ ni wɔkɛtsɔɔ kɛji wɔsumɔɔ Nyɔŋmɔ loo wɔsumɔɔɔ lɛ.—Kanemɔ Yakobo 1:13-15; 1 Yohane 5:3.

3. Mɛni hewɔ Nyɔŋmɔ eŋmɛ piŋmɔ gbɛ?

Yehowa eto etsui shi eha enɔyeli lɛ hiɛ atua ni atseɔ lɛ kɛyashi be ko. Mɛni hewɔ? Bɔni afee ni ekɛha ana akɛ kɛ́ ehe bɛ nɔyeli ko mli lɛ, adesai naŋ he sɛɛ. (Yeremia 10:23) Afii 6,000 ni adesai kɛye amɛhe nɔ nɛɛ eha anɔkwa sane nɛɛ efee faŋŋ. Adesai nɔyelɔi nyɛko amɛfo ta, awuiyeli, efɔŋfeemɔ, kɛ hela sɛɛ.—Kanemɔ Jajelɔ 7:29; 8:9; Romabii 9:17.

Nɔ ni tamɔɔɔ nakai lɛ, mɛi ni kpɛlɛɔ Nyɔŋmɔ nɔ akɛ amɛ-Nɔyelɔ lɛ náa nakai feemɔ he sɛɛ. (Yesaia 48:17, 18) Etsɛŋ Yehowa baakpata adesa nɔyelii fɛɛ ahiɛ. Mɛi pɛ ni baahi shikpɔŋ lɛ nɔ ji mɛi ni halaa akɛ Nyɔŋmɔ aye amɛnɔ lɛ.—Yesaia 2:3, 4; 11:9; kanemɔ Daniel 2:44.

  4. Te wɔnáa Nyɔŋmɔ tsuishitoo lɛ he sɛɛ tɛŋŋ?

Satan tsɔɔ akɛ adesai boŋ Yehowa toi kɛwulaŋ shi. Nyɔŋmɔ tsui shi ni eto lɛ haa wɔ fɛɛ wɔnáa hegbɛ koni wɔkɛtsɔɔ kɛji wɔkpɛlɛɔ Nyɔŋmɔ nɔyeli loo adesa nɔyeli nɔ. Bɔ ni wɔhiɔ shi wɔhaa lɛ tsɔɔ nɔ ni wɔkpɛlɛɔ nɔ.—Kanemɔ Hiob 1:8-11; Abɛi 27:11.

5. Te wɔfeɔ tɛŋŋ wɔtsɔɔ akɛ Nyɔŋmɔ ji wɔ-Nɔyelɔ?

Kɛ́ wɔtao anɔkwa jamɔ ni atsɔɔ yɛ e-Wiemɔ ni ji Biblia lɛ mli, ni wɔhi shi yɛ naa lɛ, no tsɔɔ akɛ wɔkpɛlɛɔ Nyɔŋmɔ nɔ akɛ wɔ-Nɔyelɔ. (Yohane 4:23) Kɛfata he lɛ, taakɛ Yesu fee lɛ, esaaa akɛ wɔwuɔ ta loo wɔkɛ wɔhe woɔ maŋkwramɔŋ saji amli.—Kanemɔ Yohane 17:14.

Satan kɛ hewalɛ ni eyɔɔ lɛ tsuɔ nii kɛwoɔ nifeemɔi gbohii ahe hewalɛ. Kɛ́ wɔkpoo nakai nifeemɔi lɛ, ekolɛ wɔnanemɛi kɛ wɔwekumɛi lɛ ekomɛi baaye wɔhe fɛo, loo amɛbaate shi amɛwo wɔ. (1 Petro 4:3, 4) Belɛ esa akɛ wɔkpɛ wɔyiŋ. Ani wɔkɛ mɛi ni sumɔɔ Nyɔŋmɔ baabɔ? Ani wɔbaaye emlai ni nilee yɔɔ mli ni tsɔɔ akɛ esumɔɔ wɔ lɛ anɔ? Kɛ́ wɔfee nakai lɛ, wɔhaa anaa akɛ nɔ ni Satan wie akɛ mɔ ko mɔ ko boŋ Nyɔŋmɔ toi lɛ ji amale.—Kanemɔ 1 Korintobii 6:9, 10; 15:33.

Kɛ́ ootao ole enɛ he sane babaoo lɛ, kwɛmɔ wolo nɛɛ ni Yehowa Odasefoi fee lɛ, Mɛni Biblia Lɛ Tsɔɔ Diɛŋtsɛ? yitso 11 lɛ mli.

[Mfoniri ni yɔɔ baafa 16]

Adam kpɛ yiŋ gbonyo

[Mfoniri ni yɔɔ baafa 17]

Nibii ni wɔkpɛɔ wɔyiŋ akɛ wɔbaafee lɛ tsɔɔ kɛji wɔmiisumɔ ni Nyɔŋmɔ afee wɔ-Nɔyelɔ